ವೆಸ್ಟ್ ಇಂಡೀಸ್ ವಿರುದ್ಧದ ಸರಣಿಯಲ್ಲಿ ‘ಪ್ಲೇಯರ್ ಆಫ್ ದಿ ಸಿರೀಸ್’ ಪ್ರಶಸ್ತಿ ಪಡೆಯುವ ಮೂಲಕ ಎಂ.ಎಸ್. ಧೋನಿ ಮತ್ತು ಸೌರವ್ ಗಂಗೂಲಿ ಅವರಂತಹ ದಿಗ್ಗಜರ ಸಾಲಿಗೆ ಶುಭಮನ್ ಗಿಲ್ ಸೇರ್ಪಡೆಗೊಂಡಿದ್ದಾರೆ.
ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಏಕದಿನ ಸರಣಿಯು ಭಾರತದ ಗೆಲುವಿನೊಂದಿಗೆ ಮುಕ್ತಾಯಗೊಂಡಿತು. ಈ ಸರಣಿಯಲ್ಲಿ ಭಾರತ ತಂಡವು ಮೊದಲ ಎರಡು ಪಂದ್ಯಗಳನ್ನು ಗೆದ್ದುಕೊಂಡರೆ, ವೆಸ್ಟ್ ಇಂಡೀಸ್ ಉತ್ತಮ ಪ್ರದರ್ಶನ ನೀಡಿದ ಮೂರನೇ ಪಂದ್ಯದಲ್ಲಿ ಭಾರತ ಸೋಲನ್ನು ಅನುಭವಿಸಿತು ಎಂಬುದು ಗಮನಾರ್ಹ.
ಸರಣಿ ಮುಕ್ತಾಯದ ನಂತರ, ಭಾರತದ ನಾಯಕ ಶುಭಮನ್ ಗಿಲ್ ಅವರನ್ನು ‘ಪ್ಲೇಯರ್ ಆಫ್ ದಿ ಸಿರೀಸ್’ (ಸರಣಿ ಶ್ರೇಷ್ಠ ಆಟಗಾರ) ಎಂದು ಘೋಷಿಸಲಾಯಿತು. ಈ ಸರಣಿಯಲ್ಲಿ ಗಿಲ್ ಅತ್ಯುತ್ತಮ ಪ್ರದರ್ಶನ ನೀಡಿದ್ದು, ಒಟ್ಟು 334 ರನ್ ಗಳಿಸಿದ್ದಾರೆ; ಇದರಲ್ಲಿ ಒಂದು ಶತಕ ಮತ್ತು ಒಂದು ದ್ವಿಶತಕವೂ ಸೇರಿದೆ.
‘ಪ್ಲೇಯರ್ ಆಫ್ ದಿ ಸಿರೀಸ್’ ಪ್ರಶಸ್ತಿಯನ್ನು ಗೆಲ್ಲುವ ಮೂಲಕ, ಗಿಲ್ ಅತಿ ಹೆಚ್ಚು ಏಕದಿನ ಸರಣಿ ಶ್ರೇಷ್ಠ ಪ್ರಶಸ್ತಿಗಳನ್ನು ಪಡೆದ ಭಾರತೀಯ ಆಟಗಾರರ ಪಟ್ಟಿಯಲ್ಲಿ ಎಂ.ಎಸ್. ಧೋನಿ ಮತ್ತು ಸೌರವ್ ಗಂಗೂಲಿ ಅವರಂತಹ ಆಟಗಾರರ ಸಾಲಿಗೆ ಸೇರಿದರು. 7 ಪ್ರಶಸ್ತಿಗಳೊಂದಿಗೆ ಗಿಲ್, ಧೋನಿ ಮತ್ತು ಗಂಗೂಲಿ ಅವರ ದಾಖಲೆಯನ್ನು ಸರಿಗಟ್ಟಿದರು.
ಅತಿ ಹೆಚ್ಚು ‘ಪ್ಲೇಯರ್ ಆಫ್ ದಿ ಸಿರೀಸ್’ ಪ್ರಶಸ್ತಿಗಳು (ಭಾರತ)
15 ಸಚಿನ್ ತೆಂಡೂಲ್ಕರ್
11 ವಿರಾಟ್ ಕೊಹ್ಲಿ
7 ಯುವರಾಜ್ ಸಿಂಗ್
7 ಸೌರವ್ ಗಂಗೂಲಿ
7 ಎಂ.ಎಸ್. ಧೋನಿ
7 ಶುಭಮನ್ ಗಿಲ್
ಮೂರನೇ ಏಕದಿನ ಪಂದ್ಯದ ನಂತರ ತಮ್ಮ ಪ್ರದರ್ಶನದ ಕುರಿತು ಗಿಲ್ ಮಾತು
ಏಕದಿನ ಸರಣಿ ಮುಕ್ತಾಯಗೊಂಡ ನಂತರ, ಶುಭಮನ್ ಗಿಲ್ ಸರಣಿಯಲ್ಲಿ ಭಾರತ ತಂಡದ ಪ್ರದರ್ಶನದ ಬಗ್ಗೆ ಮಾತನಾಡಿದರು. ಈ ಗೆಲುವಿನ ಮೂಲಕ ತಂಡವು ಹಲವು ಸಕಾರಾತ್ಮಕ ಅಂಶಗಳನ್ನು ಸಾಧಿಸಿದೆ ಎಂದು ಅವರು ಅಭಿಪ್ರಾಯಪಟ್ಟರು.
“ನಾವು ಹಲವು ಸಕಾರಾತ್ಮಕ ಅಂಶಗಳನ್ನು ಸಾಧಿಸಿದ್ದೇವೆ. ಆದರೂ, ಖಂಡಿತವಾಗಿಯೂ ಇನ್ನೂ ಕೆಲವು ವಿಷಯಗಳಲ್ಲಿ ಸೂಕ್ತ ಬದಲಾವಣೆಗಳು ಅಥವಾ ಸುಧಾರಣೆಗಳ ಅಗತ್ಯವಿದೆ ಎಂದು ನನಗೆ ಅನ್ನಿಸುತ್ತದೆ. ನಮ್ಮ ಒಟ್ಟಾರೆ ಮೊತ್ತದ ಬಗ್ಗೆ ನನಗೆ ತೃಪ್ತಿಯಿದೆ. ಪಂದ್ಯ ನಮ್ಮ ನಿಯಂತ್ರಣದಲ್ಲಿತ್ತು ಎಂದೇ ನಾನು ಭಾವಿಸುತ್ತೇನೆ. ಆದರೆ, ಇಬ್ಬನಿ (dew) ಇರುವಾಗ ನಾವು ನಾಲ್ಕು ಓವರ್‌ಗಳಷ್ಟು ಹಿಂದುಳಿದಿದ್ದು ಮತ್ತು ಅಂತಿಮ ಹಂತದಲ್ಲಿ ಎದುರಾಳಿಗಳು ಪಂದ್ಯವನ್ನು ನಮ್ಮ ಕೈಯಿಂದ ಕಸಿದುಕೊಂಡಿದ್ದು ನಿರ್ಣಾಯಕವಾಯಿತು ಎಂದರು.
ಒಂದು ವೇಳೆ ಓವರ್‌ಗಳ ಸಂಖ್ಯೆ ಕಡಿಮೆಯಾಗದಿದ್ದಿದ್ದರೆ, ಪಂದ್ಯವು ಕೊನೆಯ ಓವರ್‌ವರೆಗೂ ಸಾಗುವ ಸಾಧ್ಯತೆಯಿತ್ತು.(ಕುಲ್‌ದೀಪ್ ಯಾದವ್ ಅವರನ್ನು ಮೊದಲೇ ಬೌಲಿಂಗ್‌ಗೆ ತರುವ ಆಲೋಚನೆ ಇತ್ತೇ ಎಂಬ ಪ್ರಶ್ನೆಗೆ) ಇಲ್ಲ, ಅಂತಹ ಆಲೋಚನೆಯೇನೂ ಇರಲಿಲ್ಲ. ಸ್ನಾಯು ಸೆಳೆತದ (cramps) ಸಮಸ್ಯೆಯಿದ್ದ ಗುರ್ನೂರ್ ಮತ್ತೆ ಬೌಲಿಂಗ್ ಮಾಡಲು ಬರುತ್ತಾರೋ ಇಲ್ಲವೋ ಎಂಬುದು ನಮಗೆ ಖಚಿತವಿರಲಿಲ್ಲ. ಹಾಗಾಗಿ ಅಲ್ಲಿ ಸ್ವಲ್ಪ ಅನಿಶ್ಚಿತತೆ ಇತ್ತು. ಅಲ್ಲದೆ, ಪಂದ್ಯವು ಕೊನೆಯವರೆಗೂ ಸಾಗಲಿದೆ ಎಂಬುದು ನಮಗೆ ತಿಳಿದಿತ್ತು. ಕುಲ್‌ದೀಪ್ ವಿಕೆಟ್ ಪಡೆಯಬಲ್ಲ ಬೌಲರ್ ಆಗಿರುವುದರಿಂದ, ಅವರ ಎರಡು ಓವರ್‌ಗಳನ್ನು ಅಂತಿಮ ಹಂತಕ್ಕಾಗಿ ಉಳಿಸಿಕೊಳ್ಳಲು ನಾನು ಬಯಸಿದ್ದೆ ಎಂದು ಪಂದ್ಯದ ನಂತರದ ಸಮಾರಂಭದಲ್ಲಿ ಗಿಲ್ ಹೇಳಿದರು.
