ಪ್ರಸ್ತುತ ದಿನಗಳಲ್ಲಿ ಅನೇಕರು ಎದುರಿಸುತ್ತಿರುವ ಪ್ರಮುಖ ಆರೋಗ್ಯ ಸಮಸ್ಯೆಗಳಲ್ಲಿ ನಿದ್ರಾಹೀನತೆಯೂ ಒಂದು. ರಾತ್ರಿ ತಡವಾಗಿ ಮಲಗುವುದು, ನಿದ್ದೆಯ ನಡುವೆ ಪದೇ ಪದೇ ಮೆಚ್ಚಿಕೊಳ್ಳುವುದು, ಮತ್ತು ಬೆಳಿಗ್ಗೆ ಎದ್ದರೂ ಸುಸ್ತಾಗುವುದು ಈಗ ಸಾಮಾನ್ಯವಾಗಿದೆ.
ಇದಕ್ಕೆ ಒತ್ತಡ, ಕೆಲಸದೊತ್ತಡ ಅಥವಾ ಜೀವನಶೈಲಿಯೇ ಕಾರಣ ಎಂದು ಹಲವರು ಭಾವಿಸುತ್ತಾರೆ. ಆದರೆ, ದೇಹದಲ್ಲಿನ ಕೆಲವು ಪ್ರಮುಖ ವಿಟಮಿನ್ ಮತ್ತು ಖನಿಜಗಳ ಕೊರತೆಯೂ ನಿದ್ರೆಯ ಗುಣಮಟ್ಟದ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ.
ನಿದ್ರೆಯ ಮೇಲೆ ಪ್ರಭಾವ ಬೀರುವ ಪೋಷಕಾಂಶಗಳ ಕೊರತೆ:
- ವಿಟಮಿನ್ ಡಿ ಕೊರತೆ: ದೇಹದಲ್ಲಿ ವಿಟಮಿನ್ ಡಿ ಪ್ರಮಾಣ ಕಡಿಮೆಯಿದ್ದರೆ, ನಿದ್ರೆಯ ಅವಧಿ ಮತ್ತು ಗುಣಮಟ್ಟ ಎರಡೂ ಕುಸಿಯುತ್ತದೆ. ವಿಟಮಿನ್ ಡಿ ಕೊರತೆಯಿಂದ ಸುಸ್ತು, ದೌರ್ಬಲ್ಯ ಮತ್ತು ನಿದ್ರಾಹೀನತೆ ಉಂಟಾಗುತ್ತದೆ. ಮುಖ್ಯವಾಗಿ ಸೂರ್ಯನ ಬಿಸಿಲು ಕಡಿಮೆ ಪಡೆಯುವವರಲ್ಲಿ ಈ ಸಮಸ್ಯೆ ಹೆಚ್ಚಾಗಿರುತ್ತದೆ.
- ವಿಟಮಿನ್ ಬಿ12 ಮಹತ್ವ: ನರಮಂಡಲದ ಸರಿಯಾದ ಕಾರ್ಯನಿರ್ವಹಣೆಗೆ ವಿಟಮಿನ್ ಬಿ12 ಅತ್ಯಗತ್ಯ. ಈ ವಿಟಮಿನ್ ಕೊರತೆಯಾದಾಗ ನಿದ್ರೆಯ ಚಕ್ರವು ಹದಗೆಡಬಹುದು. ರಾತ್ರಿ ವೇಳೆ ಪದೇ ಪದೇ ಎಚ್ಚರವಾಗುವುದು, ನಿದ್ದೆ ಬಾರದಿರುವುದು ಮತ್ತು ಏಕಾಗ್ರತೆ ಕಳೆದುಕೊಳ್ಳುವುದು ಇದರ ಲಕ್ಷಣಗಳಾಗಿವೆ.
- ಮೆಗ್ನೀಸಿಯಮ್ ಕೊರತೆ: ದೇಹ ಮತ್ತು ಮನಸ್ಸನ್ನು ಶಾಂತವಾಗಿರಿಸುವಲ್ಲಿ ಮೆಗ್ನೀಸಿಯಮ್ ಪ್ರಮುಖ ಪಾತ್ರ ವಹಿಸುತ್ತದೆ. ಇದರ ಕೊರತೆಯಿಂದ ಒತ್ತಡ, ಆತಂಕ ಮತ್ತು ಸ್ನಾಯು ನೋವು ಹೆಚ್ಚಾಗಿ ನಿದ್ರೆಗೆ ತೊಂದರೆಯಾಗಬಹುದು. ಉತ್ತಮ ನಿದ್ದೆಗೆ ಮೆಗ್ನೀಸಿಯಮ್ ಮಟ್ಟ ಸರಿಯಾಗಿರುವುದು ಅಗತ್ಯ.
- ಕಬ್ಬಿಣಾಂಶದ (Iron) ಕೊರತೆ: ದೇಹದಾದ್ಯಂತ ಆಮ್ಲಜನಕವನ್ನು ಪೂರೈಸುವಲ್ಲಿ ಐರನ್ ಪ್ರಮುಖ ಪಾತ್ರ ವಹಿಸುತ್ತದೆ. ಐರನ್ ಕೊರತೆಯಿದ್ದರೆ ಸುಸ್ತು, ದೌರ್ಬಲ್ಯ ಮತ್ತು ಚಡಪಡಿಕೆ ಹೆಚ್ಚಾಗಿ ರಾತ್ರಿ ಶಾಂತಿಯುತವಾಗಿ ನಿದ್ದೆ ಬರುವುದಿಲ್ಲ. ಮಹಿಳೆಯರಲ್ಲಿ ಐರನ್ ಕೊರತೆ ಹೆಚ್ಚಾಗಿ ಕಂಡುಬರುತ್ತದೆ ಎಂದು ತಜ್ಞರು ತಿಳಿಸುತ್ತಾರೆ.
ಈ ಲಕ್ಷಣಗಳು ಕಂಡುಬರುತ್ತಿವೆಯೇ?
- ನಿರಂತರ ಸುಸ್ತು ಮತ್ತು ದೌರ್ಬಲ್ಯ.
- ಏಕಾಗ್ರತೆಯ ಕೊರತೆ.
- ಪದೇ ಪದೇ ತಲೆನೋವು.
- ಸ್ನಾಯು ನೋವು.
- ಮಾನಸಿಕ ಸ್ಥಿತಿಯಲ್ಲಿ ಬದಲಾವಣೆ.
- ಚಿಕ್ಕಪುಟ್ಟ ಕೆಲಸ ಮಾಡಿದರೂ ಸುಸ್ತಾಗುವುದು.
- ರಾತ್ರಿ ಸರಿಯಾಗಿ ನಿದ್ದೆ ಬಾರದಿರುವುದು.
ಈ ಲಕ್ಷಣಗಳು ದೀರ್ಘಕಾಲದವರೆಗೆ ಮುಂದುವರಿದರೆ, ವೈದ್ಯರನ್ನು ಸಂಪರ್ಕಿಸಿ ಅಗತ್ಯ ರಕ್ತ ಪರೀಕ್ಷೆಗಳನ್ನು ಮಾಡಿಸಿಕೊಳ್ಳುವುದು ಉತ್ತಮ.
ಉತ್ತಮ ನಿದ್ದೆಗಾಗಿ ಏನು ಮಾಡಬೇಕು? ಪ್ರತಿದಿನ ಒಂದೇ ಸಮಯಕ್ಕೆ ಮಲಗಿ, ಒಂದೇ ಸಮಯಕ್ಕೆ ಏಳುವ ಅಭ್ಯಾಸ ಮಾಡಿಕೊಳ್ಳಿ. ಮಲಗುವ ಮುನ್ನ ಮೊಬೈಲ್ ಫೋನ್, ಲ್ಯಾಪ್ಟಾಪ್ ಮುಂತಾದ ಡಿಜಿಟಲ್ ಸಾಧನಗಳ ಬಳಕೆಯನ್ನು ಕಡಿಮೆ ಮಾಡಿ. ಸಮತೋಲಿತ ಆಹಾರ ಸೇವನೆ, ಸಾಕಷ್ಟು ನೀರು ಕುಡಿಯುವುದು ಮತ್ತು ನಿಯಮಿತ ವ್ಯಾಯಾಮವು ನಿದ್ರೆಯ ಗುಣಮಟ್ಟವನ್ನು ಸುಧಾರಿಸುತ್ತದೆ. ಯೋಗ, ಧ್ಯಾನ ಮತ್ತು ಒತ್ತಡ ನಿರ್ವಹಣಾ ತಂತ್ರಗಳನ್ನು ಅನುಸರಿಸುವ ಮೂಲಕ ಪ್ರಶಾಂತವಾದ ನಿದ್ರೆಯನ್ನು ಪಡೆಯಬಹುದು.
