ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ಒಂದು ನೆಮ್ಮದಿಯಾದ ಬಾಡಿಗೆ ಮನೆ ಹುಡುಕುವುದು ಈಗ ದೊಡ್ಡ ಸಾಹಸವೇ ಸರಿ. ಬ್ರೋಕರ್ಗಳ ಕಿರಿಕಿರಿ ಮತ್ತು ಮನೆ ಮಾಲೀಕರ ವಿಚಿತ್ರ ಡಿಮಾಂಡ್ಗಳಿಂದ ಹೈರಾಣಾದ ವ್ಯಕ್ತಿಯೊಬ್ಬರು, ಈಗ ಸೋಶಿಯಲ್ ಮೀಡಿಯಾದಲ್ಲಿ ನೀಡಿರುವ ಬಂಪರ್ ಆಫರ್ ಇಂಟರ್ನೆಟ್ನಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ
ಏನಿದು ಬಾಡಿಗೆ ಚಾಲೆಂಜ್?
ಮನೆ ಹುಡುಕಿ ಸುಸ್ತಾದ ವ್ಯಕ್ತಿಯೊಬ್ಬರು ರೆಡಿಟ್ (Reddit) ವೇದಿಕೆಯಲ್ಲಿ Find me a 3bhk I’ll pay you half month rent ಎಂಬ ಶೀರ್ಷಿಕೆಯಡಿ ಪೋಸ್ಟ್ ಹಾಕಿದ್ದಾರೆ. ಅವರ ಈ ಹತಾಶೆಯ ಹಿಂದಿನ ಪ್ರಮುಖ ಅಂಶಗಳು ಇಲ್ಲಿವೆ:
ಯಾರೇ ಆಗಿರಲಿ ಉಡುಗೊರೆ ನಿಮಗೇ: ನೀವು ಯಾರೇ ಆಗಿರಲಿ, ನನಗೆ ಒಂದು ಒಳ್ಳೆಯ ಮನೆ ಕೊಡಿಸಿದರೆ ಮತ್ತು ನಾನು ಆ ಮನೆಗೆ ಶಿಫ್ಟ್ ಆದರೆ, ನನ್ನ ಅರ್ಧ ತಿಂಗಳ ಬಾಡಿಗೆಯನ್ನು ನಿಮಗೆ ಉಡುಗೊರೆಯಾಗಿ ನೀಡುತ್ತೇನೆ” ಎಂದು ಅವರು ಘೋಷಿಸಿದ್ದಾರೆ.
ಹುಡುಕುತ್ತಿರುವ ಏರಿಯಾ ಮತ್ತು ಬಜೆಟ್: ಕೋರಮಂಗಲ ಅಥವಾ ಎಚ್ಎಸ್ಆರ್ ಲೇಔಟ್ನಂತಹ ಪ್ರೈಮ್ ಏರಿಯಾಗಳಲ್ಲಿ 3BHK ಮನೆಗಾಗಿ ಇವರು 45,000 ರಿಂದ 48,000 ರೂ. ಬಜೆಟ್ ನಿಗದಿಪಡಿಸಿದ್ದಾರೆ.
ನೇರ ಭೇಟಿಯ ಭರವಸೆ: ನಾವು ಮುಖಾಮುಖಿಯಾಗಿ ಭೇಟಿಯಾಗಬಹುದು, ನೀವು ನನ್ನ ಜೊತೆ ಮನೆ ನೋಡಲು ಬರಬಹುದು. ಡೀಲ್ ಫೈನಲ್ ಆದ ಕೂಡಲೇ ಹಣ ನಿಮ್ಮ ಕೈ ಸೇರಲಿದೆ ಎಂದು ಬರೆದುಕೊಂಡಿದ್ದಾರೆ.
ನೆಟ್ಟಿಗರ ರಿಯಾಕ್ಷನ್: ಬೆಂಗಳೂರಲ್ಲಿ ಇದು ಅಸಾಧ್ಯ
ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆಯೇ ಅನೇಕರು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಕೋರಮಂಗಲದಲ್ಲಿ 50 ಸಾವಿರಕ್ಕಿಂತ ಕಡಿಮೆ ಬೆಲೆಗೆ 3BHK ಸಿಗುವುದು ಕಷ್ಟ. ಯಾವುದಾದರೂ ಇಂಡಿಪೆಂಡೆಂಟ್ ಮನೆಗಳನ್ನು ಹುಡುಕಿದರೆ ಮಾತ್ರ ನಿಮ್ಮ ಆಸೆ ಈಡೇರಬಹುದು” ಎಂದು ಸಲಹೆ ನೀಡಿದ್ದಾರೆ. ಇನ್ನೂ ಕೆಲವರು, ಇಂತಹ ಬೆಲೆಯಲ್ಲಿ ಈ ಏರಿಯಾಗಳಲ್ಲಿ ಮನೆ ಇದ್ದರೆ ನಮಗೂ ಹೇಳಿ, ನಾವು ಕುತೂಹಲದಿಂದ ಕಾಯುತ್ತಿದ್ದೇವೆ ಎಂದು ವ್ಯಂಗ್ಯವಾಡಿದ್ದಾರೆ.
ಮನೆ ನೋಡಲು ಮೊದಲೇ ಹಣ ಕೊಡಬೇಕಾ?
ಬೆಂಗಳೂರಿನ ಮತ್ತೊಂದು ವಿಲಕ್ಷಣ ಘಟನೆಯಲ್ಲಿ, ಮನೆ ಮಾಲೀಕರೊಬ್ಬರು ಅಪಾರ್ಟ್ಮೆಂಟ್ ತೋರಿಸುವುದಕ್ಕೂ ಮುನ್ನವೇ ಒಂದು ತಿಂಗಳ ಬಾಡಿಗೆಯನ್ನು ಮುಂಗಡವಾಗಿ ನೀಡಬೇಕು ಎಂಬ ಷರತ್ತು ವಿಧಿಸಿರುವ ಪ್ರಕರಣ ಬೆಳಕಿಗೆ ಬಂದಿದೆ. ಹೈ-ರೈಸ್ ಬಿಲ್ಡಿಂಗ್ ಒಂದರ ಮಾಲೀಕರು, ಸೆಕ್ಯೂರಿಟಿ ಗಾರ್ಡ್ ಮೂಲಕ ಈ ಬೇಡಿಕೆ ಇಟ್ಟಿರುವುದು ಹೊಸ ವೃತ್ತಿಪರರನ್ನು ಬೆಚ್ಚಿಬೀಳಿಸಿದೆ.
