ಬೆಂಗಳೂರು- ನಂಜನಗೂಡು ರಸ್ತೆ ಅಥವಾ ಹೆಬ್ಬಾಳ ಭಾಗದ ಪ್ರಮುಖ ರೆಸ್ಟೋರೆಂಟ್‌ಗಳು ಹಾಗೂ ಕ್ಲಬ್‌ಗಳ ವಿರುದ್ಧ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ತೀವ್ರ ತಪಾಸಣೆ ಮುಂದುವರಿಸಿದೆ.
ಇದರ ಭಾಗವಾಗಿ, ರಾಜಧಾನಿಯ ಪ್ರತಿಷ್ಠಿತ ‘ಚೇರ್‌ಮನ್ಸ್ ಕ್ಲಬ್’ (Chairman’s Club) ಅಡುಗೆಮನೆಯಲ್ಲಿ ತೀವ್ರ ಅಶುಚಿತ್ವ ಮತ್ತು ಅವಧಿ ಮುಗಿದ (Expired) ಆಹಾರ ಪದಾರ್ಥಗಳನ್ನು ಬಳಕೆ ಮಾಡುತ್ತಿರುವುದು ತಪಾಸಣೆ ವೇಳೆ ಪತ್ತೆಯಾಗಿದ್ದು, ಕೂಡಲೇ ಅಡುಗೆಮನೆಯನ್ನು ಮುಚ್ಚಿಸಿ ಅಧಿಕಾರಿಗಳು ಆದೇಶ ಹೊರಡಿಸಿದ್ದಾರೆ.
ಪರಿಶೀಲನೆ ಪ್ರಕ್ರಿಯೆ ಮತ್ತು ಫಲಿತಾಂಶ
ಆಹಾರ ಸುರಕ್ಷತಾ ಇಲಾಖೆಯು ನಗರದ ಹೋಟೆಲ್‌ಗಳು ಮತ್ತು ಕ್ಲಬ್‌ಗಳ ಅಡುಗೆ ಮನೆಗಳ ಮೇಲೆ ಇತ್ತೀಚೆಗೆ ನಡೆಸುತ್ತಿರುವ ಕಾರ್ಯಾಚರಣೆಯ ಮುಂದುವರಿದ ಭಾಗವಾಗಿ ಚೇರ್‌ಮನ್ಸ್ ಕ್ಲಬ್‌ಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿತು. ಈ ವೇಳೆ ಅಡುಗೆ ಮನೆಯಲ್ಲಿ ಕಂಡುಬಂದ ದೃಶ್ಯಗಳು ಗ್ರಾಹಕರಲ್ಲಿ ತೀವ್ರ ಆತಂಕ ಮೂಡಿಸುವಂತಿತ್ತು:
ಅಡುಗೆ ಕೋಣೆಯ ಗೋಡೆಗಳು ಮತ್ತು ನೆಲದ ಮೇಲೆ ಜಿಡ್ಡುಗಟ್ಟಿದ ಕೊಳೆ ಹಾಗೂ ನೊಣಗಳ ಹಾವಳಿ ಹೆಚ್ಚಾಗಿತ್ತು.ಗ್ರಾಹಕರಿಗೆ ಪೂರೈಸಲು ಇರಿಸಲಾಗಿದ್ದ ಮಾಂಸ ಮತ್ತು ತರಕಾರಿಗಳು ಕೊಳೆತ ಸ್ಥಿತಿಯಲ್ಲಿರುವುದು ಪತ್ತೆಯಾಗಿದೆ.
ಯಾವುದೇ ಲೇಬಲ್ ಇಲ್ಲದ ಮತ್ತು ಅವಧಿ ಮುಗಿದ (Expired) ದಿನಸಿ ಸಾಮಾಗ್ರಿಗಳು ಹಾಗೂ ಸಾಸ್‌ಗಳನ್ನು ಅಡುಗೆಗೆ ಬಳಸುತ್ತಿರುವುದು ಕಂಡುಬಂದಿದೆ.
ಆಹಾರ ತಯಾರಿಸುವ ಸಿಬ್ಬಂದಿ ಯಾವುದೇ ಮುನ್ನೆಚ್ಚರಿಕೆ ಕ್ರಮಗಳನ್ನು (ಗ್ಲೌಸ್, ಕ್ಯಾಪ್) ಧರಿಸಿರಲಿಲ್ಲ.
ಹಿಂದಿನ ಘಟನೆಗಳು ಮತ್ತು ಅಧಿಕಾರಿಗಳ ಕ್ರಮಗಳು
ಬೆಂಗಳೂರಿನಲ್ಲಿ ಕಳಪೆ ಗುಣಮಟ್ಟದ ಆಹಾರ ಮತ್ತು ನೈರ್ಮಲ್ಯ ಕೊರತೆಯಿಂದಾಗಿ ಹೋಟೆಲ್ ಹಾಗೂ ಕ್ಲಬ್‌ಗಳ ಅಡುಗೆಮನೆಗಳನ್ನು ಮುಚ್ಚಿಸುತ್ತಿರುವ ಪ್ರಕರಣಗಳು ಇತ್ತೀಚೆಗೆ ಹೆಚ್ಚುತ್ತಿವೆ. ಕಳೆದ ಕೆಲ ತಿಂಗಳುಗಳಿಂದ FSSAI ಹಾಗೂ ಬಿಬಿಎಂಪಿ (BBMP) ಜಂಟಿ ಕಾರ್ಯಾಚರಣೆ ನಡೆಸಿ, ನಿಯಮ ಉಲ್ಲಂಘಿಸುವ ದೊಡ್ಡ ಮಟ್ಟದ ಹೋಟೆಲ್‌ಗಳ ಮೇಲೂ ಮುದಾಲು ಕ್ರಮ ಜರುಗಿಸುತ್ತಿದೆ. ಗ್ರಾಹಕರ ಆರೋಗ್ಯದ ಜತೆ ಚೆಲ್ಲಾಟವಾಡುವ ಇಂತಹ ಸಂಸ್ಥೆಗಳ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮ ಕೈಗೊಳ್ಳಲಾಗುವುದು ಎಂದು ಇಲಾಖೆ ಎಚ್ಚರಿಕೆ ನೀಡಿದೆ.
ಈ ಘಟನೆಯ ಹಿನ್ನೆಲೆಯಲ್ಲಿ ಚೇರ್‌ಮನ್ಸ್ ಕ್ಲಬ್‌ನ ಅಡುಗೆಮನೆಯ ಪರವಾನಗಿಯನ್ನು ತಾತ್ಕಾಲಿಕವಾಗಿ ಅಮಾನತುಗೊಳಿಸಲಾಗಿದ್ದು, ಸಂಪೂರ್ಣವಾಗಿ ನೈರ್ಮಲ್ಯ ಕಾಪಾಡಿಕೊಂಡು, ಆಹಾರ ಸುರಕ್ಷತಾ ಮಾನದಂಡಗಳನ್ನು ಕಡ್ಡಾಯವಾಗಿ ಪಾಲಿಸಿದ ಬಳಿಕವಷ್ಟೇ ಮುಂದಿನ ಅನುಮತಿ ನೀಡಲಾಗುವುದು ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
ಆಗಸ್ಟ್‌ನಲ್ಲಿ ನಗರದ ಹಲವು ಪ್ರಮುಖ ಹೋಟೆಲ್‌ಗಳಲ್ಲಿ ನಡೆದ ತಪಾಸಣೆ ವೇಳೆ ಅವಧಿ ಮೀರಿದ ಹಾಲು, ಕೊಳೆತ ಮಾಂಸ, ಶಿಲೀಂಧ್ರ ಹಿಡಿದ ತರಕಾರಿಗಳು ಹಾಗೂ ಅಸಮರ್ಪಕವಾಗಿ ಸಂಗ್ರಹಿಸಿದ ಆಹಾರ ಪತ್ತೆಯಾಗಿತ್ತು. ನಂತರದ ಕಾರ್ಯಾಚರಣೆಯಲ್ಲಿ ವಿವಿಧ ಹೋಟೆಲ್‌ಗಳು ಮತ್ತು ಪಬ್‌ಗಳಿಂದ ಒಟ್ಟು 132 ಕೆ.ಜಿ. ಆಹಾರ ಪದಾರ್ಥ ಹಾಗೂ 15 ಲೀಟರ್ ಬಳಕೆಯ ಅಡುಗೆ ಎಣ್ಣೆ ವಶಪಡಿಸಿಕೊಂಡು/ನಾಶಪಡಿಸಲಾಗಿತ್ತು.
ಇದೇ ಅವಧಿಯಲ್ಲಿ ನಗರದ ಪ್ರತಿಷ್ಠಿತ ಕ್ಲಬ್‌ಗಳ ಅಡುಗೆಮನೆಗಳ ಮೇಲೂ ಅಧಿಕಾರಿಗಳು ಕಣ್ಣಿಟ್ಟಿದ್ದರು. ಕೆಲವು ಕ್ಲಬ್‌ಗಳಲ್ಲಿ ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಆಹಾರವನ್ನು ಒಟ್ಟಿಗೆ ಸಂಗ್ರಹಿಸಿರುವುದು ಸೇರಿದಂತೆ ಆಹಾರ ನಿರ್ವಹಣೆಯಲ್ಲಿನ ಹಲವು ಲೋಪಗಳು ಬೆಳಕಿಗೆ ಬಂದಿದ್ದವು.
ಆಗಸ್ಟ್ 12ರಂದು ಕರ್ನಾಟಕ ಆರೋಗ್ಯ ಇಲಾಖೆಯ ಸ್ವಂತ ಆವರಣದಲ್ಲಿರುವ ಅಡುಗೆಮನೆಯ ಮೇಲೆಯೇ ನಡೆದ ತಪಾಸಣೆಯಲ್ಲಿ ಅವಧಿ ಮೀರಿದ ಆಹಾರ ಪದಾರ್ಥಗಳು ಹಾಗೂ ಕೀಟ ನಿಯಂತ್ರಣದ ಕೊರತೆ ಪತ್ತೆಯಾಗಿದ್ದು, ಆಹಾರ ಸುರಕ್ಷತಾ ನಿಯಮಗಳು ಎಲ್ಲರಿಗೂ ಸಮಾನವಾಗಿ ಅನ್ವಯಿಸಬೇಕು ಎಂಬ ಚರ್ಚೆಗೂ ಕಾರಣವಾಗಿತ್ತು.
ಅಹರ ಸುರಕ್ಷತೆ ಕ್ರಮಗಳು
ಎಚ್ಚರಿಕೆಯ ಗಂಟೆ
ಆಹಾರ ಸುರಕ್ಷತೆಯ ವಿಚಾರದಲ್ಲಿ ಕರ್ನಾಟಕದಲ್ಲಿ ಅಧಿಕಾರಿಗಳ ಕ್ರಮ ಇತ್ತೀಚೆಗೆ ಮತ್ತಷ್ಟು ಕಠಿಣಗೊಂಡಿರುವುದು ಗಮನಾರ್ಹ. ಆಗಸ್ಟ್ 31ರಂದು ರಾಜ್ಯದ ವಿವಿಧ ಸಿಹಿ ತಯಾರಿಕಾ ಘಟಕಗಳ ಮೇಲೆ ನಡೆದ ವಿಶೇಷ ತಪಾಸಣೆಯಲ್ಲಿ ಸುಮಾರು ₹5.99 ಲಕ್ಷ ಮೌಲ್ಯದ ಆಹಾರ ಉತ್ಪನ್ನಗಳನ್ನು ವಶಪಡಿಸಿಕೊಳ್ಳಲಾಗಿತ್ತು. ಅವಧಿ ಮೀರಿದ ಮತ್ತು ಸರಿಯಾದ ಲೇಬಲ್ ಇಲ್ಲದ ಉತ್ಪನ್ನಗಳೂ ಇದರಲ್ಲಿ ಸೇರಿದ್ದವು.
ಅದೇ ರೀತಿ, ರಾಜ್ಯದ ವೈದ್ಯಕೀಯ ಕಾಲೇಜುಗಳ ಹಾಸ್ಟೆಲ್‌ಗಳ ಐದು ಕ್ಯಾಂಟೀನ್‌ಗಳಲ್ಲಿ ಇತ್ತೀಚೆಗೆ ನಡೆದ ತಪಾಸಣೆಯಲ್ಲಿ ಅವಧಿ ಮೀರಿದ ರವಾ ಮತ್ತು ಹಾಲು ಸೇರಿದಂತೆ ಹಲವು ಲೋಪಗಳು ಪತ್ತೆಯಾಗಿ ನೋಟಿಸ್ ನೀಡಲಾಗಿತ್ತು.
ದೈಹಿಕ ಆರೋಗ್ಯ ಮತ್ತು ಆಹಾರ ನಿಯಮಗಳು
ಗ್ರಾಹಕರ ಆರೋಗ್ಯವೇ ಕೇಂದ್ರಬಿಂದು
ಆಹಾರ ತಯಾರಿಸುವ ಸ್ಥಳದ ಸ್ವಚ್ಛತೆ, ಕಚ್ಚಾ ವಸ್ತುಗಳ ಗುಣಮಟ್ಟ, ಅವಧಿ ಪರಿಶೀಲನೆ, ಸರಿಯಾದ ಲೇಬಲಿಂಗ್, ಸಸ್ಯಾಹಾರಿ–ಮಾಂಸಾಹಾರಿ ಆಹಾರದ ಪ್ರತ್ಯೇಕ ಸಂಗ್ರಹಣೆ ಹಾಗೂ ಅನುಮೋದಿತ ಆಹಾರ ಬಣ್ಣಗಳ ಬಳಕೆ ಇವೆಲ್ಲವೂ ಸಾರ್ವಜನಿಕ ಆರೋಗ್ಯದೊಂದಿಗೆ ನೇರವಾಗಿ ಸಂಬಂಧ ಹೊಂದಿವೆ.
ಚೇರ್‌ಮನ್ಸ್ ಕ್ಲಬ್ ಅಡುಗೆಮನೆಯಲ್ಲಿ ಪತ್ತೆಯಾದ 40 ಕೆ.ಜಿ. ಅವಧಿ ಮೀರಿದ ಮೆಣಸಿನಕಾಯಿ ಸೇರಿದಂತೆ ಇತರ ಉಲ್ಲಂಘನೆಗಳು, ಆಹಾರ ಸುರಕ್ಷತಾ ನಿಯಮಗಳನ್ನು ಕೇವಲ ಕಾಗದದ ಮೇಲಿನ ನಿಯಮಗಳಾಗಿ ನೋಡದೆ ಪ್ರತಿಯೊಂದು ಹಂತದಲ್ಲೂ ಕಟ್ಟುನಿಟ್ಟಾಗಿ ಪಾಲಿಸುವ ಅಗತ್ಯವನ್ನು ಮತ್ತೊಮ್ಮೆ ಎತ್ತಿ ತೋರಿಸಿವೆ.
