ಬಿಸಿಸಿಐ ಹೊಸ ರಣತಂತ್ರ: ಬುಮ್ರಾ ಇಲ್ಲದಿದ್ದರೂ ತಂಡವನ್ನು ಬಲಿಷ್ಠವನ್ನಾಗಿಡಲು ಆ ಆಟಗಾರರಿಗೆ ಮಣೆ!

ನವದೆಹಲಿ-ಜಸ್ಪ್ರೀತ್ ಬುಮ್ರಾ ಅವರ ನಿರಂತರ ಗಾಯದ ಸಮಸ್ಯೆಗಳು ಮತ್ತು ಕೆಲಸದ ಹೊರೆ (Workload Management) ನಿರ್ವಹಣೆಯ ಕಾರಣದಿಂದಾಗಿ, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯು (BCCI) ಟೆಸ್ಟ್ ತಂಡದ ವೇಗದ ಬೌಲಿಂಗ್ ವಿಭಾಗದಲ್ಲಿ ದೂರಗಾಮಿ ಪರಿವರ್ತನೆಗೆ ಯೋಜನೆ ರೂಪಿಸಿದೆ.

ಭಾರತ ತಂಡವು ಮುಂಬರುವ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ (WTC) ಫೈನಲ್ ತಲುಪುವಲ್ಲಿ ವಿಫಲವಾದರೆ, ತಂಡದ ಭವಿಷ್ಯದ ಹಿತದೃಷ್ಟಿಯಿಂದ ತುಷಾರ್ ದೇಶಪಾಂಡೆ, ಗುರ್ಜಪ್ನೀತ್ ಸಿಂಗ್ ಮತ್ತು ನಚಿಕೇತ್ ಭೂಟೆ ಅವರಂತಹ ಯುವ ಮತ್ತು ಪ್ರತಿಭಾನ್ವಿತ ವೇಗಿಗಳಿಗೆ ಮಣೆ ಹಾಕಲು ಬಿಸಿಸಿಐ ಗಂಭೀರ ಚಿಂತನೆ ನಡೆಸಿದೆ.

2024-25ರ ಆಸ್ಟ್ರೇಲಿಯಾ ಪ್ರವಾಸದಲ್ಲಿ (1-3 ಸರಣಿ ಸೋಲು) ಸ್ಪಷ್ಟವಾಗಿ ಕಂಡುಬಂದಂತೆ, ಭಾರತ ತಂಡವು ಕೇವಲ ಜಸ್ಪ್ರೀತ್ ಬುಮ್ರಾ ಅವರನ್ನೇ ನೆಚ್ಚಿಕೊಳ್ಳುವುದರಿಂದ ಹೊರಬರಬೇಕಾದ ಅನಿವಾರ್ಯತೆ ಎದುರಾಗಿದೆ.

ಯುವ ವೇಗಿಗಳ ಮೇಲೆ ಬಿಸಿಸಿಐ ನಿಗಾ

ಪಿಚ್‌ಗಳಿಂದ ಉತ್ತಮ ಬೌನ್ಸ್ ಮತ್ತು ವೇಗವನ್ನು ಉತ್ಪಾದಿಸಬಲ್ಲ ತುಷಾರ್ ದೇಶಪಾಂಡೆ, ಗುರ್ಜಪ್ನೀತ್ ಸಿಂಗ್ ಮತ್ತು ವಿದರ್ಭದ ನಚಿಕೇತ್ ಭೂಟೆ ಅವರ ಪ್ರದರ್ಶನದ ಮೇಲೆ ಬಿಸಿಸಿಐ ತೀವ್ರ ಕಣ್ಣಿಟ್ಟಿದೆ.

WTC ಫೈನಲ್ ರೇಸ್‌ನಿಂದ ಭಾರತ ಅಧಿಕೃತವಾಗಿ ಹೊರಗುಳಿದರೆ, ನ್ಯೂಜಿಲೆಂಡ್ ಪ್ರವಾಸದ ವೇಳೆಯೇ ಈ ಯುವ ಬೌಲರ್‌ಗಳಿಗೆ ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅವಕಾಶ ಕಲ್ಪಿಸಿ ಪರೀಕ್ಷಿಸಲು ಮ್ಯಾನೇಜ್‌ಮೆಂಟ್ ಯೋಜನೆ ರೂಪಿಸಿದೆ.

ವೇಗದ ಬೌಲಿಂಗ್ ವಿಭಾಗದಲ್ಲಿ ಕೊರತೆ

ಸ್ಟಾರ್ ವೇಗಿ ಜಸ್ಪ್ರೀತ್ ಬುಮ್ರಾ ಭಾರತೀಯ ಟೆಸ್ಟ್ ದಾಳಿಯ ಪ್ರಮುಖ ಅಸ್ತ್ರವಾಗಿದ್ದು ಮುಂದುವರಿಯಲಿದ್ದಾರೆ. ಆದರೆ, ಪದೇ ಪದೇ ಕಾಡುತ್ತಿರುವ ಗಾಯದ ಸಮಸ್ಯೆಗಳು ಮತ್ತು ಮುಂಬರುವ ಏಕದಿನ ವಿಶ್ವಕಪ್‌ನಂತಹ ಪ್ರಮುಖ ಟೂರ್ನಿಗಳನ್ನು ದೃಷ್ಟಿಯಲ್ಲಿಟ್ಟುಕೊಂಡು ಅವರ ಲಭ್ಯತೆಯನ್ನು ಸೀಮಿತಗೊಳಿಸಬೇಕಾದ ಅನಿವಾರ್ಯತೆ ಇದೆ.

ಮತ್ತೊಂದೆಡೆ, ಮೊಹಮ್ಮದ್ ಸಿರಾಜ್ ಏಕಾಂಗಿಯಾಗಿ ಹೋರಾಡುತ್ತಿದ್ದು, ಬುಮ್ರಾ ಮತ್ತು ಸಿರಾಜ್ ಹೊರತುಪಡಿಸಿ ಎದುರಾಳಿ ಬ್ಯಾಟ್ಸ್‌ಮನ್‌ಗಳಿಗೆ ನಿರಂತರವಾಗಿ ನಡುಕ ಹುಟ್ಟಿಸಬಲ್ಲ ಮತ್ತೊಬ್ಬ ಘಟಾನುಘಟಿ ವೇಗಿಯ ಕೊರತೆ ತಂಡದಲ್ಲಿದೆ.

ಇನ್ನು ಮೊಹಮ್ಮದ್ ಶಮಿ ಅವರು ರಣಜಿ ಟ್ರೋಫಿಯಲ್ಲಿ ಬಂಗಾಳ ಪರ ಅದ್ಭುತ ಪ್ರದರ್ಶನ ನೀಡಿ ಮರಳಿದ್ದರೂ, ಆಯ್ಕೆದಾರರ ತಕ್ಷಣದ ಯೋಜನೆಗಳಲ್ಲಿ ಅವರು ಕಾಣಿಸಿಕೊಳ್ಳುತ್ತಿಲ್ಲ. ಇಂಗ್ಲೆಂಡ್‌ ಪ್ರವಾಸದ ಸಂದರ್ಭದಲ್ಲೂ ಅರ್ಶ್‌ದೀಪ್ ಸಿಂಗ್ ಮುಂತಾದ ಪ್ರತಿಭೆಗಳನ್ನು ಕಡೆಗಣಿಸಿ ಅನ್ಶುಲ್ ಕಾಂಬೋಜ್ ಮತ್ತು ಔಕಿಬ್ ನಬಿ ಮುಂತಾದವರ ಪ್ರಯೋಗಗಳು ನಡೆಯುತ್ತಿರುವುದು ವೇಗದ ಬೌಲಿಂಗ್ ವಿಭಾಗದಲ್ಲಿ ಹೊಸ ನಾಯಕತ್ವ ಹಾಗೂ ಆಳದ ಅಗತ್ಯತೆಯನ್ನು ಎತ್ತಿ ತೋರಿಸುತ್ತದೆ.

ಬಿಸಿಸಿಐ ಮೂಲಗಳ ಸ್ಪಷ್ಟನೆ

“ನ್ಯೂಜಿಲೆಂಡ್ ಪ್ರವಾಸದ ಸಮಯದಲ್ಲಿಯೇ ನಾವು ಡಬ್ಲ್ಯೂಟಿಸಿ ಫೈನಲ್‌ಗೆ ತಲುಪುವ ಸಾಧ್ಯತೆ ಇಲ್ಲ ಎಂದು ಸ್ಪಷ್ಟವಾದರೆ, ತುಷಾರ್ ದೇಶಪಾಂಡೆ, ಗುರ್ಜಪ್ನೀತ್ ಸಿಂಗ್ ಮತ್ತು ನಚಿಕೇತ್ ಭೂಟೆ ಅವರಂತಹ ವೇಗಿಗಳಿಗೆ ಹೆಚ್ಚಿನ ಅವಕಾಶಗಳನ್ನು ನೀಡಬೇಕು. ಉನ್ನತ ಮಟ್ಟದಲ್ಲಿ ಇವರು ಹೇಗೆ ಸ್ಪಂದಿಸುತ್ತಾರೆ ಎಂಬುದನ್ನು ಇವರನ್ನು ಕಣಕ್ಕಿಳಿಸದೆ ಅರಿಯಲುಸಾಧ್ಯವಿಲ್ಲ” ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.

ಒಟ್ಟಾರೆಯಾಗಿ, ಭಾರತೀಯ ಟೆಸ್ಟ್ ಕ್ರಿಕೆಟ್‌ನಲ್ಲಿ ಹಿರಿಯ ಆಟಗಾರರ ಯುಗಾಂತ್ಯದ ಮುನ್ಸೂಚನೆ ಸಿಕ್ಕಿದ್ದು, ಮುಂಬರುವ ದಿನಗಳಲ್ಲಿ ಯುವ ವೇಗದ ದಳಕ್ಕೆ ಮಣೆಹಾಕುವ ಮೂಲಕ ಬಿಸಿಸಿಐ ದಿಟ್ಟ ಹೆಜ್ಜೆ ಇಡಲು ಸಜ್ಜಾಗಿದೆ.