ಸೀಗಡಿ ಎಂದರೆ ಸಾಕು ಸಮುದ್ರ ಆಹಾರ ಪ್ರಿಯರ ಬಾಯಲ್ಲಿ ನೀರೂರುತ್ತದೆ. ಅತ್ಯಂತ ವೇಗವಾಗಿ ಮತ್ತು ರುಚಿಕರವಾಗಿ ಬೇಯಿಸಬಹುದಾದ ಸೀಗಡಿಯಿಂದ ಅನೇಕ ಬಗೆಯ ಖಾದ್ಯಗಳನ್ನು ತಯಾರಿಸಬಹುದು. ಸಾಮಾನ್ಯವಾಗಿ ಬೆಂಗಾಲಿ ಶೈಲಿಯ ಝಿಂಗಾ (ಸೀಗಡಿ) ಖಾದ್ಯಗಳು ಸಾಸಿವೆ ಹಾಗೂ ಲಘು ಮಸಾಲೆಯಿಂದ ಕೂಡಿರುತ್ತವೆ. ಆದರೆ ದಕ್ಷಿಣ ಭಾರತದ ಖಾರವಾದ ‘ಪೊಡಿ ಮಸಾಲೆ’ ಬಳಸಿ ಸೀಗಡಿಯನ್ನು ತಯಾರಿಸಿದರೆ ಅದರ ರುಚಿಯೇ ಬೇರೆ.
ಹುರಿದ ಬೇಳೆಗಳು ಮತ್ತು ಒಣ ಮೆಣಸಿನಕಾಯಿಯಿಂದ ತಯಾರಿಸಿದ ಪೊಡಿ ಮಸಾಲೆ ಸೀಗಡಿಯೊಂದಿಗೆ ಬೆರೆತಾಗ ಅದಕ್ಕೆ ವಿಶಿಷ್ಟವಾದ ಕಂಪು ಮತ್ತು ರುಚಿ ಸಿಗುತ್ತದೆ. ನೀವೇನಾದರೂ ಮನೆಯಲ್ಲಿ ಈ ‘ಝಿಂಗಾ ಪೊಡಿ’ ತಯಾರಿಸಲು ಬಯಸಿದರೆ ಅದರ ಸುಲಭ ವಿಧಾನ ಇಲ್ಲಿದೆ.
ಬೇಕಾಗುವ ಸಾಮಗ್ರಿಗಳು: ಸೀಗಡಿ, ಅರಿಶಿನ, ಅಚ್ಚಕಾರದ ಪುಡಿ, ಉಪ್ಪು, ಲಿಂಬೆ ರಸ, ಎಣ್ಣೆ, ಬೆಣ್ಣೆ, ಸಾಸಿವೆ, ಸಿಪ್ಪೆ ಸಮೇತ ಜಜ್ಜಿದ ಬೆಳ್ಳುಳ್ಳಿ, ಕರಿಬೇವು, ಈರುಳ್ಳಿ, ಸೋಂಪು, ಒಣ ಕಾಶ್ಮೀರಿ ಮೆಣಸಿನಕಾಯಿ, ತೆಂಗಿನ ತುರಿ, ಪೊಡಿ ಮಸಾಲೆ, ಕಂದು ಸಕ್ಕರೆ (ಬ್ರೌನ್ ಶುಗರ್), ಹುಣಸೆ ಹಣ್ಣಿನ ರಸ ಮತ್ತು ಕೊತ್ತಂಬರಿ ಸೊಪ್ಪು.
ತಯಾರಿಸುವ ವಿಧಾನ: ಮೊದಲು ಸೀಗಡಿಗೆ ಅರಿಶಿನ, ಖಾರದ ಪುಡಿ, ಉಪ್ಪು ಮತ್ತು ಲಿಂಬೆ ರಸ ಸೇರಿಸಿ ಚೆನ್ನಾಗಿ ಬೆರೆಸಿ 15 ನಿಮಿಷಗಳ ಕಾಲ ನೆನೆಯಲು ಬಿಡಿ. ಒಂದು ಬಾಣಲೆಯಲ್ಲಿ ಎಣ್ಣೆ ಮತ್ತು ಬೆಣ್ಣೆಯನ್ನು ಬಿಸಿ ಮಾಡಿ ಸಾಸಿವೆ ಸಿಡಿಸಿ. ನಂತರ ಜಜ್ಜಿದ ಬೆಳ್ಳುಳ್ಳಿ, ಕರಿಬೇವು ಮತ್ತು ಸಣ್ಣಗೆ ಹೆಚ್ಚಿದ ಈರುಳ್ಳಿ ಸೇರಿಸಿ ಹೊಂಬಣ್ಣ ಬರುವವರೆಗೆ ಹುರಿಯಿರಿ.
ಇದಕ್ಕೆ ಸೋಂಪು, ಕಾಶ್ಮೀರಿ ಮೆಣಸಿನಕಾಯಿ ಹಾಗೂ ಜಜ್ಜಿದ ಕೆಂಪು ಮೆಣಸಿನಕಾಯಿ ಸೇರಿಸಿ ಪರಿಮಳ ಬರುವವರೆಗೆ ಬಾಡಿಸಿ. ಬಳಿಕ ಮ್ಯಾರಿನೇಟ್ ಮಾಡಿದ ಸೀಗಡಿಗಳನ್ನು ಸೇರಿಸಿ 2-3 ನಿಮಿಷ ಬೇಯಿಸಿ. ಸೀಗಡಿ ಬಣ್ಣ ಬದಲಾದಾಗ ತೆಂಗಿನ ತುರಿ, ಪೊಡಿ ಮಸಾಲೆ ಮತ್ತು ಸ್ವಲ್ಪ ಕಂದು ಸಕ್ಕರೆ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಕೊನೆಯಲ್ಲಿ ಹುಣಸೆ ಹಣ್ಣಿನ ರಸ ಸುರಿದು ಮಿಶ್ರಣವು ಗಟ್ಟಿಯಾಗಿ ಹೊಳಪು ಬರುವವರೆಗೆ ಬೇಯಿಸಿ. ತಾಜಾ ಕೊತ್ತಂಬರಿ ಸೊಪ್ಪು ಮತ್ತು ಕರಿಬೇವು ಉದುರಿಸಿದರೆ ಬಿಸಿ ಬಿಸಿ ಝಿಂಗಾ ಪೊಡಿ ಸವಿಯಲು ಸಿದ್ಧ.
ಇದನ್ನು ಬಿಸಿ ಬಿಸಿ ಅನ್ನ, ನೀರ್ ದೋಸೆ ಅಥವಾ ಪರೋಟ ಜೊತೆ ಸವಿಯಲು ಅತ್ಯುತ್ತಮವಾಗಿರುತ್ತದೆ.
