ಬೆಂಗಳೂರು: ಸಾಮಾನ್ಯವಾಗಿ ನಾವು ಜೀರಿಗೆಯನ್ನು ಅಡುಗೆಯ ರುಚಿ ಹೆಚ್ಚಿಸಲು ಅಥವಾ ಆರೋಗ್ಯಕ್ಕಾಗಿ ಬಳಸುತ್ತೇವೆ. ಆದರೆ ವಾಸ್ತು ಶಾಸ್ತ್ರ ಮತ್ತು ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಪ್ರತಿಯೊಬ್ಬರ ಅಡುಗೆ ಮನೆಯಲ್ಲೂ ಲಭ್ಯವಿರುವ ಈ ಒಂದು ಚಮಚ ಜೀರಿಗೆಗೆ ನಿಮ್ಮ ಆರ್ಥಿಕ ಸಂಕಷ್ಟಗಳನ್ನು ಹಾಗೂ ಸಾಲದ ಬಾಧೆಯನ್ನು ದೂರಮಾಡುವ ಅದ್ಭುತ ಶಕ್ತಿಯಿದೆ
ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಜೀರಿಗೆಯು ರಾಹು ಮತ್ತು ಕೇತು ಗ್ರಹಗಳಿಗೆ ಸಂಬಂಧಿಸಿದ್ದಾಗಿದೆ. ಜೀವನದಲ್ಲಿ ಎಷ್ಟೇ ಕಷ್ಟಪಟ್ಟರೂ ಹಣ ಕೈಯಲ್ಲಿ ನಿಲ್ಲುತ್ತಿಲ್ಲ, ಸಾಲದ ಸುಳಿಗೆ ಸಿಲುಕಿ ನೆಮ್ಮದಿ ಕೆಟ್ಟಿದೆ ಎನ್ನುವವರಿಗೆ ಜೀರಿಗೆಯಿಂದ ಮಾಡುವ ಕೆಲವು ಸರಳ ವಾಸ್ತು ತಂತ್ರಗಳು (Remedies) ಅದ್ಭುತ ಬದಲಾವಣೆಯನ್ನು ತರಬಲ್ಲವು. ಆರ್ಥಿಕ ಪ್ರಗತಿ ಹಾಗೂ ನಕಾರಾತ್ಮಕ ಶಕ್ತಿಯ ನಿವಾರಣೆಗೆ ಜೀರಿಗೆಯನ್ನು ಹೇಗೆ ಬಳಸಬೇಕು ಎಂಬ ಕಂಪ್ಲೀಟ್ ಮಾಹಿತಿ ಇಲ್ಲಿದೆ:
- ಸಾಲಬಾಧೆಯಿಂದ ಮುಕ್ತಿ ಪಡೆಯಲು (To Get Rid of Debt):
ಮಣ್ಣಿನಲ್ಲಿ ಹೂತಿಡುವ ತಂತ್ರ: ಸಾಲದ ಬಾಧೆಯಿಂದ ತತ್ತರಿಸುತ್ತಿರುವವರು ಸ್ವಲ್ಪ ಜೀರಿಗೆಯನ್ನು ತೆಗೆದುಕೊಂಡು, ಯಾರೂ ಇಲ್ಲದ ಏಕಾಂತ ಪ್ರದೇಶಕ್ಕೆ ಹೋಗಿ ಮಣ್ಣಿನಲ್ಲಿ ಹೂತುಹಾಕುತ್ತಾ, “ನನ್ನ ಸಾಲಗಳು ಬೇಗ ತೀರಲಿ” ಎಂದು ಮನಸ್ಸಿನಲ್ಲೇ ಬೇಡಿಕೊಳ್ಳಬೇಕು. ಇದರಿಂದ ಆರ್ಥಿಕ ಸಮಸ್ಯೆಗಳು ದೂರಾಗುತ್ತವೆ.
ಹಸುವಿಗೆ ನೀಡುವ ಪರಿಹಾರ: ಬುಧವಾರದಂದು ಸ್ವಲ್ಪ ಜೀರಿಗೆಯನ್ನು ಒಂದು ಸಣ್ಣ ಹಸಿರು ಬಟ್ಟೆಯಲ್ಲಿ ಕಟ್ಟಿ, ರಾಹುಕಾಲವಿಲ್ಲದ ಶುಭ ಸಮಯದಲ್ಲಿ ಹಸುವಿಗೆ ತಿನ್ನಿಸಬೇಕು. ಇದರಿಂದ ಸಾಲದ ಹೊರೆ ಕ್ರಮೇಣ ಕಡಿಮೆಯಾಗಿ, ಹೊಸ ಆದಾಯದ ಮಾರ್ಗಗಳು ತೆರೆದುಕೊಳ್ಳುತ್ತವೆ.
- ಧನಲಾಭ ಮತ್ತು ಲಕ್ಷ್ಮಿ ಕೃಪೆಗಾಗಿ (For Financial Success):
ಮುಖ್ಯ ದ್ವಾರಕ್ಕೆ ಗಂಟು ಕಟ್ಟುವುದು: ನೀವು ತೀವ್ರ ಆರ್ಥಿಕ ಮುಗ್ಗಟ್ಟು ಎದುರಿಸುತ್ತಿದ್ದರೆ, ಶುಕ್ರವಾರದ ದಿನ ಜೀರಿಗೆಯನ್ನು ಒಂದು ಕೆಂಪು ಬಟ್ಟೆಯಲ್ಲಿ ಕಟ್ಟಿ ಮನೆಯ ಮುಖ್ಯ ದ್ವಾರಕ್ಕೆ (ಮುಂಭಾಗದ ಬಾಗಿಲಿಗೆ) ನೇತುಹಾಕಬೇಕು. ಇದರಿಂದ ಮನೆಗೆ ಒಳಬರುವ ನಕಾರಾತ್ಮಕ ಶಕ್ತಿ ದೂರವಾಗಿ ಹಣದ ಸಮಸ್ಯೆಗಳು ಕಡಿಮೆಯಾಗುತ್ತವೆ.
ತಿಜೋರಿಯಲ್ಲಿಡುವ ರಹಸ್ಯ: ಶುಕ್ರವಾರ ಲಕ್ಷ್ಮಿ ದೇವಿಯ ಪೂಜೆ ಮಾಡುವಾಗ ಕೆಂಪು ಬಟ್ಟೆಯಲ್ಲಿ ಸ್ವಲ್ಪ ಜೀರಿಗೆ ಮತ್ತು ಕೆಲವು ನಾಣ್ಯಗಳನ್ನು ಇಟ್ಟು ದೇವಿಯ ಪಾದದ ಬಳಿ ಇಡಿ. ಪೂಜೆಯ ನಂತರ ಆ ಗಂಟನ್ನು ನಿಮ್ಮ ಮನೆಯ ತಿಜೋರಿ ಅಥವಾ ಹಣ ಇಡುವ ಜಾಗದಲ್ಲಿ ಭದ್ರವಾಗಿ ಇಡುವುದರಿಂದ ಅನಗತ್ಯ ಖರ್ಚುಗಳಿಗೆ ಬ್ರೇಕ್ ಬಿದ್ದು, ಲಕ್ಷ್ಮಿ ದೇವಿಯ ಕೃಪೆ ಸದಾ ಇರುತ್ತದೆ.
- ಕೆಲಸದಲ್ಲಿನ ಅಡೆತಡೆಗಳು ನಿವಾರಣೆಯಾಗಲು (To Complete Pending Work):
ತಲೆ ಸುತ್ತುವ ದೃಷ್ಟಿ ತಂತ್ರ: ಯಾವುದೇ ಪ್ರಮುಖ ಕೆಲಸಗಳು ಪೂರ್ಣಗೊಳ್ಳುತ್ತಿಲ್ಲ ಎಂದಾದರೆ, ಒಂದು ಚಮಚ ಜೀರಿಗೆಯನ್ನು ತೆಗೆದುಕೊಂಡು ಅದನ್ನು ನಿಮ್ಮ ತಲೆಯ ಮೇಲೆ ಏಳು ಬಾರಿ ಸುತ್ತಿ (ದೃಷ್ಟಿ ತೆಗೆಯುವಂತೆ), ನಂತರ ಹರಿಯುವ ನೀರಿನಲ್ಲಿ ಹಾಕಿ. ಇದರಿಂದ ನಕಾರಾತ್ಮಕ ಪ್ರಭಾವ ದೂರವಾಗಿ ಸ್ಥಗಿತಗೊಂಡ ಕೆಲಸಗಳು ಪೂರ್ಣಗೊಳ್ಳುತ್ತವೆ.
ಹೊರಡುವ ಮುನ್ನ: ನೀವು ಯಾವುದೇ ಪ್ರಮುಖ ಕೆಲಸಕ್ಕೆ ಅಥವಾ ಸಂದರ್ಶನಕ್ಕೆ ಮನೆಯಿಂದ ಹೊರಡುವ ಮುನ್ನ, ಸ್ವಲ್ಪ ಜೀರಿಗೆಯನ್ನು ಬಾಯಿಗೆ ಹಾಕಿಕೊಂಡು ಹೊರಡುವುದರಿಂದ ಕೈಹಾಕಿದ ಕೆಲಸಗಳಲ್ಲಿ ಯಶಸ್ಸು ಹಾಗೂ ಆತ್ಮವಿಶ್ವಾಸ ಸಿಗುತ್ತದೆ.
- ಕೆಟ್ಟ ದೃಷ್ಟಿ ಮತ್ತು ಗ್ರಹದೋಷ ನಿವಾರಣೆಗೆ (To Avoid Evil Eye):
ಮನೆಯಲ್ಲಿ ಸದಾ ಕಲಹಗಳು ನಡೆಯುತ್ತಿದ್ದರೆ, ಗುರುವಾರ ಅಥವಾ ಮಂಗಳವಾರದಂದು ಸ್ವಲ್ಪ ಜೀರಿಗೆಯನ್ನು ತೆಗೆದುಕೊಂಡು, ದೃಷ್ಟಿ ತಗುಲಿದ ವ್ಯಕ್ತಿಯ ತಲೆಯಿಂದ ಪಾದದವರೆಗೆ 7 ಬಾರಿ ನಿವಾಳಿಸಿ ಬೆಂಕಿಗೆ ಹಾಕಬೇಕು.
ಅಷ್ಟೇ ಅಲ್ಲದೆ, ಸ್ನಾನ ಮಾಡುವ ನೀರಿಗೆ ಸ್ವಲ್ಪ ಜೀರಿಗೆ ಪುಡಿ ಬೆರೆಸಿ ಸ್ನಾನ ಮಾಡುವುದರಿಂದ ಗ್ರಹ ದೋಷಗಳು ಶಮನಗೊಂಡು ಮಾನಸಿಕ ಶಾಂತಿ ಹಾಗೂ ಆರೋಗ್ಯ ವೃದ್ಧಿಯಾಗುತ್ತದೆ.
