ಜಾಮ್ನಗರ: ಗುಜರಾತ್ನ ಜಾಮ್ನಗರದಲ್ಲಿ ಎರಡು ವರ್ಷಗಳಿಂದ ನಾಪತ್ತೆಯಾಗಿದ್ದ ವ್ಯಕ್ತಿಯ ಪ್ರಕರಣ ಬೆಚ್ಚಿಬೀಳಿಸುವ ತಿರುವು ಪಡೆದುಕೊಂಡಿದೆ. ಪತ್ನಿ ಹಾಗೂ ಆಕೆಯ ಪ್ರಿಯಕರ ಸೇರಿ ಪತಿಯನ್ನು ಕೊಲೆ ಮಾಡಿ, ಬಳಿಕ ಕುಟುಂಬದವರಿಗೆ ಆತ ಆಸ್ಟ್ರೇಲಿಯಾದಲ್ಲಿ ಕೆಲಸ ಮಾಡುತ್ತಿದ್ದಾನೆ ಎಂದು ಸುಳ್ಳು ಹೇಳಿ ಎರಡು ವರ್ಷಗಳ ಕಾಲ ನಂಬಿಸಿದ ಘಟನೆ ಬೆಳಕಿಗೆ ಬಂದಿದೆ.
ಮೃತನನ್ನು ಜಿಗ್ನೇಶ್ ಧರ್ಮೇಶ್ಭಾಯಿ ಮಾವಡಿಯಾ ಎಂದು ಗುರುತಿಸಲಾಗಿದೆ. ಅವರು ಮೇ 2024ರಿಂದ ನಾಪತ್ತೆಯಾಗಿದ್ದರು. ಈ ಅವಧಿಯಲ್ಲೆಲ್ಲಾ ಅವರ ಪತ್ನಿ ಪೃಥ್ವಿ ಮಾವಡಿಯಾ, ಪತಿ ಉದ್ಯೋಗಕ್ಕಾಗಿ ಆಸ್ಟ್ರೇಲಿಯಾಗಿದ್ದಾರೆ ಎಂದು ಕುಟುಂಬದವರಿಗೆ ಹೇಳುತ್ತಲೇ ಬಂದಿದ್ದಳು.
ಕುಟುಂಬದ ಅನುಮಾನದಿಂದ ಬಯಲಾಯ್ತು ಸತ್ಯ
ಜಿಗ್ನೇಶ್ ಅವರ ಸಹೋದರ ಅಶೋಕ್ ಧರ್ಮೇಶ್ಭಾಯಿ ಮಾವಡಿಯಾ ಅವರಿಗೆ ಎರಡು ವರ್ಷಗಳಾದರೂ ತಮ್ಮ ಸಹೋದರನೊಂದಿಗೆ ಯಾವುದೇ ಸಂಪರ್ಕ ಸಾಧ್ಯವಾಗದಿರುವುದು ಅನುಮಾನಕ್ಕೆ ಕಾರಣವಾಯಿತು. ಈ ಕುರಿತು ಅವರು ಪೊಲೀಸರಿಗೆ ದೂರು ನೀಡಿದ ನಂತರ ಪ್ರಕರಣದ ತನಿಖೆ ಆರಂಭವಾಯಿತು.ಕುಟುಂಬದವರು ಪತಿಯೊಂದಿಗೆ ಮಾತನಾಡಲು ಕೇಳಿದಾಗ, “ಅವರು ಕೆಲಸ ಮಾಡುವ ಸಂಸ್ಥೆಯಲ್ಲಿ ಮೊಬೈಲ್ ಬಳಸಲು ಅವಕಾಶವಿಲ್ಲ” ಎಂದು ಪತ್ನಿ ನಿರಂತರವಾಗಿ ಹೇಳಿ ತಪ್ಪಿಸಿಕೊಂಡಿದ್ದಳು ಎಂದು ಪೊಲೀಸರು ತಿಳಿಸಿದ್ದಾರೆ.
ವಿಚಾರಣೆಯಲ್ಲಿ ಕೊಲೆ ಸಂಚು ಬಯಲು
ಪೊಲೀಸರು ಪೃಥ್ವಿ ಮಾವಡಿಯಾ ಹಾಗೂ ಆಕೆಯೊಂದಿಗೆ ಅನೈತಿಕ ಸಂಬಂಧ ಹೊಂದಿದ್ದರೆಂದು ಆರೋಪಿಸಲಾದ ನಿಲೇಶ್ ಮನಸುಖ್ಭಾಯಿ ಕಶೇಟಿಯಾ ಅವರನ್ನು ವಿಚಾರಣೆಗೆ ಒಳಪಡಿಸಿದರು.ವಿಚಾರಣೆ ವೇಳೆ ಇಬ್ಬರೂ ಮೇ 2024ರಲ್ಲಿ ಜಿಗ್ನೇಶ್ ಅವರನ್ನು ಕೊಲೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸೈನೆಡ್ ಬೆರೆಸಿದ ಮದ್ಯ ನೀಡಿ ಹತ್ಯೆ
ತನಿಖೆ ಪ್ರಕಾರ, ಆರೋಪಿಗಳು ಸೋಡಿಯಂ ಸಯನೈಡ್ ಅನ್ನು ಮದ್ಯದಲ್ಲಿ ಬೆರೆಸಿ ಜಿಗ್ನೇಶ್ ಅವರಿಗೆ ಕುಡಿಸಿ ಕೊಲೆ ಮಾಡಿದ್ದಾರೆ. ಬಳಿಕ ಮೃತದೇಹವನ್ನು ಜಾಮ್ನಗರದ ಡಾರೆಡ್ ಕೈಗಾರಿಕಾ ಪ್ರದೇಶದಲ್ಲಿರುವ ಕಾರ್ಖಾನೆಯೊಂದಕ್ಕೆ ಕೊಂಡೊಯ್ದು, ಸುಮಾರು 12 ಅಡಿ ಆಳದ ಗುಂಡಿ ತೋಡಿ ಹೂತು ಹಾಕಿದ್ದಾರೆ ಎನ್ನಲಾಗಿದೆ.ಆ ಕಾರ್ಖಾನೆ ಜಿಗ್ನೇಶ್ ಹಾಗೂ ನಿಲೇಶ್ ಇಬ್ಬರೂ ಲೀಸ್ಗೆ ಪಡೆದಿದ್ದ ಸ್ಥಳವಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.
ಕಾರ್ಖಾನೆಯಲ್ಲಿ ಶೋಧ ಕಾರ್ಯ
ಆರೋಪಿಗಳ ಮಾಹಿತಿ ಆಧರಿಸಿ ಪೊಲೀಸರು ಹಾಗೂ ಫೊರೆನ್ಸಿಕ್ ತಜ್ಞರು ಕಾರ್ಖಾನೆ ಸ್ಥಳಕ್ಕೆ ಭೇಟಿ ನೀಡಿ ಅಗೆತ ಕಾರ್ಯ ಆರಂಭಿಸಿದ್ದಾರೆ. ಮಾನವ ಅವಶೇಷಗಳು ಹಾಗೂ ಇತರ ವೈಜ್ಞಾನಿಕ ಸಾಕ್ಷ್ಯಗಳನ್ನು ಸಂಗ್ರಹಿಸುವ ಕಾರ್ಯ ಮುಂದುವರಿದಿದೆ.ಪೃಥ್ವಿ ಮಾವಡಿಯಾ ಹಾಗೂ ನಿಲೇಶ್ ಮನಸುಖ್ಭಾಯಿ ಕಶೇಟಿಯಾ ವಿರುದ್ಧ ಕೊಲೆ ಹಾಗೂ ಸಾಕ್ಷ್ಯ ನಾಶ ಸೇರಿದಂತೆ ವಿವಿಧ ಕಾನೂನು ವಿಧಿಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಸಹಾಯಕ ಪೊಲೀಸ್ ಅಧೀಕ್ಷಕಿ ಪ್ರತಿಭಾ ಅವರ ಪ್ರಕಾರ, ಕುಟುಂಬದವರು ಪೊಲೀಸ್ ದೂರು ನೀಡಿದ ಬಳಿಕ ಪತ್ನಿ ವಿಚಾರಣೆಯಲ್ಲಿ ಕೊಲೆ ಕೃತ್ಯವನ್ನು ಒಪ್ಪಿಕೊಂಡಿದ್ದಾಳೆ. ಪ್ರಕರಣದ ಸಂಪೂರ್ಣ ಸತ್ಯಾಂಶವನ್ನು ಪತ್ತೆಹಚ್ಚಲು ತನಿಖೆ ಮುಂದುವರಿದಿದೆ.
