ಭೋಪಾಲ್: ಮಧ್ಯಪ್ರದೇಶದ ಶಾಲೆಯಲ್ಲಿ ಹನ್ನೊಂದನೇ ತರಗತಿಯ ವಿದ್ಯಾರ್ಥಿನಿಯರ ನೀರಿನ ಬಾಟಲಿಗಳಲ್ಲಿ ಹುಡುಗರು ಮೂತ್ರ ವಿಸರ್ಜನೆ ಮಾಡಿದ್ದಾರೆ.
ಬುಡಕಟ್ಟು ಜನಾಂಗದ ಪ್ರಾಬಲ್ಯವಿರುವ ಮಂಡ್ಲಾ ಜಿಲ್ಲೆಯ ಲಾಫ್ರಾ ಗ್ರಾಮದ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಘಟನೆ ನಡೆದಿದ್ದು, ಹನ್ನೊಂದನೇ ತರಗತಿಯ ವಿದ್ಯಾರ್ಥಿನಿಯರು ತರಗತಿಗಳಿಗೆ ಹಾಜರಾಗಲು ಹೋದಾಗ ತಮ್ಮ ತರಗತಿಯಲ್ಲಿ ಬಿಟ್ಟು ಹೋಗಿದ್ದ ನೀರಿನ ಬಾಟಲಿಗಳಲ್ಲಿ ಮೂತ್ರ ವಿಸರ್ಜನೆ ಮಾಡಿದ್ದಾರೆ ಎಂದು ದೂರಿದ ಹಿನ್ನೆಲೆಯಲ್ಲಿ ಅಧಿಕಾರಿಗಳು ತನಿಖೆಗೆ ಆದೇಶಿಸಿದ್ದಾರೆ.
ಇಬ್ಬರು ಹುಡುಗಿಯರ ಪ್ರಕಾರ, ಘಟನೆ ಮಂಗಳವಾರ ನಡೆದಿದೆ. ಅವರು ತಮ್ಮ ನೀರಿನ ಬಾಟಲಿಗಳನ್ನು ಬಿಟ್ಟು ಮತ್ತೊಂದು ಕೋಣೆಯಲ್ಲಿ ಇಂಗ್ಲಿಷ್ ತರಗತಿಗಳಿಗೆ ಹಾಜರಾಗಲು ತಮ್ಮ ತರಗತಿಯಿಂದ ಹೊರ ಹೋಗಿದ್ದರು. ಅವರು ಹಿಂತಿರುಗಿ ನೀರು ಕುಡಿಯಲು ಬಾಟಲಿಗಳನ್ನು ಎತ್ತಿದಾಗ ಬಾಟಲಿಗಳಿಂದ ಮೂತ್ರದ ವಾಸನೆಯಂತೆಯೇ ದುರ್ವಾಸನೆ ಬರುತ್ತಿತ್ತು ಎಂದು ತಿಳಿಸಿದ್ದಾರೆ.
ನಮ್ಮ ಸ್ನೇಹಿತೆಯೊಬ್ಬಳು ಬಾಟಲಿಯಿಂದ ನೀರನ್ನು ಸಹ ಕುಡಿದರು, ಆದರೆ ಮೂತ್ರದ ವಾಸನೆ ಬಂದ ಕೂಡಲೇ ಉಗುಳಿದರು. ನಾವು ತಕ್ಷಣ ಬಾಟಲಿಗಳನ್ನು ಖಾಲಿ ಮಾಡಿ ಶಿಕ್ಷಕರಿಗೆ ತಿಳಿಸಿದ್ದೇವೆ. ನಾವು ಇಂಗ್ಲಿಷ್ ತರಗತಿಗೆ ಹೊರಟಾಗ ತರಗತಿಯಲ್ಲಿ ಹಾಜರಿದ್ದ ಐದು ವಿದ್ಯಾರ್ಥಿಗಳಿಗೆ ಮರುದಿನ ನಮ್ಮ ಪೋಷಕರನ್ನು ಕರೆತರಲು ಹೇಳಿದ್ದಾರೆ ಎಂದರು.
ಪೋಷಕರು, ಗ್ರಾಮಸ್ಥರೊಂದಿಗೆ ಮರುದಿನ ಶಾಲೆಗೆ ಬಂದರು. ಘಟನೆ ಕುರಿತು ಮಾಹಿತಿ ತಿಳಿದು ಸಹಾಯಕ ಆಯುಕ್ತ(ಗಿರಿಜನ ಕಲ್ಯಾಣ) ವಿಜಯ್ ಟೇಕಂ ಮತ್ತು ನಾಯಬ್ ತಹಸೀಲ್ದಾರ್ ಸಾಕ್ಷಿ ಶುಕ್ಲಾ ಸೇರಿದಂತೆ ಹಿರಿಯ ಅಧಿಕಾರಿಗಳು ಆಗಮಿಸಿದ್ದರು.
ನಾವು ಶಾಲೆಗೆ ಬಂದು ಸಿಬ್ಬಂದಿ, ಪೋಷಕರು ಮತ್ತು ವಿದ್ಯಾರ್ಥಿಗಳೊಂದಿಗೆ ಚರ್ಚೆ ನಡೆಸಿದ್ದೇವೆ. ಕೆಲವು ಹುಡುಗರು ಸಿಕ್ಕಿದ್ದಾರೆ. ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ಹೇಳಿಕೆಗಳನ್ನು ದಾಖಲಿಸಲಾಗಿದೆ ಮತ್ತು ವಿವರವಾದ ತನಿಖೆ ನಡೆಯುತ್ತಿದೆ. ವಿಚಾರಣೆ ಮುಗಿದ ನಂತರ, ತಪ್ಪಿತಸ್ಥರ ವಿರುದ್ಧ ಸೂಕ್ತ ಕ್ರಮವನ್ನು ಪ್ರಾರಂಭಿಸಲಾಗುವುದು ಎಂದು ಅಧಿಕಾರಿಗಳು ಹೇಳಿದ್ದಾರೆ.
