ರಾತ್ರಿ ವೇಳೆ ಮೊಬೈಲ್ ಪರದೆಯಿಂದ ಹೊರಹೊಮ್ಮುವ ನೀಲಿ ಬೆಳಕು (Blue Light) ಕೇವಲ ಕಣ್ಣುಗಳ ಮೇಲಷ್ಟೇ ಅಲ್ಲ, ದೇಹದ ಹಾರ್ಮೋನ್ ಸಮತೋಲನದ ಮೇಲೂ ಗಂಭೀರ ಪರಿಣಾಮ ಬೀರುತ್ತದೆ ಎಂದು ಅಂತರರಾಷ್ಟ್ರೀಯ ವೈದ್ಯಕೀಯ ತಜ್ಞರು ಎಚ್ಚರಿಸಿದ್ದಾರೆ.ಒಂದು ವೇಳೆ ನೀವು ಕೇವಲ ಒಂದು ವಾರದವರೆಗೆ ಪ್ರತಿದಿನ ಮಲಗುವ ಒಂದು ಗಂಟೆ ಮೊದಲು ಮೊಬೈಲ್ ಬಳಕೆಯನ್ನು ನಿಲ್ಲಿಸಿದರೆ, ನಿಮ್ಮ ದೇಹದಲ್ಲಿ ಮೂರು ಪ್ರಮುಖ ಹಾರ್ಮೋನ್ ಬದಲಾವಣೆಗಳು ಸಂಭವಿಸುತ್ತವೆ. ಅವು ಆರೋಗ್ಯ ಮತ್ತು ಯೌವನವನ್ನು ಕಾಪಾಡಲು ಹೇಗೆ ಸಹಾಯ ಮಾಡುತ್ತವೆ ಎಂಬುದನ್ನು ತಿಳಿಯೋಣ.
1. ಮೆಲಟೊನಿನ್ ಹಾರ್ಮೋನ್ ಹೆಚ್ಚಳ – ಉತ್ತಮ ನಿದ್ರೆ
ನಮ್ಮ ಮೆದುಳಿನಲ್ಲಿರುವ ಪೈನಿಯಲ್ ಗ್ರಂಥಿ ರಾತ್ರಿ ವೇಳೆ ‘ಮೆಲಟೊನಿನ್’ ಎಂಬ ನಿದ್ರೆಯ ಹಾರ್ಮೋನ್ ಅನ್ನು ಉತ್ಪಾದಿಸುತ್ತದೆ. ಇದು ಗಾಢ ಮತ್ತು ಗುಣಮಟ್ಟದ ನಿದ್ರೆಗೆ ನೆರವಾಗುತ್ತದೆ.
ಆದರೆ ರಾತ್ರಿ ಸಮಯದಲ್ಲಿ ಮೊಬೈಲ್ ಪರದೆ ನೋಡುವುದರಿಂದ ಅದರ ನೀಲಿ ಬೆಳಕನ್ನು ಕಂಡು ಮೆದುಳು ಇನ್ನೂ ಹಗಲಾಗಿದೆ ಎಂದು ಭಾವಿಸುತ್ತದೆ. ಇದರಿಂದ ಮೆಲಟೊನಿನ್ ಉತ್ಪಾದನೆ ಶೇ.50ಕ್ಕೂ ಹೆಚ್ಚು ಕಡಿಮೆಯಾಗಬಹುದು ಮತ್ತು ನಿದ್ರಾಹೀನತೆ ಉಂಟಾಗಬಹುದು.
ಮಲಗುವ ಒಂದು ಗಂಟೆ ಮೊದಲು ಮೊಬೈಲ್ ಬಳಕೆಯನ್ನು ನಿಲ್ಲಿಸಿದರೆ ಮೆದುಳು ಶಾಂತವಾಗುತ್ತದೆ. ಇದರಿಂದ ಮೆಲಟೊನಿನ್ ಹಾರ್ಮೋನ್ ಸಮರ್ಪಕವಾಗಿ ಬಿಡುಗಡೆಯಾಗಿ, ಸುಲಭವಾಗಿ ಗಾಢ ನಿದ್ರೆ ಬರುತ್ತದೆ.
2. ಕಾರ್ಟಿಸಾಲ್ ಹಾರ್ಮೋನ್ ಕಡಿಮೆ – ಒತ್ತಡಕ್ಕೆ ಗುಡ್‌ಬೈ
ಕಾರ್ಟಿಸಾಲ್ ಅನ್ನು ‘ಒತ್ತಡದ ಹಾರ್ಮೋನ್’ (Stress Hormone) ಎಂದು ಕರೆಯಲಾಗುತ್ತದೆ.
ರಾತ್ರಿ ವೇಳೆ ಮೊಬೈಲ್‌ನಲ್ಲಿ ನೆಗೆಟಿವ್ ಸುದ್ದಿಗಳು, ಕ್ರೈಮ್ ಥ್ರಿಲ್ಲರ್ ವೆಬ್‌ಸೀರೀಸ್ ಅಥವಾ ಸಾಮಾಜಿಕ ಜಾಲತಾಣದ ಪೋಸ್ಟ್‌ಗಳನ್ನು ನಿರಂತರವಾಗಿ ನೋಡಿದರೆ ಮನಸ್ಸಿನ ಮೇಲೆ ಒತ್ತಡ ಹೆಚ್ಚಾಗುತ್ತದೆ. ಇದರಿಂದ ಕಾರ್ಟಿಸಾಲ್ ಮಟ್ಟವೂ ಏರಿಕೆಯಾಗುತ್ತದೆ.
ಕಾರ್ಟಿಸಾಲ್ ಹೆಚ್ಚಾದರೆ ಹೃದಯ ಬಡಿತ ವೇಗವಾಗುವುದು, ಬೆಳಿಗ್ಗೆ ಎದ್ದಾಗ ಆಯಾಸ ಅನುಭವಿಸುವುದು ಮೊದಲಾದ ಸಮಸ್ಯೆಗಳು ಕಾಣಿಸಬಹುದು.
ಮಲಗುವ ಒಂದು ಗಂಟೆ ಮೊದಲು ಫೋನ್‌ನ್ನು ದೂರವಿಟ್ಟರೆ ಮೆದುಳು ರಿಲ್ಯಾಕ್ಸ್ ಆಗಿ ಕಾರ್ಟಿಸಾಲ್ ಮಟ್ಟ ಕಡಿಮೆಯಾಗುತ್ತದೆ. ಇದರಿಂದ ಮಾನಸಿಕ ನೆಮ್ಮದಿ ದೊರೆಯುತ್ತದೆ.
3. ಲೆಪ್ಟಿನ್ ಮತ್ತು ಘ್ರೆಲಿನ್ ಹಾರ್ಮೋನ್ ಸಮತೋಲನ – ತೂಕ ನಿಯಂತ್ರಣಕ್ಕೆ ನೆರವು
ನಮ್ಮ ದೇಹದಲ್ಲಿ ಹಸಿವನ್ನು ನಿಯಂತ್ರಿಸುವ ಪ್ರಮುಖ ಹಾರ್ಮೋನ್‌ಗಳು ಲೆಪ್ಟಿನ್ ಮತ್ತು ಘ್ರೆಲಿನ್.
ರಾತ್ರಿ ಸಮರ್ಪಕ ನಿದ್ರೆ ಇಲ್ಲದಿದ್ದರೆ ಈ ಹಾರ್ಮೋನ್‌ಗಳ ಸಮತೋಲನ ಹಾಳಾಗುತ್ತದೆ. ಪರಿಣಾಮವಾಗಿ ಮಧ್ಯರಾತ್ರಿ ಜಂಕ್‌ಫುಡ್, ಸಿಹಿ ಪದಾರ್ಥಗಳನ್ನು ತಿನ್ನಬೇಕೆಂಬ ಆಸೆ (Cravings) ಹೆಚ್ಚಾಗುತ್ತದೆ.
ಆದರೆ ಸಮಯಕ್ಕೆ ಸರಿಯಾಗಿ ಫೋನ್‌ನ್ನು ದೂರವಿಟ್ಟು ಮಲಗಿದರೆ ಈ ಎರಡೂ ಹಾರ್ಮೋನ್‌ಗಳು ಸಮತೋಲನದಲ್ಲಿರುತ್ತವೆ. ಇದರಿಂದ ಅನಗತ್ಯ ಹಸಿವು ಕಡಿಮೆಯಾಗುವುದರ ಜೊತೆಗೆ ದೇಹದ ಚಯಾಪಚಯ ಕ್ರಿಯೆಯೂ (Metabolism) ಉತ್ತಮಗೊಳ್ಳುತ್ತದೆ. ಇದು ತೂಕ ನಿಯಂತ್ರಣಕ್ಕೂ ಸಹಕಾರಿ.
ಯೌವನ ಕಾಪಾಡುವ ಗ್ರೋತ್ ಹಾರ್ಮೋನ್
ಗಾಢ ನಿದ್ರೆಯ ಸಮಯದಲ್ಲಿ ದೇಹದಲ್ಲಿ ಹ್ಯೂಮನ್ ಗ್ರೋತ್ ಹಾರ್ಮೋನ್ (Human Growth Hormone) ಉತ್ತಮ ಪ್ರಮಾಣದಲ್ಲಿ ಬಿಡುಗಡೆಯಾಗುತ್ತದೆ. ಇದು ಚರ್ಮದ ಆರೋಗ್ಯವನ್ನು ಕಾಪಾಡಿ, ಸುಕ್ಕುಗಳನ್ನು ಕಡಿಮೆ ಮಾಡಲು ನೆರವಾಗುತ್ತದೆ. ಪರಿಣಾಮವಾಗಿ ಯಾವುದೇ ಕಾಸ್ಮೆಟಿಕ್‌ಗಳಿಲ್ಲದೇ ಚರ್ಮ ಸಹಜ ಕಾಂತಿಯಿಂದ ಹೊಳೆಯುವಂತೆ ಮಾಡುತ್ತದೆ.
ನಾಳೆಯಿಂದಲೇ ಈ ಸರಳ ಡಿಜಿಟಲ್ ಡಿಟಾಕ್ಸ್ ಅಭ್ಯಾಸವನ್ನು ರೂಢಿಸಿಕೊಂಡು ನಿಮ್ಮ ಆರೋಗ್ಯವನ್ನು ಉತ್ತಮಗೊಳಿಸಬಹುದು.
ಸೂಚನೆ: ಈ ಮಾಹಿತಿ ಅರಿವುಗಾಗಿ ಮಾತ್ರ ನೀಡಲಾಗಿದೆ. ಮೇಲಿನ ವಿವರಗಳು ಅಂತರರಾಷ್ಟ್ರೀಯ ನಿದ್ರೆ ಸಂಶೋಧನೆಗಳು, ವೈದ್ಯಕೀಯ ತಜ್ಞರ ವರದಿಗಳು ಹಾಗೂ ಹಾರ್ಮೋನ್ ಅಧ್ಯಯನಗಳ ಆಧಾರದ ಮೇಲೆ ಸಿದ್ಧಪಡಿಸಲಾಗಿದೆ. ಇದು ವೈದ್ಯಕೀಯ ಸಲಹೆಗೆ ಪರ್ಯಾಯವಲ್ಲ. ಯಾವುದೇ ಆರೋಗ್ಯ ಸಮಸ್ಯೆ ಇದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.
