ಚೆನ್ನೈ: ಭಾರತದಲ್ಲಿ ಮದುವೆಯ ವಿಚಾರ ಬಂದಾಗ ವಯಸ್ಸು ಮತ್ತು ಸಮಯದ ಬಗ್ಗೆ ಕುಟುಂಬದಲ್ಲಿ ದೊಡ್ಡ ಚರ್ಚೆಗಳೇ ನಡೆಯುತ್ತವೆ. ಎಷ್ಟೇ ಪ್ರಯತ್ನಿಸಿದರೂ ಕಂಕಣ ಭಾಗ್ಯ ಕೂಡಿಬರದಿದ್ದಾಗ ಅನೇಕರು ದೈವದ ಮೊರೆ ಹೋಗುವುದು ಸಹಜ. ಅಂತಹ ನಂಬಿಕೆಯ ಕೇಂದ್ರಗಳಲ್ಲಿ ಒಂದು ತಮಿಳುನಾಡಿನ ಚೆನ್ನೈ ಸಮೀಪವಿರುವ ‘ನಿತ್ಯಕಲ್ಯಾಣ ಪೆರುಮಾಳ್’ ದೇವಾಲಯ. ಇಲ್ಲಿ ಪ್ರಾರ್ಥನೆ ಸಲ್ಲಿಸಿದರೆ ಮದುವೆಯ ಅಡೆತಡೆಗಳು ನಿವಾರಣೆಯಾಗುತ್ತವೆ ಎಂಬ ಬಲವಾದ ನಂಬಿಕೆ ಭಕ್ತರಲ್ಲಿದೆ.
ದಿನವೂ ಮದುವೆ ನಡೆಯುವ ಪುರಾಣ ಕಥೆ ಈ ದೇವಾಲಯವು ವಿಷ್ಣುವಿನ ವರಾಹ ಅವತಾರಕ್ಕೆ ಸಮರ್ಪಿತವಾಗಿದೆ. ಪುರಾಣಗಳ ಪ್ರಕಾರ, ಕಾಲವ ಎಂಬ ಋಷಿಗೆ 360 ಮಂದಿ ಪುತ್ರಿಯರಿದ್ದರು. ವಿಷ್ಣುವು ದಿನಕ್ಕೊಬ್ಬರಂತೆ ವರ್ಷವಿಡೀ ಈ 360 ಕನ್ಯೆಯರನ್ನು ಮದುವೆಯಾದ ಎಂಬ ನಂಬಿಕೆಯಿದೆ. ಹೀಗಾಗಿಯೇ ಇಲ್ಲಿನ ದೇವರಿಗೆ ‘ನಿತ್ಯಕಲ್ಯಾಣ ಪೆರುಮಾಳ್’ (ದಿನವೂ ಮದುವೆ ಮಾಡಿಕೊಳ್ಳುವ ದೇವರು) ಎಂಬ ಹೆಸರು ಬಂದಿದೆ. ವಿವಾಹ ವಿಳಂಬ, ಗೊಂದಲ ಅಥವಾ ಮಾನಸಿಕ ಅಡೆತಡೆಗಳನ್ನು ಎದುರಿಸುತ್ತಿರುವವರು ಇಲ್ಲಿಗೆ ಬಂದು ಪ್ರಾರ್ಥಿಸಿದರೆ ಶೀಘ್ರವೇ ಕಂಕಣ ಭಾಗ್ಯ ಕೂಡಿಬರುತ್ತದೆ ಎನ್ನಲಾಗುತ್ತದೆ.
ಹೂವಿನ ಹಾರದ ವಿಶೇಷ ಹರಕೆ ಇಲ್ಲಿನ ಪೂಜಾ ವಿಧಿವಿಧಾನಗಳು ತುಂಬಾ ಸರಳ ಮತ್ತು ಅರ್ಥಪೂರ್ಣವಾಗಿವೆ. ಭಕ್ತರು ಎರಡು ಹೂವಿನ ಹಾರಗಳನ್ನು ದೇವರಿಗೆ ಅರ್ಪಿಸುತ್ತಾರೆ. ಅರ್ಚಕರು ಅದರಲ್ಲಿ ಒಂದು ಹಾರವನ್ನು ಪ್ರಸಾದವಾಗಿ ಮರಳಿ ನೀಡುತ್ತಾರೆ. ಭಕ್ತರು ಆ ಹಾರವನ್ನು ಧರಿಸಿ ದೇವಾಲಯಕ್ಕೆ ಪ್ರದಕ್ಷಿಣೆ ಹಾಕಬೇಕು. ನಂತರ ಆ ಹಾರವನ್ನು ಮನೆಗೆ ಕೊಂಡೊಯ್ದು ಒಣಗಿಸಿ ಜಾಗರೂಕತೆಯಿಂದ ಇಡಬೇಕು. ಮದುವೆ ನಿಶ್ಚಯವಾದ ನಂತರ ದಂಪತಿಗಳು ಮತ್ತೆ ಈ ದೇವಾಲಯಕ್ಕೆ ಬಂದು ಕೃತಜ್ಞತೆ ಸಲ್ಲಿಸುವುದರೊಂದಿಗೆ ಹರಕೆ ಪೂರ್ಣಗೊಳ್ಳುತ್ತದೆ.
ಇತಿಹಾಸ ಮತ್ತು ವಾಸ್ತುಶಿಲ್ಪದ ಸೊಬಗು ಸುಮಾರು 7ನೇ ಶತಮಾನದ ಪಲ್ಲವರ ಕಾಲದಲ್ಲಿ ನಿರ್ಮಾಣವಾದ ಈ ದೇವಾಲಯವು ಚೋಳರ ಕಾಲದ ಶಾಸನಗಳನ್ನು ಹೊಂದಿದೆ. ಇದು ವೈಷ್ಣವ ಸಂಪ್ರದಾಯದ 108 ದಿವ್ಯ ದೇಶಗಳಲ್ಲಿ ಒಂದಾಗಿದೆ. ಇಲ್ಲಿನ ವರಾಹ ಸ್ವಾಮಿಯ ಏಳು ಅಡಿ ಎತ್ತರದ ಗ್ರಾನೈಟ್ ವಿಗ್ರಹವು ಭೂದೇವಿಯನ್ನು ತನ್ನ ತೊಡೆಯ ಮೇಲೆ ಕುರಿಸಿಕೊಂಡಿರುವ ಅಪರೂಪದ ಭಂಗಿಯಲ್ಲಿದೆ. ಇದು ರಕ್ಷಣೆ ಮತ್ತು ಬದ್ಧತೆಯ ಸಂಕೇತವಾಗಿದೆ. ಇಲ್ಲಿನ ಶಾಂತಿಯುತ ಪರಿಸರವು ಭಕ್ತರಿಗೆ ಕೇವಲ ಆಶೀರ್ವಾದ ಮಾತ್ರವಲ್ಲದೆ, ನೆಮ್ಮದಿಯನ್ನು ನೀಡುತ್ತದೆ.
ಮದುವೆಯಾಗದವರಿಗೆ ಅಥವಾ ಸರಿಯಾದ ಜೀವನ ಸಂಗಾತಿಗಾಗಿ ಕಾಯುತ್ತಿರುವವರಿಗೆ, ಈ ದೇವಾಲಯವು ಕೇವಲ ಪವಾಡದ ನಿರೀಕ್ಷೆಯಲ್ಲ, ಬದಲಿಗೆ ಭರವಸೆಯ ಬೆಳಕಾಗಿ ಕಾಣುತ್ತಿದೆ.
