ಬೆಂಗಳೂರು-ರಾಜ್ಯ ಸರ್ಕಾರದ ಹೊಸ ಪ್ರಜಾಸೇವಾ ಇಲಾಖೆಯು ಸಾರ್ವಜನಿಕರಿಗೆ ಒಂದೇ ಸೂರಿನಡಿ ನೂರಾರು ಸರ್ಕಾರಿ ಸೇವೆಗಳನ್ನು ಸುಲಭವಾಗಿ ತಲುಪಿಸಲು ಸಜ್ಜಾಗಿದೆ.
ಒಟ್ಟು 2,456 ಸರ್ಕಾರಿ ಸೇವೆಗಳಲ್ಲಿ ಸುಮಾರು 2,300 ಸೇವೆಗಳನ್ನು ಡಿಜಿಟಲ್ ಮಾಧ್ಯಮದ ಮೂಲಕ ಒದಗಿಸುವ ನಿರೀಕ್ಷೆಯಿದ್ದು, ನಾಗರಿಕರಿಗೆ ನೆರವಾಗಲು ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. ಆದರೆ, ತಾಂತ್ರಿಕ ಹಾಗೂ ಹೆಸರಿನ ಗೊಂದಲದ ಹಿನ್ನೆಲೆಯಲ್ಲಿ ಈ ವೇದಿಕೆಯ ಹೆಸರನ್ನು ಮರುಪರಿಶೀಲಿಸುವ ಹಂತದಲ್ಲಿದೆ.
ಹೆಸರಿನ ಗೊಂದಲ ಮತ್ತು ಪರ್ಯಾಯ ಚಿಂತನೆ
ಹೆಸರಿನ ಗೊಂದಲ ಮತ್ತು ಪರ್ಯಾಯ ಚಿಂತನೆಖಾಸಗಿ ಆನ್‌ಲೈನ್ ಪೋರ್ಟಲ್ ಈಗಾಗಲೇ ‘ಸೇವಾಒನ್’ (SevaOne) ಹೆಸರಿನಲ್ಲಿ ಕಾರ್ಯಾಚರಣೆ ನಡೆಸುತ್ತಿದ್ದು, ಸಾರ್ವಜನಿಕರಿಗೆ ವಿವಿಧ ಸೇವೆಗಳನ್ನು ನೀಡುತ್ತಿರುವುದು ಸರ್ಕಾರದ ಗಮನಕ್ಕೆ ಬಂದಿದೆ.
ಸಾರ್ವಜನಿಕರಲ್ಲಿ ಉಂಟಾಗಬಹುದಾದ ಗೊಂದಲವನ್ನು ತಪ್ಪಿಸಲು ಮತ್ತು ಬಳಕೆದಾರರು ಖಾಸಗಿ ವೆಬ್‌ಸೈಟ್‌ಗೆ ತಿರುಗಿಸಲ್ಪಡುವುದನ್ನು ತಡೆಯಲು ಸರ್ಕಾರವು ಹೆಸರನ್ನು ಬದಲಿಸುವ ಕುರಿತು ಗಂಭೀರ ಚಿಂತನೆ ನಡೆಸಿದೆ.
ಈ ನಿಟ್ಟಿನಲ್ಲಿ ‘ನಮ್ಮ ಸೇವೆ’ ಸೇರಿದಂತೆ ಕೆಲವು ಪರ್ಯಾಯ ಹೆಸರುಗಳನ್ನು ಪರಿಗಣಿಸಲಾಗುತ್ತಿದ್ದು, ಅಂತಿಮ ನಿರ್ಧಾರ ಕೈಗೊಳ್ಳಬೇಕಿದೆ.
AI ತಂತ್ರಜ್ಞಾನ ಮತ್ತು ಸೇವಾ ಸುಧಾರಣೆಗಳು
ನಾಗರಿಕರು ಅರ್ಜಿ ಸಲ್ಲಿಸುವಾಗ ವಿಭಾಗಗಳ ಆಯ್ಕೆಯಲ್ಲಿ ಗೊಂದಲಕ್ಕೊಳಗಾದರೆ ಅಥವಾ ತಪ್ಪಾದ ವರ್ಗವನ್ನು ಆರಿಸಿಕೊಂಡರೆ, AI ತಂತ್ರಜ್ಞಾನವು ಅದನ್ನು ಸ್ವಯಂಚಾಲಿತವಾಗಿ ಸರಿಪಡಿಸಿ ಸರಿಯಾದ ಇಲಾಖೆಗೆ ತಲುಪಿಸಲು ಮಾರ್ಗದರ್ಶನ ನೀಡುತ್ತದೆ. ಉದಾಹರಣೆಗೆ, ಮನೆ ನಿರ್ಮಾಣದ ಅನುಮೋದನೆಗೆ ಬೇಕಾದ ದಾಖಲೆಗಳ ಕುರಿತು AI ಸಹಾಯಕರು ಸಂಪೂರ್ಣ ಮಾಹಿತಿ ನೀಡಲಿದ್ದಾರೆ.
ಪ್ರಸ್ತುತ ಈ ವೇದಿಕೆಯು ಒಂದೇ ಲಾಗಿನ್ ಪೋರ್ಟಲ್ ಆಗಿದ್ದರೂ, ಪ್ರತಿ ಇಲಾಖೆಗೂ ಪ್ರತ್ಯೇಕವಾಗಿ ದಾಖಲೆಗಳನ್ನು ಅಪ್‌ಲೋಡ್ ಮಾಡಬೇಕಿದೆ. ಮುಂದಿನ ದಿನಗಳಲ್ಲಿ ಇದನ್ನು ‘ಡಿಜಿಲಾಕರ್’ ಜತೆ ಸಂಯೋಜಿಸುವುದರಿಂದ ನಾಗರಿಕರ ಸಮಯ ಉಳಿಯಲಿದೆ. ಉಳಿದ 156 ಸೇವೆಗಳನ್ನು ಆನ್‌ಲೈನ್‌ಗೆ ತರಲುಯ ಸಂಬಂಧಿತ ಇಲಾಖೆಗಳೊಂದಿಗೆ ಚರ್ಚೆಗಳು ನಡೆಯುತ್ತಿವೆ.
ಮೋಟಾರು ವಾಹನ ಸೇವೆಗಳು ಮತ್ತು ವಿಸ್ತರಣೆ
ಮೋಟಾರು ವಾಹನ ಸೇವೆಗಳಂತಹ ಕೆಲವು ಕೇಂದ್ರ ಸರ್ಕಾರದ ಸೇವೆಗಳನ್ನೂ ಈ ವೇದಿಕೆಗೆ ಸೇರಿಸಲು ಕೇಂದ್ರದ ಅನುಮೋದನೆ ಕೋರಲಾಗುತ್ತದೆ. ಮೊಬೈಲ್ ಅಪ್ಲಿಕೇಶನ್ ಹಾಗೂ ಕಿಯೋಸ್ಕ್‌ಗಳ ವಿಸ್ತರಣೆ ಅಕ್ಟೋಬರ್ 2ರ ಗಾಂಧಿ ಜಯಂತಿಯಂದು ಈ ಮೊಬೈಲ್ ಅಪ್ಲಿಕೇಶನ್ ಅನ್ನು ಅಧಿಕೃತವಾಗಿ ಲೋಕಾರ್ಪಣೆಗೊಳಿಸಲು ತೀರ್ಮಾನಿಸಲಾಗಿದೆ.
ಗ್ರಾಮೀಣ ಹಾಗೂ ನಗರ ಪ್ರದೇಶಗಳಲ್ಲಿ ಡಿಜಿಟಲ್ ಸೇವೆಗಳಪಡೆಯಲು ಕಷ್ಟಪಡುವ ಜನರಿಗಾಗಿ ಫ್ರಾಂಚೈಸಿಗಳ ಮೂಲಕ ಕಿಯೋಸ್ಕ್‌ಗಳನ್ನು ತೆರೆಯಲು ಅವಕಾಶ ನೀಡಲಾಗುತ್ತದೆ.
ನಾಗರಿಕರು ಖಾತೆ ತೆರೆಯಲು ಹಾಗೂ ಸೇವೆಗಳಿಗೆ ಅರ್ಜಿ ಸಲ್ಲಿಸಲು ಸಹಾಯ ಮಾಡುವ ಈ ಫ್ರಾಂಚೈಸಿಗಳು ಪ್ರತಿ ಅರ್ಜಿಗೆ ನಾಮಮಾತ್ರವಾಗಿ 10 ಅಥವಾ 15 ರೂಪಾಯಿ ಶುಲ್ಕವನ್ನು ಹಾಗೂ ಲೇಖನ ಸಾಮಗ್ರಿಗಳಿಗೆ ಹೆಚ್ಚುವರಿ ಶುಲ್ಕವನ್ನು ಪಡೆಯಲು ಅವಕಾಶವಿರಲಿದೆ.
ಸರ್ಕಾರದ ಈ ನೂತನ ಡಿಜಿಟಲ್ ಹೆಜ್ಜೆಯು ಆಡಳಿತದಲ್ಲಿ ಪಾರದರ್ಶಕತೆಯನ್ನು ತರುವುದಲ್ಲದೆ, ಜನಸಾಮಾನ್ಯರ ಅಲೆದಾಟವನ್ನು ತಪ್ಪಿಸಿ ಕಚೇರಿ ಕೆಲಸಗಳನ್ನು ಮನೆಯಲ್ಲಿಯೇ ಕುಳಿತು ನಿರ್ವಹಿಸಲು ಸಹಕಾರಿಯಾಗಲಿದೆ
