ನವದೆಹಲಿ: ಭಾರತೀಯ ಕೃಷಿ ಕ್ಷೇತ್ರದಲ್ಲಿ ಹೊಸ ಕ್ರಾಂತಿ ಆರಂಭವಾಗಿದೆ ರೈತರಿಗೆ ಕೃಷಿ ಮಾಹಿತಿ ಪಡೆಯಲು ಇನ್ನು ಮುಂದೆ ಹತ್ತಾರು ಕಚೇರಿಗಳಿಗೆ ಅಲೆಯುವ ಅಗತ್ಯವಿಲ್ಲ. ರೈತರ ಎಲ್ಲಾ ಸಮಸ್ಯೆಗಳಿಗೆ ಮನೆಯಲ್ಲೇ ಕುಳಿತು ಪರಿಹಾರ ಪಡೆಯಲು ಕೇಂದ್ರ ಕೃಷಿ ಸಚಿವ ಶಿವರಾಜ್ ಸಿಂಗ್ ಚೌಹಾಣ್ ಅವರು ಮಂಗಳವಾರ ಭಾರತ್-ವಿಸ್ತಾರ್ (Virtually Integrated System to Access Agricultural Resources) ಎಂಬ AI ಚಾಲಿತ ಬಹುಭಾಷಾ ಸಾಧನಕ್ಕೆ ಚಾಲನೆ ನೀಡಿದ್ದಾರೆ.
ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು 2026-27ರ ಕೇಂದ್ರ ಬಜೆಟ್ನಲ್ಲಿ ಘೋಷಿಸಿದ್ದ ಈ ಮಹತ್ವಾಕಾಂಕ್ಷೆಯ ಯೋಜನೆಗೆ ಈಗ ಚಾಲನೆ ಸಿಕ್ಕಿದ್ದು, ಮುಂದಿನ ಹಣಕಾಸು ವರ್ಷಕ್ಕೆ ₹150 ಕೋಟಿ ಅನುದಾನ ಮೀಸಲಿಡಲಾಗಿದೆ.
ಏನಿದು ಭಾರತ್-ವಿಸ್ತಾರ್?
ಇದು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಡಿಜಿಟಲ್ ಪೋರ್ಟಲ್ ಆಗಿದ್ದು, ರೈತರಿಗೆ ಅವರ ಮಾತೃಭಾಷೆಯಲ್ಲೇ ಕೃಷಿ ಸಲಹೆಗಳನ್ನು ನೀಡುತ್ತದೆ. ಇದು ಕೃಷಿ ಉತ್ಪಾದಕತೆ ಹೆಚ್ಚಿಸಲು ಮತ್ತು ರೈತರು ಉತ್ತಮ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಡಿಜಿಟಲ್ ದ್ವಾರವಾಗಿ ಕಾರ್ಯನಿರ್ವಹಿಸುತ್ತದೆ.
ಯಾವೆಲ್ಲಾ ಮಾಹಿತಿ ಸಿಗಲಿದೆ?
ರೈತರು ಈಗ ಕೇವಲ ಒಂದು ಕ್ಲಿಕ್ ಅಥವಾ ಒಂದು ಫೋನ್ ಕರೆಯ ಮೂಲಕ ಈ ಕೆಳಗಿನ ಮಾಹಿತಿಯನ್ನು ಪಡೆಯಬಹುದು:
ಬಜೆಟ್ ಮಾಹಿತಿ: 10 ಪ್ರಮುಖ ಕೇಂದ್ರ ಸರ್ಕಾರದ ಯೋಜನೆಗಳ ಸ್ಥಿತಿಗತಿ ಹಾಗೂ ಮಾಹಿತಿ.
ಹವಾಮಾನ ಮುನ್ಸೂಚನೆ: ತಮ್ಮ ಪ್ರದೇಶದಲ್ಲಿ ಮಳೆ ಯಾವಾಗ ಬರಬಹುದು ಎಂಬ ನಿಖರ ಮಾಹಿತಿ.
ಮಾರುಕಟ್ಟೆ ದರ: ಮಂಡಿಗಳಲ್ಲಿನ ದಿನನಿತ್ಯದ ಬೆಲೆಗಳ ನವೀಕರಣ.
ಬೆಳೆ ರಕ್ಷಣೆ: ಕೀಟಗಳು, ಬೆಳೆ ರೋಗಗಳು ಮತ್ತು ಮಣ್ಣಿನ ಆರೋಗ್ಯದ ಕುರಿತು ವೈಜ್ಞಾನಿಕ ಸಲಹೆಗಳು.
ಸರ್ಕಾರಿ ಸೌಲಭ್ಯ: ವಿವಿಧ ಯೋಜನೆಗಳಿಗೆ ಅರ್ಹತೆ ಪಡೆಯುವುದು ಹೇಗೆ ಮತ್ತು ಅರ್ಜಿ ಸಲ್ಲಿಸುವ ವಿಧಾನದ ಮಾರ್ಗದರ್ಶನ.
ಇದನ್ನು ಬಳಸುವುದು ಹೇಗೆ?
ಅಪ್ಲಿಕೇಶನ್ ಮತ್ತು ವೆಬ್ಸೈಟ್: ಗೂಗಲ್ ಪ್ಲೇ ಸ್ಟೋರ್ನಲ್ಲಿ ಅಪ್ಲಿಕೇಶನ್ ಡೌನ್ಲೋಡ್ ಮಾಡಬಹುದು ಅಥವಾ vistaar.da.gov.in ವೆಬ್ ಇಂಟರ್ಫೇಸ್ ಮೂಲಕ ಪ್ರವೇಶಿಸಬಹುದು.
ಫೋನ್ ಕರೆ ಮೂಲಕ: ರೈತರು ತಮ್ಮ ಮೊಬೈಲ್ನಿಂದ 155261 ಸಂಖ್ಯೆಗೆ ಕರೆ ಮಾಡಿ ‘ಭಾರತಿ’ ಎಂಬ AI ಸಹಾಯಕರೊಂದಿಗೆ ಮಾತನಾಡಬಹುದು.
ಸಾಮಾನ್ಯ ಫೋನ್ ಹೊಂದಿರುವ ರೈತರು ಕೂಡ ಇದರ ಲಾಭ ಪಡೆಯಬಹುದು:
ಕನ್ನಡದಲ್ಲೂ ಲಭ್ಯವಿದೆಯೇ?
ಸದ್ಯ ಈ ಸೇವೆ ಇಂಗ್ಲಿಷ್ ಮತ್ತು ಹಿಂದಿಯಲ್ಲಿ ಆರಂಭವಾಗಿದೆ. ಆದರೆ ಕನ್ನಡಿಗರಿಗೆ ಸಿಹಿ ಸುದ್ದಿ ಏನೆಂದರೆ, ಮುಂದಿನ ಮೂರು ತಿಂಗಳೊಳಗೆ ಇದು ಕನ್ನಡ ಸೇರಿದಂತೆ ತಮಿಳು, ಬಂಗಾಳಿ ಮತ್ತು ಅಸ್ಸಾಮಿ ಭಾಷೆಗಳಲ್ಲಿ ಲಭ್ಯವಾಗಲಿದೆ. ಮುಂದಿನ ಆರು ತಿಂಗಳಲ್ಲಿ ಒಟ್ಟು 11 ಭಾಷೆಗಳಲ್ಲಿ ಈ ಸೇವೆ ದೊರೆಯಲಿದೆ.ರೈತರ ಆದಾಯ ಹೆಚ್ಚಿಸಲು ಮತ್ತು ಕೃಷಿಯಲ್ಲಿ ಡಿಜಿಟಲ್ ತಂತ್ರಜ್ಞಾನ ಅಳವಡಿಸಲು ಕೇಂದ್ರ ಸರ್ಕಾರ ಈ ಮಹತ್ವದ ಹೆಜ್ಜೆ ಇಟ್ಟಿದೆ.
