ಕೇಂದ್ರ ನಾಗರಿಕ ವಿಮಾನಯಾನ ಸಚಿವಾಲಯ 2 ವಿಮಾನಯಾನ ಕಂಪನಿಗಳಿಗೆ ಸೇವೆ ಆರಂಭಿಸಲು ನಿರಾಕ್ಷೇಪಣಾ ಪತ್ರವನ್ನು ನೀಡಿದೆ. ಇವುಗಳಲ್ಲಿ ಒಂದು ಅಲ್ ಹಿಂದ್ ಏರ್ ಮತ್ತು ಫ್ಲೈ ಎಕ್ಸ್ಪ್ರೆಸ್ ಆಗಿದೆ. ಆದರೆ ವರದಿಗಳ ಪ್ರಕಾರ ಅಲ್ ಹಿಂದ್ ಏರ್ ಆರ್ಥಿಕ ಸಂಕಷ್ಟವನ್ನು ಎದುರಿಸುತ್ತಿದೆ. ಉದ್ಯೋಗಿಗಳಿಗೆ ರಜೆ ನೀಡಲಾಗಿದ್ದು, ನೋ ವರ್ಕ್, ನೋ ಸ್ಯಾಲರಿ ಘೋಷಣೆ ಮಾಡಲಾಗಿದೆ.
ದೇಶದಲ್ಲಿ 9 ವಿಮಾನಯಾನ ಸಂಸ್ಥೆಗಳು ಸೇವೆಗಳನ್ನು ನೀಡುತ್ತಿವೆ. ಆದರೆ ಇತ್ತೀಚಿಗೆ ಇಂಡಿಗೋ ವಿಮಾನ ಹಾರಾಟದಲ್ಲಿ ವ್ಯತ್ಯಯ ಉಂಟಾದ ಕಾರಣ ಕೇಂದ್ರ ಸರ್ಕಾರ ಇನ್ನೂ ಎರಡು ಕಂಪನಿಗಳಿಗೆ ದೇಶದಲ್ಲಿ ವಿಮಾನ ಸೇವೆ ಆರಂಭಿಸಲು ಎನ್ಒಸಿ ಕೊಟ್ಟಿದೆ. ಕೇರಳ ರಾಜ್ಯದ ಕೊಚ್ಚಿನ್ ಮೂಲದ ಅಲ್ ಹಿಂದ್ ಏರ್ ಸಹ ಇದರಲ್ಲಿ ಒಂದು.
ಮೊಹಮ್ಮದ್ ಹ್ಯಾರೀಸ್ ಅಲ್ ಹಿಂದ್ ಏರ್ ಮುಖ್ಯಸ್ಥ. ವಿಮಾನ ಸೇವೆ ಆರಂಭಿಸಲು ಕಂಪನಿಗೆ ಒಪ್ಪಿಗೆ ಸಿಕ್ಕಿದೆ. ಆದರೆ ಏರ್ ಆಪರೇಟರ್ ಸರ್ಟಿಫಿಕೇಟ್ ಇನ್ನೂ ಸಿಗಬೇಕಿದೆ. ಡಿಜಿಸಿಎ ಈ ಪ್ರಮಾಣ ಪತ್ರವನ್ನು ನೀಡಬೇಕಿದೆ.
ವರದಿಗಳ ಪ್ರಕಾರ ಅಲ್ ಹಿಂದ್ ಏರ್ ಸಂಸ್ಥೆಯಲ್ಲಿ 120 ನೌಕರರು ಇದ್ದಾರೆ. ಆದರೆ ಸಂಸ್ಥೆ ಕೆಲಸವಿಲ್ಲದಿದ್ದರೆ ಸಂಬಳವಿಲ್ಲ ಎಂದು ಆದೇಶವನ್ನು ಹೊರಡಿಸಿದೆ. ನೌಕರರಿಗೆ ನವೆಂಬರ್ 15, 2025 ರಿಂದ ಜಾರಿಗೆ ಬರುವಂತೆ ಮತ್ತು ಮುಂದಿನ ಸೂಚನೆ ಬರುವವರೆಗೆ ಕೆಲಸವಿಲ್ಲದಿದ್ದರೆ ಸಂಬಳವಿಲ್ಲ ವ್ಯವಸ್ಥೆಯನ್ನು ಜಾರಿಗೊಳಿಸಲಾಗಿದೆ. ವಿಮಾನಗಳ ವಾಣಿಜ್ಯ ಕಾರ್ಯಾಚರಣೆಯನ್ನು ಪ್ರಾರಂಭಿಸಲು ಅಗತ್ಯವಿರುವ ಅನುಮೋದನೆಗಳನ್ನು ಪಡೆಯುವಲ್ಲಿ ಆಗುತ್ತಿರುವ ಸುದೀರ್ಘ ವಿಳಂಬವೇ ಈ ನಿರ್ಧಾರಕ್ಕೆ ಕಾರಣ ಎಂದು ವಿಶ್ಲೇಷಿಸಲಾಗುತ್ತಿದೆ.
ಅಲ್ ಹಿಂದ್ ಏರ್ ಸದ್ಯ ಆರ್ಥಿಕ ಸಮಸ್ಯೆಯನ್ನು ಎದುರಿಸುತ್ತಿದೆ. ನೌಕರರ ಸಂಬಳ ಸೇರಿದಂತೆ ವಿಮಾನಯಾನ ಸಂಸ್ಥೆಯ ಮಾಸಿಕ ವೆಚ್ಚವು ಸುಮಾರು 2 ಕೋಟಿ ಆಗುತ್ತಿದ್ದು, ಇದರಿಂದಾಗಿ ನಿರಂತರ ನಷ್ಟ ಉಂಟಾಗುತ್ತಿದೆ ಮತ್ತು ಮುಂದಿನ ಕಾರ್ಯಾಚರಣೆ ಕಷ್ಟಕರವಾಗುತ್ತಿದೆ.
ಸಂಸ್ಥೆಯ ನಿರಂತರ ಪ್ರಯತ್ನಗಳ ಹೊರತಾಗಿಯೂ ಯೋಜನೆಯಂತೆ ಮುಂದುವರಿಯಲು ಸಾಧ್ಯವಾಗುತ್ತಿಲ್ಲ. ಇದು ಪ್ರಸ್ತುತ ಪರಿಸ್ಥಿತಿಯಲ್ಲಿ ಸಂಸ್ಥೆಯ ವ್ಯವಹಾರದ ಕಾರ್ಯಸಾಧ್ಯತೆಯ ಬಗ್ಗೆ ಕಳವಳವನ್ನು ಮೂಡಿಸಿದೆ.
ಏರ್ ಆಪರೇಟರ್ ಸರ್ಟಿಫಿಕೇಟ್ (AOC) ಸಿಗುವವರೆಗೆ ಕೆಲಸಕ್ಕೆ ಹಾಜರಾಗದಂತೆ ನೌಕರರಿಗೆ ಸೂಚಿಸಲಾಗಿದೆ. ಅಲ್ಲದೆ, ಕಂಪನಿಯು ನೀಡಿದ ಎಲ್ಲಾ ಸ್ವತ್ತುಗಳನ್ನು ಮಾನವ ಸಂಪನ್ಮೂಲ ವಿಭಾಗಕ್ಕೆ ಹಿಂತಿರುಗಿಸಲು ತಿಳಿಸಲಾಗಿದೆ.
ಈ ತೀರ್ಮಾನದ ಕುರಿತು ನವೆಂಬರ್ ಆರಂಭದಲ್ಲೇ ನೌಕರರಿಗೆ ಮೌಖಿಕವಾಗಿ ತಿಳಿಸಲಾಗಿತ್ತು. ಆದರೆ, ನೌಕರರು ಅಧಿಕೃತ ಸ್ಪಷ್ಟನೆ ಕೋರಿದ ನಂತರ ಈಗ ಲಿಖಿತ ನೋಟಿಸ್ ನೀಡಲಾಗಿದೆ.
ಟಿ. ಮೊಹಮ್ಮದ್ ಹ್ಯಾರೀಸ್ ಕುರಿತು: ಅಲ್ ಹಿಂದ್ ಏರ್ ಸಂಸ್ಥೆಯು ಕೊಚ್ಚಿಯಲ್ಲಿದೆ. ಅಲ್ ಹಿಂದ್ ಗ್ರೂಪ್ ಆಫ್ ಕಂಪನೀಸ್ ಒಡೆತನದಲ್ಲಿದೆ. ಸುಮಾರು ಮೂರು ದಶಕಗಳ ಹಿಂದೆ ಸ್ಥಾಪನೆಯಾದ ಅಲ್ ಹಿಂದ್ ಗ್ರೂಪ್, ಭಾರತದ ಆತಿಥ್ಯ ಮತ್ತು ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಅತಿದೊಡ್ಡ ಸಂಸ್ಥೆಗಳಲ್ಲಿ ಒಂದು.
ಸಂಯುಕ್ತ ಅರಬ್ ಎಮಿರೇಟ್ಸ್ (ಯುಎಇ), ಸೌದಿ ಅರೇಬಿಯಾ, ಕತಾರ್, ಓಮನ್, ಬಾಂಗ್ಲಾದೇಶ ಮತ್ತು ಕುವೈತ್ ಸೇರಿದಂತೆ ಹಲವಾರು ದೇಶಗಳಲ್ಲಿ ಕಚೇರಿಗಳು ಮತ್ತು ಪಾಲುದಾರರನ್ನು ಹೊಂದಿರುವ ಈ ಕಂಪನಿಯು ವಿಶ್ವದ ವಿವಿಧ ಭಾಗಗಳ ಗ್ರಾಹಕರಿಗೆ ಸೇವೆ ಸಲ್ಲಿಸುತ್ತಿದೆ.
ಸಂಸ್ಥೆ ವೆಬ್ಸೈಟ್ಗಳ ಪ್ರಕಾರ 1992 ರಲ್ಲಿ ಅಲ್ ಹಿಂದ್ ಟೂರ್ಸ್ ಅಂಡ್ ಟ್ರಾವೆಲ್ಸ್ ಪ್ರೈವೇಟ್ ಲಿಮಿಟೆಡ್ ಆಗಿ ಪ್ರಾರಂಭವಾದ ಈ ಸಂಸ್ಥೆಯು, ಭಾರತ ಮತ್ತು ವಿದೇಶಗಳಲ್ಲಿ 130ಕ್ಕೂ ಹೆಚ್ಚು ಸ್ಥಳಗಳಿಗೆ ತನ್ನ ಸೇವಾ ಜಾಲವನ್ನು ವಿಸ್ತರಿಸಿದೆ.
2023ರ ವೇಳೆಗೆ ಇದು 20,000 ಕೋಟಿ ರೂಪಾಯಿಗಳಿಗಿಂತ ಹೆಚ್ಚಿನ ವಹಿವಾಟು ನಡೆಸಿದ್ದು, 1 ಮಿಲಿಯನ್ಗಿಂತಲೂ ಹೆಚ್ಚು ಗ್ರಾಹಕರಿಗೆ ಸೇವೆ ನೀಡಿದೆ. ಟಿ. ಮೊಹಮ್ಮದ್ ಹ್ಯಾರೀಸ್ ಅಲ್ ಹಿಂದ್ ಗ್ರೂಪ್ ಮತ್ತು ಅಲ್ ಹಿಂದ್ ಏರ್ ಸಂಸ್ಥೆಗಳ ಮಾಲೀಕರು.
ಇವರು ಪ್ರವಾಸ ಸೇವೆಗಳು, ಏರ್ ಟಿಕೆಟಿಂಗ್, ಪ್ರವಾಸಗಳು ಮತ್ತು ವಿದೇಶಿ ವಿನಿಮಯ ಕ್ಷೇತ್ರಗಳಲ್ಲಿ ಅಪಾರ ಅನುಭವ ಹೊಂದಿದ್ದಾರೆ. ಕೇರಳದ ಸಾಮಾನ್ಯ ಕುಟುಂಬದ ಹಿನ್ನೆಲೆಯಿಂದ ಬಂದ ಹ್ಯಾರೀಸ್, ಒಂದು ಸಣ್ಣ ಪ್ರವಾಸ ಕಚೇರಿಯ ಮೂಲಕ ತಮ್ಮ ವೃತ್ತಿಜೀವನ ಆರಂಭಿಸಿದರು.
ಕ್ಯಾಲಿಕಟ್ನಲ್ಲಿ ಜನಿಸಿದ ಇವರು ಕಲೆ (ಇತಿಹಾಸ ಮತ್ತು ಅರ್ಥಶಾಸ್ತ್ರ) ಮತ್ತು ಫಾರ್ಮಕಾಲಜಿಯಲ್ಲಿ ಪದವಿ ಪಡೆದಿದ್ದಾರೆ. ಹ್ಯಾರೀಸ್ ಅವರು ಇಂಡಿಯನ್ ಹಜ್ ಉಮ್ರಾ ಅಸೋಸಿಯೇಷನ್ನ ಸಂಸ್ಥಾಪಕ ಪ್ರಧಾನ ಕಾರ್ಯದರ್ಶಿ. 2021ರಲ್ಲಿ ಭಾರತೀಯ ವಿಮಾನಯಾನ ಪ್ರಾಧಿಕಾರವು ಇವರನ್ನು ಕ್ಯಾಲಿಕಟ್ ವಿಮಾನ ನಿಲ್ದಾಣದ ಸಲಹಾ ಸಮಿತಿಗೆ ಪ್ರವಾಸೋದ್ಯಮ ಸಮುದಾಯದ ಪ್ರತಿನಿಧಿಯಾಗಿ ನೇಮಿಸಿತ್ತು.
ಹ್ಯಾರೀಸ್ ಅಲ್ ಹಿಂದ್ ಸಂಸ್ಥೆಯನ್ನು ಪ್ರಾದೇಶಿಕ ಪ್ರಯಾಣಿಕ ವಿಮಾನಯಾನ ಸಂಸ್ಥೆಯಾಗಿ ಪ್ರಾರಂಭಿಸಲು ಯೋಜಿಸಿದ್ದಾರೆ. ಆರಂಭದಲ್ಲಿ ಕೇವಲ 3 ATR 72-600 ಟರ್ಬೋಪ್ರೊಪ್ ವಿಮಾನಗಳೊಂದಿಗೆ ಕಾರ್ಯಾಚರಣೆ ಶುರು ಮಾಡಿ, ಒಂದು ವರ್ಷದೊಳಗೆ ಈ ಸಂಖ್ಯೆಯನ್ನು 7ಕ್ಕೆ ಏರಿಸುವ ಗುರಿ ಹೊಂದಿದ್ದಾರೆ. ಸದ್ಯದ ಮಾಹಿತಿ ಪ್ರಕಾರ ಅಲ್ ಹಿಂದ್ ಏರ್ 2026ರಲ್ಲಿ ಕಾರ್ಯಾಚರಣೆ ಪ್ರಾರಂಭಿಸುವ ಸಾಧ್ಯತೆಯಿದೆ.
ಇದು ತನ್ನ ವ್ಯವಹಾರಕ್ಕೆ ದಕ್ಷಿಣ ಭಾರತದ ದೇಶೀಯ ಮಾರ್ಗಗಳ ಮೇಲೆ ಗಮನಹರಿಸಲಿದೆ. ಕೊಚ್ಚಿಯನ್ನು ಮುಖ್ಯ ಕೇಂದ್ರವನ್ನಾಗಿ ಮಾಡಿಕೊಳ್ಳಲಿದೆ. ಬೆಂಗಳೂರು, ತಿರುವನಂತಪುರಂ, ಚೆನ್ನೈ ಮತ್ತು ಕೇರಳದ ಇತರ ವಿಮಾನ ನಿಲ್ದಾಣಗಳನ್ನು ಇದು ಸಂಪರ್ಕಿಸಲಿದೆ. ನಂತರದ ದಿನಗಳಲ್ಲಿ ಅಂತರಾಷ್ಟ್ರೀಯ ಮಟ್ಟಕ್ಕೆ, ವಿಶೇಷವಾಗಿ ಗಲ್ಫ್ ರಾಷ್ಟ್ರಗಳಿಗಳಿಗೆ ವಿಸ್ತರಿಸುವ ಯೋಜನೆಯೂ ಇದೆ.
