ತೆಲಂಗಾಣ/ಜಂಗಾಂ: ತಿರುಪತಿಗೆ ಹೋಗುವ ಉದ್ದೇಶದಿಂದ ಮದ್ಯದ ಅಮಲಿನಲ್ಲಿದ್ದ ವ್ಯಕ್ತಿಯೊಬ್ಬ RTC ಬಸ್’ನ್ನೇ ಕದ್ದು ಸುಮಾರು 21 ಕಿಲೋಮೀಟರ್ ಚಲಾಯಿಸಿ ಕೊನೆಗೆ ಟೋಲ್ ಗೇಟ್ಗೆ ಡಿಕ್ಕಿ ಹೊಡೆದ ವಿಚಿತ್ರ ಘಟನೆ ತೆಲಂಗಾಣದ ಜಂಗಾಂ ಜಿಲ್ಲೆಯಲ್ಲಿ ನಡೆದಿದೆ. ಘಟನೆಗೆ ಸಂಬಂಧಿಸಿದಂತೆ ಆರೋಪಿಯನ್ನು ಪೊಲೀಸರು ಬಂಧಿಸಿ ಪ್ರಕರಣ ದಾಖಲಿಸಿದ್ದಾರೆ.
ತಿರುಪತಿಗೆ ತೆರಳುವ ಉದ್ದೇಶದಿಂದ ಮದ್ಯದ ಅಮಲಿನಲ್ಲಿದ್ದ ವ್ಯಕ್ತಿಯೊಬ್ಬ ತೆಲಂಗಾಣದ ಜಂಗಾಂ ಬಸ್ ನಿಲ್ದಾಣದಿಂದ ಬಾಡಿಗೆ ಆರ್ಟಿಸಿ ಬಸ್‌ನ್ನೇ ಕದ್ದೊಯ್ದು ಸುಮಾರು 21 ಕಿಲೋಮೀಟರ್ ಚಲಾಯಿಸಿದ ಬಳಿಕ ಟೋಲ್‌ಗೇಟ್‌ನ ಸಿಮೆಂಟ್ ತಡೆಗೋಡೆಗೆ ಡಿಕ್ಕಿ ಹೊಡೆದ ವಿಚಿತ್ರ ಘಟನೆ ನಡೆದಿದೆ. ಚಾಲಕ ಬಸ್ನ ಕೀಯನ್ನು ವಾಹನದೊಳಗೇ ಬಿಟ್ಟು ಹೋಗಿದ್ದನ್ನು ದುರುಪಯೋಗಪಡಿಸಿಕೊಂಡ ಆರೋಪಿ ಕೊನೆಗೆ ಪೊಲೀಸರ ಬಲೆಗೆ ಬಿದ್ದಿದ್ದಾನೆ.
ಪೊಲೀಸರ ಪ್ರಕಾರ, ಆರೋಪಿ ಜಿತ್ತಬೊಯಿನ ವೆಂಕಣ್ಣ ಪಾಲಕುರ್ತಿ ಮಂಡಲದ ಚೆನ್ನೂರು ಗ್ರಾಮದ ನಿವಾಸಿಯಾಗಿದ್ದು, ಬುಲ್ಡೋಜರ್ ಆಪರೇಟರ್ ಆಗಿ ಕೆಲಸ ಮಾಡುತ್ತಿದ್ದಾನೆ. ಕುಟುಂಬದ ಕಲಹದಿಂದ ಮನನೊಂದಿದ್ದ ಆತ ಮದ್ಯ ಸೇವಿಸಿದ ಬಳಿಕ ತಿರುಪತಿಗೆ ತೆರಳುವ ಉದ್ದೇಶದಿಂದ ಜಂಗಾಂ ಬಸ್ ನಿಲ್ದಾಣದಲ್ಲಿ ನಿಲ್ಲಿಸಿದ್ದ ಬಾಡಿಗೆ RTC ಬಸ್ನ್ನು ಕದ್ದೊಯ್ದಿದ್ದಾನೆ ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.
ಬುಧವಾರ ರಾತ್ರಿ ನಿಗದಿತ ಸೇವೆ ಮುಗಿಸಿದ ಬಸ್ ಚಾಲಕ ವಾಹನವನ್ನು ಜಂಗಾಂ ಬಸ್ ನಿಲ್ದಾಣದಲ್ಲಿ ನಿಲ್ಲಿಸಿ ಮನೆಗೆ ತೆರಳಿದ್ದರು. ಈ ವೇಳೆ ಅಜಾಗರೂಕತೆಯಿಂದ ಬಸ್ನ ಕೀಲಿಯನ್ನು ವಾಹನದೊಳಗೇ ಬಿಟ್ಟು ಹೋಗಿದ್ದರು. ಇದನ್ನೇ ಅವಕಾಶವನ್ನಾಗಿ ಮಾಡಿಕೊಂಡ ವೆಂಕಣ್ಣ ಗುರುವಾರ ಬೆಳಗಿನ ಜಾವ ಸುಮಾರು 3 ಗಂಟೆ ವೇಳೆಗೆ ಬಸ್ ಚಾಲನೆ ಆರಂಭಿಸಿದ್ದಾನೆ.
ಬಳಿಕ ಬಸ್ನ್ನು ಸೂರ್ಯಾಪೇಟೆ ಮಾರ್ಗವಾಗಿ ಚಲಾಯಿಸಿದ ಆತ ಸುಮಾರು 21 ಕಿಲೋಮೀಟರ್ ದೂರ ಕ್ರಮಿಸಿದ ಬಳಿಕ ದೇವರುಪ್ಪುಲ ಮಂಡಲದ ಸಿಂಗರಾಜುಪಳ್ಳಿ ಟೋಲ್ ಗೇಟ್ ಬಳಿ ನಿಯಂತ್ರಣ ಕಳೆದುಕೊಂಡು ಸಿಮೆಂಟ್ ತಡೆಗೋಡೆಗೆ ಡಿಕ್ಕಿ ಹೊಡೆದಿದ್ದಾನೆ. ಡಿಕ್ಕಿಯ ರಭಸಕ್ಕೆ ಬಸ್ ಅಲ್ಲಿಯೇ ನಿಂತಿದೆ.ಘಟನೆ ಅನುಮಾನಾಸ್ಪದವಾಗಿ ಕಂಡ ಟೋಲ್ ಸಿಬ್ಬಂದಿ ತಕ್ಷಣವೇ ದೇವರುಪ್ಪುಲ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.
ಸ್ಥಳಕ್ಕೆ ಧಾವಿಸಿದ ಪೊಲೀಸರು ಪರಿಶೀಲನೆ ನಡೆಸಿದಾಗ, ವೆಂಕಣ್ಣ ಮದ್ಯದ ಅಮಲಿನಲ್ಲಿದ್ದಾನೆ ಎಂಬುದು ಪ್ರಾಥಮಿಕ ತನಿಖೆಯಲ್ಲಿ ಗೊತ್ತಾಗಿದೆ. ಬಳಿಕ ಆರೋಪಿಯನ್ನು ವಶಕ್ಕೆ ಪಡೆದು ಬಸ್ ಸಮೇತ ಜಂಗಾಂ ಪೊಲೀಸರಿಗೆ ಹಸ್ತಾಂತರಿಸಲಾಗಿದೆ.ಜಂಗಾಂ ವೃತ್ತ ನಿರೀಕ್ಷಕ ಸತ್ಯನಾರಾಯಣ ರೆಡ್ಡಿ ಮಾತನಾಡಿ, “ಬಾಡಿಗೆ ಆರ್ಟಿಸಿ ಬಸ್ ಮಾಲೀಕ ಗಾಂಟಾ ಗೋಪಿಕೃಷ್ಣ ರೆಡ್ಡಿ ನೀಡಿದ ದೂರಿನ ಆಧಾರದ ಮೇಲೆ ಪ್ರಕರಣ ದಾಖಲಿಸಲಾಗಿದೆ. ಆರೋಪಿ ಬಸ್ ಕದ್ದು ಓಡಿಸಿದ ಸಂಪೂರ್ಣ ಘಟನೆಯ ಕುರಿತು ತನಿಖೆ ಮುಂದುವರಿದಿದೆ,” ಎಂದು ತಿಳಿಸಿದ್ದಾರೆ.
