ಭಾರತದ 80ನೇ ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ದೇಶದ ಪ್ರಮುಖ ವಿಮಾನಯಾನ ಸಂಸ್ಥೆಗಳು ಪ್ರಯಾಣಿಕರಿಗೆ ವಿಶೇಷ ಆಫರ್‌ಗಳನ್ನು ಘೋಷಿಸಿವೆ. ಏರ್ ಇಂಡಿಯಾ ಎಕ್ಸ್‌ಪ್ರೆಸ್, ಇಂಡಿಗೋ ಹಾಗೂ ಏರ್ ಇಂಡಿಯಾ ಟಿಕೆಟ್ ಬುಕಿಂಗ್ ಮೇಲೆ ಭರ್ಜರಿ ರಿಯಾಯಿತಿ ನೀಡುತ್ತಿವೆ. ಇದರ ಜೊತೆಗೆ ಕೆಲವು ಹೆಚ್ಚುವರಿ ಪ್ರಯೋಜನಗಳನ್ನೂ ಪ್ರಯಾಣಿಕರು ಪಡೆಯಬಹುದಾಗಿದೆ.
ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಪ್ರಯಾಣ ಮಾಡುವವರು ಈ ಆಫರ್‌ಗಳ ಸದುಪಯೋಗಪಡಿಸಿಕೊಳ್ಳಬಹುದು. ಆದರೆ ಪ್ರತಿ ವಿಮಾನಯಾನ ಸಂಸ್ಥೆಯ ಬುಕಿಂಗ್ ದಿನಾಂಕ, ಪ್ರಯಾಣದ ಅವಧಿ ಹಾಗೂ ಡಿಸ್ಕೌಂಟ್ ನಿಯಮಗಳು ವಿಭಿನ್ನವಾಗಿವೆ.
ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌ನಲ್ಲಿ ಶೇ.20ರವರೆಗೆ ಡಿಸ್ಕೌಂಟ್
ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ತನ್ನ ಪ್ರಯಾಣಿಕರಿಗಾಗಿ ‘ಫ್ರೀಡಂ ಸೇಲ್’ ಆರಂಭಿಸಿದೆ. ಈ ಆಫರ್‌ನಲ್ಲಿ ವಿಮಾನ ಟಿಕೆಟ್‌ಗಳ ಮೇಲೆ ಶೇ.20ರವರೆಗೆ ರಿಯಾಯಿತಿ ಸಿಗಲಿದೆ. ಇದರ ಜೊತೆಗೆ ಮುಂಗಡವಾಗಿ ಬುಕ್ ಮಾಡುವ Gourmair Meals ಮೇಲೂ ಶೇ.20ರಷ್ಟು ಡಿಸ್ಕೌಂಟ್ ಲಭ್ಯವಿದೆ.
ಈ ಆಫರ್ ದೇಶೀಯ ಪ್ರಯಾಣಿಕರಿಗೆ ಮಾತ್ರ ಅನ್ವಯಿಸುತ್ತದೆ. ಕಡಿಮೆ ದರದಲ್ಲಿ ವಿಮಾನ ಟಿಕೆಟ್ ಬುಕ್ ಮಾಡಲು ಬಯಸುವವರಿಗೆ ಇದು ಉತ್ತಮ ಅವಕಾಶವಾಗಿದೆ. ಆದರೆ ಎಲ್ಲಾ ವಿಮಾನಗಳು ಹಾಗೂ ಎಲ್ಲಾ ದಿನಾಂಕಗಳಿಗೆ ಒಂದೇ ರೀತಿಯ ರಿಯಾಯಿತಿ ಇರುವುದಿಲ್ಲ.
ಲೈಟ್ ಮತ್ತು ವ್ಯಾಲ್ಯೂ ಫೇರ್ ವಿಭಾಗಗಳಲ್ಲಿ ಬೇಸ್ ಫೇರ್ ಮೇಲೆ ಶೇ.20ರಷ್ಟು ರಿಯಾಯಿತಿ ದೊರೆಯಲಿದೆ. ಆಫರ್ ಸೀಟುಗಳು ಸೀಮಿತವಾಗಿರುವುದರಿಂದ ಮೊದಲು ಬುಕ್ ಮಾಡುವವರಿಗೆ ಹೆಚ್ಚಿನ ಅವಕಾಶ ಸಿಗಲಿದೆ.
ದಿಲ್ಲಿ, ಕೋಲ್ಕತ್ತಾ ಹಾಗೂ ಗುವಾಹಟಿಯಿಂದ ಹೊರಡುವ ಅಥವಾ ಈ ನಗರಗಳಿಗೆ ತೆರಳುವ ಆಯ್ದ ವಿಮಾನಗಳಲ್ಲಿ FREEDOM ಪ್ರೊಮೋ ಕೋಡ್ ಬಳಸಿದರೆ ಹೆಚ್ಚುವರಿಯಾಗಿ 10% ಡಿಸ್ಕೌಂಟ್ ಪಡೆಯಬಹುದು.
ಈ ಫ್ರೀಡಂ ಸೇಲ್ ಅಡಿಯಲ್ಲಿ ಆಗಸ್ಟ್ 13ರಿಂದ ಆಗಸ್ಟ್ 16ರವರೆಗೆ ಟಿಕೆಟ್ ಬುಕ್ ಮಾಡಬಹುದು. ಬುಕ್ ಮಾಡಿದ ಟಿಕೆಟ್‌ಗಳೊಂದಿಗೆ ಆಗಸ್ಟ್ 16ರಿಂದ ಅಕ್ಟೋಬರ್ 31ರವರೆಗೆ ಪ್ರಯಾಣಿಸಬಹುದು.
ಇಂಡಿಗೋದಲ್ಲೂ ಭರ್ಜರಿ ಆಫರ್
ಪ್ರಮುಖ ವಿಮಾನಯಾನ ಸಂಸ್ಥೆ ಇಂಡಿಗೋ ಕೂಡ ಸ್ವಾತಂತ್ರ್ಯ ದಿನಾಚರಣೆ ಪ್ರಯುಕ್ತ ವಿಶೇಷ ಸೇಲ್ ನಡೆಸುತ್ತಿದೆ.
INDIGO80 ಪ್ರೊಮೋ ಕೋಡ್ ಬಳಸಿದರೆ ಬೇಸ್ ಫೇರ್ ಹಾಗೂ ಆಯ್ದ ಸೇವೆಗಳ ಮೇಲೆ ಶೇ.20ರವರೆಗೆ ಡಿಸ್ಕೌಂಟ್ ಪಡೆಯಬಹುದು.
ಈ ಆಫರ್‌ನ ಬುಕಿಂಗ್ ಅವಧಿ ಆಗಸ್ಟ್ 13ರಿಂದ ಆಗಸ್ಟ್ 16ರವರೆಗೆ ಇರಲಿದೆ. ಇದರ ಅಡಿಯಲ್ಲಿ ಆಗಸ್ಟ್ 16ರಿಂದ ಅಕ್ಟೋಬರ್ 31ರ ನಡುವೆ ಪ್ರಯಾಣಿಸಬಹುದು.
ಬುಕಿಂಗ್ ಮಾಡಿದ ದಿನಾಂಕದಿಂದ ಕನಿಷ್ಠ 3 ದಿನಗಳ ನಂತರದ ಪ್ರಯಾಣದ ದಿನಾಂಕ ಇರಬೇಕು. ಇಂಡಿಗೋ ನಿರ್ವಹಿಸುವ ನಾನ್-ಸ್ಟಾಪ್ ವಿಮಾನಗಳಿಗೆ ಮಾತ್ರ ಈ ಆಫರ್ ಅನ್ವಯಿಸುತ್ತದೆ. ಇದರ ಜೊತೆಗೆ ಇತರ ಮೀಲ್ ಆಫರ್‌ಗಳನ್ನೂ ಸಂಸ್ಥೆ ನೀಡುತ್ತಿದೆ.
ಏರ್ ಇಂಡಿಯಾದಲ್ಲೂ ಟಿಕೆಟ್ ಮೇಲೆ ರಿಯಾಯಿತಿ
ಏರ್ ಇಂಡಿಯಾ ಕೂಡ ಸ್ವಾತಂತ್ರ್ಯ ದಿನಾಚರಣೆ ವಿಶೇಷ ಆಫರ್ ಘೋಷಿಸಿದೆ. ಆಗಸ್ಟ್ 13ರಿಂದ ಆಗಸ್ಟ್ 16ರವರೆಗೆ ಏರ್ ಇಂಡಿಯಾ ವಿಮಾನಗಳನ್ನು ಬುಕ್ ಮಾಡುವ ಪ್ರಯಾಣಿಕರಿಗೆ ಬೇಸ್ ಫೇರ್ ಮೇಲೆ ಶೇ.20ರಷ್ಟು ಡಿಸ್ಕೌಂಟ್ ಸಿಗಲಿದೆ.
FLYAI ಪ್ರೊಮೋ ಕೋಡ್ ಬಳಸಿದರೆ ಪ್ರತಿ ಪ್ರಯಾಣಿಕರಿಗೆ ಹೆಚ್ಚುವರಿಯಾಗಿ ₹3,000ರವರೆಗೆ ರಿಯಾಯಿತಿ ಪಡೆಯುವ ಅವಕಾಶವಿದೆ.ಲಾಗಿನ್ ಆಗಿರುವ ಸದಸ್ಯರಿಗೆ ಕನ್ವೀನಿಯನ್ಸ್ ಫೀಸ್ ಮೇಲೂ ಶೇ.50ರವರೆಗೆ ಡಿಸ್ಕೌಂಟ್ ದೊರೆಯಲಿದೆ.
ದೇಶೀಯ ವಿಮಾನಗಳಿಗೆ ಆಗಸ್ಟ್ 16ರಿಂದ ಅಕ್ಟೋಬರ್ 15ರವರೆಗೆ, ಅಂತಾರಾಷ್ಟ್ರೀಯ ವಿಮಾನಗಳಿಗೆ ಆಗಸ್ಟ್ 16ರಿಂದ ಅಕ್ಟೋಬರ್ 31ರವರೆಗೆ ಪ್ರಯಾಣಿಸುವ ಅವಕಾಶವಿದೆ.ಇದಲ್ಲದೆ, ICICI ಬ್ಯಾಂಕ್ ಹಾಗೂ HDFC ಬ್ಯಾಂಕ್ ಕ್ರೆಡಿಟ್ ಕಾರ್ಡ್ EMI ವಹಿವಾಟುಗಳ ಮೇಲೆ ಶೇ.12ರಷ್ಟು ಫ್ಲ್ಯಾಟ್ ಡಿಸ್ಕೌಂಟ್ ಕೂಡ ಲಭ್ಯವಿದೆ.
