ವಿಮಾನ ಪ್ರಯಾಣಿಕರ ಜೇಬಿಗೆ ಮತ್ತಷ್ಟು ಕತ್ತರಿ ಬೀಳಲಿದ್ದು, ದೇಶದ ಪ್ರಮುಖ ವಿಮಾನಯಾನ ಸಂಸ್ಥೆಯಾದ ಇಂಡಿಗೋ (IndiGo) ಇಂದಿನಿಂದ (ಏಪ್ರಿಲ್ 2, 2026) ಅನ್ವಯವಾಗುವಂತೆ ಟಿಕೆಟ್ ದರದಲ್ಲಿ ಗಣನೀಯ ಏರಿಕೆ ಮಾಡಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ವಿಮಾನ ಇಂಧನ (ATF) ಬೆಲೆ ಶೇ. 130ಕ್ಕಿಂತ ಹೆಚ್ಚು ಏರಿಕೆಯಾಗಿರುವ ಹಿನ್ನೆಲೆಯಲ್ಲಿ ಸಂಸ್ಥೆಯು ಈ ನಿರ್ಧಾರ ಕೈಗೊಂಡಿದೆ.
ಇಂಧನ ಬೆಲೆ ಏರಿಕೆಯ ಹಿನ್ನೆಲೆಯಲ್ಲಿ ದೇಶದ ಪ್ರಮುಖ ವಿಮಾನಯಾನ ಸಂಸ್ಥೆ ಇಂಡಿಗೋ, ಏಪ್ರಿಲ್ 2 ರಿಂದ ಜಾರಿಗೆ ಬರುವಂತೆ ಇಂಧನ ಸರ್ಚಾರ್ಜ್ ಅನ್ನು ಹೆಚ್ಚಿಸಿದೆ. ಪ್ರಯಾಣದ ದೂರ ಮತ್ತು ಮಾರ್ಗಕ್ಕೆ ಅನುಗುಣವಾಗಿ ಈ ದರವು 275 ರೂಪಾಯಿಯಿಂದ 10,000 ರೂಪಾಯಿಯವರೆಗೆ ಇರಲಿದೆ.
ಸರ್ಕಾರವು ವಿಮಾನ ಇಂಧನ (ATF) ದರವನ್ನು ಪರಿಷ್ಕರಿಸಿದ ಬೆನ್ನಲ್ಲೇ ಇಂಡಿಗೋ ಈ ನಿರ್ಧಾರ ಕೈಗೊಂಡಿದೆ. ಇದು ದೇಶೀಯ ಮತ್ತು ಅಂತರಾಷ್ಟ್ರೀಯ ಎರಡೂ ವಿಮಾನ ಪ್ರಯಾಣಿಕರ ಮೇಲೆ ಪರಿಣಾಮ ಬೀರಲಿದೆ.
ಪರಿಷ್ಕೃತ ಇಂಧನ ಶುಲ್ಕದ ವಿವರ (ದೇಶೀಯ ವಿಮಾನಗಳು):
| ಪ್ರಯಾಣದ ದೂರ (ಕಿ.ಮೀ) | ಇಂಧನ ಸರ್ಚಾರ್ಜ್ (ರೂಪಾಯಿಗಳಲ್ಲಿ) |
| 0 ರಿಂದ 500 ಕಿ.ಮೀ | ₹275 |
| 501 ರಿಂದ 1000 ಕಿ.ಮೀ | ₹400 |
| 1001 ರಿಂದ 1500 ಕಿ.ಮೀ | ₹600 |
| 1501 ರಿಂದ 2000 ಕಿ.ಮೀ | ₹800 |
| 2000 ಕಿ.ಮೀ ಗಿಂತ ಹೆಚ್ಚು | ₹900 |
ಅಂತರಾಷ್ಟ್ರೀಯ ವಿಮಾನಗಳ ದರಪಟ್ಟಿ:
- ಭಾರತೀಯ ಉಪಖಂಡ: 500 ಕಿ.ಮೀ ವರೆಗೆ ₹900; 500 ಕಿ.ಮೀ ಗಿಂತ ಹೆಚ್ಚು ₹2500.
- ಗಲ್ಫ್ ಮತ್ತು ಮಧ್ಯಪ್ರಾಚ್ಯ: 2000 ಕಿ.ಮೀ ವರೆಗೆ ₹3000; 2000 ಕಿ.ಮೀ ಗಿಂತ ಹೆಚ್ಚು ₹5000.
- ಆಫ್ರಿಕಾ: ₹5000.
- ಗ್ರೀಸ್ ಮತ್ತು ಟರ್ಕಿ: ₹7500.
- ಬ್ರಿಟನ್ ಮತ್ತು ಯುರೋಪ್: ₹10,000.
