ಭಾರತೀಯ ಕಿರುತೆರೆ ಇತಿಹಾಸದಲ್ಲಿ ಸುವರ್ಣಾಕ್ಷರಗಳಲ್ಲಿ ಬರೆದಿಡಲಾದ ದೃಶ್ಯಕಾವ್ಯ ‘ಮಾಲ್ಗುಡಿ ಡೇಸ್’. ಖ್ಯಾತ ಸಾಹಿತಿ ಆರ್.ಕೆ. ನಾರಾಯಣ್ ಅವರ ಕಥೆಗಳಿಗೆ ಶಂಕರ್ನಾಗ್ ತಮ್ಮ ಕಲ್ಪನೆಯ ಸ್ಪರ್ಶ ನೀಡಿ ನಿರ್ದೇಶಿಸಿದ್ದ ಈ ಧಾರಾವಾಹಿ ಇಂದಿಗೂ ಪ್ರತಿಯೊಬ್ಬರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿದಿದೆ. ಇದೀಗ ಆ ಸವಿನೆನಪುಗಳನ್ನು ಮತ್ತೆ ಮೆಲುಕು ಹಾಕುವಂತಹ ಅಪರೂಪದ, ಭಾವನಾತ್ಮಕ ಕ್ಷಣವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
‘ಮಾಲ್ಗುಡಿ ಡೇಸ್’ ಧಾರಾವಾಹಿಯ ಕೇಂದ್ರಬಿಂದು, ಮನೆಮಾತಾಗಿದ್ದ ‘ಸ್ವಾಮಿ’ ಪಾತ್ರಧಾರಿ ಮಾಸ್ಟರ್ ಮಂಜುನಾಥ್, ತಮ್ಮ ಫೇಸ್ಬುಕ್ ಖಾತೆಯಲ್ಲಿ ಹಂಚಿಕೊಂಡಿರುವ ಈ ಫೋಟೋ ನೋಡುಗರನ್ನು ನೇರವಾಗಿ 80ರ ದಶಕದ ಆ ಮುಗ್ಧ ಬಾಲ್ಯಕ್ಕೆ ಕರೆದೊಯ್ಯುತ್ತದೆ.
ಆಗುಂಬೆಯ ನೆನಪುಗಳನ್ನು ಬೆನ್ನಟ್ಟಿ ಹೋದ ಗೆಳೆಯರು:
‘ಮಾಲ್ಗುಡಿ ಡೇಸ್’ ಚಿತ್ರೀಕರಣ ನಡೆದಿದ್ದ ಮಲೆನಾಡಿನ ಸುಂದರ ತಾಣ ಆಗುಂಬೆಗೆ ಈ ಮೂವರು ಇತ್ತೀಚೆಗೆ ಭೇಟಿ ನೀಡಿದ್ದಾರೆ. ದಶಕಗಳ ಹಿಂದೆ ಶಂಕರ್ನಾಗ್ ಅವರ ಕ್ಯಾಮೆರಾ ಕಣ್ಣಿನಲ್ಲಿ ಪೋಲೀಸ್ ಅಧಿಕಾರಿಯ ಮುದ್ದಾದ ಮಗನಾಗಿ ಮಿಂಚಿದ್ದ ‘ರಾಜಂ’ (ರೋಹಿತ್ ಶ್ರೀನಾಥ್), ಕೈಯಲ್ಲಿ ಸದಾ ದೊಣ್ಣೆ ಹಿಡಿದುಕೊಂಡು ರೌದ್ರಾವತಾರದಲ್ಲಿರುತ್ತಿದ್ದ ‘ಮಣಿ’ (ರಘುರಾಮ್ ಸೀತಾರಾಮ್) ಹಾಗೂ ಎಲ್ಲರ ಪ್ರೀತಿಯ ‘ಸ್ವಾಮಿ’ (ಮಾಸ್ಟರ್ ಮಂಜುನಾಥ್) ದಶಕಗಳ ನಂತರ ಮತ್ತೆ ಅದೇ ತಾಣದಲ್ಲಿ ಒಟ್ಟಿಗೆ ಸೇರಿದ್ದಾರೆ.
ತಮ್ಮದೇ ಪ್ರತಿಮೆಗಳೊಂದಿಗೆ ನಿಂತು ಕಣ್ತುಂಬಿಕೊಂಡ ಕ್ಷಣ:
ಈ ಭೇಟಿಯ ಅತ್ಯಂತ ಆಕರ್ಷಕ ಮತ್ತು ಅಪರೂಪದ ದೃಶ್ಯವೆಂದರೆ, ಅಂದು ತಾವು ನಟಿಸಿದ್ದ ಸ್ವಾಮಿ, ರಾಜಂ ಹಾಗೂ ಮಣಿ ಪಾತ್ರಗಳ ಪ್ರತಿಮೆಗಳ ಎದುರೇ ಇಂದು ಪ್ರಬುದ್ಧ ವಯಸ್ಸಿನ ಈ ಮೂವರು ನಟರು ನಿಂತು ಪೋಸ್ ನೀಡಿರುವುದು.
* ಎಡಭಾಗದಲ್ಲಿ, ಖಾಕಿ ವಸ್ತ್ರ ಮತ್ತು ಬಂದೂಕು ಹಿಡಿದ ಬಾಲಕ ‘ರಾಜಂ’ ಪ್ರತಿಮೆಯ ಹೆಗಲ ಮೇಲೆ ಕೈಯಿಟ್ಟು ನಗುಮುಖದಿಂದ ನಿಂತಿರುವ ರೋಹಿತ್ ಶ್ರೀನಾಥ್.
* ಮಧ್ಯದಲ್ಲಿ, ಎಂದಿನಂತೆ ತನ್ನ ಮುಗ್ಧತೆ, ಪಂಚೆ-ಕೋಟು ಧರಿಸಿರುವ ‘ಸ್ವಾಮಿ’ಯ ಪ್ರತಿಮೆಯನ್ನು ವಾತ್ಸಲ್ಯದಿಂದ ಹಿಡಿದು ನಿಂತಿರುವ ಮಾಸ್ಟರ್ ಮಂಜುನಾಥ್.
* ಬಲಭಾಗದಲ್ಲಿ, ಕೈಯಲ್ಲಿ ಮರದ ಬಡಿಗೆ ಹಿಡಿದು ನಿಂತಿರುವ ‘ಮಣಿ’ಯ ಪ್ರತಿಮೆಯನ್ನು ತೋರಿಸುತ್ತಾ, ಅದೇ ಖದರ್ನಲ್ಲಿ ನಿಂತಿರುವ ರಘುರಾಮ್ ಸೀತಾರಾಮ್.
ವೈರಲ್ ಆದ ಭಾವನಾತ್ಮಕ ಫೋಟೋ:
ಮಾಸ್ಟರ್ ಮಂಜುನಾಥ್ ಅವರು ಈ ಚಿತ್ರವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡು ʼʼ40 ವರ್ಷಗಳು. ಮೂವರು ಸ್ನೇಹಿತರು. ಒಂದು ಮರೆಯಲಾಗದ ಸ್ಥಳ.
ನಾವು ಮತ್ತೆ ಆಗುಂಬೆಗೆ ಮರಳಿದ್ದೇವೆ.
ಹಳೆಯ ನೆನಪುಗಳ ನಡುವೆ ನಡೆದಾಡಿದೆವು,
ಒಮ್ಮೆ ನಮ್ಮ ಬದುಕಿನ ಭಾಗವಾಗಿದ್ದ ಸ್ಥಳಗಳನ್ನು ಮತ್ತೆ ನೋಡಿದೆವು…
ಮತ್ತು ಕೆಲವು ನೆನಪುಗಳು ಎಂದಿಗೂ ನಮ್ಮನ್ನು ಬಿಟ್ಟು ಹೋಗುವುದಿಲ್ಲ ಎಂಬುದನ್ನು ಮತ್ತೊಮ್ಮೆ ಅರಿತುಕೊಂಡೆವು.
ಮಾಲ್ಗುಡಿಯಿಂದ ಮತ್ತೊಂದು ಕಥೆ ಮತ್ತೆ ಬರುತ್ತಿದೆ.
ಈ ಬಾರಿ… ಈ ಪಯಣದಲ್ಲಿ ನೀವೂ ನಮ್ಮೊಂದಿಗೆ ಇರಬೇಕೆಂದು ನಾವು ಬಯಸುತ್ತೇವೆ.
ಘೋಷಣೆ ಶೀಘ್ರದಲ್ಲೇ…ʼʼ ಎಂದು ಬರೆದುಕೊಂಡಿದ್ದು, ನೆಟ್ಟಿಗರು ಅಪಾರ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. “ನಮ್ಮ ಬಾಲ್ಯದ ಅತ್ಯಂತ ಸುಂದರ ನೆನಪುಗಳನ್ನು ಮತ್ತೆ ನೆನಪಿಸಿದ್ದೀರಿ”, “ಶಂಕರ್ನಾಗ್ ಅವರ ಅದ್ಭುತ ಸೃಷ್ಟಿಗೆ ಕಾಲವೇ ತಲೆಬಾಗಿದೆ” ಎಂಬಿತ್ಯಾದಿ ಕಾಮೆಂಟ್ಗಳು ಹರಿದುಬರುತ್ತಿವೆ.
ನಾಲ್ಕು ದಶಕಗಳು ಕಳೆದರೂ, ಕಾಲ ಎಷ್ಟು ಬದಲಾದರೂ ‘ಮಾಲ್ಗುಡಿ ಡೇಸ್’ ನೀಡಿದ ಆ ಅನುಭವ, ಈ ಮೂವರು ಬಾಲಮಿತ್ರರ ಸ್ನೇಹ ಮತ್ತು ಆರ್.ಕೆ. ನಾರಾಯಣ್-ಶಂಕರ್ನಾಗ್ ಅವರ ಆ ಕಲಾಪ್ರಪಂಚ ಎಂದಿಗೂ ಅಮರ ಎಂಬುದಕ್ಕೆ ಈ ಚಿತ್ರವೇ ಜೀವಂತ ಸಾಕ್ಷಿ.
