ಜನಸೇನಾ ಮುಖ್ಯಸ್ಥ ಪವನ್ ಕಲ್ಯಾಣ್ ಅವರನ್ನು ಆಂಧ್ರಪ್ರದೇಶ ಸರ್ಕಾರ ಶುಕ್ರವಾರ ಉಪಮುಖ್ಯಮಂತ್ರಿಯಾಗಿ ನೇಮಿಸಿದೆ.
ಚಂದ್ರಬಾಬು ನಾಯ್ಡು ನೇತೃತ್ವದ ಸರ್ಕಾರದಲ್ಲಿ ಪಂಚಾಯತ್ ರಾಜ್ ಮತ್ತು ಗ್ರಾಮೀಣಾಭಿವೃದ್ಧಿ, ಪರಿಸರ, ಅರಣ್ಯ ಮತ್ತು ವಿಜ್ಞಾನ ಮತ್ತು ತಂತ್ರಜ್ಞಾನ ಖಾತೆಗಳನ್ನು ಸಹ ನೀಡಲಾಗಿದೆ.
ನಾಯ್ಡು ಅವರ ಪುತ್ರ ನಾರಾ ಲೋಕೇಶ್ (41) ಅವರಿಗೆ ಮಾನವ ಸಂಪನ್ಮೂಲ ಅಭಿವೃದ್ಧಿ, ಮಾಹಿತಿ ತಂತ್ರಜ್ಞಾನ ಮತ್ತು ಸಂವಹನ ಖಾತೆಗಳನ್ನು ನೀಡಲಾಗಿದೆ ಎಂದು ಟಿಡಿಪಿ ಮೂಲಗಳು ತಿಳಿಸಿವೆ. ಸ್ಟ್ಯಾನ್ಫೋರ್ಡ್ ಎಂಬಿಎ ಪದವೀಧರ ಮತ್ತು ವಿಶ್ವಬ್ಯಾಂಕ್ ನ ಮಾಜಿ ಅಧಿಕಾರಿ ಲೋಕೇಶ್ ಅವರು ಮಂಗಳಗಿರಿ ಕ್ಷೇತ್ರದಿಂದ 91,413 ಮತಗಳ ಅಂತರದಿಂದ ಗೆದ್ದಿದ್ದಾರೆ.ಅನಿತಾ ವಂಗಲಪುಡಿ ಅವರು ಗೃಹ ಸಚಿವರಾಗಲಿದ್ದಾರೆ.
ನಾಯ್ಡು ಅವರೊಂದಿಗೆ 24 ಸಚಿವರು ಬುಧವಾರ ಪ್ರಮಾಣ ವಚನ ಸ್ವೀಕರಿಸಿದರು. ಪ್ರಮಾಣ ವಚನ ಸ್ವೀಕರಿಸಿದ 24 ಸಚಿವರಲ್ಲಿ 17 ಮಂದಿ ಮೊದಲ ಬಾರಿಗೆ ಆಯ್ಕೆಯಾದವರು, ಮೂವರು ಮಹಿಳೆಯರು, ಎಂಟು ಮಂದಿ ಹಿಂದುಳಿದ ವರ್ಗ (ಬಿ.ಸಿ) ಸಮುದಾಯದವರು, ಒಬ್ಬರು ಮುಸ್ಲಿಂ, ಇಬ್ಬರು ಪರಿಶಿಷ್ಟ ಜಾತಿ (ಎಸ್ಸಿ) ಮತ್ತು ಒಬ್ಬರು ಪರಿಶಿಷ್ಟ ಪಂಗಡಕ್ಕೆ ಸೇರಿದವರು.ನಾಯ್ಡು ಅವರಲ್ಲದೆ, ಟಿಡಿಪಿಯ 20, ಜನಸೇನಾದ ಮೂವರು ಮತ್ತು ಬಿಜೆಪಿಯ ಒಬ್ಬರು ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಿದರು.ಅಮರಾವತಿ ರಾಜಧಾನಿ ಪ್ರದೇಶದ ಅಭಿವೃದ್ಧಿಯ ಜವಾಬ್ದಾರಿಯನ್ನು ಹೊಂದಿರುವ ಪ್ರಮುಖ ಇಲಾಖೆಗಳಲ್ಲಿ ಒಂದಾದ ಪೌರಾಡಳಿತವನ್ನು ಪಿ ನಾರಾಯಣ ಅವರಿಗೆ ನೀಡಲಾಯಿತು.
