ಮನರೇಗಾ ಯೋಜನೆಯ ಹೆಸರು ಬದಲಾವಣೆ ವಿಚಾರವಾಗಿ ಚರ್ಚಿಸಲು ವಿಧಾನಸಭೆಯ ವಿಶೇಷ ಅಧಿವೇಶನ ಕರೆಯಲಾಗಿದೆ. ಒಂದು ವಾರದ ಅಧಿವೇಶನದ ಎರಡು ದಿನ ರಾಜ್ಯಪಾಲರ ಭಾಷಣದ ವಿವಾದದಲ್ಲೇ ಅಂತ್ಯವಾಗಿದೆ. ಈ ನಡುವೆ ಅನೇಕ ಸಚಿವರು ಸದನಕ್ಕೆ ಗೈರು ಹಾಜರಾಗುತ್ತಿದ್ದಾರೆ.
ಈ ಹಿನ್ನಲೆಯಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಎಲ್ಲಾ ಸಚಿವರಿಗೆ ಪತ್ರವೊಂದನ್ನು ಬರೆದಿದ್ದಾರೆ. ಕಡ್ಡಾಯವಾಗಿ ಸದನಕ್ಕೆ ಹಾಜರಾಗಬೇಕು. ವಿಧಾನ ಸಭೆ, ವಿಧಾನ ಪರಿಷತ್ ಕಲಾಪದಲ್ಲಿ ಪಾಲ್ಗೊಳ್ಳಬೇಕು ಎಂದು ಸೂಚನೆ ನೀಡಿದ್ದಾರೆ.
ಸಿದ್ದರಾಮಯ್ಯ ಪತ್ರ: ವಿಧಾನಮಂಡಲಗಳ ಅಧಿವೇಶನಗಳು ನಡೆಯುವಾಗ ಮಾನ್ಯ ಸಚಿವರುಗಳು ಗೈರುಹಾಜರಾಗುತ್ತಿರುವುದರ ಬಗ್ಗೆ ವಿರೋಧ ಪಕ್ಷದವರು ತೀವ್ರ ಆಕ್ಷೇಪ ವ್ಯಕ್ತಪಡಿಸುತ್ತಿದ್ದಾರೆ.
ಜವಾಬ್ದಾರಿಯುತ ಸ್ಥಾನದಲ್ಲಿರುವ ಸಚಿವರುಗಳು ಸದನದಲ್ಲಿ ಇಲ್ಲದಿರುವುದು ಸಾರ್ವಜನಿಕ ವಲಯದಲ್ಲಿ ತಪ್ಪು ಸಂದೇಶ ರವಾನೆಯಾಗಲು ಕಾರಣವಾಗುತ್ತದೆ.
ಅಧಿವೇಶನ ನಡೆಯುತ್ತಿರುವ ಅವಧಿಯಲ್ಲಿ ಮಾನ್ಯ ಸಚಿವರುಗಳು ತಮ್ಮ ಇಲಾಖೆಯ ಅಥವಾ ಇತರ ಯಾವುದೇ ಸಭೆ/ ಸಮಾರಂಭಗಳನ್ನು ಆಯೋಜಿಸದೆ ಖುದ್ದಾಗಿ ಸದನದಲ್ಲಿ ಹಾಜರಿರಬೇಕಾಗುತ್ತದೆ.
ಆದ್ದರಿಂದ, ಉಭಯ ಸದನಗಳಲ್ಲಿ ಕಾರ್ಯಕಲಾಪಗಳು ನಡೆಯುತ್ತಿರುವಾಗ, ತಮಗೆ ಕರ್ತವ್ಯವಿರುವ ಸದನದಲ್ಲಿ (ವಿಧಾನಸಭೆ ಅಥವಾ ವಿಧಾನ ಪರಿಷತ್ತು) ತಾವೇ ಖುದ್ದಾಗಿ ಹಾಜರಿರುವಂತೆ ಹಾಗೂ ಪ್ರತಿದಿನವೂ ಸದನದಲ್ಲಿ ಹಾಜರಿದ್ದು, ಸದನದ ಘನತೆಯನ್ನು ಗೌರವಿಸುವಂತೆ ಕೋರುತ್ತೇನೆ ಎಂದು ಎಲ್ಲಾ ಸಚಿವರಿಗೆ ಸಿದ್ದರಾಮಯ್ಯ ಪತ್ರವನ್ನು ಬರೆದಿದ್ದಾರೆ.
