ನ್ಯಾಷನಲ್ ಕ್ರಶ್ ರಶ್ಮಿಕಾ ಮಂದಣ್ಣ ಹಾಗೂ ಬಾಲಿವುಡ್ ಸ್ಟಾರ್ ಶಾಹಿದ್ ಕಪೂರ್ ಕಾಂಬಿನೇಷನ್‌ನ ಮುಂಬರುವ ‘ಕಾಕ್‌ಟೇಲ್ 2’ ಚಿತ್ರದ ಹೊಸ ರೊಮ್ಯಾಂಟಿಕ್ ಹಾಡು ‘ತುಜ್ಕೋ’ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸೌಂಡ್ ಮಾಡುತ್ತಿದೆ. ನಟಿ ರಶ್ಮಿಕಾ ಮಂದಣ್ಣ ಅವರು ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯಲ್ಲಿ ಈ ಹಾಡಿನ ಸಣ್ಣ ತುಣುಕೊಂದನ್ನು ಹಂಚಿಕೊಳ್ಳುವ ಮೂಲಕ ಅಭಿಮಾನಿಗಳಲ್ಲಿ ಕುತೂಹಲ ಹೆಚ್ಚಿಸಿದ್ದಾರೆ. ಕೇವಲ ಝಲಕ್ ಮೂಲಕವೇ ಈ ಹಾಡು ಮತ್ತು ಇಬ್ಬರ ನಡುವಿನ ರೊಮ್ಯಾಂಟಿಕ್ ಕೆಮಿಸ್ಟ್ರಿ ಪ್ರೇಕ್ಷಕರ ಮನಗೆದ್ದಿದೆ.
ಮನಸೂರೆಗೊಂಡ ‘ತುಜ್ಕೋ’ ಹಾಡು ಹಾಡಿನ ಸಣ್ಣ ಪ್ರೋಮೋ ಬಿಡುಗಡೆಯಾಗಿದ್ದರೂ, ಅದರಲ್ಲಿರುವ ಮೆಲೋಡಿ ಸಂಗೀತಕ್ಕೆ ನೆಟ್ಟಿಗರು ಫಿದಾ ಆಗಿದ್ದಾರೆ. ಹಿನ್ನೆಲೆಯಲ್ಲಿ ಕೇಳಿಬರುವ ಗಾಯಕ ಅರಿಜಿತ್ ಸಿಂಗ್ ಅವರ ಧ್ವನಿ ಹಾಗೂ ಶಾಹಿದ್-ರಶ್ಮಿಕಾ ಜೋಡಿಯ ಕ್ಯೂಟ್ ಮುಖಭಾವಗಳು ಹಾಡಿನ ಮೌಲ್ಯವನ್ನು ಹೆಚ್ಚಿಸಿವೆ. ಇಂಟರ್ನೆಟ್‌ನಲ್ಲಿ ಈ ವಿಡಿಯೋ ಕ್ಲಿಪ್ ವೈರಲ್ ಆಗುತ್ತಿದ್ದಂತೆ ಅಭಿಮಾನಿಗಳು ಕಮೆಂಟ್ಸ್ ಮೂಲಕ ಪ್ರೀತಿ ವ್ಯಕ್ತಪಡಿಸುತ್ತಿದ್ದಾರೆ. “ಈ ಹಾಡನ್ನು ಲೂಪ್‌ನಲ್ಲಿ ಕೇಳಬಹುದು” ಎಂದು ಒಬ್ಬರು ಬರೆದರೆ, ಮತ್ತೊಬ್ಬರು “ಶಾಹಿದ್ ಕಪೂರ್‌ಗೆ 45 ವರ್ಷ ಎಂದರೆ ನಂಬಲು ಸಾಧ್ಯವೇ ಇಲ್ಲ, ಅಷ್ಟು ಹ್ಯಾಂಡ್‌ಸಮ್ ಆಗಿ ಕಾಣುತ್ತಿದ್ದಾರೆ” ಎಂದು ಕೊಂಡಾಡಿದ್ದಾರೆ.
ಕುತೂಹಲ ಮೂಡಿಸಿದ ರಶ್ಮಿಕಾ ಮಾತು ಇತ್ತೀಚೆಗೆ ನಡೆದ ‘ಕಾಕ್‌ಟೇಲ್ 2’ ಚಿತ್ರದ ಕಾರ್ಯಕ್ರಮವೊಂದರ ವೋಟಿಂಗ್ ಪ್ರಕ್ರಿಯೆಯನ್ನು ರಶ್ಮಿಕಾ ಮಂದಣ್ಣ ಅವರು ತಮಾಷೆಯಾಗಿ ಕಾಲೆಳೆದಿದ್ದರು. ಅದರ ಬೆನ್ನಲ್ಲೇ ಈ ಹಾಡಿನ ತುಣುಕು ಹಂಚಿಕೊಂಡಿರುವ ಅವರು, “ತುಜ್ಕೋ ಹಾಡು ಬಿಡುಗಡೆಯಾಗುವವರೆಗೂ ನಿಮ್ಮ ತೀರ್ಪನ್ನು ಕಾಯ್ದಿರಿಸಿ” ಎಂದು ಪರೋಕ್ಷವಾಗಿ ಈ ಹಾಡಿನಲ್ಲಿ ದೊಡ್ಡ ಸರ್ಪ್ರೈಸ್ ಅಡಗಿದೆ ಎಂಬ ಸುಳಿವು ನೀಡಿದ್ದಾರೆ. ಇನ್ನು ಚಿತ್ರದ ಮತ್ತೊಂದು ಪಾರ್ಟಿ ಸಾಂಗ್ ‘ಮಶೂಕಾ’ ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದು, ಅದರಲ್ಲಿ ಕೃತಿ ಸನೂನ್ ಮತ್ತು ಶಾಹಿದ್ ಕಪೂರ್ ಜೋಡಿ ಧೂಳೆಬ್ಬಿಸಿತ್ತು. ಆದರೆ ಇವೆಲ್ಲದಕ್ಕಿಂತ ‘ತುಜ್ಕೋ’ ಹಾಡು ಇಡೀ ಆಲ್ಬಮ್‌ನಲ್ಲೇ ಅತ್ಯುತ್ತಮ ಸಾಂಗ್ ಆಗಲಿದೆ ಎಂದು ನೆಟ್ಟಿಗರು ಅಭಿಪ್ರಾಯಪಡುತ್ತಿದ್ದಾರೆ.
ಜೂನ್ 19ಕ್ಕೆ ಸಿನಿಮಾ ರಿಲೀಸ್ ಹೋಮಿ ಅದಾಜಾನಿಯಾ ನಿರ್ದೇಶನದ ‘ಕಾಕ್‌ಟೇಲ್ 2’ ಸಿನಿಮಾ ಜೂನ್ 19, 2026 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲು ಸಿದ್ಧವಾಗಿದೆ. ಇದು 2012 ರ ಸೂಪರ್ ಹಿಟ್ ಚಿತ್ರ ‘ಕಾಕ್‌ಟೇಲ್’ (ಸೈಫ್ ಅಲಿ ಖಾನ್, ದೀಪಿಕಾ ಪಡುಕೋಣೆ ಮತ್ತು ಡಯಾನಾ ಪೆಂಟಿ ನಟನೆಯ) ಸಿನಿಮಾದ ಸೀಕ್ವೆಲ್ ಆಗಿದೆ. ಲವ್ ರಂಜನ್ ಕಥೆ ಬರೆದಿರುವ ಈ ಚಿತ್ರವನ್ನು ಮ್ಯಾಡಾಕ್ ಫಿಲ್ಮ್ಸ್ ನಿರ್ಮಿಸಿದೆ. ಇಟಲಿಯ ಸಿಸಿಲಿ ಹಾಗೂ ದೆಹಲಿ, ಗುರುಗ್ರಾಮ್‌ನ ಸುಂದರ ತಾಣಗಳಲ್ಲಿ ಈ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ.
