ಮೊದಲ ಭೇಟಿಯಿಂದ ವಿಚ್ಛೇದನ ಅರ್ಜಿ ಹಿಂಪಡೆಯುವವರೆಗೆ: ಸಿಎಂ ವಿಜಯ್–ಸಂಗೀತಾ ದಾಂಪತ್ಯದ ಇಂಟರೆಸ್ಟಿಂಗ್ ಸ್ಟೋರಿ

ತಮಿಳುನಾಡು ಮುಖ್ಯಮಂತ್ರಿ ಹಾಗೂ ನಟ ವಿಜಯ್ ಮತ್ತು ಅವರ ಪತ್ನಿ ಸಂಗೀತಾ ಅವರ ದಾಂಪತ್ಯ ಜೀವನ ಕಳೆದ ಕೆಲವು ತಿಂಗಳುಗಳಿಂದ ಸಾಕಷ್ಟು ಸುದ್ದಿಯಲ್ಲಿತ್ತು. ವಿಚ್ಛೇದನ ಅರ್ಜಿ ಸಲ್ಲಿಕೆಯಿಂದ ಆರಂಭವಾದ ವಿವಾದಕ್ಕೆ ಇದೀಗ ಹೊಸ ತಿರುವು ಸಿಕ್ಕಿದ್ದು, ಸಂಗೀತಾ ಕುಟುಂಬ ನ್ಯಾಯಾಲಯದಲ್ಲಿ ಸಲ್ಲಿಸಿದ್ದ ವಿಚ್ಛೇದನ ಅರ್ಜಿಯನ್ನು ಹಿಂಪಡೆದಿದ್ದಾರೆ. ಇದರೊಂದಿಗೆ ಬಹುಚರ್ಚಿತ ಪ್ರಕರಣಕ್ಕೆ ಸದ್ಯ ತೆರೆ ಬಿದ್ದಿದೆ.

ಹೌದು. ತಮಿಳುನಾಡು ಮುಖ್ಯಮಂತ್ರಿ ಹಾಗೂ ನಟ ವಿಜಯ್ ಮತ್ತು ಅವರ ಪತ್ನಿ ಸಂಗೀತಾ ಕೊನೆಗೂ ಒಂದಾಗಿದ್ದು, ಸಂಗೀತಾ ಕುಟುಂಬ ನ್ಯಾಯಾಲಯದಲ್ಲಿ ಸಲ್ಲಿಸಿದ್ದ ವಿಚ್ಛೇದನ ಅರ್ಜಿಯನ್ನು ಹಿಂಪಡೆದಿದ್ದಾರೆ. ಶುಕ್ರವಾರ ನಡೆದ ವಿಚಾರಣೆಯ ವೇಳೆ ಸಂಗೀತಾ ವಿಡಿಯೊ ಕಾನ್ಫರೆನ್ಸ್ ಮೂಲಕ ನ್ಯಾಯಾಲಯಕ್ಕೆ ಹಾಜರಾಗಿ, ವಿಚ್ಛೇದನ ಅರ್ಜಿಯನ್ನು ಮುಂದುವರಿಸಲು ಇಚ್ಛೆಯಿಲ್ಲ ಎಂದು ತಿಳಿಸಿದರು. ನ್ಯಾಯಾಲಯ ಅವರ ಮನವಿಯನ್ನು ಅಂಗೀಕರಿಸಿ ಪ್ರಕರಣವನ್ನು ವಜಾಗೊಳಿಸಿತು. ಇದರಿಂದ ವಿಜಯ್–ಸಂಗೀತಾ ವಿಚ್ಛೇದನ ಪ್ರಕರಣಕ್ಕೆ ಸದ್ಯ ಅಂತ್ಯ ಬಿದ್ದಿದೆ.ಸಂಗೀತಾ ಅವರನ್ನು ವಿಜಯ್ ವರಿಸಿದ್ದು ಯಾವಾಗ..? ವಿಜಯ್ ದಾಂಪತ್ಯ ಜೀವನದ ಇಂಟರೆಸ್ಟಿಂಗ್ ವಿಚಾರ ಇಲ್ಲಿದೆ.

1990ರ ದಶಕದ ಕೊನೆಯಲ್ಲಿ ವಿಜಯ್ ಅವರ ಕಟ್ಟಾ ಅಭಿಮಾನಿಯಾಗಿದ್ದ ಶ್ರೀಲಂಕಾ ಮೂಲದ ಬ್ರಿಟಿಷ್ ತಮಿಳು ಯುವತಿ ಸಂಗೀತಾ, ಚಿತ್ರೀಕರಣದ ವೇಳೆ ಅವರನ್ನು ಮೊದಲ ಬಾರಿ ಭೇಟಿ ಮಾಡಿದ್ದರು. ಈ ಭೇಟಿಯ ನಂತರ ಇಬ್ಬರ ಕುಟುಂಬಗಳ ನಡುವೆ ಪರಿಚಯ ಬೆಳೆದು, ಪರಸ್ಪರ ಒಪ್ಪಿಗೆಯೊಂದಿಗೆ ಮದುವೆಗೆ ದಾರಿ ಮಾಡಿಕೊಟ್ಟಿತು

1) 1999ರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ಜೋಡಿ

ಆಗಸ್ಟ್ 25, 1999ರಂದು ವಿಜಯ್ ಮತ್ತು ಸಂಗೀತಾ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ಬಳಿಕ ಅವರಿಗೆ ಒಬ್ಬ ಪುತ್ರ ಹಾಗೂ ಒಬ್ಬ ಪುತ್ರಿ ಜನಿಸಿದರು. ಹಲವು ವರ್ಷಗಳ ಕಾಲ ಈ ಜೋಡಿ ತಮಿಳು ಚಿತ್ರರಂಗದ ಆದರ್ಶ ದಂಪತಿಗಳಲ್ಲಿ ಒಂದೆಂದು ಗುರುತಿಸಿಕೊಂಡಿತ್ತು.

2)ಮೊದಲ ಭೇಟಿ
ಶ್ರೀಲಂಕಾ ತಮಿಳು ಉದ್ಯಮಿಯ ಪುತ್ರಿಯಾಗಿರುವ, ಯುಕೆಯಲ್ಲಿ ನೆಲೆಸಿದ್ದ ಸಂಗೀತಾ ಸೋರ್ನಲಿಂಗಂ ಅವರು ನಟ ವಿಜಯ್ ಅವರ ಅಭಿಮಾನಿಯಾಗಿದ್ದರು. 1996ರಲ್ಲಿ ಬಿಡುಗಡೆಯಾದ Poove Unakkaga ಚಿತ್ರದ ಯಶಸ್ಸಿನಿಂದ ಪ್ರಭಾವಿತರಾದ ಅವರು, ವಿಜಯ್ ಅವರನ್ನು ಅಭಿನಂದಿಸಲು ಚೆನ್ನೈಗೆ ಬಂದು ಚಿತ್ರದ ಚಿತ್ರೀಕರಣದ ವೇಳೆ ಮೊದಲ ಬಾರಿಗೆ ಭೇಟಿಯಾದರು.

3)ಪ್ರೇಮದ ಆರಂಭ
ಸಂಗೀತಾ ಅವರ ಸರಳತೆ ಮತ್ತು ಪ್ರಾಮಾಣಿಕತೆ ವಿಜಯ್ ಅವರನ್ನು ಆಕರ್ಷಿಸಿತು. ಬಳಿಕ ವಿಜಯ್ ಅವರು ಸಂಗೀತಾರನ್ನು ತಮ್ಮ ಕುಟುಂಬಕ್ಕೆ ಪರಿಚಯಿಸಿದರು. ವಿಜಯ್ ಅವರ ತಂದೆ ನಿರ್ದೇಶಕ ಎಸ್.ಎ. ಚಂದ್ರಶೇಖರ್ ಹಾಗೂ ತಾಯಿ ಗಾಯಕಿ ಶೋಭಾ ಚಂದ್ರಶೇಖರ್ ಅವರಿಗೆ ಸಂಗೀತಾ ಇಷ್ಟವಾದ ಹಿನ್ನೆಲೆಯಲ್ಲಿ, ಅವರ ಕುಟುಂಬದೊಂದಿಗೆ ವಿವಾಹದ ಮಾತುಕತೆ ನಡೆಸಲಾಯಿತು.

4)ವಿವಾಹ
1998ರ ಜುಲೈ 10ರಂದು ವಿಜಯ್ ಮತ್ತು ಸಂಗೀತಾ ಯುನೈಟೆಡ್ ಕಿಂಗ್‌ಡಮ್‌ನಲ್ಲಿ ತಮ್ಮ ವಿವಾಹವನ್ನು ಅಧಿಕೃತವಾಗಿ ನೋಂದಾಯಿಸಿಕೊಂಡರು. ನಂತರ 1999ರ ಆಗಸ್ಟ್ 25ರಂದು ಚೆನ್ನೈನ ರಾಜಾ ಮುತ್ತಯ್ಯ ಹಾಲ್‌ನಲ್ಲಿ ಸಾಂಪ್ರದಾಯಿಕ ಹಿಂದೂ ವಿಧಿವಿಧಾನಗಳಂತೆ ವಿವಾಹವಾದರು. ಬಳಿಕ ಕುಟುಂಬದವರು, ಸ್ನೇಹಿತರು ಹಾಗೂ ಚಿತ್ರರಂಗದ ಗಣ್ಯರ ಸಮ್ಮುಖದಲ್ಲಿ ಅದ್ಧೂರಿ ಆರತಕ್ಷತೆ ನಡೆಯಿತು. ಕ್ರೈಸ್ತ ಧರ್ಮದ ವಿಜಯ್ ಹಾಗೂ ಹಿಂದೂ ಧರ್ಮದ ಸಂಗೀತಾ ಅವರ ವಿವಾಹ ವಿಶೇಷ ಗಮನ ಸೆಳೆದಿತ್ತು.

5)ಕುಟುಂಬ ಜೀವನ
ಈ ದಂಪತಿಗೆ ಜೇಸನ್ ಸಂಜಯ್ ಮತ್ತು ದಿವ್ಯ ಸಾಶಾ ಎಂಬ ಇಬ್ಬರು ಮಕ್ಕಳು ಇದ್ದಾರೆ. 2000ರಲ್ಲಿ ಜನಿಸಿದ ಜೇಸನ್ ಸಂಜಯ್ Vettaikaaran (2009) ಚಿತ್ರದ “ನಾ ಅಡಿಚಾ” ಹಾಡಿನಲ್ಲಿ ಬಾಲ ಕಲಾವಿದನಾಗಿ ಕಾಣಿಸಿಕೊಂಡಿದ್ದರು. ಬಳಿಕ ಅವರು ಚಿತ್ರ ನಿರ್ಮಾಣ ಕ್ಷೇತ್ರವನ್ನು ವೃತ್ತಿಯಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ. 2005ರಲ್ಲಿ ಜನಿಸಿದ ದಿವ್ಯ ಸಾಶಾ Theri (2016) ಚಿತ್ರದ ಕೊನೆಯ ದೃಶ್ಯದಲ್ಲಿ ಸಂಕ್ಷಿಪ್ತವಾಗಿ ಕಾಣಿಸಿಕೊಂಡಿದ್ದರು.

6)ವಿಚ್ಛೇದನ ಅರ್ಜಿ
2026ರ ಫೆಬ್ರವರಿಯಲ್ಲಿ ಸಂಗೀತಾ ಅವರು ವಿಶೇಷ ವಿವಾಹ ಕಾಯ್ದೆ–1954ರ ಅಡಿಯಲ್ಲಿ ಚೆಂಗಲ್ಪಟ್ಟು ಕುಟುಂಬ ನ್ಯಾಯಾಲಯದಲ್ಲಿ ವಿಜಯ್ ವಿರುದ್ಧ ವಿಚ್ಛೇದನ ಅರ್ಜಿ ಸಲ್ಲಿಸಿದ್ದರು. 27 ವರ್ಷಗಳ ದಾಂಪತ್ಯ ಜೀವನವನ್ನು ಕೊನೆಗೊಳಿಸುವಂತೆ ಅವರು ಮನವಿ ಮಾಡಿದ್ದರು.

7)ಅರ್ಜಿಯಲ್ಲಿನ ಆರೋಪಗಳು
ವಿಚ್ಛೇದನ ಅರ್ಜಿಯಲ್ಲಿ ವಿಜಯ್ ಅವರು ವೈವಾಹಿಕೇತರ ಸಂಬಂಧ ಹೊಂದಿದ್ದಾರೆ ಎಂದು ಸಂಗೀತಾ ಆರೋಪಿಸಿದ್ದರು. 2021ರ ಏಪ್ರಿಲ್‌ನಲ್ಲಿ ಈ ವಿಚಾರ ತಿಳಿದಿದ್ದು, ವ್ಯಭಿಚಾರ ಹಾಗೂ ಮಾನಸಿಕ ಕಿರುಕುಳದ ಆಧಾರದ ಮೇಲೆ ವಿಚ್ಛೇದನ ಕೋರಿದ್ದರು. ಈ ಆರೋಪಗಳು ನಟಿ ತ್ರಿಷಾ ಅವರೊಂದಿಗೆ ವಿಜಯ್ ಹೆಸರು ತಳುಕಾಡುತ್ತಿದ್ದ ಸಾಮಾಜಿಕ ಜಾಲತಾಣಗಳ ವದಂತಿಗಳಿಗೆ ಮತ್ತಷ್ಟು ಚರ್ಚೆಗೆ ಕಾರಣವಾದವು. ಆದರೆ, ವಿಜಯ್ ಅಥವಾ ತ್ರಿಷಾ ಈ ಕುರಿತು ಯಾವುದೇ ಸಾರ್ವಜನಿಕ ಪ್ರತಿಕ್ರಿಯೆ ನೀಡಿಲ್ಲ. ಅಲ್ಲದೆ, ಈ ವದಂತಿಗಳನ್ನು ದೃಢೀಕರಿಸುವ ಸ್ವತಂತ್ರ ಸಾಕ್ಷ್ಯಗಳೂ ಬಹಿರಂಗವಾಗಿಲ್ಲ.

8) ಪ್ರತ್ಯೇಕ ವಾಸ
ಕಾನೂನು ಪ್ರಕ್ರಿಯೆ ಆರಂಭವಾಗುವ ಮುನ್ನವೇ ವಿಜಯ್ ಮತ್ತು ಸಂಗೀತಾ ಹಲವು ತಿಂಗಳುಗಳಿಂದ ಪ್ರತ್ಯೇಕವಾಗಿ ವಾಸಿಸುತ್ತಿದ್ದರು ಎಂದು ವರದಿಗಳು ತಿಳಿಸಿವೆ.

9)ವಿಚ್ಛೇದನ ಅರ್ಜಿ ಹಿಂಪಡೆದ ಸಂಗೀತಾ
2026ರ ಆಗಸ್ಟ್ 7ರಂದು ಸಂಗೀತಾ ಅವರು ಚೆಂಗಲ್ಪಟ್ಟು ಜಿಲ್ಲಾ ನ್ಯಾಯಾಲಯದಲ್ಲಿ ಸಲ್ಲಿಸಿದ್ದ ವಿಚ್ಛೇದನ ಅರ್ಜಿಯನ್ನು ಹಿಂಪಡೆದರು. ಇದರೊಂದಿಗೆ ನ್ಯಾಯಾಲಯವು ಪ್ರಕರಣವನ್ನು ವಜಾಗೊಳಿಸಿದ್ದು, ಸಾಕಷ್ಟು ಚರ್ಚೆಗೆ ಕಾರಣವಾಗಿದ್ದ ಈ ವಿಚ್ಛೇದನ ಪ್ರಕರಣಕ್ಕೆ ತೆರೆ ಬಿದ್ದಿದೆ.