ಮುಂಬೈ: ದೀಪಾವಳಿ ಹಬ್ಬದ್ ಸಡಗರ-ಸಂಭ್ರಮದ ವೇಳೆ ಅಗ್ನಿ ಅವಘಡಗಳ ಭೀತಿ ಹಿನ್ನೆಲೆಯಲ್ಲಿ ಮುಂಬೈನಲ್ಲಿ ನವೆಂಬರ್ 25ರವರೆಗೆ ರಾಕೆಟ್‌ಗಳು ಮತ್ತು ಆಕಾಶದಲ್ಲಿ ಸಿಡಿಯುವ ಪಟಾಕಿಗಳಿಗೆ ನಿಷೇಧ ಹೇರಲಾಗಿದೆ.
ನಗರದಾದ್ಯಂತ ಸಂಭವಿಸಿದ ಹಲವಾರು ಅಗ್ನಿ ಅವಘಡಗಳ ಹಿನ್ನೆಲೆಯಲ್ಲಿ, ಮುಂಬೈ ವಿಪತ್ತು ನಿರ್ವಹಣಾ ಪ್ರಾಧಿಕಾರವು ಸೋಮವಾರದಂದು ನಗರದಲ್ಲಿ ರಾಕೆಟ್‌ಗಳು ಮತ್ತು ಆಕಾಶದಲ್ಲಿ ಸಿಡಿಯುವ ಪಟಾಕಿಗಳನ್ನು ಹಾರಿಸುವುದನ್ನು ನವೆಂಬರ್ 25ರವರೆಗೆ ನಿಷೇಧಿಸಿದೆ.
ಪ್ರಾಧಿಕಾರ ಹೊರಡಿಸಿದ ಆದೇಶದ ಪ್ರಕಾರ, ಈ ನಿರ್ಬಂಧವು ಎಲ್ಲಾ ವಸತಿ ಕಟ್ಟಡಗಳು, ಮೇಲ್ಛಾವಣಿಗಳು, ಬಾಲ್ಕನಿಗಳು ಮತ್ತು ಕೊಳೆಗೇರಿ ಪ್ರದೇಶಗಳಿಗೆ ಅನ್ವಯಿಸುತ್ತದೆ.
ದೀಪಾವಳಿಯ ರಾತ್ರಿಯೊಂದರಲ್ಲೇ ನಗರದ ವಿವಿಧ ಭಾಗಗಳಲ್ಲಿ ಮೂರು ಪ್ರಮುಖ ಅಗ್ನಿ ಅವಘಡಗಳು ವರದಿಯಾಗಿವೆ. ಈ ಘಟನೆಗಳಲ್ಲಿ ಹಲವಾರು ಗುಡಿಸಲುಗಳು, ಅಂಗಡಿಗಳು, ಗ್ಯಾರೇಜ್ ಮತ್ತು ವಾಣಿಜ್ಯ ಕಟ್ಟಡವೊಂದರ ಕೆಲವು ಭಾಗಗಳು ಬೆಂಕಿಗಾಹುತಿಯಾಗಿವೆ.
ಹೆಚ್ಚುವರಿ ಮುನ್ಸಿಪಲ್ ಕಮಿಷನರ್ ಪ್ರಜಕ್ತಾ ವರ್ಮಾ-ಲವಂಗರೆ ಅವರ ಸಹಿ ಇರುವ ಈ ಆದೇಶದಲ್ಲಿ, ಆಕಾಶಕ್ಕೆ ಹಾರಿ ನಂತರ ಮೇಲ್ಛಾವಣಿಗಳು, ಬಾಲ್ಕನಿಗಳು, ಕಿಟಕಿಗಳು ಅಥವಾ ಸುಲಭವಾಗಿ ಬೆಂಕಿ ಹತ್ತಿಕೊಳ್ಳುವ ವಸ್ತುಗಳ ಮೇಲೆ ಬೀಳುವ ರಾಕೆಟ್‌ಗಳು ಮತ್ತು ಇತರೆ ಪಟಾಕಿಗಳಿಂದ ಉಂಟಾಗಬಹುದಾದ ಅಪಾಯವನ್ನು ಉಲ್ಲೇಖಿಸಲಾಗಿದೆ.
ದಟ್ಟ ಜನಸಂಖ್ಯೆಯಿರುವ ಪ್ರದೇಶಗಳು, ಎತ್ತರದ ಕಟ್ಟಡಗಳು, ಕೊಳೆಗೇರಿಗಳು, ಕಿರಿದಾದ ರಸ್ತೆಗಳು ಹಾಗೂ ಪರಸ್ಪರ ಹತ್ತಿರವಿರುವ ವಸತಿ ಮತ್ತು ವಾಣಿಜ್ಯ ಕಟ್ಟಡಗಳಲ್ಲಿ ಇಂತಹ ಪಟಾಕಿಗಳಿಂದ ಅಗ್ನಿ ಅವಘಡಗಳು ಸಂಭವಿಸುವ ಸಾಧ್ಯತೆ ಹೆಚ್ಚು. ಇದು ಜೀವ ಮತ್ತು ಆಸ್ತಿಗೆ ಗಂಭೀರ ಅಪಾಯವನ್ನು ಉಂಟುಮಾಡುತ್ತದೆ ಎಂದು ಪ್ರಾಧಿಕಾರ ತಿಳಿಸಿದೆ. ಆದೇಶದ ಪ್ರಕಾರ, ಈ ನಿಷೇಧವು ಬೃಹತ್ ಮುಂಬೈ ಮಹಾನಗರ ಪಾಲಿಕೆ (BMC) ವ್ಯಾಪ್ತಿಯಲ್ಲಿ ನವೆಂಬರ್ 9 ರಿಂದ ನವೆಂಬರ್ 25, 2026 ರ ರಾತ್ರಿ 11:59 ರವರೆಗೆ ಜಾರಿಯಲ್ಲಿರುತ್ತದೆ.
ರಾಕೆಟ್‌ಗಳು ಮತ್ತು ಆಕಾಶದಲ್ಲಿ ಸಿಡಿಯುವ ಪಟಾಕಿಗಳನ್ನು ಹೊರತುಪಡಿಸಿ, ಇತರ ಪಟಾಕಿಗಳ ಬಳಕೆಯು ಅಸ್ತಿತ್ವದಲ್ಲಿರುವ ಕಾನೂನುಗಳು, ಸಂಬಂಧಪಟ್ಟ ಅಧಿಕಾರಿಗಳ ನಿರ್ದೇಶನಗಳು ಮತ್ತು ನ್ಯಾಯಾಲಯಗಳ ಆದೇಶಗಳಿಗೆ ಒಳಪಟ್ಟಿರುತ್ತದೆ ಎಂದು ಸಹ ಇದರಲ್ಲಿ ತಿಳಿಸಲಾಗಿದೆ.
ಸಾರ್ವಜನಿಕ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಬೆಂಕಿಗೆ ಸಂಬಂಧಿಸಿದ ಅಪಘಾತಗಳನ್ನು ತಡೆಯಲು ಈ ನಿರ್ಬಂಧಗಳು ಅಗತ್ಯವೆಂದು ಪ್ರಾಧಿಕಾರ ಹೇಳಿದೆ. ಅಲ್ಲದೆ, ಈ ಬಗ್ಗೆ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವಂತೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಚಿಸಿದೆ.
ಇದಕ್ಕೂ ಮುನ್ನ, ಮುಂಬೈ ಮೇಯರ್ ರಿತು ತಾವ್ಡೆ ಅವರು ವಿಡಿಯೋ ಸಂದೇಶವೊಂದರ ಮೂಲಕ ನಾಗರಿಕರಿಗೆ ಮನವಿ ಮಾಡಿದ್ದು, ಜವಾಬ್ದಾರಿಯುತವಾಗಿ ಹಬ್ಬವನ್ನು ಆಚರಿಸುವಂತೆಯೂ, ವಸತಿ ಕಟ್ಟಡಗಳ ಹತ್ತಿರ ಅಥವಾ ಪಾದಚಾರಿ ಮಾರ್ಗಗಳಲ್ಲಿ ಪಟಾಕಿಗಳನ್ನು ಸಿಡಿಸದಂತೆಯೂ ಕೋರಿದ್ದಾರೆ.
ಶಿವಸೇನೆ (ಯುಬಿಟಿ) ನಾಯಕ ಆದಿತ್ಯ ಠಾಕ್ರೆ ಅವರು, ರಾಕೆಟ್‌ಗಳು ಮತ್ತು ಆಕಾಶದಲ್ಲಿ ಸಿಡಿಯುವ ಪಟಾಕಿಗಳು ಜನರ ಮನೆಗಳ ಒಳಗೆ ಬಿದ್ದು ಬೆಂಕಿ ಹೊತ್ತಿಕೊಳ್ಳುವಂತಹ ಘಟನೆಗಳಲ್ಲಿ ಪೊಲೀಸರು ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಿದ್ದಾರೆ.
“ಇಂತಹ ಪ್ರಕರಣಗಳಲ್ಲಿ ಪೊಲೀಸರು ಮತ್ತು ಆಡಳಿತವು ಖಂಡಿತವಾಗಿಯೂ ಅಧಿಕೃತ ಕ್ರಮ ಕೈಗೊಳ್ಳಬೇಕು. ಇದಕ್ಕೆ ಸ್ಪಷ್ಟನೆ ನೀಡುವ ಅಗತ್ಯವಿದೆ,” ಎಂದು ರಾಜ್ಯದ ಮಾಜಿ ಪರಿಸರ ಸಚಿವರು ಹೇಳಿದ್ದಾರೆ.
