ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ಸ್ವಂತ ಮನೆ ಕಟ್ಟಿಸಿ, ಸಣ್ಣಪುಟ್ಟ ತಾಂತ್ರಿಕ ಕಾರಣಗಳಿಂದಾಗಿ ವಾಸವಿರುವ ಪ್ರಮಾಣಪತ್ರ (Occupancy Certificate – OC) ಸಿಗದೇ ಒದ್ದಾಡುತ್ತಿದ್ದ ಲಕ್ಷಾಂತರ ಜನರಿಗೆ ರಾಜ್ಯ ಸರ್ಕಾರ ಮಹತ್ವದ ಸಮಾಧಾನಕರ ಸುದ್ದಿ ನೀಡಿದೆ. ಹೊಸದಾಗಿ ರಚನೆಯಾಗಿರುವ ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (Greater Bengaluru Authority – GBA), ಕಟ್ಟಡ ಬೈಲಾಗಳಲ್ಲಿನ ಸೆಟ್ ಬ್ಯಾಕ್ ಉಲ್ಲಂಘನಾ ಮಿತಿಯನ್ನು ಶೇ. 5 ರಿಂದ ಶೇ. 15 ಕ್ಕೆ ಏರಿಸಲು ಕರಡು ಅಧಿಸೂಚನೆ ಹೊರಡಿಸಿದೆ.
ಏನಿದು ಹೊಸ ನಿಯಮ? ಯಾಕಿಷ್ಟು ಮಹತ್ವ?
ಬೆಂಗಳೂರಿನಲ್ಲಿ ಮನೆ ಕಟ್ಟುವಾಗ ಸೈಟ್‌ನ ಸುತ್ತಲೂ ಬಿಡಬೇಕಾದ ಜಾಗವನ್ನು (Setback) ಸ್ವಲ್ಪ ಹೆಚ್ಚು ಒತ್ತುವರಿ ಮಾಡಿದರೂ ಅದನ್ನು ಅಕ್ರಮ ಎಂದು ಪರಿಗಣಿಸಲಾಗುತ್ತಿತ್ತು. ಈ ಹಿಂದೆ ಕೇವಲ ಶೇ. 5 ರಷ್ಟು ವ್ಯತ್ಯಾಸಕ್ಕೆ ಮಾತ್ರ ದಂಡ ಕಟ್ಟಿ ಸಕ್ರಮ ಮಾಡಲು ಅವಕಾಶವಿತ್ತು. ಆದರೆ, ನಗರದ ಸುಮಾರು 3 ರಿಂದ 3.5 ಲಕ್ಷ ಆಸ್ತಿಗಳು ಈ ಮಿತಿಗಿಂತ ಹೆಚ್ಚು ಉಲ್ಲಂಘನೆ ಮಾಡಿದ್ದವು.
ಇತ್ತೀಚೆಗೆ ಸುಪ್ರೀಂಕೋರ್ಟ್ ನೀಡಿದ ಆದೇಶದಂತೆ C ಇಲ್ಲದ ಮನೆಗಳಿಗೆ ವಿದ್ಯುತ್ ಮತ್ತು ನೀರಿನ ಸಂಪರ್ಕ ಕಡಿತಗೊಳಿಸುವ ಭೀತಿ ಎದುರಾಗಿತ್ತು. ಈಗ ಸರ್ಕಾರದ ಈ ಹೊಸ ಹೆಜ್ಜೆಯಿಂದಾಗಿ ಅಂತಹ ಲಕ್ಷಾಂತರ ಮನೆಗಳಿಗೆ ಅಧಿಕೃತವಾಗಿ OC ಭಾಗ್ಯ ಸಿಗಲಿದೆ.
ಜಿಬಿಎ (GBA) ತಿದ್ದುಪಡಿಯ ಪ್ರಮುಖ ಮುಖ್ಯಾಂಶಗಳು:
ಉಲ್ಲಂಘನೆ ಮಿತಿ ಏರಿಕೆ: 500 ಚದರ ಮೀಟರ್‌ವರೆಗಿನ ನಿವೇಶನಗಳಲ್ಲಿ ನಿರ್ಮಿಸಲಾದ 15 ಮೀಟರ್‌ಗಿಂತ ಕಡಿಮೆ ಎತ್ತರದ ಕಟ್ಟಡಗಳಿಗೆ ಶೇ. 15 ರಷ್ಟು ಸೆಟ್ ಬ್ಯಾಕ್ ಉಲ್ಲಂಘನೆಗೆ ಸಕ್ರಮದ ಅವಕಾಶ ನೀಡಲಾಗಿದೆ.
ದಂಡದ ಹೊಸ ಲೆಕ್ಕಾಚಾರ: ಇನ್ನು ಮುಂದೆ ಕಟ್ಟಡದ ನಿರ್ಮಾಣ ವೆಚ್ಚದ ಬದಲಾಗಿ ಆಸ್ತಿಯ ಮಾರ್ಗಸೂಚಿ ಮೌಲ್ಯದ (Guidance Value) ಆಧಾರದ ಮೇಲೆ ದಂಡ ವಿಧಿಸಲಾಗುತ್ತದೆ.
ನಿವಾಸಿ ಕಟ್ಟಡಗಳು: ಶೇ. 3 ರಿಂದ 10 ರಷ್ಟು ದಂಡ.
ವಾಣಿಜ್ಯ ಕಟ್ಟಡಗಳು: ಶೇ. 6 ರಿಂದ 12 ರಷ್ಟು ದಂಡ.
ಎತ್ತರದಲ್ಲೂ ವಿನಾಯಿತಿ: ಕಟ್ಟಡದ ಒಟ್ಟು ಎತ್ತರದಲ್ಲಿ ಶೇ. 7.5 ರಷ್ಟು ವ್ಯತ್ಯಾಸವಿದ್ದರೆ ಅದನ್ನು ಸಕ್ರಮಗೊಳಿಸಬಹುದು. ಆದರೆ ಹೆಚ್ಚುವರಿ ಮಹಡಿಗಳನ್ನು (Floor) ಕಟ್ಟುವುದಕ್ಕೆ ಈ ನಿಯಮ ಅನ್ವಯಿಸುವುದಿಲ್ಲ.
ಬಿ-ಖಾತೆ ಟು ಎ-ಖಾತೆ: ಈ ಕ್ರಮದಿಂದಾಗಿ ಲಕ್ಷಾಂತರ ಬಿ-ಖಾತೆ ಆಸ್ತಿಗಳು ಎ-ಖಾತೆಯಾಗಿ ಬದಲಾಗಲು ದಾರಿ ಸುಗಮವಾಗಲಿದ್ದು, ಸರ್ಕಾರಕ್ಕೂ ದೊಡ್ಡ ಮೊತ್ತದ ಆದಾಯ ಹರಿದುಬರಲಿದೆ.
ಸಾರ್ವಜನಿಕರ ಗಮನಕ್ಕೆ: ಸಲಹೆ ನೀಡಲು ಅವಕಾಶ
ಈ ಹೊಸ ಕರಡು ಅಧಿಸೂಚನೆಗೆ ಸಂಬಂಧಿಸಿದಂತೆ ಸಾರ್ವಜನಿಕರು ತಮ್ಮ ಆಕ್ಷೇಪಣೆ ಅಥವಾ ಸಲಹೆಗಳನ್ನು ಸಲ್ಲಿಸಲು ಏಪ್ರಿಲ್ 30, 2026 ರವರೆಗೆ ಕಾಲಾವಕಾಶ ನೀಡಲಾಗಿದೆ. ಸಾರ್ವಜನಿಕರ ಪ್ರತಿಕ್ರಿಯೆಗಳನ್ನು ಗಮನಿಸಿ ಸರ್ಕಾರವು ಈ ನಿಯಮವನ್ನು ಅಂತಿಮಗೊಳಿಸಲಿದೆ.
