ಸಾಮಾಜಿಕ ಮಾಧ್ಯಮದಲ್ಲಿ ಜನಪ್ರಿಯತೆ ಗಳಿಸಲು ಹಲವು ರೀತಿಯ ವಿಡಿಯೋಗಳನ್ನು ಮಾಡಲಾಗುತ್ತದೆ. ಇಂತಹುದೇ ಒಂದು ಪ್ರಯತ್ನದಲ್ಲಿ ಫಿಲಿಪೈನ್ಸ್‌ನ ಒಬ್ಬ ಹುಡುಗ ತನ್ನ ತುಟಿಗಳಿಗೆ ಸೂಪರ್‌ಗ್ಲು ಅಂಟಿಸಿಕೊಂಡಿದ್ದಾನೆ. ಆದರೆ ಅವನ ತಮಾಷೆ ಅವನಿಗೆ ತಲೆನೋವಾಗಿ ಪರಿಣಮಿಸಿದೆ.
@badis_tv ಎಂಬ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಈ ವಿಡಿಯೋ ವೈರಲ್ ಆಗಿದೆ. ವಿಡಿಯೋದಲ್ಲಿ ಹುಡುಗನೊಬ್ಬ ಅಂಗಡಿಯೊಂದರಲ್ಲಿ ಕುಳಿತು ವಿಡಿಯೋ ಮಾಡುತ್ತಿರುವುದು ಕಂಡುಬರುತ್ತದೆ.
ಅವನು ಮೊದಲು ಕ್ಯಾಮೆರಾಕ್ಕೆ ಸೂಪರ್‌ ಗ್ಲು ತೋರಿಸುತ್ತಾನೆ ಮತ್ತು ನಂತರ ಅದನ್ನು ತನ್ನ ತುಟಿಗಳಿಗೆ ಅಂಟಿಸಿಕೊಳ್ಳುತ್ತಾನೆ. ತಕ್ಷಣವೇ ಅವನ ತುಟಿಗಳು ಒಟ್ಟಿಗೆ ಅಂಟಿಕೊಳ್ಳುತ್ತವೆ. ಮೊದಲಿಗೆ ಅವನು ನಗುತ್ತಾನೆ, ಆದರೆ ತನ್ನ ಬಾಯಿಯನ್ನು ತೆರೆಯಲು ಪ್ರಯತ್ನಿಸಿದಾಗ ಅವನಿಗೆ ಅದು ಸಾಧ್ಯವಾಗುವುದಿಲ್ಲ.
ಭಯಗೊಂಡ ಅವನು ಅಳಲು ಶುರು ಮಾಡುತ್ತಾನೆ. ಪದೇ ಪದೇ ಪ್ರಯತ್ನಿಸಿದರೂ ಅವನ ಬಾಯಿ ತೆರೆಯುವುದಿಲ್ಲ. ಆದಾಗ್ಯೂ, ಹುಡುಗ ನಿಜವಾಗಿಯೂ ಸೂಪರ್‌ಗ್ಲು ಅಂಟಿಸಿಕೊಂಡಿದ್ದಾನೋ ಅಥವಾ ನಟಿಸುತ್ತಿದ್ದಾನೋ ಎಂಬುದನ್ನು ದೃಢೀಕರಿಸಲಾಗಿಲ್ಲ.
ಈ ವಿಡಿಯೋ 47 ಲಕ್ಷ ವೀಕ್ಷಣೆಗಳನ್ನು ಪಡೆದಿದ್ದು, ಅನೇಕ ಕಾಮೆಂಟ್‌ಗಳು ಬಂದಿವೆ. ಒಬ್ಬ ವ್ಯಕ್ತಿ ತಾನೂ ಸಹ ಇದನ್ನು ಪ್ರಯತ್ನಿಸುವುದಾಗಿ ಹೇಳಿದ್ದರೆ, ಇನ್ನೊಬ್ಬರು “ಕಣ್ಣುಗಳಿಗೆ ಸಹ ಇದನ್ನು ಪ್ರಯತ್ನಿಸಬೇಕು” ಎಂದು ವ್ಯಂಗ್ಯ ಮಾಡಿದ್ದಾರೆ.
View this post on Instagram
