ದೈನಂದಿನ ಆಹಾರ ಪದ್ಧತಿಯಲ್ಲಿ ಬಾಳೆಹಣ್ಣು ಪ್ರತಿಯೊಬ್ಬರ ನೆಚ್ಚಿನ ಫಲ. ಬೆಲೆ ಕಡಿಮೆಯಿದ್ದರೂ ಇದರಲ್ಲಿರುವ ಪೋಷಕಾಂಶಗಳ ಪ್ರಮಾಣ ಅಪಾರ. ಆದರೆ ಅನೇಕರಲ್ಲಿ ಕಾಡುವ ದೊಡ್ಡ ಗೊಂದಲ ಎಂದರೆ ಬಾಳೆಹಣ್ಣನ್ನು ಊಟಕ್ಕೆ ಮೊದಲು ತಿನ್ನಬೇಕೋ ಅಥವಾ ಊಟದ ನಂತರ ತಿನ್ನಬೇಕೋ ಎಂಬುದು. ಆರೋಗ್ಯ ತಜ್ಞರ ಪ್ರಕಾರ ನೀವು ಬಾಳೆಹಣ್ಣು ತಿನ್ನುವ ಸಮಯ ನಿಮ್ಮ ದೇಹದ ಅಗತ್ಯ ಮತ್ತು ಆರೋಗ್ಯದ ಸ್ಥಿತಿಯ ಮೇಲೆ ಆಧಾರಪಟ್ಟಿರುತ್ತದೆ.
ಊಟಕ್ಕೆ ಸುಮಾರು ಅರ್ಧ ಗಂಟೆ ಮುಂಚಿತವಾಗಿ ಬಾಳೆಹಣ್ಣು ತಿನ್ನುವುದರಿಂದ ಹಲವು ಪ್ರಯೋಜನಗಳಿವೆ. ಇದರಲ್ಲಿರುವ ನಾರಿನಂಶವು ಹೊಟ್ಟೆ ತುಂಬಿದ ಅನುಭವ ನೀಡುತ್ತದೆ. ಇದರಿಂದಾಗಿ ಅತಿಯಾಗಿ ಊಟ ಮಾಡುವುದನ್ನು ತಡೆಯಬಹುದು. ತೂಕ ಇಳಿಸಿಕೊಳ್ಳಲು ಬಯಸುವವರಿಗೆ ಮತ್ತು ಹಸಿವಿನ ನಿಯಂತ್ರಣ ಬಯಸುವವರಿಗೆ ಊಟಕ್ಕೆ ಮೊದಲು ಬಾಳೆಹಣ್ಣು ಸೇವಿಸುವುದು ಸೂಕ್ತ. ಅಲ್ಲದೆ ಇದು ಜೀರ್ಣಕ್ರಿಯೆಗೆ ಅಗತ್ಯವಾದ ಕಿಣ್ವಗಳನ್ನು ಸಕ್ರಿಯಗೊಳಿಸಲು ನೆರವಾಗುತ್ತದೆ.
ಇನ್ನೊಂದೆಡೆ ಊಟವಾದ ತಕ್ಷಣವೇ ಬಾಳೆಹಣ್ಣು ತಿನ್ನುವ ಅಭ್ಯಾಸ ಹಲವರಲ್ಲಿದೆ. ಊಟ ಮುಗಿದ ನಂತರ ತಿಂದರೆ ಜೀರ್ಣಕ್ರಿಯೆ ವೇಗಗೊಳ್ಳುತ್ತದೆ ನಿಜ. ಆದರೆ ಹೊಟ್ಟೆ ತುಂಬಾ ಊಟ ಮಾಡಿದ ತಕ್ಷಣ ಬಾಳೆಹಣ್ಣು ತಿಂದರೆ ದೇಹದಲ್ಲಿ ಕ್ಯಾಲೊರಿ ಪ್ರಮಾಣ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ. ವಿಶೇಷವಾಗಿ ಗ್ಯಾಸ್ಟ್ರಿಕ್ ಅಥವಾ ಅಜೀರ್ಣ ಸಮಸ್ಯೆಯಿಂದ ಬಳಲುತ್ತಿರುವವರು ಊಟದ ನಂತರ ತಕ್ಷಣವೇ ಹಣ್ಣುಗಳನ್ನು ಸೇವಿಸುವುದನ್ನು ತಪ್ಪಿಸುವುದು ಒಳ್ಳೆಯದು. ಬದಲಿಗೆ ಊಟವಾದ ಕನಿಷ್ಠ ಒಂದು ಗಂಟೆಯ ನಂತರ ಸೇವಿಸುವುದು ಹೆಚ್ಚು ಉಪಯುಕ್ತ.
ಆರೋಗ್ಯವಂತ ವ್ಯಕ್ತಿಯು ದಿನಕ್ಕೆ ಒಂದರಿಂದ ಎರಡು ಬಾಳೆಹಣ್ಣುಗಳನ್ನು ಧೈರ್ಯವಾಗಿ ಸೇವಿಸಬಹುದು. ಬೆಳಗಿನ ಉಪಾಹಾರದ ಸಮಯದಲ್ಲಿ ಅಥವಾ ಸಂಜೆಯ ಲಘು ಉಪಾಹಾರದ ವೇಳೆ ಬಾಳೆಹಣ್ಣು ಸೇವಿಸುವುದು ದೇಹಕ್ಕೆ ತಕ್ಷಣದ ಶಕ್ತಿ ನೀಡುತ್ತದೆ. ಮಧುಮೇಹ ಕಾಯಿಲೆ ಇರುವವರು ಮತ್ತು ಅಸ್ತಮಾ ಅಥವಾ ನೆಗಡಿ ಸಮಸ್ಯೆಯಿಂದ ಬಳಲುತ್ತಿರುವವರು ವೈದ್ಯರ ಸಲಹೆ ಪಡೆದು ಬಾಳೆಹಣ್ಣು ತಿನ್ನುವುದು ಸೂಕ್ತ.
ಸರಿಯಾದ ಸಮಯದಲ್ಲಿ ಮತ್ತು ಸೂಕ್ತ ಪ್ರಮಾಣದಲ್ಲಿ ಬಾಳೆಹಣ್ಣು ಸೇವಿಸುವುದರಿಂದ ಅದರಲ್ಲಿರುವ ಪೊಟ್ಯಾಸಿಯಂ ಮತ್ತು ಜೀವಸತ್ವಗಳು ಸಂಪೂರ್ಣವಾಗಿ ದೇಹಕ್ಕೆ ದೊರೆಯುತ್ತವೆ.
