ಏಟಾ (ಉತ್ತರ ಪ್ರದೇಶ): ಉತ್ತರ ಪ್ರದೇಶದ ಏಟಾ ಜಿಲ್ಲೆಯಲ್ಲಿ ನಡುರಸ್ತೆಯಲ್ಲೇ ಒಂಟಿ ಮಹಿಳೆಯನ್ನು ಟಾರ್ಗೆಟ್ ಮಾಡಿದ ಖದೀಮರಿಗೆ ಸರಿಯಾದ ಪಾಠ ಸಿಕ್ಕಿದೆ. ಬೈಕ್‌ನಲ್ಲಿ ಬಂದ ಇಬ್ಬರು ಸಶಸ್ತ್ರ ಸರಗಳ್ಳರ ವಿರುದ್ಧ 45 ವರ್ಷದ ಮಹಿಳೆಯೊಬ್ಬರು ಧೃತಿಗೆಡದೆ ಬರೋಬ್ಬರಿ 23 ನಿಮಿಷಗಳ ಕಾಲ ಸಿಂಹಿಣಿಯಂತೆ ಹೋರಾಡಿ ತಮ್ಮ ಒಡವೆ ಹಾಗೂ ಬ್ಯಾಗ್ ಅನ್ನು ಉಳಿಸಿಕೊಂಡಿದ್ದಾರೆ ಈ ಜಿದ್ದಾಜಿದ್ದಿನ ಹೋರಾಟದ ಸಿಸಿಟಿವಿ ದೃಶ್ಯಾವಳಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆದ ಬೆನ್ನಲ್ಲೇ ಆಕ್ಷನ್‌ಗೆ ಇಳಿದ ಯುಪಿ ಪೊಲೀಸರು, ಶನಿವಾರ ಮುಂಜಾನೆ ನಡೆದ ಭೀಕರ ಎನ್‌ಕೌಂಟರ್‌ನಲ್ಲಿ ಇಬ್ಬರೂ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ನಡೆದಿದ್ದೇನು? ಚರಂಡಿಗೆ ತಳ್ಳಿದರೂ ಬಿಡದ ಪ್ರತಿರೋಧ
ಮೇ 6 ರಂದು ರಾತ್ರಿ ಏಟಾ ಜಿಲ್ಲೆಯ ಜೈಥ್ರಾ ಎಂಬ ಪ್ರದೇಶದಲ್ಲಿ ಈ ರೋಮಾಂಚಕ ಘಟನೆ ನಡೆದಿದೆ. ಸಂತ್ರಸ್ತ ಮಹಿಳೆಯನ್ನು ಅನಿತಾ ದೇವಿ ಎಂದು ಗುರುತಿಸಲಾಗಿದೆ. ಅವರು ರಾತ್ರಿ ವೇಳೆ ಕೆಲಸ ಮುಗಿಸಿ ಮನೆಗೆ ಮರಳುತ್ತಿದ್ದಾಗ ಬೈಕ್‌ನಲ್ಲಿ ಬಂದ ಇಬ್ಬರು ದುಷ್ಕರ್ಮಿಗಳು ಅವರ ಬ್ಯಾಗ್ ಹಾಗೂ ಚಿನ್ನದ ಸರವನ್ನು ಕಸಿಯಲು ಯತ್ನಿಸಿದ್ದಾರೆ.
ಆದರೆ, ಕಳ್ಳರಿಗೆ ಶರಣಾಗದ ಅನಿತಾ ದೇವಿ ಸತತವಾಗಿ ಪ್ರತಿರೋಧ ಒಡ್ಡಿದ್ದಾರೆ. ಈ ವೇಳೆ ದರೋಡೆಕೋರರು ಅವರಿಗೆ ಮನಬಂದಂತೆ ಥಳಿಸಿ, ರಸ್ತೆಯಲ್ಲಿ ಎಳೆದೊಯ್ದು, ಹತ್ತಿರದ ಚರಂಡಿಗೂ ತಳ್ಳಿದ್ದಾರೆ. ಆದರೂ ತಮ್ಮ ಒಡವೆ ಮತ್ತು ಬ್ಯಾಗ್ ಅನ್ನು ಬಿಟ್ಟುಕೊಡದೆ ಅವರು ಜೋರಾಗಿ ಕಿರುಚಾಡುತ್ತಾ ಕಳ್ಳರ ಜೊತೆ ಫೈಟ್ ಮಾಡಿದ್ದಾರೆ. ಮಹಿಳೆಯ ಕಿರುಚಾಟ ಕೇಳಿ ಸ್ಥಳೀಯ ನಿವಾಸಿಗಳು ಅತ್ತ ಧಾವಿಸಲು ಆರಂಭಿಸುತ್ತಿದ್ದಂತೆ, ಸಿಕ್ಕಿಬೀಳುವ ಭೀತಿಯಿಂದ ಕಳ್ಳರು ಅಲ್ಲಿಂದ ಕಾಲ್ಕಿತ್ತಿದ್ದಾರೆ.
ಸಾರ್ವಜನಿಕ ಸುರಕ್ಷತೆ ಮತ್ತು ಜಾಗೃತಿ ಬಗ್ಗೆ ಚರ್ಚೆ
ಈ ಘಟನೆಯು ಉತ್ತರ ಪ್ರದೇಶದಲ್ಲಿ ಹೆಚ್ಚಾಗುತ್ತಿರುವ ರಸ್ತೆ ಬದಿಯ ಅಪರಾಧಗಳು ಮತ್ತು ಬೈಕ್ ಸವಾರರ ಸರಗಳ್ಳತನದ ದೆಸೆಯನ್ನು ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ. ಮಹಿಳೆಯರು ಮತ್ತು ಪಾದಚಾರಿಗಳ ಸುರಕ್ಷತೆ ಬಗ್ಗೆ ಆತಂಕ ವ್ಯಕ್ತವಾಗುತ್ತಿರುವುದರ ಜೊತೆಗೆ, ಅಪರಾಧಗಳು ನಡೆಯುವಾಗ ಸಾರ್ವಜನಿಕರು ತಕ್ಷಣವೇ ಮಧ್ಯಪ್ರವೇಶಿಸಿ ಸಹಾಯ ಮಾಡಬೇಕಾದ ಅನಿವಾರ್ಯತೆಯ ಕುರಿತೂ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗಳು ಆರಂಭವಾಗಿವೆ.
