ಆರೋಗ್ಯವಾಗಿರಲು ಪ್ರತಿದಿನ ಸ್ವಲ್ಪ ಹೊತ್ತು ನಡೆಯುವುದು ಒಳ್ಳೆಯ ಅಭ್ಯಾಸ. ಇದಕ್ಕಾಗಿ ಕೆಲವರು ಉದ್ಯಾನವನಕ್ಕೆ ಹೋಗುತ್ತಾರೆ, ಇನ್ನೂ ಕೆಲವರು ವಾಕಿಂಗ್ ಟ್ರ್ಯಾಕ್ ಬಳಸುತ್ತಾರೆ. ಇತ್ತೀಚೆಗೆ ಕಲ್ಲುಗಳನ್ನು ಹಾಕಿರುವ ಹಾದಿಯಲ್ಲಿ ಬರಿಗಾಲಿನಲ್ಲಿ ನಡೆಯುವ ಅಭ್ಯಾಸವೂ ಕೆಲವರಲ್ಲಿ ಕಂಡುಬರುತ್ತಿದೆ.
ಸಾಮಾನ್ಯ ನೆಲಕ್ಕೆ ಹೋಲಿಸಿದರೆ ಇಂತಹ ಹಾದಿಯಲ್ಲಿ ಹೆಜ್ಜೆ ಇಡುವಾಗ ಪಾದದ ಮೇಲೆ ಒತ್ತಡ ಬೇರೆ ರೀತಿಯಲ್ಲಿ ಬೀಳುತ್ತದೆ. ಪಾದದ ಸ್ನಾಯುಗಳು ಹೆಚ್ಚು ಕೆಲಸ ಮಾಡಬೇಕಾಗುತ್ತದೆ. ಜೊತೆಗೆ ಹೆಜ್ಜೆ ಇಡುವಾಗ ದೇಹದ ಸಮತೋಲನವನ್ನೂ ಕಾಪಾಡಿಕೊಳ್ಳಬೇಕು.
ಪಾದದ ಸ್ನಾಯುಗಳಿಗೆ ಕೆಲಸ
ನಾವು ದಿನನಿತ್ಯ ಹೆಚ್ಚಾಗಿ ಸಮತಟ್ಟಾದ ನೆಲದಲ್ಲೇ ನಡೆಯುತ್ತೇವೆ. ಆದರೆ ಕಲ್ಲಿನ ಹಾದಿಯಲ್ಲಿ ಒಂದೊಂದು ಹೆಜ್ಜೆಯೂ ಒಂದೇ ರೀತಿ ಇರುವುದಿಲ್ಲ. ಪಾದದ ಕೆಳಭಾಗ ಬೇರೆಬೇರೆ ರೀತಿಯಲ್ಲಿ ಚಲಿಸಬೇಕಾಗುತ್ತದೆ.
ಇದರಿಂದ ಪಾದದ ಸಣ್ಣ ಸ್ನಾಯುಗಳಿಗೂ ಕೆಲಸ ಸಿಗುತ್ತದೆ. ನಿಯಮಿತವಾಗಿ, ಮಿತವಾಗಿ ಮಾಡುವುದರಿಂದ ಪಾದದ ಬಲ ಮತ್ತು ಸ್ಥಿರತೆಗೆ ಇದು ಸಹಾಯ ಮಾಡಬಹುದು.
ಕಲ್ಲಿನ ಮೇಲೆ ನಡೆಯುವಾಗ ಎಲ್ಲೆಲ್ಲಿ ಹೆಜ್ಜೆ ಇಡಬೇಕು ಎಂಬುದನ್ನು ಗಮನಿಸಬೇಕಾಗುತ್ತದೆ. ಪಾದದ ಚಲನೆಗೆ ತಕ್ಕಂತೆ ದೇಹವನ್ನೂ ಹೊಂದಿಸಿಕೊಳ್ಳಬೇಕು.
ಹೀಗಾಗಿ ಇದು ದೇಹದ ಸಮತೋಲನ ಕಾಪಾಡಿಕೊಳ್ಳಲು ಒಂದು ರೀತಿಯ ಅಭ್ಯಾಸವಾಗಬಹುದು. ಅಸಮತಟ್ಟಾದ ಜಾಗದಲ್ಲಿ ನಡೆಯುವವರಿಗೆ ಇಂತಹ ಅಭ್ಯಾಸ ಉಪಯೋಗವಾಗುವ ಸಾಧ್ಯತೆಯಿದೆ.
ಪಾದದ ಚಲನೆ ಬದಲಾಗುತ್ತದೆ
ಶೂ ಅಥವಾ ಚಪ್ಪಲಿ ಹಾಕಿಕೊಂಡು ಸಮತಟ್ಟಾದ ರಸ್ತೆಯಲ್ಲಿ ನಡೆಯುವುದು ನಮಗೆ ಸಾಮಾನ್ಯ. ಕಲ್ಲಿನ ಹಾದಿಯಲ್ಲಿ ಮಾತ್ರ ಪಾದದ ಬೆರಳುಗಳು, ಪಾದದ ಕೆಳಭಾಗ ಮತ್ತು ಕೀಲುಗಳು ಬೇರೆಬೇರೆ ರೀತಿಯಲ್ಲಿ ಚಲಿಸಬೇಕಾಗುತ್ತದೆ.
ಇದರಿಂದ ಪಾದಕ್ಕೆ ಹೆಚ್ಚು ಚಲನೆ ಸಿಗಬಹುದು. ಆದರೆ ಅದಕ್ಕಾಗಿ ನೋವು ಸಹಿಸಿಕೊಳ್ಳುತ್ತಾ ಹೆಚ್ಚು ಹೊತ್ತು ನಡೆಯುವುದು ಸರಿಯಲ್ಲ.
ನರಗಳಿಗೆ ಒತ್ತಡ ಬೀಳುತ್ತದೆ
ಬರಿಗಾಲಿನಲ್ಲಿ ನಡೆದಾಗ ಕಲ್ಲಿನ ಮೇಲ್ಮೈ ಪಾದದ ಕೆಳಭಾಗಕ್ಕೆ ನೇರವಾಗಿ ತಾಗುತ್ತದೆ. ಹೀಗಾಗಿ ಅಲ್ಲಿ ಇರುವ ನರಗಳ ತುದಿಗಳಿಗೆ ಒತ್ತಡ ಬೀಳುತ್ತದೆ. ಇದರಿಂದ ಚುಚ್ಚುವ ಅಥವಾ ಒತ್ತಡದ ಅನುಭವ ಆಗುವುದು ಸಾಮಾನ್ಯ.
ಅಕ್ಯುಪ್ರೆಶರ್ ಮತ್ತು ರಿಫ್ಲೆಕ್ಸಾಲಜಿ ಪದ್ಧತಿಗಳಲ್ಲಿ ಪಾದದ ಕೆಲವು ಭಾಗಗಳಿಗೆ ದೇಹದ ಇತರ ಅಂಗಗಳೊಂದಿಗೆ ಸಂಬಂಧವಿದೆ ಎಂದು ಹೇಳಲಾಗುತ್ತದೆ. ಆದರೆ ಈ ಒತ್ತಡದಿಂದ ನಿರ್ದಿಷ್ಟ ಕಾಯಿಲೆ ಕಡಿಮೆಯಾಗುತ್ತದೆ ಎಂಬುದಕ್ಕೆ ಸಾಕಷ್ಟು ವೈಜ್ಞಾನಿಕ ಸಾಕ್ಷ್ಯ ಇಲ್ಲ.
ರಕ್ತಸಂಚಾರದ ಬಗ್ಗೆ ಏನು?
ನಡೆಯುವುದೇ ದೇಹಕ್ಕೆ ಉತ್ತಮ ದೈಹಿಕ ಚಟುವಟಿಕೆ. ಇದರಿಂದ ರಕ್ತಸಂಚಾರವೂ ಚುರುಕಾಗುತ್ತದೆ. ಆದರೆ ಬರಿಗಾಲಿನಲ್ಲಿ ಕಲ್ಲಿನ ಮೇಲೆ ನಡೆಯುವುದರಿಂದ ಸಾಮಾನ್ಯ ವಾಕಿಂಗ್ಗಿಂತ ರಕ್ತಸಂಚಾರ ಹೆಚ್ಚು ಸುಧಾರಿಸುತ್ತದೆ ಎಂದು ಹೇಳಲು ಸಾಕಷ್ಟು ಪುರಾವೆಗಳಿಲ್ಲ.
ಆದ್ದರಿಂದ ಇದನ್ನು ರಕ್ತಸಂಚಾರ ಅಥವಾ ಬೇರೆ ಯಾವುದೇ ಆರೋಗ್ಯ ಸಮಸ್ಯೆಗೆ ಚಿಕಿತ್ಸೆಯಾಗಿ ನೋಡಬಾರದು.
ಯಾರಿಗೆ ಎಚ್ಚರಿಕೆ ಅಗತ್ಯ?
ಕಲ್ಲಿನ ಹಾದಿಯಲ್ಲಿ ಬರಿಗಾಲಿನಲ್ಲಿ ನಡೆಯುವುದರಿಂದ ಪಾದಕ್ಕೆ ಸಣ್ಣ ಗಾಯಗಳಾಗುವ ಸಾಧ್ಯತೆ ಇದೆ. ಪಾದದ ಸಂವೇದನೆ ಕಡಿಮೆ ಇರುವವರು ಇದರಲ್ಲಿ ಹೆಚ್ಚು ಎಚ್ಚರಿಕೆ ವಹಿಸಬೇಕು.
ಮಧುಮೇಹ ಇರುವವರು, ಸಂಧಿವಾತದ ಸಮಸ್ಯೆ ಇರುವವರು, ಪಾದದಲ್ಲಿ ಗಾಯವಿರುವವರು, ಇತ್ತೀಚೆಗೆ ಶಸ್ತ್ರಚಿಕಿತ್ಸೆಗೆ ಒಳಗಾದವರು ಹಾಗೂ ಸಮತೋಲನದ ಸಮಸ್ಯೆ ಇರುವವರು ವೈದ್ಯರ ಸಲಹೆ ಪಡೆದು ಮುಂದುವರಿಯುವುದು ಒಳಿತು.ಹಿಮ್ಮಡಿ ನೋವು ಅಥವಾ ಪ್ಲಾಂಟರ್ ಫ್ಯಾಸಿಯಾಟಿಸ್ ಇರುವವರೂ ಇದೇ ರೀತಿ ಜಾಗರೂಕರಾಗಬೇಕು.
ಆರಂಭಿಸುವಾಗ ಗಮನಿಸಿ
ಮೊದಲ ದಿನವೇ 15-20 ನಿಮಿಷ ನಡೆಯುವ ಅಗತ್ಯವಿಲ್ಲ. 2ರಿಂದ 5 ನಿಮಿಷಗಳಷ್ಟು ಸಮಯದಿಂದ ಆರಂಭಿಸಿ. ಯಾವುದೇ ತೊಂದರೆ ಕಾಣಿಸದಿದ್ದರೆ ಮಾತ್ರ ನಿಧಾನವಾಗಿ ಸಮಯ ಹೆಚ್ಚಿಸಬಹುದು.
ಹಾದಿಯಲ್ಲಿ ಚೂಪಾದ ಕಲ್ಲುಗಳು, ಗಾಜಿನ ತುಂಡುಗಳು ಅಥವಾ ಇತರ ಅಪಾಯಕಾರಿ ವಸ್ತುಗಳಿಲ್ಲ ಎಂಬುದನ್ನು ಮೊದಲು ನೋಡಿಕೊಳ್ಳಿ. ಪಾದದಲ್ಲಿ ನೋವು, ಗಾಯ ಅಥವಾ ಹೆಚ್ಚಿನ ಅಸೌಕರ್ಯ ಕಂಡುಬಂದರೆ ತಕ್ಷಣ ನಿಲ್ಲಿಸಿ.
ಬರಿಗಾಲಿನಲ್ಲಿ ಕಲ್ಲಿನ ಹಾದಿಯಲ್ಲಿ ನಡೆಯುವುದು ಎಲ್ಲರಿಗೂ ಅಗತ್ಯವಾದ ವ್ಯಾಯಾಮವಲ್ಲ. ಇದನ್ನು ಪಾದಗಳ ಚಲನೆ ಮತ್ತು ಸಮತೋಲನಕ್ಕಾಗಿ ಮಾಡುವ ಒಂದು ಸರಳ ಅಭ್ಯಾಸವಾಗಿ ನೋಡಬಹುದು. ಆರೋಗ್ಯ ಸಮಸ್ಯೆ ಇರುವವರು ವೈದ್ಯರ ಸಲಹೆಯನ್ನೇ ಮೊದಲ ಆದ್ಯತೆಯಾಗಿ ಪರಿಗಣಿಸುವುದು ಉತ್ತಮ.
