ಸಾಮಾನ್ಯವಾಗಿ ಅನೇಕರಿಗೆ ಸ್ನಾನ ಮಾಡಿದ ತಕ್ಷಣ ಅಥವಾ ಕಿವಿಯಲ್ಲಿ ತುರಿಕೆ ಉಂಟಾದಾಗ ಹತ್ತಿ ಉಂಡೆಗಳನ್ನು (ಕಾಟನ್ ಬಡ್ಸ್) ಬಳಸಿ ಕಿವಿ ಸ್ವಚ್ಛಗೊಳಿಸುವ ಅಭ್ಯಾಸ ಇರುತ್ತದೆ. ಇದನ್ನು ಸ್ವಚ್ಛತೆಯ ಒಂದು ಭಾಗ ಎಂದು ಭಾವಿಸಿ ದಿನನಿತ್ಯ ಮಾಡುವವರೂ ಇದ್ದಾರೆ. ಆದರೆ ಈ ಹವ್ಯಾಸ ಕಿವಿಯ ಆರೋಗ್ಯಕ್ಕೆ ಎಷ್ಟು ಸುರಕ್ಷಿತ ಎಂಬ ಪ್ರಶ್ನೆಗೆ ಕಿವಿ, ಮೂಗು ಮತ್ತು ಗಂಟಲು (ಇಎನ್‌ಟಿ) ತಜ್ಞರು ಮಹತ್ವದ ಮಾಹಿತಿ ನೀಡಿದ್ದಾರೆ.
ಮುಂಬೈನ ಜೈನೋವಾ ಶಾಲ್ಬಿ ಆಸ್ಪತ್ರೆಯ ಇಎನ್‌ಟಿ ತಜ್ಞರಾದ ಡಾ. ಸಲೋನಿ ರಾಜಗುರು ಅವರ ಪ್ರಕಾರ, ಕಿವಿಯಲ್ಲಿ ಉತ್ಪತ್ತಿಯಾಗುವ ಮೇಣದಂತಹ ದ್ರವ (ಇಯರ್‌ವ್ಯಾಕ್ಸ್) ಕಿವಿಯ ರಕ್ಷಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಇದನ್ನು ಪದೇ ಪದೇ ಸ್ವಚ್ಛಗೊಳಿಸುವುದರಿಂದ ಲಾಭಕ್ಕಿಂತ ನಷ್ಟವೇ ಹೆಚ್ಚು.
ಕಿವಿಯ ಮೇಣ ಏಕೆ ಅಗತ್ಯ?
ವೈದ್ಯಕೀಯ ಭಾಷೆಯಲ್ಲಿ ‘ಸೆರುಮೆನ್’ ಎಂದು ಕರೆಯಲ್ಪಡುವ ಕಿವಿಯ ಮೇಣವನ್ನು ಅನೇಕರು ಕಸ ಅಥವಾ ಕೊಳೆ ಎಂದು ಭಾವಿಸುತ್ತಾರೆ. ಆದರೆ ಇದು ಕಿವಿಯ ರಕ್ಷಣಾ ವ್ಯವಸ್ಥೆಯಾಗಿದೆ. ಕಿವಿಯ ಒಳಗಿನ ಗ್ರಂಥಿಗಳು ಉತ್ಪಾದಿಸುವ ಈ ದ್ರವವು ಹೊರಗಿನ ಧೂಳು, ಕೊಳೆ, ಬ್ಯಾಕ್ಟೀರಿಯಾ ಮತ್ತು ಸಣ್ಣ ಕೀಟಗಳು ಕಿವಿಯ ತಮಟೆಯನ್ನು ತಲುಪದಂತೆ ತಡೆಯುತ್ತದೆ. ಅಷ್ಟೇ ಅಲ್ಲದೆ, ಇದು ಕಿವಿಯ ಒಳಗಿನ ಚರ್ಮವನ್ನು ಮೃದುವಾಗಿಡಲು ನೆರವಾಗುತ್ತದೆ ಹಾಗೂ ಕಿವಿ ಒಣಗುವುದು, ತುರಿಕೆ ಮತ್ತು ಉರಿಯೂತದಂತಹ ಸಮಸ್ಯೆಗಳಿಂದ ರಕ್ಷಿಸುತ್ತದೆ.
ಹತ್ತಿ ಉಂಡೆಗಳನ್ನು ಬಳಸುವುದರಿಂದಾಗುವ ತೊಂದರೆಗಳು
ಕಿವಿಯ ಹೊರಭಾಗದಲ್ಲಿ ಕಾಣಿಸುವ ಮೇಣವನ್ನು ಕಾಟನ್ ಬಡ್ಸ್ ಮೂಲಕ ತೆಗೆಯುವುದು ಸುಲಭ ಎನಿಸಬಹುದು. ಆದರೆ ಈ ಪ್ರಕ್ರಿಯೆಯಲ್ಲಿ ಹತ್ತಿ ಉಂಡೆಯು ಮೇಣವನ್ನು ಕಿವಿಯ ಮತ್ತಷ್ಟು ಒಳಗಡೆಗೆ ತಳ್ಳುತ್ತದೆ. ಇದರಿಂದಾಗಿ ಮೇಣವು ಒಳಗಡೆಯೇ ಗಟ್ಟಿಯಾಗಿ ಸಿಲುಕಿಕೊಳ್ಳುತ್ತದೆ.
ಹೀಗೆ ಕಿವಿಯೊಳಗೆ ವಸ್ತುಗಳನ್ನು ತೂರಿಸುವುದರಿಂದ ಕಿವಿ ನೋವು, ಕೇಳಿ ಬರುವ ಸಾಮರ್ಥ್ಯ ಕಡಿಮೆಯಾಗುವುದು, ಕಿವಿಯಲ್ಲಿ ಸದಾ ಶಬ್ದ ಕೇಳಿಸುವುದು, ತಲೆಸುತ್ತು ಕಾಣಿಸಿಕೊಳ್ಳುವುದು ಅಥವಾ ಕಿವಿಯ ತಮಟೆಗೆ ಹಾನಿಯಾಗುವ ಸಾಧ್ಯತೆ ಇರುತ್ತದೆ. ಕೆಲವು ಸಂದರ್ಭಗಳಲ್ಲಿ ಕಿವಿಯ ತಮಟೆಗೆ ತೂತಾಗುವ ಅಪಾಯವೂ ಇರುತ್ತದೆ ಎಂದು ವೈದ್ಯರು ಎಚ್ಚರಿಸಿದ್ದಾರೆ.
ಕಿವಿ ಸ್ವಚ್ಛಗೊಳಿಸಲು ಸರಿಯಾದ ವಿಧಾನ ಯಾವುದು?
ಕಿವಿಯನ್ನು ಸ್ವಚ್ಛವಾಗಿಡಲು ಅದರ ಒಳಗಡೆ ಯಾವುದೇ ವಸ್ತುಗಳನ್ನು ಹಾಕುವ ಅಗತ್ಯವಿಲ್ಲ. ಕಾಟನ್ ಬಡ್ಸ್ ಮಾತ್ರವಲ್ಲದೆ ಹೇರ್ ಪಿನ್, ಕೀಲಿ ಕೈಗಳಂತಹ ಚೂಪಾದ ವಸ್ತುಗಳನ್ನು ಕಿವಿಯೊಳಗೆ ಎಂದಿಗೂ ಬಳಸಬಾರದು. ಕಿವಿಯ ಹೊರಭಾಗವನ್ನು ಮಾತ್ರ ಮೃದುವಾದ, ಹಸಿ ಬಟ್ಟೆಯಿಂದ ನಿಧಾನವಾಗಿ ಒರೆಸಿಕೊಳ್ಳಬೇಕು.
ಒಂದು ವೇಳೆ ಕಿವಿಯಲ್ಲಿ ನೋವು, ಕೀವು ಸೋರುವುದು, ಕೇಳಿಸದಿರುವುದು ಅಥವಾ ಕಿವಿ ಮುಚ್ಚಿಕೊಂಡಂತಾಗುವ ಲಕ್ಷಣಗಳು ಕಂಡುಬಂದಲ್ಲಿ ತಾವಾಗಿಯೇ ಸ್ವಚ್ಛಗೊಳಿಸಲು ಪ್ರಯತ್ನಿಸದೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಿ ಚಿಕಿತ್ಸೆ ಪಡೆಯುವುದು ಸೂಕ್ತ.
