ಅಲಿಗಢ: ದೇಶದ ರಕ್ಷಣೆಗಾಗಿ ಹೋರಾಡುವ ಸೈನಿಕನೊಬ್ಬ ತನ್ನ ರಜೆಯ ಅವಧಿಯಲ್ಲಿ ಊರಿಗೆ ಬಂದಾಗ, ಪರೀಕ್ಷೆಯಲ್ಲಿ ನಡೆಯುತ್ತಿದ್ದ ಅಕ್ರಮವನ್ನು ವಿರೋಧಿಸಿದ್ದಕ್ಕೆ ಪ್ರಾಣ ಕಳೆದುಕೊಂಡ ಘಟನೆಗೆ ಸಂಬಂಧಿಸಿದಂತೆ ನ್ಯಾಯಾಲಯ ಮಹತ್ವದ ತೀರ್ಪು ನೀಡಿದೆ. ಸುಮಾರು 12 ವರ್ಷಗಳ ಸುದೀರ್ಘ ಕಾನೂನು ಹೋರಾಟದ ನಂತರ, ಎನ್ಎಸ್ಜಿ (NSG) ಕಮಾಂಡೋ ತೇಜವೀರ್ ಸಿಂಗ್ ಅವರ ಹತ್ಯೆ ಪ್ರಕರಣದಲ್ಲಿ ಏಳು ಮಂದಿ ಆರೋಪಿಗಳಿಗೆ ಅಲಿಗಢದ ಸ್ಥಳೀಯ ನ್ಯಾಯಾಲಯವು ಶುಕ್ರವಾರ ಜೀವಾವಧಿ ಶಿಕ್ಷೆ ವಿಧಿಸಿದೆ.
ನಡೆದಿದ್ದೇನು? ಈ ಆಘಾತಕಾರಿ ಘಟನೆಯು 2013ರ ಮಾರ್ಚ್ ತಿಂಗಳಲ್ಲಿ ಅಲಿಗಢದ ಗೊಂಡಾ ಪೊಲೀಸ್ ಠಾಣಾ ವ್ಯಾಪ್ತಿಯ ಮುರ್ವಾರ್ ಗ್ರಾಮದಲ್ಲಿ ನಡೆದಿತ್ತು. ದೆಹಲಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ 26 ವರ್ಷದ ಕಮಾಂಡೋ ತೇಜವೀರ್ ಸಿಂಗ್ ಅವರು ರಜೆಯ ಮೇಲೆ ಗ್ರಾಮಕ್ಕೆ ಬಂದಿದ್ದರು. ಅವರ ಭಾವ ಸಂಜೆಯ ಪಾಲಿಯ ಪರೀಕ್ಷೆ ಬರೆಯುತ್ತಿದ್ದ ಪರೀಕ್ಷಾ ಕೇಂದ್ರದ ಬಳಿ ತೇಜವೀರ್ ಕಾಯುತ್ತಿದ್ದರು.
ಈ ವೇಳೆ ನೆರೆಯ ರಾಜಾವಾಲ್ ಗ್ರಾಮದ ಪ್ರಧಾನ ರಾಮ್ ಪ್ರಕಾಶ್ ಎಂಬಾತ ಕಿಟಕಿಯ ಮೂಲಕ ತನ್ನ ಮಗನಿಗೆ ಪರೀಕ್ಷೆಯಲ್ಲಿ ನಕಲು ಮಾಡಲು ಸಹಾಯ ಮಾಡುತ್ತಿದ್ದನು. ಇದನ್ನು ಗಮನಿಸಿದ ತೇಜವೀರ್ ಹಾಗೂ ಅವರ ಸಹೋದರ ಕುಲದೀಪ್ ಅದನ್ನು ತಡೆದಿದ್ದಾರೆ. ಈ ವಿಚಾರಕ್ಕೆ ಇಬ್ಬರ ನಡುವೆ ತೀವ್ರ ಮಾತಿನ ಚಕಮಕಿ ನಡೆದಿದೆ.
ಮನೆಗೆ ನುಗ್ಗಿ ನಡೆಸಿದ ಗುಂಡಿನ ದಾಳಿ: ಪರೀಕ್ಷಾ ಅಕ್ರಮವನ್ನು ತಡೆದಿದ್ದಕ್ಕೆ ಕೆರಳಿದ ರಾಮ್ ಪ್ರಕಾಶ್, ತಕ್ಷಣವೇ ತನ್ನ ಸಂಬಂಧಿಕರು ಮತ್ತು ಸಹಚರರನ್ನು ಶಸ್ತ್ರಾಸ್ತ್ರಗಳೊಂದಿಗೆ ಸ್ಥಳಕ್ಕೆ ಕರೆಸಿಕೊಂಡಿದ್ದಾನೆ. ಸಂಜೆ ಪರೀಕ್ಷೆ ಮುಗಿದ ನಂತರ ತೇಜವೀರ್ ಅವರ ಮನೆಗೆ ನುಗ್ಗಿದ ದುಷ್ಕರ್ಮಿಗಳು ಮನಸೋಇಚ್ಛೆ ಗುಂಡಿನ ದಾಳಿ ನಡೆಸಿದ್ದಾರೆ. ಈ ದಾಳಿಯಲ್ಲಿ ತೇಜವೀರ್ ಸಿಂಗ್ ಮತ್ತು ಕುಲದೀಪ್ ಅವರಿಗೆ ತೀವ್ರ ಗುಂಡೇಟು ತಗುಲಿತ್ತು. ಕೂಡಲೇ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ತೇಜವೀರ್ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದರು.
ನ್ಯಾಯಾಲಯದ ತೀರ್ಪು: ಈ ಪ್ರಕರಣದ ವಿಚಾರಣೆ ನಡೆಸಿದ ಹೆಚ್ಚುವರಿ ಜಿಲ್ಲಾ ನ್ಯಾಯಾಧೀಶ ರವೀಶ್ ಕುಮಾರ್ ಅತ್ರಿ ಅವರು, ಪ್ರಮುಖ ಆರೋಪಿಗಳಾದ ಸೋನು, ಕೋಮಲ್, ಹರಿಓಂ, ರಾಜೇಂದ್ರ, ದೇವೇಂದ್ರ, ಗುಡ್ಡು ಮತ್ತು ರಾಜಕುಮಾರ್ ಎಂಬುವವರಿಗೆ ಜೀವಾವಧಿ ಶಿಕ್ಷೆ ಹಾಗೂ ತಲಾ 35,000 ರೂಪಾಯಿ ದಂಡ ವಿಧಿಸಿದ್ದಾರೆ. ಪ್ರಕರಣದ ಎಂಟನೇ ಆರೋಪಿಗೆ ಎರಡು ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ. ವಿಚಾರಣೆಯ ಸಂದರ್ಭದಲ್ಲಿ ಮುಖ್ಯ ಆರೋಪಿ ರಾಮ್ ಪ್ರಕಾಶ್ ಮತ್ತು ಸಾಕ್ಷಿಯಾಗಿದ್ದ ಕುಲದೀಪ್ ಮೃತಪಟ್ಟಿದ್ದಾರೆ.
ಈ ತೀರ್ಪಿನಿಂದ ಸಂತಸ ವ್ಯಕ್ತಪಡಿಸಿರುವ ತೇಜವೀರ್ ಅವರ ಸಹೋದರ ಶ್ಯಾಮ್ವೀರ್, “ಹನ್ನೆರಡು ವರ್ಷಗಳ ನಂತರವಾದರೂ ನಮಗೆ ನ್ಯಾಯ ಸಿಕ್ಕಿದೆ” ಎಂದು ಹೇಳಿದ್ದಾರೆ. ವೀರ ಕಮಾಂಡೋ ತೇಜವೀರ್ ಅವರ ಪತ್ನಿ ಪ್ರೀತಿ ದೇವಿ ಅವರಿಗೆ ಸಶಸ್ತ್ರ ಸೀಮಾ ಬಲ್ (SSB) ನಲ್ಲಿ ಉದ್ಯೋಗ ನೀಡಲಾಗಿದ್ದು, ಅವರು ಪ್ರಸ್ತುತ ಲಕ್ನೋದಲ್ಲಿ ವಾಸಿಸುತ್ತಿದ್ದಾರೆ.
