ಶಾಂಘೈನಲ್ಲಿ ನಡೆದ ‘ಸ್ಪೈಡರ್‌ಮ್ಯಾನ್: ಬ್ರ್ಯಾಂಡ್ ನ್ಯೂ ಡೇ’ ಸಿನಿಮಾದ ಪ್ರೀಮಿಯರ್ ಪ್ರದರ್ಶನದಲ್ಲಿ ಹಾಲಿವುಡ್ ನಟಿ ಝೆಂಡಾಯಾ ತಮ್ಮ ವಿಭಿನ್ನ ಹಾಗೂ ನವೀನ ಶೈಲಿಯ ಉಡುಪಿನ ಮೂಲಕ ಎಲ್ಲರ ಕಣ್ಣು ಕೋರೈಸಿದ್ದಾರೆ. ಈ ಪ್ರಚಾರದ ಕಾರ್ಯಕ್ರಮದಲ್ಲಿ ಅವರು ಜೇಡರ ಬಲೆಯ ವಿನ್ಯಾಸವನ್ನು ಹೋಲುವ ಉಡುಪಿನಲ್ಲಿ ಕಾಣಿಸಿಕೊಂಡು ಫ್ಯಾಷನ್ ಪ್ರಿಯರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಝೆಂಡಾಯಾ ಧರಿಸಿದ್ದ ಈ ಕಪ್ಪು ಮತ್ತು ಬಿಳಿ ಬಣ್ಣದ ಉಡುಪನ್ನು ಪ್ರಸಿದ್ಧ ವರ್ಸೇಸ್ ಸಂಸ್ಥೆಯ ೨೦೧೬ರ ಪ್ರಮುಖ ಕಲೆಕ್ಷನ್‌ನಿಂದ ಆಯ್ಕೆ ಮಾಡಲಾಗಿತ್ತು. ಜೇಡರ ಬಲೆಯನ್ನು ನೆನಪಿಸುವ ಸೂಕ್ಷ್ಮವಾದ ನೆಟ್, ಹೊಳೆಯುವ ಹರಳುಗಳು ಹಾಗೂ ಮೈಕಟ್ಟು ಪ್ರದರ್ಶಿಸುವಂತೆ ವಿನ್ಯಾಸಗೊಳಿಸಲಾದ ಈ ಡ್ರೆಸ್, ಅವರ ಸೌಂದರ್ಯಕ್ಕೆ ಮತ್ತಷ್ಟು ಕಳೆ ನೀಡಿತ್ತು.
ತಮ್ಮ ಗೆಳೆಯ ಹಾಗೂ ಪ್ರಸಿದ್ಧ ಸ್ಟೈಲಿಸ್ಟ್ ಲಾ ರೋಚ್ ಅವರ ಜೊತೆಗೂಡಿ ಈ ಲುಕ್ ರೂಪಿಸಿದ್ದ ಝೆಂಡಾಯಾ, ಉಡುಪಿಗೆ ತಕ್ಕಂತೆ ಸೊಂಟದ ಭಾಗದಲ್ಲಿ ವಜ್ರ ಹಾಗೂ ಹಳದಿ ಸಫೈರ್ ರತ್ನದ ಜೇಡದ ಆಕಾರದ ಬ್ರೂಚ್ ಧರಿಸಿದ್ದರು. ಇದರೊಂದಿಗೆ ಅವರ ಹೊಸ ರೀತಿಯ ಹೇರ್‌ಸ್ಟೈಲ್ ಮತ್ತು ಡಾರ್ಕ್ ಸ್ಮೋಕಿ ಮೇಕಪ್ ಈ ಇಡೀ ಲುಕ್‌ಗೆ ಒಂದು ಎಡ್ಜಿ ಹಾಗೂ ಬೋಲ್ಡ್ ಸ್ಪರ್ಶ ನೀಡಿದೆ.
ಮಾರ್ವೆಲ್ ಸಂಸ್ಥೆಯ ಬಹುನಿರೀಕ್ಷಿತ ‘ಸ್ಪೈಡರ್‌ಮ್ಯಾನ್: ಬ್ರ್ಯಾಂಡ್ ನ್ಯೂ ಡೇ’ ಸಿನಿಮಾವು ನಾಲ್ಕು ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ ವಿಶ್ವದಾದ್ಯಂತ ಜುಲೈ ೩೧ ರಂದು ತೆರೆಕಾಣುತ್ತಿದೆ. ಡೆಸ್ಟಿನ್ ಡೇನಿಯಲ್ ಕ್ರೆಟನ್ ನಿರ್ದೇಶನದ ಈ ಚಿತ್ರದಲ್ಲಿ ಟಾಮ್ ಹಾಲೆಂಡ್ ಮತ್ತು ಝೆಂಡಾಯಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
