ದೇಹದ ಸ್ವಚ್ಛತೆಯ ವಿಷಯಕ್ಕೆ ಬಂದಾಗ ನಾವು ಮುಖ, ಕೈ, ಕಾಲು ಹಾಗೂ ಕೂದಲಿನ ಕಡೆಗೆ ತೋರುವ ಕಾಳಜಿಯನ್ನು ದೇಹದ ಕೆಲವು ಸೂಕ್ಷ್ಮ ಭಾಗಗಳಿಗೆ ತೋರುವುದಿಲ್ಲ. ಅಂತಹ ಭಾಗಗಳಲ್ಲಿ ಹೊಕ್ಕಳು (Navel) ಕೂಡ ಒಂದು. ಸ್ನಾನ ಮಾಡುವಾಗ ಹೊಕ್ಕಳನ್ನು ಸರಿಯಾಗಿ ಸ್ವಚ್ಛಗೊಳಿಸದೆ ಇದ್ದರೆ, ಅಲ್ಲಿ ಸುಲಭವಾಗಿ ಕೊಳೆ ತುಂಬಿಕೊಳ್ಳುತ್ತದೆ. ಹೊಕ್ಕಳಿನ ಭಾಗವು ತೇವ ಮತ್ತು ಕತ್ತಲೆಯಿಂದ ಕೂಡಿರುವುದರಿಂದ ಬ್ಯಾಕ್ಟೀರಿಯಾಗಳು ಹಾಗೂ ಶಿಲೀಂಧ್ರಗಳು (Fungi) ಬೆಳೆಯಲು ಇದು ಸೂಕ್ತ ಜಾಗವಾಗಿದೆ. ಹೊಕ್ಕಳಿನಲ್ಲಿ ಕೊಳೆಯನ್ನು ಹಾಗೆಯೇ ಬಿಟ್ಟರೆ ದೇಹದ ಮೇಲಾಗುವ ಪ್ರಮುಖ ಪರಿಣಾಮಗಳ ಕುರಿತಾದ ಮಾಹಿತಿ ಇಲ್ಲಿದೆ.
ದುರ್ವಾಸನೆ ಮತ್ತು ಸೋಂಕು (Infection):
ಹೊಕ್ಕಳಿನಲ್ಲಿ ಧೂಳು, ಸತ್ತ ಚರ್ಮದ ಕೋಶಗಳು ಮತ್ತು ಬೆವರು ಒಟ್ಟಾಗಿ ಸೇರಿದಾಗ ಅಲ್ಲಿ ಬ್ಯಾಕ್ಟೀರಿಯಾಗಳ ಉತ್ಪತ್ತಿ ಹೆಚ್ಚಾಗುತ್ತದೆ. ಇದರಿಂದಾಗಿ ಹೊಕ್ಕಳಿನಿಂದ ತೀವ್ರವಾದ ದುರ್ವಾಸನೆ ಬರಲು ಆರಂಭವಾಗುತ್ತದೆ. ಇದನ್ನು ಸರಿಯಾದ ಸಮಯಕ್ಕೆ ಗಮನಿಸದೆ ಹೋದರೆ ಅದು ‘ಅಂಪ್ಲಿಕಲ್ ಇನ್ಫೆಕ್ಷನ್’ ಆಗಿ ಬದಲಾಗಿ, ಆ ಭಾಗದಲ್ಲಿ ಕೆಂಪಾಗುವುದು, ಉರಿ ಹಾಗೂ ಕೀವು ತುಂಬಿಕೊಳ್ಳುವ ಸಾಧ್ಯತೆ ಇರುತ್ತದೆ.
ಅತಿಯಾದ ತುರಿಕೆ ಮತ್ತು ನೋವು:
ಬ್ಯಾಕ್ಟೀರಿಯಾ ಅಥವಾ ಫಂಗಲ್ ಸೋಂಕು ತೀವ್ರವಾದಾಗ ಹೊಕ್ಕಳಿನ ಸುತ್ತಮುತ್ತಲಿನ ಚರ್ಮದಲ್ಲಿ ಅತಿಯಾದ ತುರಿಕೆ ಕಾಣಿಸಿಕೊಳ್ಳುತ್ತದೆ. ಚರ್ಮವು ಒಣಗಿ ಹೊಟ್ಟು ಏಳಲು ಪ್ರಾರಂಭವಾಗಬಹುದು. ಕೆಲವು ಸಂದರ್ಭಗಳಲ್ಲಿ ಹೊಕ್ಕಳಿನ ಒಳಗಿನಿಂದ ಸಣ್ಣದಾಗಿ ನೋವು ಕಾಣಿಸಿಕೊಂಡು, ಮುಟ್ಟಿದಾಗ ತೀವ್ರವಾದ ಉರಿ ಉಂಟಾಗಬಹುದು.
ಹೊಕ್ಕಳಿನ ಕಲ್ಲು ಅಥವಾ ಒಂಫಾಲಿತ್ (Omphalolith):
ಹೊಕ್ಕಳಿನಲ್ಲಿರುವ ಕೊಳೆಯನ್ನು ವರ್ಷಗಟ್ಟಲೆ ಸ್ವಚ್ಛಗೊಳಿಸದೆ ಹಾಗೆಯೇ ಬಿಟ್ಟರೆ, ಆ ಕೊಳೆಯು ದಿನಕಳೆದಂತೆ ಗಟ್ಟಿಯಾಗುತ್ತಾ ಹೋಗುತ್ತದೆ. ಇದು ಕೊನೆಗೆ ಕಲ್ಲಿನಂತಹ ರೂಪವನ್ನು ಪಡೆದುಕೊಳ್ಳುತ್ತದೆ. ವೈದ್ಯಕೀಯ ಲೋಕದಲ್ಲಿ ಇದನ್ನು ಒಂಫಾಲಿತ್ ಅಥವಾ ‘ನೇವಲ್ ಸ್ಟೋನ್’ ಎಂದು ಕರೆಯಲಾಗುತ್ತದೆ. ಇಂತಹ ಪರಿಸ್ಥಿತಿ ಬಂದಾಗ ಸೋಂಕು ತೀವ್ರವಾಗಿ, ಶಸ್ತ್ರಚಿಕಿತ್ಸೆಯ ಮೂಲಕವೇ ಅದನ್ನು ಹೊರತೆಗೆಯಬೇಕಾಗಬಹುದು.
ಸ್ವಚ್ಛಗೊಳಿಸುವುದು ಹೇಗೆ?
ಹೊಕ್ಕಳನ್ನು ಸ್ವಚ್ಛಗೊಳಿಸುವುದು ಅತ್ಯಂತ ಸುಲಭ. ಸ್ನಾನ ಮಾಡುವಾಗ ಮೃದುವಾದ ಸೋಪು ಮತ್ತು ಉಗುರುಬೆಚ್ಚಗಿನ ನೀರನ್ನು ಬಳಸಿ ಹಗುರವಾಗಿ ಸ್ವಚ್ಛಗೊಳಿಸಬೇಕು. ಯಾವುದೇ ಕಾರಣಕ್ಕೂ ಉಗುರುಗಳಿಂದ ಅಥವಾ ಚೂಪಾದ ವಸ್ತುಗಳಿಂದ ಕೊಳೆಯನ್ನು ಕೆರೆಯಲು ಹೋಗಬಾರದು. ಸ್ನಾನದ ನಂತರ ಇಯರ್ ಬಡ್ಸ್ ಬಳಸಿ ಹೊಕ್ಕಳಿನ ಒಳಗಿನ ನೀರನ್ನು ಒರೆಸಿ ಒಣದಾಗಿ ಇಟ್ಟುಕೊಳ್ಳಬೇಕು. ವಾರಕ್ಕೆ ಒಮ್ಮೆಯಾದರೂ ತೆಂಗಿನ ಎಣ್ಣೆಯ ಒಂದೆರಡು ಹನಿಗಳನ್ನು ಹೊಕ್ಕಳಿಗೆ ಹಾಕುವುದರಿಂದ ಕೊಳೆ ಸುಲಭವಾಗಿ ಸಾಫ್ಟ್ ಆಗಿ ಹೊರಬರುತ್ತದೆ ಮತ್ತು ಚರ್ಮವು ಆರೋಗ್ಯವಾಗಿರುತ್ತದೆ.
