ಏಷ್ಯನ್ ಗೇಮ್ಸ್ ನಲ್ಲಿ ಭಾರತೀಯ ಪುರುಷರ ಹಾಕಿ ತಂಡದ ಐತಿಹಾಸಿಕ ಸಾಧನೆ ಗೈದಿದ್ದು, ಸತತ ಎರಡನೇ ಬಾರಿಗೆ ಚಿನ್ನದ ಪದಕ ಜಯ, ಫೈನಲ್ ನಲ್ಲಿ ಮಲೇಷ್ಯಾ ವಿರುದ್ಧ 5-1 ಅಂತರದ ಭರ್ಜರಿ ಗೆಲುವು ಸಾಧಿಸಿದೆ.
ಗಿಫು ಪ್ರಿಫೆಕ್ಚರಲ್ ಗ್ರೀನ್ ಸ್ಟೇಡಿಯಂನಲ್ಲಿ ನಡೆದ ಚಿನ್ನದ ಪದಕದ ಪಂದ್ಯದಲ್ಲಿ ಮಲೇಷ್ಯಾ ವಿರುದ್ಧ 5-1 ಅಂತರದ ಭರ್ಜರಿ ಗೆಲುವು ಸಾಧಿಸುವ ಮೂಲಕ ಭಾರತವು ತನ್ನ ಏಷ್ಯನ್ ಗೇಮ್ಸ್ ಪುರುಷರ ಹಾಕಿ ಪ್ರಶಸ್ತಿಯನ್ನು ಉಳಿಸಿಕೊಂಡಿತು ಮತ್ತು 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್‌ಗೆ ನೇರ ಅರ್ಹತೆಯನ್ನು ಖಚಿತಪಡಿಸಿಕೊಂಡಿತು. ಏಷ್ಯನ್ ಗೇಮ್ಸ್‌ನಲ್ಲಿ ಭಾರತೀಯ ಪುರುಷರ ತಂಡ ಸತತವಾಗಿ ಚಿನ್ನದ ಪದಕಗಳನ್ನು ಗೆದ್ದಿರುವುದು ಇತಿಹಾಸದಲ್ಲೇ ಇದೇ ಮೊದಲು.
ಪಂದ್ಯದ 12ನೇ ನಿಮಿಷದಲ್ಲಿ ನಾಯಕ ಹರ್ಮನ್‌ ಪ್ರೀತ್ ಸಿಂಗ್ ಅವರು ಪೆನಾಲ್ಟಿ ಕಾರ್ನರ್ ಅನ್ನು ಅತ್ಯುತ್ತಮ ‘ಡ್ರ್ಯಾಗ್-ಫ್ಲಿಕ್’ ಮೂಲಕ ಗೋಲಾಗಿ ಪರಿವರ್ತಿಸುವ ಮೂಲಕ ಭಾರತಕ್ಕೆ ಮುನ್ನಡೆ ತಂದುಕೊಟ್ಟರು. ಎರಡು ನಿಮಿಷಗಳ ನಂತರ ಮಲೇಷ್ಯಾ ಇದಕ್ಕೆ ತಕ್ಷಣವೇ ಪ್ರತಿಕ್ರಿಯಿಸಿತು. ಶೆಲ್ಲೊ ಸಿಲ್ವೆರಿಯಸ್ ಅವರು ಎಡಭಾಗದಲ್ಲಿ ಗಾಳಿಯಲ್ಲಿ ಬಂದ ಚೆಂಡನ್ನು ನಿಯಂತ್ರಿಸಿ, ಅದ್ಭುತ ‘ಹಾಫ್-ವಾಲಿ’ ಹೊಡೆತದ ಮೂಲಕ ಗೋಲ್‌ಕೀಪರ್ ಸೂರಜ್ ಕರ್ಕೇರಾ ಅವರನ್ನು ವಂಚಿಸಿ ಗೋಲು ಗಳಿಸಿದರು. ಇದರೊಂದಿಗೆ ಮೊದಲ ವಿರಾಮದ ವೇಳೆಗೆ ಪಂದ್ಯ 1-1 ಸಮಬಲಗೊಂಡಿತು.
ಎರಡನೇ ಕ್ವಾರ್ಟರ್‌ ನಲ್ಲಿ ಭಾರತ ನಿರ್ಣಾಯಕ ಮುನ್ನಡೆ ಸಾಧಿಸಿತು. 23ನೇ ನಿಮಿಷದಲ್ಲಿ ‘ಸರ್ಕಲ್’ ಒಳಗೆ ಶಿಲಾನಂದ್ ಲಾಕ್ರಾ ಅವರ ಕೌಶಲಪೂರ್ಣ ಆಟದಿಂದ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಲಭಿಸಿತು. ಜುಗ್ರಾಜ್ ಸಿಂಗ್ ಅವರು ಕಡಿಮೆ ಎತ್ತರದ ‘ಡ್ರ್ಯಾಗ್-ಫ್ಲಿಕ್’ ಮೂಲಕ ಚೆಂಡನ್ನು ಗೋಲ್ ಪೋಸ್ಟ್‌ ನ ಮೂಲೆಯಲ್ಲಿ ಸೇರಿಸಿ, ತಂಡದ ಮುನ್ನಡೆಯನ್ನು 2-1ಕ್ಕೆ ಏರಿಸಿದರು.
42ನೇ ನಿಮಿಷದಲ್ಲಿ ಭಾರತದ ಮುನ್ನಡೆ ಮತ್ತಷ್ಟು ಹೆಚ್ಚಾಯಿತು. ಪೆನಾಲ್ಟಿ ಕಾರ್ನರ್ ವೇಳೆ ಮಂದೀಪ್ ಸಿಂಗ್ ಹೊಡೆದ ಚೆಂಡು ಮಲೇಷ್ಯಾದ ಡಿಫೆಂಡರ್ ಒಬ್ಬರಿಗೆ ತಗುಲಿತು. ಇದರಿಂದ ಲಭಿಸಿದ ಪೆನಾಲ್ಟಿ ಸ್ಟ್ರೋಕ್ ಅನ್ನು ಹಾರ್ದಿಕ್ ಸಿಂಗ್ ಯಶಸ್ವಿಯಾಗಿ ಗೋಲಾಗಿ ಪರಿವರ್ತಿಸಿದರು; ಅವರು ಗೋಲ್ ಕೀಪರ್ ಊಹಿಸಿದ್ದ ದಿಕ್ಕಿಗೆ ವಿರುದ್ಧವಾಗಿ ಚೆಂಡನ್ನು ಹೊಡೆದು ಭಾರತದ ಮುನ್ನಡೆಯನ್ನು 3-1ಕ್ಕೆ ವಿಸ್ತರಿಸಿದರು.
ಮಲೇಷ್ಯಾ ತಂಡದ ಕಮ್‌ಬ್ಯಾಕ್(ಮರುಹೋರಾಟ)ದ ಎಲ್ಲಾ ಆಸೆಗಳು 55ನೇ ನಿಮಿಷದಲ್ಲಿ ಕೊನೆಗೊಂಡವು. ಫಾರ್ವರ್ಡ್ ಆಟಗಾರ ಅಭಿಷೇಕ್ ಬಲ ಭಾಗದಿಂದ ಚೆಂಡನ್ನು ಹೊತ್ತು ‘ಸರ್ಕಲ್’ ಒಳಗೆ ನುಗ್ಗಿದರು. ಚೆಂಡು ಡಿಫ್ಲೆಕ್ಟ್ ಆಗಿ ಗೋಲ್ ಪೋಸ್ಟ್‌ ನ ಮುಂಭಾಗಕ್ಕೆ ಬಂದಾಗ, ಶಿಲಾನಂದ್ ಲಾಕ್ರಾ ಅದನ್ನು ಹತ್ತಿರದಿಂದ ಗೋಲಾಗಿ ಪರಿವರ್ತಿಸಿದರು, ಇದರಿಂದ ಭಾರತದ ಮುನ್ನಡೆ 4-1ಕ್ಕೆ ಏರಿತು.
ಆದರೆ ಆಟದ ರೋಚಕತೆ ಅಲ್ಲಿಗೆ ಮುಗಿಯಲಿಲ್ಲ. ಒಂದು ನಿಮಿಷದ ನಂತರ ಹರ್ಮನ್‌ ಪ್ರೀತ್ ಮತ್ತೊಂದು ಗೋಲು ಗಳಿಸುವ ಮೂಲಕ ಭಾರತಕ್ಕೆ ಏಷ್ಯನ್ ಗೇಮ್ಸ್ ಪ್ರಶಸ್ತಿಯನ್ನು ಖಚಿತಪಡಿಸಿದರು. 2026ರ ಏಷ್ಯನ್ ಕ್ರೀಡಾಕೂಟದಲ್ಲಿ ಭಾರತದ ಅಭಿಯಾನ ಮುಕ್ತಾಯ
ಈ ಗೆಲುವಿನೊಂದಿಗೆ ಏಷ್ಯನ್ ಕ್ರೀಡಾಕೂಟದಲ್ಲಿ ಭಾರತದ ಅಭಿಯಾನವು ಸಮಾಪ್ತಿಯಾಗಿದೆ. ಆರಂಭದಲ್ಲಿ ಹಿನ್ನಡೆ ಅನುಭವಿಸಿದ್ದರೂ ಅದ್ಭುತವಾಗಿ ಪುಟಿದೆದ್ದ ಭಾರತೀಯ ತಂಡವು, ಅಂತಿಮವಾಗಿ 21 ಚಿನ್ನ, 27 ಬೆಳ್ಳಿ ಮತ್ತು 37 ಕಂಚಿನ ಪದಕಗಳನ್ನು ತನ್ನದಾಗಿಸಿಕೊಂಡಿತು. ಇದರೊಂದಿಗೆ, ಉಜ್ಬೇಕಿಸ್ತಾನ್ ಅನ್ನು ಹಿಂದಿಕ್ಕಿ ಪದಕ ಪಟ್ಟಿಯಲ್ಲಿ ಭಾರತ ನಾಲ್ಕನೇ ಸ್ಥಾನವನ್ನು ಅಲಂಕರಿಸಿದೆ. ಉಭಯ ದೇಶಗಳೂ ತಲಾ 21 ಚಿನ್ನದ ಪದಕಗಳನ್ನು ಹೊಂದಿದ್ದರೂ, ಭಾರತವು ಹೆಚ್ಚು ಬೆಳ್ಳಿ ಪದಕಗಳನ್ನು ಗೆದ್ದುಕೊಂಡಿದೆ. ಇದೊಂದು ಸ್ಮರಣೀಯವಾದ ಹಾಗೂ ಅದ್ಭುತವಾದ ಪುನರಾಗಮನವಾಗಿದೆ.
