ಇತ್ತೀಚಿನ ದಿನಗಳಲ್ಲಿ ಗ್ಯಾಸ್ ಸಿಲಿಂಡರ್ ಬುಕ್ ಮಾಡುವಾಗ ಗ್ರಾಹಕರು ಎದುರಿಸುತ್ತಿರುವ ಪ್ರಮುಖ ಸಮಸ್ಯೆಯೆಂದರೆ ಮೊಬೈಲ್‌ಗೆ ಒಟಿಪಿ (OTP) ಬಾರದಿರುವುದು ಅಥವಾ ತಡವಾಗಿ ಬರುವುದು. OTP ಇಲ್ಲದೆ ಬುಕಿಂಗ್ ಪ್ರಕ್ರಿಯೆ ಪೂರ್ಣಗೊಳ್ಳದ ಕಾರಣ ಇದು ಗ್ರಾಹಕರಲ್ಲಿ ಆತಂಕ ಮೂಡಿಸಿದೆ. ಆದರೆ, ಪ್ರತಿ ಬಾರಿ ಒಟಿಪಿ ಬಾರದಿರಲು ಗ್ಯಾಸ್ ಕಂಪನಿಯ ಸರ್ವರ್ ಮಾತ್ರ ಕಾರಣವಾಗಿರುವುದಿಲ್ಲ; ಕೆಲವು ಬಾರಿ ನಿಮ್ಮ ಫೋನ್‌ನಲ್ಲಿನ ಸೆಟ್ಟಿಂಗ್ಸ್ ಕೂಡ ಇದಕ್ಕೆ ಕಾರಣ ಇರಬಹುದು. ಹಾಗಾದರೆ ಈ ಒಟಿಪಿ ಸಮಸ್ಯೆಯನ್ನು ಸರಳವಾಗಿ ಹೇಗೆ ಪರಿಹರಿಸಿಕೊಳ್ಳಬಹುದು ಎಂಬ ಮಾಹಿತಿ ಇಲ್ಲಿದೆ.
1. ನೆಟ್‌ವರ್ಕ್ ಸಮಸ್ಯೆ (Network Issue): ಗ್ರಾಹಕರು ನೆಟ್‌ವರ್ಕ್ ಸಿಗ್ನಲ್ ಕಡಿಮೆ ಇರುವ ಪ್ರದೇಶದಲ್ಲಿದ್ದಾಗ ಅಥವಾ ಇಂಟರ್ನೆಟ್ ಸರಿಯಾಗಿ ಕೆಲಸ ಮಾಡದಿದ್ದಾಗ ಗ್ಯಾಸ್ ಕಂಪನಿ ಕಳುಹಿಸುವ OTP ತಡವಾಗಿ ಬರಬಹುದು ಅಥವಾ ಬರದೇ ಇರಬಹುದು. ವಿಶೇಷವಾಗಿ ರಶ್ ಇರುವ ಸಮಯದಲ್ಲಿ ಸರ್ವರ್ ಮತ್ತು ನೆಟ್‌ವರ್ಕ್ ವೇಗ ಎರಡೂ ಕಡಿಮೆಯಾಗುತ್ತವೆ. ನಿಮ್ಮ ಮೊಬೈಲ್‌ನಲ್ಲಿ ಸಿಗ್ನಲ್ ಸರಿಯಾಗಿದೆಯೇ ಎಂದು ಪರಿಶೀಲಿಸಿ. ಒಂದು ವೇಳೆ ಸಿಗ್ನಲ್ ಕಡಿಮೆ ಇದ್ದರೆ, ಫೋನ್ ಅನ್ನು ಒಮ್ಮೆ ‘ಏರ್‌ಪ್ಲೇನ್ ಮೋಡ್’ (Airplane Mode) ಆನ್ ಮಾಡಿ, ನಂತರ ಆಫ್ ಮಾಡಿ. ಹೀಗೆ ಮಾಡುವುದರಿಂದ ನೆಟ್‌ವರ್ಕ್ ರಿಫ್ರೆಶ್ ಆಗಿ ಸಿಗ್ನಲ್ ಸಿಗುತ್ತದೆ.
2. DND ಫೀಚರ್ ಆನ್ ಆಗಿರುವುದು (DND Feature On): ಸಾಕಷ್ಟು ಜನರ ಸ್ಮಾರ್ಟ್‌ಫೋನ್‌ಗಳಲ್ಲಿ ‘ಡು ನಾಟ್ ಡಿಸ್ಟರ್ಬ್’ (Do Not Disturb – DND) ಮೋಡ್ ಆನ್ ಆಗಿರುತ್ತದೆ. ಈ ಫೀಚರ್ ಫೋನ್‌ಗೆ ಬರುವ ಕರೆಗಳು, ಮೆಸೇಜ್‌ಗಳು ಮತ್ತು ನೋಟಿಫಿಕೇಶನ್‌ಗಳನ್ನು ತಡೆಯುತ್ತದೆ. ಇದರಿಂದಾಗಿ ಗ್ಯಾಸ್ ಬುಕಿಂಗ್ OTP ಮೆಸೇಜ್ ಕೂಡ ಬ್ಲಾಕ್ ಆಗುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ತಕ್ಷಣ ನಿಮ್ಮ ಫೋನ್ ಸೆಟ್ಟಿಂಗ್ಸ್‌ಗೆ ಹೋಗಿ DND ಫೀಚರ್ ಆನ್ ಆಗಿದೆಯೇ ಎಂದು ಪರಿಶೀಲಿಸಿ, ಆನ್ ಇದ್ದರೆ ಅದನ್ನು ತಕ್ಷಣ ಆಫ್ ಮಾಡಿ.
3. ಗ್ಯಾಸ್ ಕಂಪನಿ ಸರ್ವರ್ ಡೌನ್ (Gas Company Server Down): ಕೆಲವು ಬಾರಿ ಸಮಸ್ಯೆ ನಿಮ್ಮ ಫೋನ್‌ನಲ್ಲಿ ಇರದೆ ಗ್ಯಾಸ್ ಕಂಪನಿಯ ಸರ್ವರ್‌ನಲ್ಲಿ ಇರಬಹುದು. ಒಂದೇ ಸಮಯದಲ್ಲಿ ಸಾವಿರಾರು ಗ್ರಾಹಕರು ಸಿಲಿಂಡರ್ ಬುಕ್ ಮಾಡಲು ಪ್ರಯತ್ನಿಸಿದಾಗ, ತಾಂತ್ರಿಕ ಕಾರಣಗಳಿಂದ ಸರ್ವರ್ ಡೌನ್ ಆಗುತ್ತದೆ. ಇದರಿಂದಾಗಿ OTP ಕಳುಹಿಸುವ ಪ್ರಕ್ರಿಯೆ ಮಧ್ಯದಲ್ಲೇ ನಿಂತುಹೋಗುತ್ತದೆ. ಇದು ತಾಂತ್ರಿಕ ಸಮಸ್ಯೆಯಾಗಿರುವುದರಿಂದ, ಸ್ವಲ್ಪ ಸಮಯ ಕಾಯ್ದು ನಂತರ ಮತ್ತೊಮ್ಮೆ ಬುಕ್ ಮಾಡಲು ಪ್ರಯತ್ನಿಸುವುದು ಒಳ್ಳೆಯದು.
4. ಇನ್‌ಬಾಕ್ಸ್ ಫುಲ್ ಆಗಿರುವುದು (Inbox Full): ಫೋನ್‌ನಲ್ಲಿರುವ ಹಳೆಯ ಎಸ್‌ಎಂಎಸ್ (SMS) ಗಳನ್ನು ಕಾಲಕಾಲಕ್ಕೆ ಡಿಲೀಟ್ ಮಾಡದಿದ್ದರೆ ಇನ್‌ಬಾಕ್ಸ್ ಸಂಪೂರ್ಣವಾಗಿ ತುಂಬಿಹೋಗುತ್ತದೆ. ಇದರಿಂದ ಹೊಸದಾಗಿ ಬರುವ ಮೆಸೇಜ್‌ಗಳಿಗೆ ಜಾಗವಿಲ್ಲದೆ, ಗ್ಯಾಸ್ ಬುಕಿಂಗ್ ಒಟಿಪಿಗಳು ಫೋನ್‌ಗೆ ಬಂದು ತಲುಪುವುದಿಲ್ಲ. ನಿಮ್ಮ ಮೊಬೈಲ್ ಮೆಸೇಜ್ ಇನ್‌ಬಾಕ್ಸ್ ಪರಿಶೀಲಿಸಿ, ಅನಗತ್ಯ ಹಳೆಯ ಮೆಸೇಜ್‌ಗಳನ್ನು ಡಿಲೀಟ್ ಮಾಡಿ. ಇನ್‌ಬಾಕ್ಸ್ ಖಾಲಿಯಾದರೆ OTP ತಕ್ಷಣ ಬರುತ್ತದೆ.
5. ಸ್ಪ್ಯಾಮ್ ಫಿಲ್ಟರ್‌ನಲ್ಲಿ ಸಿಲುಕಿಕೊಳ್ಳುವುದು (Spam Filter): ಪ್ರಸ್ತುತ ಸ್ಮಾರ್ಟ್‌ಫೋನ್‌ಗಳಲ್ಲಿರುವ ಸ್ಪ್ಯಾಮ್ ಪ್ರೊಟೆಕ್ಷನ್ ಫೀಚರ್, ಕೆಲವು ಅಪರಿಚಿತ ನಂಬರ್‌ಗಳಿಂದ ಬರುವ ಮೆಸೇಜ್‌ಗಳನ್ನು ಆಟೋಮ್ಯಾಟಿಕ್ ಆಗಿ ‘ಸ್ಪ್ಯಾಮ್’ ಅಥವಾ ‘ಜಂಕ್’ ಫೋಲ್ಡರ್‌ಗೆ ಕಳುಹಿಸುತ್ತದೆ. ಪ್ರಮಾದವಶಾತ್ ಒಟಿಪಿ ಮೆಸೇಜ್ ಕೂಡ ಅದರಲ್ಲಿ ಹೋಗಿ ಬೀಳುವ ಸಾಧ್ಯತೆ ಇರುತ್ತದೆ. ಒಂದು ವೇಳೆ ಸಾಮಾನ್ಯ ಇನ್‌ಬಾಕ್ಸ್‌ಗೆ OTP ಬರದಿದ್ದರೆ, ಮೆಸೇಜ್ ಆ್ಯಪ್‌ನಲ್ಲಿರುವ ‘Spam or Blocked’ ಫೋಲ್ಡರ್ ಅನ್ನು ಒಮ್ಮೆ ಪರಿಶೀಲಿಸಿ.
