ಮಾಸ್ಕೋ: ಉಕ್ರೇನ್ ನಿಂದ ರಷ್ಯಾ ಮೇಲೆ 1,000ಕ್ಕೂ ಹೆಚ್ಚು ಡ್ರೋನ್ ಗಳ ದಾಳಿ ನಡೆಸಲಾಗಿದೆ. ಮಾಸ್ಕೋ ಮೇಲಿನ ಅತಿದೊಡ್ಡ ದಾಳಿ ಇದಾಗಿದೆ.
ರಷ್ಯಾದಲ್ಲಿ ಸಂಸದೀಯ ಚುನಾವಣೆಗಳ ಮೂರನೇ ಹಾಗೂ ಅಂತಿಮ ದಿನದ ಪ್ರಕ್ರಿಯೆ ನಡೆಯುತ್ತಿದ್ದಂತೆಯೇ, ಶನಿವಾರ ರಾತ್ರಿ ಉಕ್ರೇನಿಯನ್ ಪಡೆಗಳು ರಷ್ಯಾ ಮೇಲೆ 1,000ಕ್ಕೂ ಹೆಚ್ಚು ಡ್ರೋನ್‌ಗಳನ್ನು ಪ್ರಯೋಗಿಸಿವೆ; ಇದರಲ್ಲಿ ನೂರಾರು ಡ್ರೋನ್‌ಗಳು ಮಾಸ್ಕೋವನ್ನೇ ಗುರಿಯಾಗಿಸಿಕೊಂಡಿದ್ದವು ಎಂದು ರಷ್ಯಾದ ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ.
ಮಾಸ್ಕೋ ಮೇಲಿನ ಈ ಡ್ರೋನ್ ದಾಳಿಗಳ ಸರಣಿಯನ್ನು ರಷ್ಯಾದ ರಾಜಧಾನಿಯ ಮೇಲಿನ “ಇತಿಹಾಸದಲ್ಲೇ ಅತಿದೊಡ್ಡ” ದಾಳಿ ಎಂದು ಮಾಸ್ಕೋ ಮೇಯರ್ ಸೆರ್ಗೆ ಸೊಬ್ಯಾನಿನ್ ಬಣ್ಣಿಸಿದ್ದಾರೆ. ಈ ದಾಳಿಯಿಂದಾಗಿ ಮಾಸ್ಕೋ ತೈಲ ಸಂಸ್ಕರಣಾಗಾರ ಮತ್ತು ವಸತಿ ಕಟ್ಟಡವೊಂದು ಹಾನಿಗೀಡಾಗಿವೆ ಎಂದು ಅವರು ತಿಳಿಸಿದರು.
ಸ್ಥಳೀಯ ಗವರ್ನರ್ ಆಂಡ್ರೆ ವೊರೊಬ್ಯೋವ್ ಅವರ ಪ್ರಕಾರ, ವಿಶಾಲ ಮಾಸ್ಕೋ ಪ್ರದೇಶದಲ್ಲಿ ಇಬ್ಬರು ಮೃತಪಟ್ಟಿದ್ದು, 20 ಮಂದಿ ಗಾಯಗೊಂಡಿದ್ದಾರೆ. ಮೃತರನ್ನು 74 ವರ್ಷದ ಪುರುಷ ಮತ್ತು 44 ವರ್ಷದ ಮಹಿಳೆ ಎಂದು ಗುರುತಿಸಲಾಗಿದೆ. ಈ ದಾಳಿಯ ಕುರಿತು ಉಕ್ರೇನ್‌ನಿಂದ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ.
1,100 ಉಕ್ರೇನಿಯನ್ ಡ್ರೋನ್ ಗಳನ್ನು ಹೊಡೆದುರುಳಿಸಿದ್ದಾಗಿ ರಷ್ಯಾ ಹೇಳಿಕೆ
ದೇಶಾದ್ಯಂತ ಹಾಗೂ ಕ್ರೈಮಿಯಾ ಮತ್ತು ಕಪ್ಪು ಸಮುದ್ರದ ಪ್ರದೇಶಗಳಲ್ಲಿ ಒಟ್ಟು 1,100 ಉಕ್ರೇನಿಯನ್ ಡ್ರೋನ್‌ಗಳನ್ನು ತಮ್ಮ ಪಡೆಗಳು ಹೊಡೆದುರುಳಿಸಿವೆ ಎಂದು ರಷ್ಯಾದ ರಕ್ಷಣಾ ಸಚಿವಾಲಯ ತಿಳಿಸಿದೆ. ಮಾಸ್ಕೋ ಕಡೆಗೆ ಬರುತ್ತಿದ್ದ 450 ಡ್ರೋನ್‌ಗಳನ್ನು ನಾಶಪಡಿಸಲಾಗಿದೆ ಎಂದು ಸೊಬ್ಯಾನಿನ್ ಹೇಳಿದರು.
ಈ ದಾಳಿಯನ್ನು “ಅಭೂತಪೂರ್ವ” ಎಂದು ಬಣ್ಣಿಸಿದ ಮಾಸ್ಕೋ ಮೇಯರ್, ಡ್ರೋನ್ ದಾಳಿಯ ಸರಣಿಯು ಮಾಸ್ಕೋ ತೈಲ ಸಂಸ್ಕರಣಾಗಾರ ಮತ್ತು ವಸತಿ ಕಟ್ಟಡಕ್ಕೂ ಹಾನಿ ಉಂಟುಮಾಡಿದೆ ಎಂದು ತಿಳಿಸಿದರು.
ಮಾಸ್ಕೋ ಪ್ರದೇಶದಲ್ಲಿ ಇಬ್ಬರು ಸಾವು, 20 ಮಂದಿಗೆ ಗಾಯ
ರಾತ್ರಿಯ ದಾಳಿಯ ನಂತರ ವಿಶಾಲ ಮಾಸ್ಕೋ ಪ್ರದೇಶದಲ್ಲಿ ಇಬ್ಬರು ಮೃತಪಟ್ಟಿರುವ ಮತ್ತು 20 ಮಂದಿ ಗಾಯಗೊಂಡಿರುವ ವರದಿಯಾಗಿದೆ. ಮೃತಪಟ್ಟವರು 74 ವರ್ಷದ ಪುರುಷ ಮತ್ತು 44 ವರ್ಷದ ಮಹಿಳೆ ಎಂದು ಗವರ್ನರ್ ಆಂಡ್ರೆ ವೊರೊಬ್ಯೋವ್ ತಿಳಿಸಿದ್ದಾರೆ.
ಕಾರ್ಯಾಚರಣೆ ಮುಂದುವರಿದಿರುವಂತೆಯೇ, ದಾಳಿಯಿಂದಾದ ಹಾನಿಯ ವ್ಯಾಪ್ತಿಯ ಬಗ್ಗೆ ರಷ್ಯಾದ ಅಧಿಕಾರಿಗಳು ಮಾಹಿತಿ ನೀಡುತ್ತಿದ್ದಾರೆ.
ರಷ್ಯಾದಲ್ಲಿ ಸಂಸದೀಯ ಚುನಾವಣೆ ನಡೆಯುತ್ತಿರುವಾಗಲೇ ಡ್ರೋನ್ ದಾಳಿ
ರಷ್ಯಾದಲ್ಲಿ ಸಂಸದೀಯ ಚುನಾವಣೆಗಳ ಮೂರನೇ ಹಾಗೂ ಅಂತಿಮ ದಿನದ ಪ್ರಕ್ರಿಯೆ ಪೂರ್ಣಗೊಳ್ಳುತ್ತಿರುವ ಸಂದರ್ಭದಲ್ಲೇ ಈ ದಾಳಿ ನಡೆದಿದೆ. ಈ ಚುನಾವಣೆಯನ್ನು ರಷ್ಯಾದ ಮೊದಲ ‘ಯುದ್ಧಕಾಲದ ಸಂಸದೀಯ ಚುನಾವಣೆ’ ಎಂದು ಬಣ್ಣಿಸಲಾಗಿದೆ. ಮತದಾನ ಪ್ರಕ್ರಿಯೆಯಲ್ಲಿ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ನೀತಿಗಳ ವಿರುದ್ಧ ಯಾವುದೇ ಗಮನಾರ್ಹ ವಿರೋಧವಿರಲಿಲ್ಲ ಮತ್ತು ಇದು ಕ್ರೆಮ್ಲಿನ್‌ನ ಪ್ರಾಬಲ್ಯವನ್ನು ಇನ್ನಷ್ಟು ಬಲಪಡಿಸುವ ನಿರೀಕ್ಷೆಯಿದೆ.
ಯುದ್ಧದ ನಂತರ ಮಾಸ್ಕೋ ತನ್ನ ವಶಕ್ಕೆ ತೆಗೆದುಕೊಂಡಿದ್ದರೂ ಸಂಪೂರ್ಣ ನಿಯಂತ್ರಣ ಹೊಂದಿರದ ಉಕ್ರೇನ್ ನ ನಾಲ್ಕು ಪ್ರದೇಶಗಳಲ್ಲಿಯೂ ರಷ್ಯಾ ಮತದಾನ ನಡೆಸಿದೆ. 2014ರಲ್ಲಿ ರಷ್ಯಾ ತನ್ನ ವಶಕ್ಕೆ ತೆಗೆದುಕೊಂಡಿದ್ದ ಕಪ್ಪು ಸಮುದ್ರದ ಪರ್ಯಾಯ ದ್ವೀಪವಾದ ಕ್ರೈಮಿಯಾದಲ್ಲಿಯೂ ಮತದಾನ ನಡೆದಿದೆ. ಆಕ್ರಮಿತ ಪ್ರದೇಶಗಳಲ್ಲಿ ನಡೆದ ಈ ಚುನಾವಣೆಗಳನ್ನು ಕೀವ್(ಉಕ್ರೇನ್) ಕಾನೂನುಬಾಹಿರ ಎಂದು ಖಂಡಿಸಿದೆ.
ಚುನಾವಣೆಗೆ ಅಡ್ಡಿಪಡಿಸುವ ಪ್ರಯತ್ನ ವಿಫಲವೆಂದು ಮಾಸ್ಕೋ ಹೇಳಿಕೆ
ರಷ್ಯಾದ ಚುನಾವಣೆಗೆ ಅಡ್ಡಿಪಡಿಸುವ ಉದ್ದೇಶದಿಂದಲೇ ಈ ಡ್ರೋನ್ ದಾಳಿ ನಡೆಸಲಾಗಿತ್ತು ಎಂದು ಸೋಬ್ಯಾನಿನ್ ಹೇಳಿದರು. “ಈ ವಿಷಯದಲ್ಲಿ ಶತ್ರುಗಳು ವಿಫಲರಾಗಿದ್ದಾರೆ” ಎಂದು ಮಾಸ್ಕೋ ಮೇಯರ್ ತಿಳಿಸಿದರು.
ರಷ್ಯಾದಾದ್ಯಂತ ಮತದಾನವು ಮುಕ್ತಾಯದ ಹಂತದಲ್ಲಿದ್ದಾಗ ಈ ದಾಳಿಗಳು ನಡೆದವು; ಮಾಸ್ಕೋ, ದೇಶದ ಇತರ ಭಾಗಗಳು, ಕ್ರೈಮಿಯಾ ಮತ್ತು ಕಪ್ಪು ಸಮುದ್ರದ ಮೇಲೆ ಹೆಚ್ಚಿನ ಸಂಖ್ಯೆಯ ಡ್ರೋನ್‌ಗಳನ್ನು ತಡೆಹಿಡಿಯಲಾಗಿದೆ ಎಂದು ಅಧಿಕಾರಿಗಳು ವರದಿ ಮಾಡಿದ್ದಾರೆ.
