ಬೆಳಗಿನ ಉಪಾಹಾರಕ್ಕೆ ಅಥವಾ ಸಂಜೆಯ ಸ್ನಾಕ್ಸ್ ಸಮಯಕ್ಕೆ ಏನು ಮಾಡಬೇಕು ಎಂಬ ಗೊಂದಲ ಹಲವರಲ್ಲಿ ಇರುತ್ತದೆ. ದಿನನಿತ್ಯದ ಸಾಂಪ್ರದಾಯಿಕ ತಿಂಡಿಗಳನ್ನು ತಿಂದು ಬೇಸತ್ತಿರುವವರಿಗೆ ಚೀಸ್ ಕಾರ್ನ್ ಪರಾಠ ಅತ್ಯುತ್ತಮ ಆಯ್ಕೆಯಾಗಿದೆ. ಇದು ಉತ್ತರ ಭಾರತದ ಪ್ರಸಿದ್ಧ ಸ್ಟಫ್ಡ್ ಪರಾಠ ಶೈಲಿಗೆ ಆಧುನಿಕ ಸ್ಪರ್ಶ ನೀಡಿದಂತಿದ್ದು, ಸಣ್ಣವರಿಂದ ಹಿಡಿದು ದೊಡ್ಡವರವರೆಗೆ ಎಲ್ಲರಿಗೂ ಇಷ್ಟವಾಗುವಂತಹ ರುಚಿ ಹೊಂದಿದೆ. ಮೃದುವಾದ ಚೀಸ್ ಮತ್ತು ಸಿಹಿ ಜೋಳದ ಮಿಶ್ರಣವು ಈ ಪರಾಠದ ಸ್ವಾದವನ್ನು ಮತ್ತಷ್ಟು ಹೆಚ್ಚಿಸುತ್ತದೆ.
ವಿಶೇಷತೆ ಏನು? ಈ ಪರಾಠ ಕೇವಲ ರುಚಿಕರ ಮಾತ್ರವಲ್ಲದೆ ಆರೋಗ್ಯಕರವೂ ಹಾಗಿದೆ. ಇದರಲ್ಲಿ ಬಳಸಲಾಗುವ ಚೀಸ್ ಮತ್ತು ಜೋಳವು ಮಕ್ಕಳಿಗೆ ಇಷ್ಟವಾಗುವ ಕಾರಣ, ತರಕಾರಿ ತಿನ್ನಲು ಹಠ ಮಾಡುವ ಮಕ್ಕಳಿಗೆ ಇದನ್ನು ಸುಲಭವಾಗಿ ನೀಡಬಹುದು. ಇದು ತಿನ್ನಲು ಕ್ರಿಸ್ಪಿಯಾಗಿದ್ದು, ಒಳಗಿನ ಚೀಸ್ ಮೃದುವಾದ ಅನುಭವ ನೀಡುತ್ತದೆ. ಕನಿಷ್ಠ ಸಾಮಗ್ರಿಗಳನ್ನು ಬಳಸಿ ಅತಿ ಕಡಿಮೆ ಸಮಯದಲ್ಲಿ ಇದನ್ನು ತಯಾರಿಸಬಹುದಾಗಿದ್ದು, ದೀರ್ಘಕಾಲದವರೆಗೆ ಹೊಟ್ಟೆ ತುಂಬಿರುವಂತೆ ಮಾಡುತ್ತದೆ.
ಬೇಕಾಗುವ ಸಾಮಗ್ರಿಗಳು:
- ಗೋಧಿ ಹಿಟ್ಟು – ಎರಡು ಕಪ್
- ಬೇಯಿಸಿದ ಸಿಹಿ ಜೋಳ (ಸ್ವೀಟ್ ಕಾರ್ನ್) – ಒಂದು ಕಪ್
- ತುರಿದ ಚೀಸ್ – ಒಂದು ಕಪ್
- ಸಣ್ಣಗೆ ಹೆಚ್ಚಿದ ಈರುಳ್ಳಿ – ಒಂದು
- ಹಸಿಮೆಣಸಿನಕಾಯಿ – ಒಂದು
- ಚಿಲ್ಲಿ ಫ್ಲೇಕ್ಸ್ – ಒಂದು ಚಮಚ
- ಒರೆಗಾನೋ – ಒಂದು ಚಮಚ
- ಉಪ್ಪು – ರುಚಿಗೆ ತಕ್ಕಷ್ಟು
- ಬೆಣ್ಣೆ ಅಥವಾ ಎಣ್ಣೆ – ಬೇಯಿಸಲು
- ನೀರು – ಹಿಟ್ಟು ಕಲಸಲು
ತಯಾರಿಸುವ ಸರಳ ವಿಧಾನ:
ಮೊದಲಿಗೆ ಒಂದು ಪಾತ್ರೆಯಲ್ಲಿ ಗೋಧಿ ಹಿಟ್ಟು ಮತ್ತು ಸ್ವಲ್ಪ ಉಪ್ಪು ಸೇರಿಸಿ, ನೀರು ಹಾಕುತ್ತಾ ಮೃದುವಾಗಿ ಕಲಸಿಕೊಳ್ಳಿ. ಕಲಸಿದ ಹಿಟ್ಟನ್ನು ಸುಮಾರು ಹದಿನೈದು ನಿಮಿಷಗಳ ಕಾಲ ನೆನೆಯಲು ಬಿಡಿ.
ಮತ್ತೊಂದು ಪಾತ್ರೆಯಲ್ಲಿ ಬೇಯಿಸಿದ ಸಿಹಿ ಜೋಳ, ತುರಿದ ಚೀಸ್, ಹೆಚ್ಚಿದ ಈರುಳ್ಳಿ, ಹಸಿಮೆಣಸಿನಕಾಯಿ, ಚಿಲ್ಲಿ ಫ್ಲೇಕ್ಸ್, ಒರೆಗಾನೋ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ ಪರಾಠದ ಹೂರಣವನ್ನು ಸಿದ್ಧಪಡಿಸಿಕೊಳ್ಳಿ.
ಈಗ ಕಲಸಿದ ಹಿಟ್ಟಿನಿಂದ ಸಣ್ಣ ಉಂಡೆಯನ್ನು ತೆಗೆದುಕೊಂಡು ಲಘುವಾಗಿ ಲಟ್ಟಿಸಿ. ಅದರ ಮಧ್ಯದಲ್ಲಿ ಸಿದ್ಧಪಡಿಸಿದ ಚೀಸ್ ಮತ್ತು ಜೋಳದ ಹೂರಣವನ್ನು ಇಡಿ. ನಂತರ ಹಿಟ್ಟಿನ ಅಂಚುಗಳನ್ನು ಒಟ್ಟಿಗೆ ಸೇರಿಸಿ ಸರಿಯಾಗಿ ಮುಚ್ಚಿ. ಹೂರಣ ಹೊರಗೆ ಬಾರದಂತೆ ಜಾಗರೂಕತೆಯಿಂದ ಮಧ್ಯಮ ಗಾತ್ರದ ಪರಾಠವಾಗಿ ಲಟ್ಟಿಸಿಕೊಳ್ಳಿ.
ನಂತರ ಒಲೆಯ ಮೇಲೆ ಹಂಚನ್ನು ಕಾಯಿಸಲು ಇಟ್ಟು, ಲಟ್ಟಿಸಿದ ಪರಾಠವನ್ನು ಹಾಕಿ. ಎರಡು ಬದಿಗಳಿಗೂ ಬೆಣ್ಣೆ ಅಥವಾ ಎಣ್ಣೆಯನ್ನು ಸವರಿ, ಪರಾಠವು ಹೊಂಬಣ್ಣಕ್ಕೆ ಬಂದು ಗರಿಗರಿಯಾಗುವವರೆಗೆ ಮಧ್ಯಮ ಉರಿಯಲ್ಲಿ ಚೆನ್ನಾಗಿ ಬೇಯಿಸಿ.
ಈಗ ಬಿಸಿಬಿಸಿಯಾದ ರುಚಿಕರ ಚೀಸ್ ಕಾರ್ನ್ ಪರಾಠ ಸವಿಯಲು ಸಿದ್ಧ. ಇದನ್ನು ಮೊಸರು, ಹಸಿರು ಚಟ್ನಿ ಅಥವಾ ಟೊಮೆಟೊ ಕೆಚಪ್ ಜೊತೆ ಬಡಿಸಿದರೆ ತಿನ್ನಲು ಅತ್ಯಂತ ಅದ್ಭುತವಾಗಿರುತ್ತದೆ.
