ಇಂಡೋನೇಷ್ಯಾದಲ್ಲಿ ಶನಿವಾರ ಮತ್ತೊಂದು 6.5 ತೀವ್ರತೆಯ ಪ್ರಬಲ ಭೂಕಂಪ ಸಂಭವಿಸಿದೆ. ಕೆಲವೇ ಗಂಟೆಗಳ ಹಿಂದೆ ದೇಶದಲ್ಲಿ ಸಂಭವಿಸಿದ್ದ 7.7 ತೀವ್ರತೆಯ ಭೂಕಂಪದಲ್ಲಿ ಕನಿಷ್ಠ 38 ಮಂದಿ ಮೃತಪಟ್ಟಿದ್ದು, 13 ಮಂದಿ ಗಾಯಗೊಂಡಿದ್ದಾರೆ.
ಭಾರತದ ನ್ಯಾಷನಲ್ ಸೆಂಟರ್ ಫಾರ್ ಸೀಸ್ಮಾಲಜಿ (NCS) ಪ್ರಕಾರ, ಶನಿವಾರ ಮಧ್ಯಾಹ್ನ 6.5 ತೀವ್ರತೆಯ ಭೂಕಂಪ ಸಂಭವಿಸಿದೆ. ಆಗಸ್ಟ್ 15ರಂದು ಸಂಜೆ 4:24ಕ್ಕೆ IST ಭೂಕಂಪ ದಾಖಲಾಗಿದೆ ಎಂದು NCS ತಿಳಿಸಿದೆ.
ಭೂಕಂಪವು ಭೂಮಿಯ ಮೇಲ್ಮೈಯಿಂದ 165 ಕಿಲೋಮೀಟರ್ ಆಳದಲ್ಲಿ ಸಂಭವಿಸಿದೆ. NCS ಪ್ರಕಾರ, ಭೂಕಂಪದ ಕೇಂದ್ರ ಇಂಡೋನೇಷ್ಯಾದಲ್ಲಿದೆ.
6.5 ತೀವ್ರತೆಯ ಭೂಕಂಪದಿಂದ ತಕ್ಷಣ ಯಾವುದೇ ಹಾನಿ ವರದಿಯಾಗಿಲ್ಲ
ಇತ್ತೀಚಿನ ಭೂಕಂಪದ ಬಳಿಕ ಸದ್ಯಕ್ಕೆ ಯಾವುದೇ ಸಾವು-ನೋವು ಅಥವಾ ಆಸ್ತಿಪಾಸ್ತಿ ಹಾನಿಯ ವರದಿಯಾಗಿಲ್ಲ. ಆದರೆ, ಈ ಕಂಪನ ಸಂಭವಿಸಿರುವ ಸಮಯದಲ್ಲಿ ಇಂಡೋನೇಷ್ಯಾ ಈಗಾಗಲೇ ಮತ್ತೊಂದು ಭೀಕರ ಭೂಕಂಪದ ಪರಿಣಾಮಗಳನ್ನು ಎದುರಿಸುತ್ತಿದೆ.
ಶನಿವಾರ ಬೆಳಗ್ಗೆ ಪೂರ್ವ ಇಂಡೋನೇಷ್ಯಾದ ಫ್ಲೋರೆಸ್ ಪ್ರದೇಶದಲ್ಲಿ ಸಂಭವಿಸಿದ 7.7 ತೀವ್ರತೆಯ ಭೂಕಂಪ ಭಾರಿ ಹಾನಿ ಉಂಟುಮಾಡಿದೆ.
7.7 ತೀವ್ರತೆಯ ಭೂಕಂಪದಲ್ಲಿ 40 ಮಂದಿ ಸಾವು
ಇಂಡೋನೇಷ್ಯಾದ ಪೂರ್ವ ನುಸಾ ತೆಂಗಾರಾ ಪ್ರಾಂತ್ಯದ ನಾಗೆಕೆಯೊ ಜಿಲ್ಲೆಯಲ್ಲಿ ಸಂಭವಿಸಿದ 7.7 ತೀವ್ರತೆಯ ಭೂಕಂಪದಲ್ಲಿ ಕನಿಷ್ಠ40 ಮಂದಿ ಮೃತಪಟ್ಟಿದ್ದು, 13 ಮಂದಿ ಗಾಯಗೊಂಡಿದ್ದಾರೆ ಎಂದು ಅಲ್ಲಿನ ವಿಪತ್ತು ನಿರ್ವಹಣಾ ಸಂಸ್ಥೆ ತಿಳಿಸಿದೆ.
ಗಾಯಗೊಂಡವರ ಪೈಕಿ ಇಬ್ಬರ ಸ್ಥಿತಿ ಗಂಭೀರವಾಗಿದ್ದು, 11 ಮಂದಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಭೂಕಂಪದ ಹಿನ್ನೆಲೆಯಲ್ಲಿ ಸುಮಾರು 2,000 ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲಾಗಿದೆ.
ಭೂಕಂಪದಿಂದ ಹಲವು ಕಟ್ಟಡಗಳು ಕುಸಿದಿದ್ದು, ಭೂಕುಸಿತಗಳು ಸಂಭವಿಸಿವೆ. ಕೆಲವು ರಸ್ತೆಗಳು ಸಂಪರ್ಕ ಕಳೆದುಕೊಂಡಿದ್ದು, ರಕ್ಷಣಾ ಕಾರ್ಯಾಚರಣೆಗೆ ತೊಂದರೆಯಾಗಿದೆ. ಸಂವಹನ ವ್ಯವಸ್ಥೆ ಹಾಗೂ ರಸ್ತೆ ಸಂಪರ್ಕದ ಸಮಸ್ಯೆಯಿಂದ ರಕ್ಷಣಾ ತಂಡಗಳು ಪೀಡಿತ ಪ್ರದೇಶಗಳನ್ನು ತಲುಪಲು ಹರಸಾಹಸಪಡುತ್ತಿವೆ.
ಭೂಕಂಪದ ಬಳಿಕ ಸುನಾಮಿ ಎಚ್ಚರಿಕೆ ನೀಡಲಾಗಿತ್ತು. ಆದರೆ ನಂತರ ಯಾವುದೇ ದೊಡ್ಡ ಮಟ್ಟದ ಸುನಾಮಿ ಅಪಾಯವಿಲ್ಲ ಎಂದು ಅಧಿಕಾರಿಗಳು ಖಚಿತಪಡಿಸಿಕೊಂಡ ಬಳಿಕ ಎಚ್ಚರಿಕೆಯನ್ನು ಹಿಂಪಡೆಯಲಾಯಿತು.
ಮುಖ್ಯ ಭೂಕಂಪದ ಬಳಿಕವೂ ಹಲವು ಕಂಪನಗಳು (ಆಫ್ಟರ್‌ಶಾಕ್‌ಗಳು) ದಾಖಲಾಗಿವೆ. ರಕ್ಷಣಾ ತಂಡಗಳು ಭೂಕಂಪದ ಕೇಂದ್ರದ ಸಮೀಪದ ಪ್ರದೇಶಗಳಿಗೆ ತೆರಳಿ ಸಂತ್ರಸ್ತರನ್ನು ತಲುಪುವ ಕಾರ್ಯದಲ್ಲಿ ತೊಡಗಿವೆ.
ಎರಡು ಭೂಕಂಪಗಳು ಒಂದೇ ಘಟನೆಯಲ್ಲ
ಶನಿವಾರ ಸಂಭವಿಸಿದ ಈ ಎರಡು ಭೂಕಂಪಗಳು ಒಂದೇ ಘಟನೆಯಲ್ಲ ಎಂದು ವರದಿಯಲ್ಲಿ ಸ್ಪಷ್ಟಪಡಿಸಲಾಗಿದೆ. 7.7 ತೀವ್ರತೆಯ ಮಾರಕ ಭೂಕಂಪವು ಪೂರ್ವ ಇಂಡೋನೇಷ್ಯಾದ ಫ್ಲೋರೆಸ್ ಸಮೀಪ ಸಂಭವಿಸಿದ್ದರೆ, ಭಾರತದ NCS ದಾಖಲಿಸಿರುವ 6.5 ತೀವ್ರತೆಯ ಭೂಕಂಪವು ಬೇರೆ ಸ್ಥಳದಲ್ಲಿ ಮತ್ತು ಭೂಮಿಯ ಹೆಚ್ಚು ಆಳದಲ್ಲಿ ಸಂಭವಿಸಿದೆ.
