ಈರೋಡ್: ಪತ್ನಿಯನ್ನು ಶಾಲೆಯ ಅಡುಗೆ ಕೆಲಸದಿಂದ ವಜಾಗೊಳಿಸಿದ್ದಕ್ಕೆ ಕೋಪಗೊಂಡ ವ್ಯಕ್ತಿಯೊಬ್ಬ ವಿದ್ಯಾರ್ಥಿಯ ಮೂಲಕ ಸರ್ಕಾರಿ ಶಾಲೆಯ ಉಚಿತ ಉಪಾಹಾರ ಯೋಜನೆಯಡಿ ತಯಾರಿಸಲಾಗಿದ್ದ ಸಾಂಬಾರ್ಗೆ ಸೆಗಣಿ ಪುಡಿ ಬೆರೆಸಿದ ಆರೋಪ ತಮಿಳುನಾಡಿನ ಈರೋಡ್ನಲ್ಲಿ ಕೇಳಿಬಂದಿದೆ.
ಹೌದು. ತಮಿಳುನಾಡಿನ ಈರೋಡ್ನಲ್ಲಿ ಆಘಾತಕಾರಿ ಘಟನೆಯೊಂದು ನಡೆದಿದೆ. ಪತ್ನಿಯನ್ನು ಶಾಲೆಯ ಅಡುಗೆ ಕೆಲಸದಿಂದ ವಜಾಗೊಳಿಸಿದ್ದಕ್ಕೆ ಆಕ್ರೋಶಗೊಂಡ ವ್ಯಕ್ತಿಯೊಬ್ಬ, ಸರ್ಕಾರಿ ಶಾಲೆಯ ಸಾಂಬಾರ್ಗೆ ಸೆಗಣಿ ಪುಡಿ ಬೆರೆಸುವಂತೆ ವಿದ್ಯಾರ್ಥಿಗೆ ಒತ್ತಾಯಿಸಿದ್ದಾನೆ ಎನ್ನಲಾಗಿದೆ. ಶಿಕ್ಷಕರು ಊಟವನ್ನು ಪರಿಶೀಲಿಸುವ ವೇಳೆ ಅಸಹಜ ಕಹಿ ರುಚಿ ಪತ್ತೆಯಾದ ಪರಿಣಾಮ, ಕಲುಷಿತ ಆಹಾರ ಮಕ್ಕಳಿಗೆ ಬಡಿಸುವುದನ್ನು ತಡೆಯಲಾಗಿದೆ.
ಆಗಸ್ಟ್ 29ರಂದು ಈ ಘಟನೆ ನಡೆದಿದ್ದು, ಸೆಪ್ಟೆಂಬರ್ 1ರಂದು ಪೊಲೀಸರಿಗೆ ದೂರು ನೀಡಲಾಗಿದೆ. ವಿದ್ಯಾರ್ಥಿಗಳಿಗೆ ಊಟ ಬಡಿಸುವ ಮುನ್ನ ಶಾಲಾ ಶಿಕ್ಷಕರು ಎಂದಿನಂತೆ ಆಹಾರವನ್ನು ರುಚಿ ನೋಡಿದ್ದಾರೆ. ಈ ವೇಳೆ ಸಾಂಬಾರ್ನಲ್ಲಿ ಅಸಹಜ ಕಹಿ ರುಚಿ ಕಂಡುಬಂದಿದೆ.
ಮೊದಲಿಗೆ ಅರಿಶಿನ ಹೆಚ್ಚಾಗಿ ಸೇರಿರಬಹುದು ಎಂದು ಶಿಕ್ಷಕರು ಶಂಕಿಸಿದ್ದರು. ಆದರೆ ಬಳಿಕ ಪರಿಶೀಲಿಸಿದಾಗ ಸಾಂಬಾರ್ನಲ್ಲಿ ಪುಡಿ ಮಾಡಿದ ಸೆಗಣಿ ಇರುವುದು ಪತ್ತೆಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ವಿದ್ಯಾರ್ಥಿಗಳಿಗೆ ಕಲುಷಿತ ಆಹಾರ ಬಡಿಸಲಿಲ್ಲ
ಸೆಗಣಿ ಪುಡಿಯನ್ನು ಶಿಕ್ಷಕರು ರುಚಿ ನೋಡಲು ಪ್ರತ್ಯೇಕವಾಗಿ ಇಡಲಾಗಿದ್ದ ಸಾಂಬಾರ್ನ ಭಾಗಕ್ಕೆ ಮಾತ್ರ ಬೆರೆಸಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಶಿಕ್ಷಕರು ಆಹಾರವನ್ನು ಪರಿಶೀಲಿಸುವ ಸಂದರ್ಭದಲ್ಲಿ ಅಸಹಜ ರುಚಿ ಪತ್ತೆಯಾದ ಕಾರಣ, ಕಲುಷಿತ ಆಹಾರವನ್ನು ವಿದ್ಯಾರ್ಥಿಗಳಿಗೆ ಬಡಿಸುವ ಮುನ್ನವೇ ತಡೆಹಿಡಿಯಲಾಯಿತು. ಹೀಗಾಗಿ ಯಾವುದೇ ವಿದ್ಯಾರ್ಥಿ ಆ ಆಹಾರ ಸೇವಿಸಿಲ್ಲ ಎಂದು ಪೊಲೀಸರು ಹೇಳಿದ್ದಾರೆ.
ವಿದ್ಯಾರ್ಥಿಯನ್ನು ಬಳಸಿಕೊಂಡ ಆರೋಪ
ಅರುಮುಗಂ ಒಬ್ಬ ವಿದ್ಯಾರ್ಥಿಯನ್ನು ಒತ್ತಾಯಿಸಿ ಸಾಂಬಾರ್ಗೆ ಸೆಗಣಿ ಪುಡಿ ಬೆರೆಸುವಂತೆ ಮಾಡಿದ್ದಾನೆ ಎಂದು ತನಿಖಾಧಿಕಾರಿಗಳು ಆರೋಪಿಸಿದ್ದಾರೆ. ಶಾಲೆಯಲ್ಲಿ ಅಡುಗೆ ಕೆಲಸ ಮಾಡುತ್ತಿದ್ದ ತನ್ನ ಪತ್ನಿಯನ್ನು ಕೆಲಸದಿಂದ ವಜಾಗೊಳಿಸಿದ್ದಕ್ಕೆ ಅರುಮುಗಂ ಅಸಮಾಧಾನಗೊಂಡಿದ್ದ ಎನ್ನಲಾಗಿದೆ.ಈ ಕೃತ್ಯದ ಹಿಂದಿನ ನಿಖರ ಕಾರಣಗಳು ಹಾಗೂ ವಿದ್ಯಾರ್ಥಿಯ ಪಾತ್ರದ ಕುರಿತು ತನಿಖೆ ಮುಂದುವರಿದಿದೆ.
BNS ಅಡಿ ಪ್ರಕರಣ
ಅರುಮುಗಂ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 123ರ ಅಡಿ ಪ್ರಕರಣ ದಾಖಲಿಸಲಾಗಿದೆ. ಅಪರಾಧ ಎಸಗುವ ಉದ್ದೇಶದಿಂದ ವಿಷ ಅಥವಾ ಇತರ ಹಾನಿಕಾರಕ ವಸ್ತುಗಳ ಮೂಲಕ ಗಾಯ ಉಂಟುಮಾಡುವ ಕೃತ್ಯಕ್ಕೆ ಈ ಸೆಕ್ಷನ್ ಸಂಬಂಧಿಸಿದೆ.
ಸರ್ಕಾರಿ ಶಾಲೆಗಳಲ್ಲಿ ಮಕ್ಕಳಿಗೆ ನೀಡಲಾಗುವ ಆಹಾರದ ಸುರಕ್ಷತೆ ಕುರಿತು ಈ ಘಟನೆ ಆತಂಕ ಮೂಡಿಸಿದೆ. ಆದರೆ ಶಿಕ್ಷಕರು ಊಟ ಬಡಿಸುವ ಮುನ್ನ ಆಹಾರವನ್ನು ರುಚಿ ನೋಡಿ ಪರಿಶೀಲಿಸಿದ್ದರಿಂದ ಕಲುಷಿತ ಆಹಾರ ಮಕ್ಕಳಿಗೆ ತಲುಪುವುದನ್ನು ತಡೆಯಲು ಸಾಧ್ಯವಾಯಿತು ಎಂದು ಪೊಲೀಸರು ತಿಳಿಸಿದ್ದಾರೆ.
ಒಟ್ಟಿನಲ್ಲಿ ಶಿಕ್ಷಕರ ಸಮಯೋಚಿತ ಆಹಾರ ಪರಿಶೀಲನೆಯಿಂದ ಕಲುಷಿತ ಸಾಂಬಾರ್ ವಿದ್ಯಾರ್ಥಿಗಳ ಕೈ ಸೇರುವ ಮುನ್ನವೇ ತಡೆಹಿಡಿಯಲಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಅರುಮುಗಂನನ್ನು ಪೊಲೀಸರು ಬಂಧಿಸಿದ್ದು, ವಿದ್ಯಾರ್ಥಿಯನ್ನು ಈ ಕೃತ್ಯಕ್ಕೆ ಬಳಸಿಕೊಂಡಿರುವ ಆರೋಪ ಸೇರಿದಂತೆ ಘಟನೆಯ ಸಂಪೂರ್ಣ ಹಿನ್ನೆಲೆಯ ಕುರಿತು ತನಿಖೆ ಮುಂದುವರಿದಿದೆ.
