ಬಂಡೀಪುರ ಹಾಗೂ ನಾಗರಹೊಳೆ ರಾಷ್ಟ್ರೀಯ ಉದ್ಯಾನಗಳಿಗೆ ಪ್ರವಾಸಕ್ಕೆ ತೆರಳುವವರಿಗೆ ಅರಣ್ಯ ಇಲಾಖೆ ಶಾಕ್ ನೀಡಿದೆ. ಸೆಪ್ಟೆಂಬರ್ 1ರಿಂದ ಸಫಾರಿ, ಕ್ಯಾಮೆರಾ ಬಳಕೆ ಹಾಗೂ ವಾಹನ ನಿಲುಗಡೆ ಸೇರಿದಂತೆ ಹಲವು ಶುಲ್ಕಗಳನ್ನು ಪರಿಷ್ಕರಿಸಲಾಗಿದ್ದು, ಸಫಾರಿ ದರ ಬಹುತೇಕ ದುಪ್ಪಟ್ಟಾಗಿದೆ.
ಪ್ರವಾಸಿಗರ ನೆಚ್ಚಿನ ತಾಣಗಳಾದ ಬಂಡೀಪುರ ಮತ್ತು ನಾಗರಹೊಳೆ ರಾಷ್ಟ್ರೀಯ ಉದ್ಯಾನಗಳಲ್ಲಿ ಸೆಪ್ಟೆಂಬರ್ 1ರಿಂದ ಪರಿಷ್ಕೃತ ಸಫಾರಿ ದರ ಜಾರಿಗೆ ಬಂದಿದೆ. ಬಸ್‌ ಸಫಾರಿ, ಜೀಪ್‌ ಸಫಾರಿ, ಕ್ಯಾಮೆರಾ ಬಳಕೆ ಹಾಗೂ ವಾಹನ ನಿಲುಗಡೆ ಶುಲ್ಕದಲ್ಲಿ ಏರಿಕೆ ಮಾಡಲಾಗಿದೆ.
ಸಫಾರಿ ದರ ಎಷ್ಟು?
ನಾಗರಹೊಳೆಯಲ್ಲಿ ಬಸ್‌ ಸಫಾರಿಗೆ ವಯಸ್ಕರಿಗೆ ₹1,000 ಹಾಗೂ ಮಕ್ಕಳಿಗೆ ₹500 ದರ ನಿಗದಿಪಡಿಸಲಾಗಿದೆ. ಜೀಪ್‌ ಸಫಾರಿಗೆ ವಯಸ್ಕರಿಗೆ ₹1,500 ಹಾಗೂ ಮಕ್ಕಳಿಗೆ ₹750 ಶುಲ್ಕ ವಿಧಿಸಲಾಗುತ್ತದೆ.
ಬಂಡೀಪುರದಲ್ಲೂ ಬಸ್‌ ಸಫಾರಿ ದರ ವಯಸ್ಕರಿಗೆ ₹650ರಿಂದ ₹1,000ಕ್ಕೆ, 12 ವರ್ಷದೊಳಗಿನ ಮಕ್ಕಳಿಗೆ ₹350ರಿಂದ ₹500ಕ್ಕೆ ಏರಿಕೆಯಾಗಿದೆ. ಜೀಪ್‌ ಸಫಾರಿಗೆ ವಯಸ್ಕರ ದರ ₹750ರಿಂದ ₹1,500ಕ್ಕೆ ಹೆಚ್ಚಿಸಲಾಗಿದೆ.
ಕ್ಯಾಮೆರಾ ಬಳಕೆಗೂ ಶುಲ್ಕ
ಸಫಾರಿ ವೇಳೆ 200 ಎಂಎಂವರೆಗೆ ಲೆನ್ಸ್ ಹೊಂದಿರುವ ಕ್ಯಾಮೆರಾಗಳಿಗೆ ಶುಲ್ಕವಿಲ್ಲ. ಆದರೆ 200 ಎಂಎಂಗಿಂತ ಹೆಚ್ಚಿನ ಲೆನ್ಸ್ ಹೊಂದಿರುವ ಕ್ಯಾಮೆರಾಗಳಿಗೆ ₹1,500 ಶುಲ್ಕದ ಜೊತೆಗೆ 18% ಜಿಎಸ್‌ಟಿ ಪಾವತಿಸಬೇಕಾಗುತ್ತದೆ.
ವಾಹನ ನಿಲುಗಡೆ ದರವೂ ಏರಿಕೆ
ನಾಗರಹೊಳೆ ವ್ಯಾಪ್ತಿಯಲ್ಲಿ ವಾಹನ ನಿಲುಗಡೆ ಶುಲ್ಕವನ್ನೂ ಹೆಚ್ಚಿಸಲಾಗಿದೆ. ಕಾರಿಗೆ ₹100, ಲಘು ವಾಹನಗಳಿಗೆ ₹200 ಹಾಗೂ ಬಸ್‌ಗೆ ₹300 ದರ ನಿಗದಿಪಡಿಸಲಾಗಿದೆ.
ಹೀಗಾಗಿ, ಇನ್ನು ಮುಂದೆ ಬಂಡೀಪುರ ಹಾಗೂ ನಾಗರಹೊಳೆ ಪ್ರವಾಸ ಕೈಗೊಳ್ಳುವವರು ಪರಿಷ್ಕೃತ ಸಫಾರಿ ದರಗಳನ್ನು ಗಮನದಲ್ಲಿಟ್ಟುಕೊಂಡು ಪ್ರವಾಸದ ಬಜೆಟ್‌ ರೂಪಿಸುವುದು ಅಗತ್ಯವಾಗಿದೆ.
