ಸಂಜೆ ವೇಳೆ ಬಿಸಿಬಿಸಿಯಾಗಿ, ಖಾರ ಹಾಗೂ ಹುಳಿ-ಸಿಹಿಯಾದ ಚಾಟ್ ತಿನ್ನಬೇಕು ಎನಿಸಿದರೆ ಕೇವಲ ಬೇಕರಿ ಅಥವಾ ಚಾಟ್ ಸೆಂಟರ್ಗೆ ಹೋಗಬೇಕಾಗಿಲ್ಲ. ಮನೆಯಲ್ಲಿಯೇ ಸಿಗುವ ಪದಾರ್ಥಗಳನ್ನು ಬಳಸಿ ಕಟಬಾಜಾರ್ ಶೈಲಿಯಲ್ಲಿ ಅತ್ಯಂತ ರುಚಿಕರವಾದ ‘ಛೋಲೆ ಸಮೋಸಾ ಚಾಟ್’ ತಯಾರಿಸಬಹುದು. ಗರಿಗರಿಯಾದ ಸಮೋಸಾ, ಮಸಾಲೆಯುಕ್ತ ಛೋಲೆ ಗ್ರೇವಿ ಮತ್ತು ಮೊಸರು-ಚಟ್ನಿಗಳ ಮಿಶ್ರಣದೊಂದಿಗೆ ನಾಲಿಗೆಗೆ ಹೊಸ ರುಚಿ ನೀಡುವ ಈ ಚಾಟ್ ರೆಸಿಪಿ ಇಲ್ಲಿದೆ.
ಬೇಕಾಗುವ ಪದಾರ್ಥಗಳು:
- ಛೋಲೆ ಮಸಾಲ ಕರಿ (ಬೇಯಿಸಿದ ಕಾಬೂಲ್ ಕಡಲೆ ಗ್ರೇವಿ) – ಅಗತ್ಯಕ್ಕೆ ತಕ್ಕಷ್ಟು
- ಮೈದಾ ಹಿಟ್ಟು – ಒಂದೂವರೆ ಕಪ್
- ಬೇಯಿಸಿ ಪುಡಿ ಮಾಡಿದ ಆಲೂಗಡ್ಡೆ – 2 ರಿಂದ 3
- ಚಾಟ್ ಮಸಾಲಾ – ಅರ್ಧ ಚಮಚ
- ಅಚ್ಚಖಾರದ ಪುಡಿ – ಅರ್ಧ ಚಮಚ
- ಜೀರಿಗೆ ಪುಡಿ – ಅರ್ಧ ಚಮಚ
- ಗರಂ ಮಸಾಲಾ – ಅರ್ಧ ಚಮಚ
- ಪುದೀನಾ ಚಟ್ನಿ – 1 ಚಮಚ
- ಹುಣಿಸೇಹಣ್ಣಿನ ಸಿಹಿ ಚಟ್ನಿ – 1 ಚಮಚ
- ಗಟ್ಟಿ ಮೊಸರು – 2 ಚಮಚ
- ಓಂಪುಡಿ (ಸೇವ್) – 1 ಚಮಚ
- ದಾಳಿಂಬೆ ಕಾಳುಗಳು – 1 ಚಮಚ
- ಕೊತ್ತಂಬರಿ ಸೊಪ್ಪು – 1 ಚಮಚ
- ಉಪ್ಪು ಮತ್ತು ಎಣ್ಣೆ – ರುಚಿಗೆ ಹಾಗೂ ಕರಿಯಲು ಅಗತ್ಯವಿರುವಷ್ಟು
ತಯಾರಿಸುವ ವಿಧಾನ:
- ಮೊದಲಿಗೆ ಒಂದು ಪಾತ್ರೆಯಲ್ಲಿ ಮೈದಾ ಹಿಟ್ಟಿಗೆ ಸ್ವಲ್ಪ ಉಪ್ಪು ಮತ್ತು ನೀರು ಸೇರಿಸಿ, ಚಪಾತಿ ಹಿಟ್ಟಿನ ಹದಕ್ಕೆ ಚೆನ್ನಾಗಿ ನಾದಿ ಪಕ್ಕಕ್ಕೆ ಎತ್ತಿಟ್ಟುಕೊಳ್ಳಿ.
- ಸಮೋಸಾದ ಒಳಗಿನ ಹೂರಣ (ಸ್ಟಫಿಂಗ್) ತಯಾರಿಸಲು, ಬೇಯಿಸಿದ ಆಲೂಗಡ್ಡೆ ಪುಡಿಗೆ ಚಾಟ್ ಮಸಾಲಾ, ಖಾರದ ಪುಡಿ, ಜೀರಿಗೆ ಪುಡಿ, ಗರಂ ಮಸಾಲಾ ಮತ್ತು ಉಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
- ಈಗ ಕಲಸಿಟ್ಟ ಮೈದಾ ಹಿಟ್ಟಿನಿಂದ ಸಣ್ಣ ಉಂಡೆಗಳನ್ನು ತೆಗೆದುಕೊಂಡು ಲಟ್ಟಿಸಿ, ಅದನ್ನು ಮಧ್ಯಕ್ಕೆ ಕತ್ತರಿಸಿ ಕೋನ್ ಆಕಾರ ಮಾಡಿ. ಅದರೊಳಗೆ ಸಿದ್ಧಪಡಿಸಿದ ಆಲೂಗಡ್ಡೆ ಮಿಶ್ರಣವನ್ನು ತುಂಬಿ ಸಮೋಸಾ ಆಕಾರಕ್ಕೆ ಮಡಚಿ.
- ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ, ಸಿದ್ಧಪಡಿಸಿದ ಸಮೋಸಾಗಳನ್ನು ಹಾಕಿ ಹೊಂಬಣ್ಣ ಬರುವವರೆಗೆ ಎರಡೂ ಬದಿಯಲ್ಲಿ ಗರಿಗರಿಯಾಗಿ ಡೀಪ್ ಫ್ರೈ ಮಾಡಿ.
- ಚಾಟ್ ಪ್ಲೇಟ್ ಸಿದ್ಧಪಡಿಸಲು, ಮೊದಲು ಕರಿದ ಸಮೋಸಾವನ್ನು ಕೈಯಿಂದ ಲಘುವಾಗಿ ಪುಡಿ ಮಾಡಿ ಪ್ಲೇಟ್ನಲ್ಲಿ ಇಡಿ. ಅದರ ಮೇಲೆ ಬಿಸಿಬಿಸಿಯಾದ ಛೋಲೆ ಕರಿಯನ್ನು ಸುರಿಯಿರಿ.
- ನಂತರ ಇದರ ಮೇಲೆ ಗಟ್ಟಿ ಮೊಸರು, ಪುದೀನಾ ಚಟ್ನಿ ಮತ್ತು ಹುಣಿಸೇಹಣ್ಣಿನ ಸಿಹಿ ಚಟ್ನಿಯನ್ನು ಒಂದೊಂದಾಗಿ ಹಾಕಿ. ಕೊನೆಯಲ್ಲಿ ಓಂಪುಡಿ (ಸೇವ್), ದಾಳಿಂಬೆ ಕಾಳು ಹಾಗೂ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಬಾಯಲ್ಲಿ ನೀರೂರಿಸುವ ಛೋಲೆ ಸಮೋಸಾ ಚಾಟ್ ಸವಿಯಲು ಸಿದ್ಧ.
