ನವದೆಹಲಿ: ವಾಟ್ಸ್ಆಪ್ನ ಹೊಸ ಯೂಸರ್‌ನೇಮ್ (Username) ವೈಶಿಷ್ಟ್ಯಕ್ಕೆ ಸಂಬಂಧಿಸಿದಂತೆ ಈಗಾಗಲೇ ಮೆಟಾಗೆ ನೋಟಿಸ್ ನೀಡಿರುವ ಕೇಂದ್ರ ಸರ್ಕಾರ, ಇದೀಗ ತನ್ನ ಪರಿಶೀಲನೆಯನ್ನು ಇತರ ಮೆಸೇಜಿಂಗ್ ಪ್ಲಾಟ್ಫಾರ್ಮ್ಗಳಿಗೂ ವಿಸ್ತರಿಸಿದೆ. ಟೆಲಿಗ್ರಾಮ್‌ ಮತ್ತು ಸಿಗ್ನಲ್‌ ಸಂಸ್ಥೆಗಳಿಗೂ ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ನೋಟಿಸ್ ಜಾರಿ ಮಾಡಿದೆ.
ಮೋಸ, ನಕಲಿ ಗುರುತು (Impersonation) ಹಾಗೂ ಇತರ ಸೈಬರ್ ಅಪರಾಧಗಳನ್ನು ತಡೆಯಲು ಈ ವೇದಿಕೆಗಳು ಯಾವ ರೀತಿಯ ಸುರಕ್ಷತಾ ಕ್ರಮಗಳನ್ನು ಕೈಗೊಂಡಿವೆ ಎಂಬ ಬಗ್ಗೆ ವಿವರ ನೀಡುವಂತೆ ಸರ್ಕಾರ ಸೂಚಿಸಿದೆ.ಸರ್ಕಾರ ವಿಶೇಷವಾಗಿ Telegram ಅನ್ನು ಉದ್ದೇಶಿಸಿ, Username ವೈಶಿಷ್ಟ್ಯವನ್ನು ಮುಂದುವರಿಸಲು ಏಕೆ ಅವಕಾಶ ನೀಡಬೇಕು ಹಾಗೂ ಅದರ ದುರುಪಯೋಗವನ್ನು ತಡೆಯಲು ಯಾವ ಸುರಕ್ಷತಾ ಕ್ರಮಗಳನ್ನು ಜಾರಿಗೊಳಿಸಲಾಗಿದೆ ಎಂಬುದರ ಬಗ್ಗೆ ಸ್ಪಷ್ಟನೆ ಕೇಳಿದೆ.
WhatsAppಗೆ ಈಗಾಗಲೇ ನೋಟಿಸ್
ಒಂದು ದಿನದ ಹಿಂದೆ ಕೇಂದ್ರ ಸರ್ಕಾರ Metaಗೆ ನೋಟಿಸ್ ನೀಡಿ, WhatsApp ಪರಿಚಯಿಸಲು ಉದ್ದೇಶಿಸಿರುವ Username ವೈಶಿಷ್ಟ್ಯವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸುವಂತೆ ಸೂಚಿಸಿತ್ತು.ಈ ವೈಶಿಷ್ಟ್ಯದಿಂದ ಮೊಬೈಲ್ ಸಂಖ್ಯೆ ಹಂಚಿಕೊಳ್ಳದೇ ಸಂವಹನ ನಡೆಸಲು ಸಾಧ್ಯವಾಗುವುದರಿಂದ ಆನ್ಲೈನ್ ವಂಚನೆಗಳು ಹೆಚ್ಚಾಗುವ ಸಾಧ್ಯತೆ,ಫಿಶಿಂಗ್ ದಾಳಿಗಳು,’ಡಿಜಿಟಲ್ ಅರೆಸ್ಟ್’ ಹೆಸರಿನ ವಂಚನೆ,ನಕಲಿ ಗುರುತಿನ (Impersonation) ಪ್ರಕರಣಗಳು ಹೆಚ್ಚಾಗುವ ಆತಂಕವಿದೆ ಎಂದು ಸರ್ಕಾರ ತಿಳಿಸಿದೆ . ಸರ್ಕಾರದೊಂದಿಗೆ ಸಮಾಲೋಚನೆ ಪೂರ್ಣಗೊಳ್ಳುವವರೆಗೆ ಈ ವೈಶಿಷ್ಟ್ಯವನ್ನು ಜಾರಿಗೆ ತರಬಾರದು ಎಂದು WhatsAppಗೆ ಸೂಚಿಸಲಾಗಿದೆ.
IT ಕಾಯ್ದೆಯಡಿ ಕ್ರಮದ ಎಚ್ಚರಿಕೆ
ನೋಟಿಸ್ನಲ್ಲಿ, ಈ ವೈಶಿಷ್ಟ್ಯವು ಸೈಬರ್ ಅಪರಾಧಗಳಿಗೆ ಅನುಕೂಲವಾಗುತ್ತದೆ ಎಂದು ಕಂಡುಬಂದರೆ ಮಾಹಿತಿ ತಂತ್ರಜ್ಞಾನ ಕಾಯ್ದೆ (IT Act) ಹಾಗೂ ಸಂಬಂಧಿತ ನಿಯಮಗಳಡಿ ಕ್ರಮ ಏಕೆ ಕೈಗೊಳ್ಳಬಾರದು ಎಂಬುದನ್ನು ವಿವರಿಸುವಂತೆ ಮೆಟಾಗೆ ಕೇಳಲಾಗಿದೆ.ಜೊತೆಗೆ, Significant Social Media Intermediary (SSMI) ಆಗಿರುವ WhatsApp, IT ಕಾಯ್ದೆಯಡಿ ವಿಧಿಸಲಾಗಿರುವ ಎಲ್ಲಾ ‘Due Diligence’ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು ಎಂದು ಸರ್ಕಾರ ನೆನಪಿಸಿದೆ.
WhatsApp ಸ್ಪಷ್ಟನೆ ಏನು?
WhatsApp ತನ್ನ ಹೊಸ ವೈಶಿಷ್ಟ್ಯವನ್ನು ಸಮರ್ಥಿಸಿಕೊಂಡಿದ್ದು, ವಂಚನೆ ಮತ್ತು ನಕಲಿ ಗುರುತಿನ ದುರುಪಯೋಗವನ್ನು ತಡೆಯಲು ಹಲವು ಭದ್ರತಾ ಕ್ರಮಗಳನ್ನು ಅಳವಡಿಸಲಾಗಿದೆ ಎಂದು ಹೇಳಿದೆ.
ಕಂಪನಿಯ ಪ್ರಕಾರ,
• ಗಣ್ಯ ವ್ಯಕ್ತಿಗಳು,
• ಸರ್ಕಾರಿ ಸಂಸ್ಥೆಗಳು,
• ರಾಜಕಾರಣಿಗಳು,
• ಸೆಲೆಬ್ರಿಟಿಗಳು,
• ಪರಿಶೀಲಿತ (Verified) Meta ಖಾತೆಗಳ
Usernameಗಳನ್ನು ಮುಂಚಿತವಾಗಿಯೇ ಕಾಯ್ದಿರಿಸಲಾಗಿದೆ. ಹೀಗಾಗಿ ಅವುಗಳನ್ನು ಅವರ ನಿಜವಾದ ಮಾಲೀಕರೇ ಬಳಸಲು ಸಾಧ್ಯವಾಗುತ್ತದೆ.
ಇದರ ಜೊತೆಗೆ, ಪ್ರಸಿದ್ಧ Usernameಗಳಿಗೆ ಹೋಲುವ (Lookalike) ಹೆಸರುಗಳನ್ನು ನೋಂದಾಯಿಸಲು ಅವಕಾಶ ನೀಡುವುದಿಲ್ಲ ಎಂದು ಕಂಪನಿ ತಿಳಿಸಿದೆ.
ಸರ್ಕಾರದ ಆತಂಕ ಹೆಚ್ಚಾಗಿದೆ
WhatsApp ಮಾತ್ರವಲ್ಲದೆ ಈಗಾಗಲೇ Username ವ್ಯವಸ್ಥೆಯನ್ನು ಹೊಂದಿರುವ Telegram ಮತ್ತು Signal ಸೇರಿದಂತೆ ಇತರ ಮೆಸೇಜಿಂಗ್ ಪ್ಲಾಟ್ಫಾರ್ಮ್ಗಳಲ್ಲೂ ಇದೇ ರೀತಿಯ ಭದ್ರತಾ ಸಮಸ್ಯೆಗಳಿವೆಯೇ ಎಂಬುದನ್ನು ಕೇಂದ್ರ ಸರ್ಕಾರ ಪರಿಶೀಲಿಸುತ್ತಿದೆ.
ಭಾರತದಲ್ಲಿ WhatsApp ಅತಿದೊಡ್ಡ ಮಾರುಕಟ್ಟೆ
ಭಾರತದಲ್ಲಿ 50 ಕೋಟಿಗೂ ಹೆಚ್ಚು ಬಳಕೆದಾರರನ್ನು ಹೊಂದಿರುವ WhatsApp, ವಿಶ್ವದಲ್ಲೇ ತನ್ನ ಅತಿದೊಡ್ಡ ಮಾರುಕಟ್ಟೆಯನ್ನು ಭಾರತದಲ್ಲೇ ಹೊಂದಿದೆ. Telegramಗಿಂತಲೂ WhatsApp ಬಳಕೆದಾರರ ಸಂಖ್ಯೆ ಭಾರತದಲ್ಲಿ ಬಹಳ ಹೆಚ್ಚಾಗಿದೆ.
Telegram ಮೇಲೆ ಈ ಹಿಂದೆಯೂ ಕ್ರಮ
ಇತ್ತೀಚೆಗೆ NEET ಪ್ರಶ್ನೆಪತ್ರಿಕೆ ಸೋರಿಕೆ, ನಕಲಿ ಮಾಹಿತಿ ಹಾಗೂ ವಂಚನೆಗೆ ಸಂಬಂಧಿಸಿದ ವಿಷಯಗಳ ಪ್ರಸಾರದ ಆರೋಪದ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ Telegram ಸೇವೆಯನ್ನು ಜೂನ್ 22ರವರೆಗೆ ತಾತ್ಕಾಲಿಕವಾಗಿ ನಿರ್ಬಂಧಿಸಿತ್ತು. ಬಳಿಕ ಒಂದು ವಾರದ ನಿಷೇಧ ಅವಧಿ ಮುಗಿದ ನಂತರ ಸೇವೆಗಳನ್ನು ಮರುಸ್ಥಾಪಿಸಲಾಗಿತ್ತು.
