ನವದೆಹಲಿ: ಇಂದಿನ ದಿನಗಳಲ್ಲಿ ಆಧಾರ್ ಕಾರ್ಡ್ ಇಲ್ಲದೆ ಯಾವುದೇ ಕೆಲಸ ನಡೆಯುವುದಿಲ್ಲ. ಬ್ಯಾಂಕ್ ಖಾತೆ, ಪ್ಯಾನ್ ಕಾರ್ಡ್, ಮೊಬೈಲ್ ಸಿಮ್ನಿಂದ ಹಿಡಿದು ಸರ್ಕಾರದ ಪ್ರತಿಯೊಂದು ಸೌಲಭ್ಯಕ್ಕೂ ಆಧಾರ್ ಜೋಡಣೆಯಾಗಿದೆ. ಆದರೆ, ಇದೇ ಆಧಾರ್ ಕಾರ್ಡ್ ಈಗ ಸೈಬರ್ ವಂಚಕರ ಪಾಲಿಗೆ ದೊಡ್ಡ ಅಸ್ತ್ರವಾಗಿ ಪರಿಣಮಿಸಿದೆ. ನಿಮ್ಮ ಆಧಾರ್ ಮಾಹಿತಿಯನ್ನು ಬಳಸಿ ನಿಮ್ಮ ಬ್ಯಾಂಕ್ ಖಾತೆಗೆ ಕನ್ನ ಹಾಕುವ ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿವೆ.
ಏನಿದು ಆಧಾರ್ ವಂಚನೆ? ನಮ್ಮ ಆಧಾರ್ ಕಾರ್ಡ್ನಲ್ಲಿ ಬೆರಳಚ್ಚು (Fingerprint) ಮತ್ತು ಕಣ್ಣಿನ ಪಾಪೆಯ (Iris) ಮಾಹಿತಿಯಂತಹ ಬಯೋಮೆಟ್ರಿಕ್ ಡೇಟಾ ಇರುತ್ತದೆ. ವಂಚಕರು ನಿಮ್ಮ ಈ ಬಯೋಮೆಟ್ರಿಕ್ ಮಾಹಿತಿಯನ್ನು ದುರುಪಯೋಗಪಡಿಸಿಕೊಂಡು ‘ಆಧಾರ್ ಎನೇಬಲ್ಡ್ ಪೇಮೆಂಟ್ ಸಿಸ್ಟಮ್’ (AePS) ಮೂಲಕ ನಿಮ್ಮ ಗಮನಕ್ಕೆ ಬಾರದಂತೆ ಹಣ ಲೂಟಿ ಮಾಡಬಹುದು.
ಪಾರಾಗುವುದು ಹೇಗೆ? ಬಯೋಮೆಟ್ರಿಕ್ ಲಾಕ್ ಮಾಡಿ: ವಂಚನೆಯಿಂದ ತಪ್ಪಿಸಿಕೊಳ್ಳಲು ನಿಮ್ಮ ಬಯೋಮೆಟ್ರಿಕ್ ಮಾಹಿತಿಯನ್ನು ಲಾಕ್ ಮಾಡುವುದು ಅತ್ಯಂತ ಸುರಕ್ಷಿತ ಮಾರ್ಗ. ಇದನ್ನು ಲಾಕ್ ಮಾಡಿದರೆ, ನಿಮ್ಮ ಅನುಮತಿಯಿಲ್ಲದೆ ಯಾರೂ ಆಧಾರ್ ದೃಢೀಕರಣ (Authentication) ಮಾಡಲು ಸಾಧ್ಯವಿಲ್ಲ.
ಬಯೋಮೆಟ್ರಿಕ್ ಲಾಕ್ ಮಾಡುವುದು ಹೇಗೆ?
- ಮೊದಲಿಗೆ UIDAI ನ ಅಧಿಕೃತ ವೆಬ್ಸೈಟ್ uidai.gov.in ಗೆ ಭೇಟಿ ನೀಡಿ.
- ಹೋಮ್ ಪೇಜ್ನಲ್ಲಿರುವ ‘My Aadhaar’ ವಿಭಾಗಕ್ಕೆ ಹೋಗಿ, ಅಲ್ಲಿ ‘Aadhaar Services’ ಆಯ್ಕೆ ಮಾಡಿ.
- ನಂತರ ‘Lock/Unlock Biometrics’ ಎಂಬ ಆಯ್ಕೆಯ ಮೇಲೆ ಕ್ಲಿಕ್ ಮಾಡಿ.
- ನಿಮ್ಮ 12 ಅಂಕಿಗಳ ಆಧಾರ್ ಸಂಖ್ಯೆ ಮತ್ತು ಕ್ಯಾಪ್ಚಾ ಕೋಡ್ ದಾಖಲಿಸಿ ‘Send OTP’ ನೀಡಿ.
- ನಿಮ್ಮ ಮೊಬೈಲ್ಗೆ ಬರುವ ಓಟಿಪಿ ನಮೂದಿಸಿ ಲಾಗಿನ್ ಆಗಿ.
- ಅಲ್ಲಿ ‘Enable Biometric Locking’ ಆಯ್ಕೆ ಮಾಡಿ ಸಬ್ಮಿಟ್ ಮಾಡಿ. ಇಷ್ಟು ಮಾಡಿದರೆ ನಿಮ್ಮ ಬಯೋಮೆಟ್ರಿಕ್ ಮಾಹಿತಿ ಸುರಕ್ಷಿತವಾಗಿರುತ್ತದೆ. ನಿಮಗೆ ಬೇಕಾದಾಗ ಮತ್ತೆ ಇದೇ ರೀತಿ ಅನ್ಲಾಕ್ ಮಾಡಬಹುದು.
ಮಾಸ್ಕ್ಡ್ ಆಧಾರ್ (Masked Aadhaar) ಬಳಸಿ: ಯಾವುದೇ ಖಾಸಗಿ ಸಂಸ್ಥೆಗಳಿಗೆ ಅಥವಾ ಹೋಟೆಲ್ಗಳಿಗೆ ಆಧಾರ್ ಪ್ರತಿ ನೀಡುವಾಗ ಪೂರ್ಣ ಸಂಖ್ಯೆ ಇರುವ ಕಾರ್ಡ್ ಬದಲು ‘ಮಾಸ್ಕ್ಡ್ ಆಧಾರ್’ ನೀಡುವುದು ಉತ್ತಮ. ಇದರಲ್ಲಿ ಆಧಾರ್ನ ಮೊದಲ 8 ಅಂಕಿಗಳು ಗುಪ್ತವಾಗಿರುತ್ತವೆ (xxxx-xxxx), ಕೇವಲ ಕೊನೆಯ 4 ಅಂಕಿಗಳು ಮಾತ್ರ ಕಾಣಿಸುತ್ತವೆ. ಇದು ನಿಮ್ಮ ಮಾಹಿತಿಯ ದುರುಪಯೋಗವನ್ನು ತಡೆಯುತ್ತದೆ.
ನಿಮ್ಮ ಆಧಾರ್ ಸಂಖ್ಯೆ ಅಥವಾ ಫೋಟೋವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಬೇಡಿ. ನೆನಪಿಡಿ, ಜಾಗರೂಕತೆಯೇ ಸೈಬರ್ ವಂಚನೆಗೆ ಇರುವ ಏಕೈಕ ಮದ್ದು.
