ನವದೆಹಲಿ: ಜುಲೈ 20ರಂದು ದೆಹಲಿಯ ಜಂತರ್ ಮಂತರ್‌ನಲ್ಲಿ ನಡೆದ ಪ್ರತಿಭಟನೆ ವೇಳೆ ರ್ಯಾಪಿಡ್ ಆಕ್ಷನ್ ಫೋರ್ಸ್ (RAF) ಪೆಲೆಟ್ ಗನ್ ಬಳಸಿದೆಯೇ? ಎಂಬ ವಿವಾದ ಮತ್ತಷ್ಟು ತೀವ್ರಗೊಂಡಿದೆ. ಕೇಂದ್ರ ಸರ್ಕಾರ ಹಾಗೂ ದೆಹಲಿ ಪೊಲೀಸರು ಪೆಲೆಟ್ ಗನ್ ಬಳಕೆಯ ಆರೋಪವನ್ನು ನಿರಾಕರಿಸುತ್ತಿರುವ ನಡುವೆಯೇ, ಹೊಸ ವೈದ್ಯಕೀಯ ವರದಿಯೊಂದು ಈ ವಿವಾದಕ್ಕೆ ಹೊಸ ತಿರುವು ನೀಡಿದೆ.
ಹಿಂದುಸ್ತಾನ್ ಟೈಮ್ಸ್ ವರದಿ ಪ್ರಕಾರ, 25 ವರ್ಷದ ಪ್ರತಿಭಟನಾಕಾರ ಶೇಖ್ ಇರ್ಷಾದ್ ಮನ್ಸೂರಿ ಅವರ ಮೆಡಿಕೋ-ಲೀಗಲ್ ಕೇಸ್ (MLC) ವರದಿಯಲ್ಲಿ, ಶಸ್ತ್ರಚಿಕಿತ್ಸೆ ವೇಳೆ “ಲೋಹದ ವಿದೇಶಿ ವಸ್ತುಗಳು” (Metallic Foreign Bodies) ದೇಹದಿಂದ ಹೊರತೆಗೆದಿರುವುದಾಗಿ ಉಲ್ಲೇಖಿಸಲಾಗಿದೆ.ಮನ್ಸೂರಿ ಅವರು ಕಾಕ್ರೋಚ್ ಜನತಾ ಪಾರ್ಟಿ (CJP) ನೇತೃತ್ವದಲ್ಲಿ ನಡೆದ ‘ಸಂಸದ್ ಚಲೋ’ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದವರಲ್ಲಿ ಒಬ್ಬರಾಗಿದ್ದು, ಪ್ರತಿಭಟನಾಕಾರರ ಮೇಲೆ ಅತಿಯಾದ ಬಲಪ್ರಯೋಗ ನಡೆದಿದೆ ಎಂದು ಆರೋಪಿಸಿ ಸುಪ್ರೀಂ ಕೋರ್ಟ್‌ಗೆ ಅರ್ಜಿ ಸಲ್ಲಿಸಿರುವವರಲ್ಲಿ ಸೇರಿದ್ದಾರೆ.
ಶಸ್ತ್ರಚಿಕಿತ್ಸೆಯಲ್ಲಿ ಲೋಹದ ಕಣಗಳು ಪತ್ತೆ
MLC ವರದಿ ಪ್ರಕಾರ, ಮನ್ಸೂರಿ ಅವರ ಮುಖ ಮತ್ತು ಕುತ್ತಿಗೆಗೆ ಗಾಯಗಳಾಗಿದ್ದು, ಶಸ್ತ್ರಚಿಕಿತ್ಸೆಯ ವೇಳೆ ಗಾಯದೊಳಗೆ ಸಿಲುಕಿದ್ದ ಲೋಹದ ಕಣಗಳನ್ನು ವೈದ್ಯರು ಹೊರತೆಗೆದಿದ್ದಾರೆ. ಅವುಗಳನ್ನು ಹೆಚ್ಚಿನ ಪರೀಕ್ಷೆಗಾಗಿ ಸಂರಕ್ಷಿಸಲಾಗಿದೆ.ಆದರೆ, ಈ ಲೋಹದ ತುಣುಕುಗಳನ್ನು ಯಾರು ಅಥವಾ ಯಾವ ಆಯುಧದಿಂದ ಹಾರಿಸಲಾಗಿದೆ ಎಂಬುದನ್ನು ವರದಿ ಸ್ಪಷ್ಟಪಡಿಸಿಲ್ಲ. ಆದರೂ, ಪ್ರತಿಭಟನೆಯ ವೇಳೆ ಪೆಲೆಟ್ ಮಾದರಿಯ ಗುಂಡುಗಳನ್ನು ಬಳಸಲಾಗಿದೆ ಎಂಬ ಪ್ರತಿಭಟನಾಕಾರರ ಆರೋಪಕ್ಕೆ ಈ ವರದಿ ಬಲ ನೀಡಿದೆ.
ಪ್ರತಿಭಟನಾಕಾರನ ಹೇಳಿಕೆ
ಮನ್ಸೂರಿ ಅವರ ಹೇಳಿಕೆಯಂತೆ, ಭದ್ರತಾ ಸಿಬ್ಬಂದಿಯೊಬ್ಬರು ತಮ್ಮತ್ತ ಆಯುಧವನ್ನು ಗುರಿಯಾಗಿಸಿ ಹಿಡಿದಿರುವುದನ್ನು ನೋಡಿದ್ದಾಗಿ ತಿಳಿಸಿದ್ದಾರೆ.”ನಾನು ಓಡಲು ತಿರುಗಿದಾಗ, ಏನೋ ಬಂದು ನನ್ನ ಮುಖಕ್ಕೆ ಬಡಿದಿತು,” ಎಂದು ಅವರು ಹೇಳಿದ್ದಾರೆ.ಶಸ್ತ್ರಚಿಕಿತ್ಸೆಯ ಬಳಿಕ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದರೂ, ಗಾಯದ ಗುರುತುಗಳು ಇನ್ನೂ ಮುಖದಲ್ಲಿ ಕಾಣಿಸುತ್ತಿವೆ ಎಂದು ಅವರು ತಿಳಿಸಿದ್ದಾರೆ.
ಪ್ರತಿಭಟನೆ ವೇಳೆ ನಡೆದದ್ದು
CJP ಕಾರ್ಯಕರ್ತರು ಸಂಸತ್ ಕಡೆಗೆ ಮೆರವಣಿಗೆ ನಡೆಸಲು ಯತ್ನಿಸಿದಾಗ, ದೆಹಲಿ ಪೊಲೀಸರು ಮತ್ತು RAF ಸಿಬ್ಬಂದಿ ಅವರನ್ನು ತಡೆದಿದ್ದರು. ಈ ವೇಳೆ ಹಲವಾರು ಪ್ರತಿಭಟನಾಕಾರರು ಗಾಯಗೊಂಡಿದ್ದು, ಕೆಲವು ಭದ್ರತಾ ಸಿಬ್ಬಂದಿಗೂ ಗಾಯಗಳಾಗಿದ್ದವು.ಕಳೆದ ಕೆಲವು ದಿನಗಳಿಂದ ಇತರ ಗಾಯಾಳು ಪ್ರತಿಭಟನಾಕಾರರೂ ತಮ್ಮ ವೈದ್ಯಕೀಯ ದಾಖಲೆಗಳಲ್ಲಿ “ಪೆಲೆಟ್ ಗಾಯದ ಗುರುತುಗಳು” ಅಥವಾ “ಲೋಹದ ಕಣಗಳು” ಪತ್ತೆಯಾಗಿರುವುದಾಗಿ ಹೇಳಿರುವ ವರದಿಗಳು ಹೊರಬಂದಿವೆ. ಆದರೆ, ಕೇಂದ್ರ ಸರ್ಕಾರ ಈ ಆರೋಪಗಳನ್ನು ಸಂಪೂರ್ಣವಾಗಿ ತಳ್ಳಿಹಾಕಿದೆ. ಲೋಕಸಭೆಯಲ್ಲಿ ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿರುವಂತೆ, ಪ್ರತಿಭಟನಾಕಾರರ ಮೇಲೆ ಯಾವುದೇ ಗುಂಡಿನ ದಾಳಿ ನಡೆದಿಲ್ಲ. ಜನರನ್ನು ನಿಯಂತ್ರಿಸಲು ಕಣ್ಣೀರು ಅನಿಲ (Tear Gas) ಸೇರಿದಂತೆ ಸಾಮಾನ್ಯ ಗುಂಪು ನಿಯಂತ್ರಣ ಕ್ರಮಗಳನ್ನಷ್ಟೇ ಬಳಸಲಾಗಿದೆ ಎಂದು ತಿಳಿಸಿದೆ.
