ಖ್ಯಾತ ರಿಯಾಲಿಟಿ ಶೋ ‘ಲಾಕ್ ಅಪ್ ಸೀಸನ್ 2’ ಆರಂಭದಲ್ಲೇ ಭಾರೀ ಸದ್ದು ಮಾಡುತ್ತಿದ್ದು, ದಿನದಿಂದ ದಿನಕ್ಕೆ ಹೊಸ ತಿರುವುಗಳನ್ನು ಪಡೆದುಕೊಳ್ಳುತ್ತಿದೆ. ಇತ್ತೀಚೆಗಷ್ಟೇ ನಟಿ ಆಕಾಂಕ್ಷಾ ಚಮೋಲಾ ಅವರು ತಮ್ಮ ಪತಿ, ನಟ ಗೌರವ್ ಖನ್ನಾ ಅವರಿಂದ ವಿಚ್ಛೇದನ ಪಡೆಯುತ್ತಿರುವುದಾಗಿ ಘೋಷಿಸಿ ಸುದ್ದಿಯಾಗಿದ್ದರು. ಈ ಬೆನ್ನಲ್ಲೇ ಕಾರ್ಯಕ್ರಮದ ಮತ್ತೊಬ್ಬ ಸ್ಪರ್ಧಿ, ಸೋಶಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ ಶ್ರೇಯಾ ಕಲ್ರಾ ಅವರು ಆಕಾಂಕ್ಷಾ ಅವರ ವೈಯಕ್ತಿಕ ಜೀವನದ ಬಗ್ಗೆ ಸ್ಫೋಟಕ ಸತ್ಯವೊಂದನ್ನು ಬಹಿರಂಗಪಡಿಸಿದ್ದಾರೆ.
ಆಕಾಂಕ್ಷಾ ರಹಸ್ಯ ಬಯಲು ಮಾಡಿದ ಶ್ರೇಯಾ
ಕಾರ್ಯಕ್ರಮದ ನಿಯಮಾವಳಿಗಳ ಪ್ರಕಾರ ಆಕಾಂಕ್ಷಾ ಚಮೋಲಾ ಅವರು ಶ್ರೇಯಾ ಕಲ್ರಾ ವಿರುದ್ಧ ಚಾರ್ಜ್ ಶೀಟ್ ದಾಖಲಿಸಿದ್ದರು. ಇದರಿಂದ ಅಸಮಾಧಾನಗೊಂಡಿದ್ದ ಶ್ರೇಯಾ, ಆಕಾಂಕ್ಷಾ ತಮಗೆ ಖಾಸಗಿಯಾಗಿ ಹೇಳಿದ್ದ ರಹಸ್ಯವೊಂದನ್ನು ರಿವೀಲ್ ಮಾಡುವ ಮೂಲಕ ಸೇಡು ತೀರಿಸಿಕೊಂಡಿದ್ದಾರೆ. ಮತ್ತೊಬ್ಬ ಸ್ಪರ್ಧಿ ಸೂಫಿ ಮೋತಿವಾಲಾ ಅವರೊಂದಿಗೆ ಮಾತನಾಡುತ್ತಾ, ಈ ರಹಸ್ಯವನ್ನು ನಾನು ಹೊರಹಾಕಿದರೆ ಜನ ನನ್ನನ್ನು ಕೆಟ್ಟವಳು ಎಂದುಕೊಳ್ಳುತ್ತಾರಾ ಎಂದು ಶ್ರೇಯಾ ಕೇಳಿದ್ದಾರೆ. ಇದಕ್ಕೆ ಸೂಫಿ, ಇಲ್ಲ ಇದು ಆಟದ ಒಂದು ಭಾಗ ಎಂದು ಉತ್ತರಿಸಿದ್ದಾರೆ.
ಕೂಡಲೇ ಶ್ರೇಯಾ ಕಲ್ರಾ, ಆಕಾಂಕ್ಷಾ ಚಮೋಲಾ ಅವರು ಬೈಸೆಕ್ಷುವಲ್ (ಉಭಯಲಿಂಗಿ) ಎಂಬ ಶಾಕಿಂಗ್ ವಿಷಯವನ್ನು ಹಂಚಿಕೊಂಡಿದ್ದಾರೆ. ಈ ವೇಳೆ ಕ್ಯಾಮೆರಾ ತಕ್ಷಣ ಆಕಾಂಕ್ಷಾ ಅವರತ್ತ ಮುಖ ಮಾಡಿದೆ. ಇದನ್ನು ರಹಸ್ಯವಾಗಿಡೋಣ ಎಂದು ಸೂಫಿ ಸಲಹೆ ನೀಡಿದರೂ ಶ್ರೇಯಾ ಅದಕ್ಕೆ ಒಪ್ಪಲಿಲ್ಲ. ಆಕಾಂಕ್ಷಾ ತಮಗೆ ನಂಬಿಕೆಯಿಂದ ಹೇಳಿದ್ದ ರಹಸ್ಯ ಈಗ ಶೋನಲ್ಲಿ ಬಳಕೆಯಾಗಿದೆ. ಈ ಮೂಲಕ ಅವರ ಎರಡು ಲೈಫ್ ಲೈನ್‌ಗಳು ಮುಗಿದಿದ್ದು, ಈಗ ಕೇವಲ ಒಂದು ಮಾತ್ರ ಬಾಕಿ ಇದೆ ಎಂದು ಶ್ರೇಯಾ ಹೇಳಿದ್ದಾರೆ.
ಗೌರವ್ ಖನ್ನಾ ಜೊತೆಗಿನ ವಿಚ್ಛೇದನಕ್ಕೆ ಅಸಲಿ ಕಾರಣ ಬಿಚ್ಚಿಟ್ಟ ನಟಿ
‘ಲಾಕ್ ಅಪ್ 2’ ಕಾರ್ಯಕ್ರಮದ ಮೊದಲ ಸಂಚಿಕೆಯಲ್ಲೇ ಆಕಾಂಕ್ಷಾ ಅವರು ತಾವು ಮತ್ತು ಪತಿ ಗೌರವ್ ಖನ್ನಾ ಕಳೆದ ಒಂದು ವರ್ಷದಿಂದ ಪ್ರತ್ಯೇಕವಾಗಿ ವಾಸಿಸುತ್ತಿದ್ದು, ಸದ್ಯದಲ್ಲೇ ವಿಚ್ಛೇದನ ಪಡೆಯುತ್ತಿರುವುದಾಗಿ ತಿಳಿಸಿದ್ದರು. ಈ ರಹಸ್ಯದ ವಿನೂತನ ಪ್ರಕಟಣೆಯು ಕಾರ್ಯಕ್ರಮದ ನಿರೂಪಕರಾದ ಫರಾ ಖಾನ್ ಮತ್ತು ರಿತೇಶ್ ದೇಶ್ ಮುಖ್ ಸೇರಿದಂತೆ ವೀಕ್ಷಕರನ್ನು ದಿಗ್ಭ್ರಮೆಗೊಳಿಸಿತ್ತು.
ನಮ್ಮಿಬ್ಬರ ನಡುವೆ ಯಾವುದೇ ಕಹಿ ನೆನಪುಗಳಿಲ್ಲ ಮತ್ತು ನಾವು ಇಂದಿಗೂ ಮಾತನಾಡುತ್ತೇವೆ. ಆದರೆ ಭವಿಷ್ಯದ ಹಾದಿ ಬೇರೆಯಾಗಿರುವುದರಿಂದ ಜೊತೆಯಾಗಿ ಬಾಳಲು ಸಾಧ್ಯವಾಗುತ್ತಿಲ್ಲ ಎಂದು ಆಕಾಂಕ್ಷಾ ಸ್ಪಷ್ಟಪಡಿಸಿದ್ದರು. ತದನಂತರದ ಸಂಚಿಕೆಯಲ್ಲಿ ವಿಚ್ಛೇದನದ ಹಿಂದಿನ ಮುಖ್ಯ ಕಾರಣವನ್ನು ಅವರು ಹಂಚಿಕೊಂಡಿದ್ದಾರೆ. ಗೌರವ್ ಅವರಿಗೆ ಮಕ್ಕಳಾಗಬೇಕೆಂಬ ತೀವ್ರ ಆಸೆ ಇದೆ, ಆದರೆ ತಮಗೆ ತಾಯಿಯಾಗುವ ಯಾವುದೇ ಹಂಬಲ ಇಲ್ಲ ಎಂದು ಆಕಾಂಕ್ಷಾ ಮುಕ್ತವಾಗಿ ಹೇಳಿಕೊಂಡಿದ್ದಾರೆ.
ಮದುವೆಯಾದ ಹೊಸದರಲ್ಲೇ ನನಗೆ ತಾಯ್ತನದ ಭಾವನೆ ಇರಲಿಲ್ಲ. ಮುಂದೆ ಆ ಭಾವನೆ ಬರಬಹುದು ಎಂದು ಕಾಯ್ದೆ, ಆದರೆ ಅದು ಸಾಧ್ಯವಾಗಲಿಲ್ಲ. ಗೌರವ್ ಅವರಿಗೆ ಮಕ್ಕಳನ್ನು ಪಡೆದು ವಂಶ ಮುಂದುವರಿಸುವ ಆಸೆ ಇದೆ ಮತ್ತು ಅವರ ಜಾಗದಲ್ಲಿ ಅವರು ಸರಿಯಾಗಿದ್ದಾರೆ. ಕಳೆದ ವರ್ಷ ಬಿಗ್ ಬಾಸ್ ಕಾರ್ಯಕ್ರಮದ ಮೂಲಕ ಅವರ ಈ ಆಸೆ ನನಗೆ ಇನ್ನಷ್ಟು ಸ್ಪಷ್ಟವಾಯಿತು. ಅವರ ಆಸೆಗೆ ಅಡ್ಡಿಯಾಗಬಾರದು ಎಂಬ ಕಾರಣಕ್ಕೆ ಪರಸ್ಪರ ಒಪ್ಪಿಗೆಯಿಂದ ದೂರಾಗುತ್ತಿದ್ದೇವೆ ಎಂದು ಆಕಾಂಕ್ಷಾ ಚಮೋಲಾ ತಿಳಿಸಿದ್ದಾರೆ.
ನೆಟ್‌ಫ್ಲಿಕ್ಸ್‌ನಲ್ಲಿ ಪ್ರಸಾರವಾಗುತ್ತಿರುವ ಫರಾ ಖಾನ್ ಮತ್ತು ರಿತೇಶ್ ದೇಶ್‌ಮುಖ್ ಜೋಡಿ ನಿರೂಪಣೆಯ ‘ಲಾಕ್ ಅಪ್ 2’ ಸದ್ಯ ಕಿರುತೆರೆ ತಾರೆಯರು ಮತ್ತು ಸಾಮಾಜಿಕ ಜಾಲತಾಣದ ಸೆಲೆಬ್ರಿಟಿಗಳ ಉಪಸ್ಥಿತಿಯಿಂದಾಗಿ ಭಾರೀ ಕುತೂಹಲ ಮೂಡಿಸಿದೆ.
