ಆದಿತ್ಯ ಧರ್ ನಿರ್ದೇಶನದ ‘ಧುರಂಧರ್-2’ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಸಖತ್ ಸೌಂಡ್ ಮಾಡುತ್ತಿದೆ. ರಣವೀರ್ ಸಿಂಗ್ ಅಭಿನಯದ ಈ ಸ್ಪೈ ಥ್ರಿಲ್ಲರ್ ಸಿನಿಮಾ ಕೇವಲ ಪ್ರೇಕ್ಷಕರ ಮನಗೆದ್ದಿರುವುದಲ್ಲದೆ, ಚಿತ್ರರಂಗದ ಗಣ್ಯರಿಂದಲೂ ಅಪಾರ ಮೆಚ್ಚುಗೆ ಗಳಿಸುತ್ತಿದೆ. ಇದರ ನಡುವೆ ಹಿರಿಯ ನಟಿ ಅಮೀಷಾ ಪಟೇಲ್ ಅವರು ಮಾಡಿರುವ ಟ್ವೀಟ್ ಈಗ ಬಾಲಿವುಡ್ ಅಂಗಳದಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ.
ಇನ್‌ಸ್ಟಾಗ್ರಾಮರ್‌ಗಳನ್ನಲ್ಲ, ನಟರನ್ನು ಆಯ್ಕೆ ಮಾಡಿ: ಅಮೀಷಾ ಪಟೇಲ್ ಸಿನಿಮಾದ ಯಶಸ್ಸನ್ನು ಕೊಂಡಾಡಿರುವ ಅಮೀಷಾ ಪಟೇಲ್, ಬಾಲಿವುಡ್‌ನ ಇಂದಿನ ಪರಿಸ್ಥಿತಿಯ ಬಗ್ಗೆ ನೇರವಾಗಿಯೇ ಕಿಡಿಕಾರಿದ್ದಾರೆ. “ಧುರಂಧರ್-2 ಸಿನಿಮಾ ಕಣ್ಣು ತೆರೆಸುವಂತಿದೆ. ಚಿತ್ರರಂಗ ಈ ಸಿನಿಮಾವನ್ನು ಹೊಗಳುತ್ತಿರುವುದು ಖುಷಿಯ ವಿಚಾರ. ಆದರೆ ನಿರ್ದೇಶಕ ಆದಿತ್ಯ ಧರ್ ಇಲ್ಲಿ ಒಂದು ಸಿನಿಮಾ ಮಾಡಿದ್ದಾರೆ ಹೊರತು ಕೇವಲ ‘ಪ್ರಾಜೆಕ್ಟ್’ ಅಲ್ಲ ಎಂಬುದನ್ನು ಉದ್ಯಮ ಅರ್ಥ ಮಾಡಿಕೊಳ್ಳಬೇಕು. ಪಾರ್ಟಿಗಳಲ್ಲಿ ಟ್ರೆಂಡ್ ಆಗುವ ಇನ್‌ಸ್ಟಾಗ್ರಾಮರ್‌ಗಳ ಬದಲಿಗೆ ಅವರು ನಟರನ್ನು ಆಯ್ಕೆ ಮಾಡಿದ್ದಾರೆ. ದಯವಿಟ್ಟು ಬರೀ ಪ್ರಾಜೆಕ್ಟ್ ಮಾಡುವುದನ್ನು ಬಿಟ್ಟು ಉತ್ತಮ ಸಿನಿಮಾಗಳನ್ನು ಮಾಡಿ,” ಎಂದು ಅಮೀಷಾ ತಮ್ಮ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
ಬಾಕ್ಸ್ ಆಫೀಸ್ ಬಾಪ್ ಎಂದ ರಜನಿಕಾಂತ್ ಕೇವಲ ಅಮೀಷಾ ಮಾತ್ರವಲ್ಲದೆ ದಕ್ಷಿಣ ಭಾರತದ ಸೂಪರ್ ಸ್ಟಾರ್ ರಜನಿಕಾಂತ್ ಕೂಡ ಈ ಸಿನಿಮಾವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ನಿರ್ದೇಶಕ ಆದಿತ್ಯ ಧರ್ ಅವರನ್ನು ‘ಬಾಕ್ಸ್ ಆಫೀಸ್ ಕಾ ಬಾಪ್’ ಎಂದು ಕರೆದಿರುವ ಅವರು, ಪ್ರತಿ ಭಾರತೀಯನೂ ನೋಡಲೇಬೇಕಾದ ಸಿನಿಮಾ ಇದಾಗಿದೆ ಎಂದು ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ನಿರ್ದೇಶಕ ಆದಿತ್ಯ ಧರ್, ತಲೈವಾ ಅವರಿಂದ ಇಂತಹ ಪ್ರಶಂಸೆ ಸಿಕ್ಕಿರುವುದು ಒಂದು ಆಶೀರ್ವಾದ ಎಂದು ಭಾವುಕರಾಗಿದ್ದಾರೆ. ಅಲ್ಲದೆ ಆಲಿಯಾ ಭಟ್, ಕಂಗನಾ ರಣಾವತ್, ಅಲ್ಲು ಅರ್ಜುನ್ ಮತ್ತು ಮಹೇಶ್ ಬಾಬು ಅವರಂತಹ ದಿಗ್ಗಜರು ಕೂಡ ಈ ಚಿತ್ರದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ತಾರಾಗಣದ ಬಲವೇ ಈ ಸಿನಿಮಾದ ಶಕ್ತಿ ‘ಧುರಂಧರ್-2’ ಚಿತ್ರದ ಯಶಸ್ಸಿನಲ್ಲಿ ಅದರ ತಾರಾಗಣ ಪ್ರಮುಖ ಪಾತ್ರ ವಹಿಸಿದೆ. ರಣವೀರ್ ಸಿಂಗ್ ಅವರೊಂದಿಗೆ ಅರ್ಜುನ್ ರಾಂಪಾಲ್, ಆರ್. ಮಾಧವನ್ ಮತ್ತು ಅಕ್ಷಯ್ ಖನ್ನಾ ಅವರಂತಹ ಘಟಾನುಘಟಿ ನಟರು ಈ ಚಿತ್ರದಲ್ಲಿದ್ದಾರೆ. ಮುಕೇಶ್ ಛಾಬ್ರಾ ಅವರ ಆಯ್ಕೆಯಂತೆ ಪೋಷಕ ಪಾತ್ರಗಳಲ್ಲೂ ಪ್ರತಿಭಾವಂತ ನಟರು ಮಿಂಚಿದ್ದಾರೆ. ಸಾಮಾಜಿಕ ಜಾಲತಾಣದ ಫಾಲೋವರ್ಸ್ ಸಂಖ್ಯೆ ನೋಡಿ ನಟರನ್ನು ಆಯ್ಕೆ ಮಾಡುವ ಇಂದಿನ ಟ್ರೆಂಡ್ ನಡುವೆ, ನೈಜ ಪ್ರತಿಭೆಗಳಿಗೆ ಬೆಲೆ ನೀಡಿದ ಈ ಸಿನಿಮಾ ಹೊಸ ದಾಖಲೆ ಬರೆಯುತ್ತಿದೆ.
