ಇತ್ತೀಚಿನ ದಿನಗಳಲ್ಲಿ ಬೆಳ್ಳಿಪರದೆಯಿಂದ ತುಸು ದೂರ ಉಳಿದಿರುವ ಬಾಲಿವುಡ್ ನಟಿ ಐಶ್ವರ್ಯಾ ರೈ ಬಚ್ಚನ್, ಜಾಗತಿಕ ಮಟ್ಟದ ಕಾರ್ಯಕ್ರಮಗಳಲ್ಲಿ ತಮ್ಮ ಉಪಸ್ಥಿತಿಯಿಂದ ಸದಾ ಸುದ್ದಿಯಲ್ಲಿರುತ್ತಾರೆ. ಖ್ಯಾತ ಸೌಂದರ್ಯವರ್ಧಕ ಸಂಸ್ಥೆ ಲೊರಿಯಲ್ ಪ್ಯಾರಿಸ್ನ ಜಾಗತಿಕ ರಾಯಭಾರಿಯಾಗಿರುವ ಅವರು, ಪ್ರತಿಷ್ಠಿತ ಕ್ಯಾನ್ಸ್ ಫಿಲ್ಮ್ ಫೆಸ್ಟಿವಲ್ ಹಾಗೂ ಪ್ಯಾರಿಸ್ ಫ್ಯಾಷನ್ ವೀಕ್ನಂತಹ ದೊಡ್ಡ ವೇದಿಕೆಗಳಲ್ಲಿ ಭಾರತವನ್ನು ಪ್ರತಿನಿಧಿಸುತ್ತಾ ಬಂದಿದ್ದಾರೆ.
ಈ ಬಾರಿಯ ಪ್ಯಾರಿಸ್ ಫ್ಯಾಷನ್ ವೀಕ್ನಲ್ಲೂ ಐಶ್ವರ್ಯಾ ರೈ ತಮ್ಮ ಸೌಂದರ್ಯ ಮತ್ತು ಸರಳತೆಯಿಂದ ಪ್ರೇಕ್ಷಕರ ಮನ ಗೆದ್ದಿದ್ದಾರೆ. ಈ ಫ್ಯಾಷನ್ ಶೋನ ಉದ್ಘಾಟನಾ ಸಮಾರಂಭದಲ್ಲಿ ಜಾಗತಿಕ ಸಂಗೀತ ಲೋಕದ ದೈತ್ಯ ಪ್ರತಿಭೆ ಸಿಲೀನ್ ಡಿಯೋನ್ ತಮ್ಮ ಐಕಾನಿಕ್ ಐ ಆಮ್ ಅಲೈವ್ ಗೀತೆಯನ್ನು ಗಾಯನ ಮಾಡುವ ಮೂಲಕ ಎಲ್ಲರನ್ನೂ ರಂಜಿಸಿದರು. ಈ ವೇಳೆ ಐಶ್ವರ್ಯಾ ರೈ ಅವರು ಸಿಲೀನ್ ಡಿಯೋನ್ ಅವರನ್ನು ಅಪ್ಪಿಕೊಂಡು, ಮುದ್ದಾಡಿ ಶುಭಾಶಯ ತಿಳಿಸಿದರು. ಅಷ್ಟೇ ಅಲ್ಲದೆ, ವೇದಿಕೆಯ ಮೇಲೆ ಇಬ್ಬರೂ ಕೈಹಿಡಿದು ಹೆಜ್ಜೆ ಹಾಕುತ್ತಾ ಕಾರ್ಯಕ್ರಮದ ಕಳೆಯನ್ನು ಹೆಚ್ಚಿಸಿದರು.
ಈ ವರ್ಣರಂಜಿತ ಸಂಜೆ ಐಶ್ವರ್ಯಾ ರೈ ಜೊತೆಗೆ ಹಾಲಿವುಡ್ ಹಾಗೂ ಜಾಗತಿಕ ಮಟ್ಟದ ಪ್ರಸಿದ್ಧ ತಾರೆಗಳಾದ ಕೆಂಡಲ್ ಜೆನ್ನರ್, ಸಿಮೋನ್ ಆಶ್ಲಿ, ವೈಯೋಲಾ ಡೇವಿಸ್, ಕ್ಯಾರಾ ಡೆಲೆವಿನ್, ಜೇನ್ ಫೋಂಡಾ ಮತ್ತು ಈವಾ ಲೋಂಗೋರಿಯಾ ಸೇರಿದಂತೆ ಹಲವು ಗಣ್ಯರು ಭಾಗವಹಿಸಿದ್ದರು.
ಕಪ್ಪು ವರ್ಣದ ರೇಷ್ಮೆ ಗೌನ್ನಲ್ಲಿ ಮಿಂಚಿದ ತಾರೆ
ಸೆಪ್ಟೆಂಬರ್ 28 ರಂದು ನಡೆದ ಈ ಫ್ಯಾಷನ್ ರ್ಯಾಂಪ್ ವಾಕ್ನಲ್ಲಿ ಐಶ್ವರ್ಯಾ ರೈ ಕಪ್ಪು ಬಣ್ಣದ ವೆಲ್ವೆಟ್ ಗೌನ್ ಧರಿಸಿ ಅತ್ಯಂತ ಆಕರ್ಷಕವಾಗಿ ಕಂಗೊಳಿಸಿದರು. ಆಕರ್ಷಕ ಕಿರೀಟ ಧರಿಸಿದ್ದ ಅವರ ರಾಜಸಿಕ ಉಡುಪು ಪ್ರೇಕ್ಷಕರ ಗಮನ ಸೆಳೆಯಿತು.
ಚಿತ್ರರಂಗದ ವಿಚಾರಕ್ಕೆ ಬಂದರೆ, ಐಶ್ವರ್ಯಾ ರೈ ಕೊನೆಯದಾಗಿ ಮಣಿರತ್ನಂ ನಿರ್ದೇಶನದ ಪೊನ್ನಿಯಿನ್ ಸೆಲ್ವನ್ ಭಾಗ 2 ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.
