ಮುಂಬೈ: ಛತ್ರಪತಿ ಶಿವಾಜಿ ಮಹಾರಾಜರ ಜೀವನ ಆಧಾರಿತ ‘ರಾಜಾ ಶಿವಾಜಿ’ ಸಿನಿಮಾ ಇತ್ತೀಚೆಗಷ್ಟೇ ತೆರೆಕಂಡು ಭಾರಿ ಪ್ರಶಂಸೆ ಗಳಿಸುತ್ತಿದೆ. ಈ ಚಿತ್ರದಲ್ಲಿ ಶಿವಾಜಿ ಮಹಾರಾಜರ ತಾಯಿ ರಾಜಮಾತಾ ಜೀಜಾಬಾಯಿ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಹಿರಿಯ ನಟಿ ಭಾಗ್ಯಶ್ರೀ ಅವರ ನಟನೆಗೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ. ಆದರೆ, ಚಿತ್ರದಲ್ಲಿ ತಮಗಿಂತ ಕೇವಲ 10 ವರ್ಷ ಕಿರಿಯರಾದ ನಟ ರಿತೇಶ್ ದೇಶ್ಮುಖ್ ಅವರಿಗೆ ತಾಯಿಯಾಗಿ ನಟಿಸಿರುವ ಕುರಿತು ಸೋಶಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಚರ್ಚೆಗಳು ನಡೆಯುತ್ತಿವೆ. ಈ ಬಗ್ಗೆ ಸ್ವತಃ ಭಾಗ್ಯಶ್ರೀ ಅವರು ಸಂದರ್ಶನವೊಂದರಲ್ಲಿ ಮುಕ್ತವಾಗಿ ಮಾತನಾಡಿದ್ದಾರೆ.
ತಮಗಿಂತ ಕಿರಿಯ ನಟನಿಗೆ ತಾಯಿಯ ಪಾತ್ರ ಮಾಡಲು ಒಪ್ಪಿಕೊಂಡಿದ್ದರ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಇಂತಹ ಐತಿಹಾಸಿಕ ಮತ್ತು ಗೌರವಾನ್ವಿತ ಪಾತ್ರವನ್ನು ನಿರಾಕರಿಸುವ ಪ್ರಶ್ನೆಯೇ ಬರುವುದಿಲ್ಲ ಎಂದು ಹೇಳಿದ್ದಾರೆ. ಬಾಲ್ಯದಿಂದಲೇ ಜೀಜಾಬಾಯಿ ಅವರ ಸಾಹಸ ಗಾಥೆಗಳನ್ನು ಕೇಳುತ್ತಾ ಬೆಳೆದ ತಮಗೆ, ಈ ಪಾತ್ರ ಮಾಡಲು ಸಿಕ್ಕ ಅವಕಾಶ ದೊಡ್ಡ ಅದೃಷ್ಟ ಎಂದಿದ್ದಾರೆ.
ಕ್ಯಾಮೆರಾ ಕಣ್ಣಿನಲ್ಲಿ ವಯಸ್ಸಾದಂತೆ ತೋರಿಸಿದ ಮಾಂತ್ರಿಕ: ಇದೇ ವೇಳೆ ಚಿತ್ರದ ತಾಂತ್ರಿಕ ಸವಾಲುಗಳ ಬಗ್ಗೆ ಹಂಚಿಕೊಂಡ ಭಾಗ್ಯಶ್ರೀ, ಜೀಜಾಬಾಯಿ ಅವರು ಚಿಕ್ಕ ವಯಸ್ಸಿನಲ್ಲೇ ತಾಯಿಯಾಗಿದ್ದರು ಎಂಬ ಇತಿಹಾಸವನ್ನು ನೆನಪಿಸಿದರು. ಆದರೂ ತೆರೆಯ ಮೇಲೆ ರಿತೇಶ್ ಅವರಿಗೆ ತಾಯಿಯಂತೆ ಕಾಣಿಸಲು ತಂತ್ರಜ್ಞಾನದ ಸಹಾಯ ಪಡೆಯಬೇಕಾಯಿತು. ಚಿತ್ರದ ಖ್ಯಾತ ಛಾಯಾಗ್ರಾಹಕ ಸಂತೋಷ್ ಶಿವನ್ ಅವರು ತಮಗೆ ಕರೆ ಮಾಡಿ, ನಿಮ್ಮ ಮುಖದ ಯೌವನವನ್ನು ಮರೆಮಾಚಿ, ತೆರೆಯ ಮೇಲೆ ವಯಸ್ಸಾದಂತೆ ತೋರಿಸಲು ಕ್ಯಾಮೆರಾ ವರ್ಕ್ ಮತ್ತು ಲೈಟಿಂಗ್ ಮೂಲಕ ಸಾಕಷ್ಟು ಕಷ್ಟಪಡಬೇಕಾಯಿತು ಎಂದು ತಮಾಷೆಯಾಗಿ ಕ್ಷಮೆಯಾಚಿಸಿದ್ದನ್ನು ಭಾಗ್ಯಶ್ರೀ ನೆನಪಿಸಿಕೊಂಡಿದ್ದಾರೆ. ಇದನ್ನು ತಮಗೆ ಸಿಕ್ಕ ಬಹುದೊಡ್ಡ ಪ್ರಶಂಸೆ ಎಂದು ಅವರು ಭಾವಿಸಿದ್ದಾರೆ.
ವಯಸ್ಸಿನ ಅಂತರದ ಚರ್ಚೆಗಿಂತಲೂ ಜೀಜಾಬಾಯಿ ಅವರಂತಹ ವೀರ ಮಾತೆಯ ಪಾತ್ರಕ್ಕೆ ನ್ಯಾಯ ಒದಗಿಸುವುದು ತಮಗೆ ಮುಖ್ಯವಾಗಿತ್ತು ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಅಂದಹಾಗೆ, ಭಾಗ್ಯಶ್ರೀ ಅವರು ಮಹಾರಾಷ್ಟ್ರದ ಸಾಂಗ್ಲಿಯ ರಾಜಮನೆತನಕ್ಕೆ ಸೇರಿದವರಾಗಿದ್ದು, ಈ ಐತಿಹಾಸಿಕ ಹಿನ್ನೆಲೆ ಅವರಿಗೆ ಈ ಪಾತ್ರವನ್ನು ಮತ್ತಷ್ಟು ಆಪ್ತವಾಗಿಸಿದೆ.
ಮೇ 1 ರಂದು ಬಿಡುಗಡೆಯಾದ ‘ರಾಜಾ ಶಿವಾಜಿ’ ಚಿತ್ರದಲ್ಲಿ ರಿತೇಶ್ ದೇಶ್ಮುಖ್ ಶಿವಾಜಿ ಮಹಾರಾಜರಾಗಿ ನಟಿಸಿದ್ದು, ಸಂಜಯ್ ದತ್, ಅಭಿಷೇಕ್ ಬಚ್ಚನ್, ವಿದ್ಯಾ ಬಾಲನ್, ಜೆನಿಲಿಯಾ ಮತ್ತು ಫರ್ದೀನ್ ಖಾನ್ ಸೇರಿದಂತೆ ದೊಡ್ಡ ತಾರಾಬಳಗವೇ ಈ ಚಿತ್ರದಲ್ಲಿದೆ. ನಟ ಸಲ್ಮಾನ್ ಖಾನ್ ಕೂಡ ಈ ಸಿನಿಮಾದಲ್ಲಿ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
