ಬೆಂಗಳೂರು: ದೇಶದ ಎಲ್ಲಾ ಗೃಹಬಳಕೆಯ ಎಲ್‌ಪಿಜಿ (LPG) ಗ್ರಾಹಕರು ಇನ್ಮುಂದೆ ಅಡುಗೆ ಅನಿಲ ಸೇವೆ ಮತ್ತು ಸಬ್ಸಿಡಿಯನ್ನು ಪಡೆಯುವುದನ್ನು ಮುಂದುವರಿಸಲು ಬಯೋಮೆಟ್ರಿಕ್ ಆಧಾರ್ ದೃಢೀಕರಣ ಅಥವಾ ಇ-ಕೆವೈಸಿ (e-KYC) ಪೂರ್ಣಗೊಳಿಸುವುದನ್ನು ಕೇಂದ್ರ ಸರ್ಕಾರ ಕಡ್ಡಾಯಗೊಳಿಸಿದೆ. ಈ ಪ್ರಕ್ರಿಯೆಯನ್ನು ಗ್ರಾಹಕರು ತಮ್ಮ ಮನೆಯಲ್ಲೇ ಕುಳಿತು ಸ್ಮಾರ್ಟ್‌ಫೋನ್ ಮೂಲಕ ಸುಲಭವಾಗಿ ಮಾಡಬಹುದು ಎಂದು ಸಚಿವಾಲಯ ತಿಳಿಸಿದೆ.
ಇ-ಕೆವೈಸಿಮಾಡುವುದು ಹೇಗೆ? (ಹಂತ-ಹಂತದ ಮಾಹಿತಿ):
ಗ್ರಾಹಕರು ಯಾವುದೇ ಗ್ಯಾಸ್ ಏಜೆನ್ಸಿಗೆ ಭೇಟಿ ನೀಡದೆ ಡಿಜಿಟಲ್ ಆಗಿ ಈ ಪ್ರಕ್ರಿಯೆ ಪೂರ್ಣಗೊಳಿಸಬಹುದು:
- ಲಿಂಕ್ ಬಳಸಿ: ಸರ್ಕಾರದ ಅಧಿಕೃತ ಲಿಂಕ್ https://www.pmuy.gov.in/e-kyc.html ಗೆ ಭೇಟಿ ನೀಡಿ ಅಥವಾ ಅಧಿಕೃತ ಸೂಚನೆಯಲ್ಲಿರುವ ಕ್ಯೂಆರ್ ಕೋಡ್ (QR Code) ಸ್ಕ್ಯಾನ್ ಮಾಡಿ.
- ಆ್ಯಪ್ ಡೌನ್‌ಲೋಡ್ ಮಾಡಿ: ನಿಮ್ಮ ಗ್ಯಾಸ್ ಕಂಪನಿಯ ಮೊಬೈಲ್ ಆ್ಯಪ್ (IOCL, BPCL ಅಥವಾ HPCL) ಜೊತೆಗೆ ಗೂಗಲ್ ಪ್ಲೇ ಸ್ಟೋರ್‌ನಿಂದ ‘Aadhaar FaceRD’ ಆ್ಯಪ್ ಅನ್ನು ಡೌನ್‌ಲೋಡ್ ಮಾಡಿಕೊಳ್ಳಿ.
- ಮುಖದ ದೃಢೀಕರಣ: ಕಂಪನಿಯ ಆ್ಯಪ್‌ನಲ್ಲಿ ನೀಡಲಾದ ಸೂಚನೆಗಳನ್ನು ಅನುಸರಿಸಿ, ‘Aadhaar FaceRD’ ಆ್ಯಪ್ ಮೂಲಕ ನಿಮ್ಮ ಮುಖವನ್ನು ಸ್ಕ್ಯಾನ್ ಮಾಡುವ ಮೂಲಕ ಬಯೋಮೆಟ್ರಿಕ್ ದೃಢೀಕರಣ ಪೂರ್ಣಗೊಳಿಸಿ.
- ಯಶಸ್ವಿ ಸಲ್ಲಿಕೆ: ದೃಢೀಕರಣ ಪೂರ್ಣಗೊಂಡ ನಂತರ ನಿಮ್ಮ ಎಲ್‌ಪಿಜಿ ಖಾತೆಯು ಅಧಿಕೃತಗೊಳ್ಳುತ್ತದೆ.
ಉಜ್ವಲ ಯೋಜನೆಯ ಫಲಾನುಭವಿಗಳಿಗೆ ವಿಶೇಷ ಸೂಚನೆ
ಪ್ರಧಾನ ಮಂತ್ರಿ ಉಜ್ವಲ ಯೋಜನೆಯ ಫಲಾನುಭವಿಗಳು ಪ್ರತಿ ಹಣಕಾಸು ವರ್ಷದ ಮೊದಲ ರೀಫಿಲ್‌ಗಿಂತ ಮೊದಲು ಬಯೋಮೆಟ್ರಿಕ್ ಇ-ಕೆವೈಸಿ ಮಾಡುವುದು ಕಡ್ಡಾಯ. ಒಂದು ವೇಳೆ ಇದು ಪೂರ್ಣಗೊಳ್ಳದಿದ್ದರೆ, ಸಿಗುವ ಸಬ್ಸಿಡಿ ಹಣ ಸ್ಥಗಿತಗೊಳ್ಳಬಹುದು ಮತ್ತು ಸಿಲಿಂಡರ್ ಸರಬರಾಜಿನಲ್ಲಿ ವ್ಯತ್ಯಯವಾಗಬಹುದು.
ಪ್ರಮುಖ ಅಂಶಗಳು:
- ಒಂದು ಬಾರಿಮಾತ್ರ: ವರ್ಷಕ್ಕೆ ಒಂದು ಬಾರಿ ಈ ದೃಢೀಕರಣ ಮಾಡಿದರೆ ಸಾಕು, ಅದೇ ವರ್ಷದಲ್ಲಿ ಮತ್ತೆ ಮಾಡುವ ಅಗತ್ಯವಿಲ್ಲ.
- ಹೆಲ್ಪ್‌ಲೈನ್: ಪ್ರಕ್ರಿಯೆಯಲ್ಲಿ ಯಾವುದೇ ಸಮಸ್ಯೆ ಎದುರಾದರೆ ಗ್ರಾಹಕರು ಎಲ್‌ಪಿಜಿ ಸಹಾಯವಾಣಿ ಸಂಖ್ಯೆ 1800 2333 555 ಗೆ ಕರೆ ಮಾಡಬಹುದು ಅಥವಾ ಸ್ಥಳೀಯ ವಿತರಕರನ್ನು ಸಂಪರ್ಕಿಸಬಹುದು.
- ರೀಫಿಲ್ ನಿಯಮ: ಅನಿಲ ಪೂರೈಕೆಯ ಕೊರತೆಯ ಹಿನ್ನೆಲೆಯಲ್ಲಿ ಎರಡು ರೀಫಿಲ್‌ಗಳ ನಡುವಿನ ಅಂತರವನ್ನು 25 ದಿನಗಳಿಗೆ ಹೆಚ್ಚಿಸಲಾಗಿದೆ ಎಂಬುದು ಗಮನಾರ್ಹ.
.
