‘ಮೈನೆ ಪ್ಯಾರ್ ಕಿಯಾ’ ಚಿತ್ರಕ್ಕೆ ಸಲ್ಮಾನ್‌ಗಿಂತ ಭಾಗ್ಯಶ್ರೀಗೆ ಸಿಕ್ಕಿತ್ತು ಡಬಲ್ ಸಂಭಾವನೆ: ಕಾರಣ ಕೇಳಿದ್ರೆ ಅಚ್ಚರಿ ಪಡ್ತೀರಾ!

ಸೂರಜ್ ಬರ್ಜಾತ್ಯಾ ನಿರ್ದೇಶನದ ‘ಮೈನೆ ಪ್ಯಾರ್ ಕಿಯಾ’ ಚಿತ್ರ ಬಿಡುಗಡೆಯಾಗಿ ದಶಕಗಳೇ ಕಳೆದರೂ ಆ ಚಿತ್ರದ ಕ್ರೇಜ್ ಮಾತ್ರ ಕಡಿಮೆಯಾಗಿಲ್ಲ. ಈ ಚಿತ್ರದ ಮೂಲಕವೇ ಸಲ್ಮಾನ್ ಖಾನ್ ಬಾಲಿವುಡ್‌ನಲ್ಲಿ ಸ್ಟಾರ್ ಆಗಿ ಮಿಂಚಿದ್ದು. ಆದರೆ ಈ ಚಿತ್ರಕ್ಕೆ ಸಂಬಂಧಿಸಿದಂತೆ ನಟಿ ಭಾಗ್ಯಶ್ರೀ ಇತ್ತೀಚೆಗೆ ಆಸಕ್ತಿದಾಯಕ ವಿಷಯವೊಂದನ್ನು ಬಿಚ್ಚಿಟ್ಟಿದ್ದಾರೆ. ಚಿತ್ರದಲ್ಲಿ ತಮಗೆ ಸಲ್ಮಾನ್ ಖಾನ್ ಅವರಿಗಿಂತ ಹೆಚ್ಚಿನ ಸಂಭಾವನೆ ನೀಡಲಾಗಿತ್ತು ಎಂಬ ಸತ್ಯವನ್ನು ಅವರು ಹಂಚಿಕೊಂಡಿದ್ದಾರೆ.

ಸಲ್ಮಾನ್ ಖಾನ್‌ಗಿಂತ ಹೆಚ್ಚಿನ ಸಂಭಾವನೆ ಪಡೆದಿದ್ದ ನಟಿ ಭಾಗ್ಯಶ್ರೀ: ಇಲ್ಲಿದೆ ಅಸಲಿ ಕಾರಣ!

1989ರಲ್ಲಿ ತೆರೆಕಂಡ ‘ಮೈನೆ ಪ್ಯಾರ್ ಕಿಯಾ’ ಚಿತ್ರವು ಬಾಲಿವುಡ್‌ನಲ್ಲಿ ದೊಡ್ಡ ಇತಿಹಾಸ ಸೃಷ್ಟಿಸಿತ್ತು. ಇತ್ತೀಚೆಗೆ ನಡೆದ ಸಂದರ್ಶನವೊಂದರಲ್ಲಿ ಭಾಗ್ಯಶ್ರೀ ಅಂದಿನ ಕಾಲದ ಸಂಭಾವನೆ ಹಂಚಿಕೆ ಬಗ್ಗೆ ಮಾತನಾಡಿದ್ದಾರೆ. ಚಿತ್ರರಂಗದಲ್ಲಿ ಸಂಭಾವನೆ ಎನ್ನುವುದು ‘ಬೇಡಿಕೆ ಮತ್ತು ಪೂರೈಕೆ’ಯ (Supply and Demand) ಮೇಲೆ ನಿರ್ಧಾರವಾಗುತ್ತದೆ ಎಂದು ಅವರು ವಿವರಿಸಿದ್ದಾರೆ.

ಭಾಗ್ಯಶ್ರೀ ಹೇಳಿದ್ದೇನು? ಸಲ್ಮಾನ್ ಖಾನ್‌ಗಿಂತ ನಿಮಗೆ ಹೆಚ್ಚು ಹಣ ನೀಡಿದ್ದು ನಿಜವೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, “ಹಣದ ವಿಷಯಕ್ಕೆ ಬಂದಾಗ ಇದು ಸರಳವಾದ ವ್ಯವಹಾರ. ಒಬ್ಬ ನಟಿ ಕಷ್ಟಪಟ್ಟು ಕೆಲಸ ಮಾಡಬಹುದು, ಆದರೆ ನಿರ್ಮಾಪಕ ಅಥವಾ ನಿರ್ದೇಶಕರಿಗೆ ಆಕೆಯ ಬದಲಿಗೆ ಬೇರೆ ಯಾರಾದರೂ ಕಡಿಮೆ ಬೆಲೆಗೆ ಸಿಗುತ್ತಾರೆ ಎಂದು ಅನ್ನಿಸಿದರೆ ಅವರು ಆ ಬೆಲೆಗೇ ಅಂಟಿಕೊಳ್ಳುತ್ತಾರೆ. ಅಂತಹ ಸಮಯದಲ್ಲಿ ಕೆಲಸವನ್ನು ಬಿಡಬೇಕೇ ಅಥವಾ ಕಡಿಮೆ ಸಂಭಾವನೆಗೆ ಒಪ್ಪಬೇಕೇ ಎಂಬ ನಿರ್ಧಾರ ಆಯಾ ನಟಿಯರಿಗೆ ಬಿಟ್ಟಿದ್ದು” ಎಂದಿದ್ದಾರೆ.

ಸಿನಿಮಾ ಮಾರುಕಟ್ಟೆ ಎನ್ನುವುದು ಅತ್ಯಂತ ಅನಿಶ್ಚಿತತೆಯಿಂದ ಕೂಡಿದೆ. ಇಲ್ಲಿ ಕೆಲಸದ ಸಮಯ ಅಥವಾ ಪಾವತಿಯ ವಿಷಯದಲ್ಲಿ ಯಾವಾಗಲೂ ಒಬ್ಬರಿಗಿಂತ ಒಬ್ಬರು ಚೌಕಾಶಿ ಮಾಡಲು ಸಿದ್ಧವಿರುತ್ತಾರೆ. ಹೀಗಾಗಿ ಎಲ್ಲ ಮಹಿಳೆಯರು ಒಗ್ಗೂಡಿ ಒಂದು ನಿರ್ದಿಷ್ಟ ಸಂಭಾವನೆಯ ಬಗ್ಗೆ ಧ್ವನಿ ಎತ್ತದ ಹೊರತು ಈ ವ್ಯವಸ್ಥೆಯಲ್ಲಿ ಬದಲಾವಣೆ ಕಷ್ಟ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಸಂಭಾವನೆ ಎಷ್ಟು? ವರದಿಗಳ ಪ್ರಕಾರ, ಈ ಚಿತ್ರಕ್ಕಾಗಿ ಭಾಗ್ಯಶ್ರೀ ಅವರಿಗೆ 1,50,000 ರೂಪಾಯಿ ಸಂಭಾವನೆ ನೀಡಲಾಗಿತ್ತು. ಆದರೆ ಸ್ವತಃ ಸಲ್ಮಾನ್ ಖಾನ್ ಅವರೇ ಈ ಹಿಂದೆ ನೀಡಿದ ಸಂದರ್ಶನವೊಂದರಲ್ಲಿ ತಮಗೆ ಈ ಚಿತ್ರಕ್ಕಾಗಿ 75,000 ರೂಪಾಯಿ ನೀಡಲಾಗಿತ್ತು ಎಂದು ಹೇಳಿಕೊಂಡಿದ್ದರು. ಅಂದರೆ ಸಲ್ಮಾನ್ ಖಾನ್ ಅವರಿಗಿಂತ ಎರಡರಷ್ಟು ಹೆಚ್ಚು ಹಣವನ್ನು ಅಂದು ಭಾಗ್ಯಶ್ರೀ ಪಡೆದಿದ್ದರು. ಇದಕ್ಕೆ ಮುಖ್ಯ ಕಾರಣವೆಂದರೆ, ಸಲ್ಮಾನ್ ಆಗಷ್ಟೇ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದರು, ಆದರೆ ಭಾಗ್ಯಶ್ರೀ ಅವರ ಮೊದಲ ಚಿತ್ರಕ್ಕೇ ದೊಡ್ಡ ಮಟ್ಟದ ಬೇಡಿಕೆ ಸೃಷ್ಟಿಯಾಗಿತ್ತು.

ಸದ್ಯ ರಿತೇಶ್ ದೇಶ್‌ಮುಖ್ ಅವರ ‘ರಾಜಾ ಶಿವಾಜಿ’ ಚಿತ್ರದಲ್ಲಿ ನಟಿಸಿರುವ ಭಾಗ್ಯಶ್ರೀ, ಅಂದಿನ ದಿನಗಳ ಸಿನಿಮೀಯ ವ್ಯವಹಾರದ ಬಗ್ಗೆ ನೀಡಿರುವ ಈ ಹೇಳಿಕೆ ಈಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ.