ಚೆನ್ನೈ: ತಮಿಳುನಾಡಿನ ನೂತನ ಮುಖ್ಯಮಂತ್ರಿ ಜೋಸೆಫ್ ವಿಜಯ್ ಮತ್ತು ಮಾಜಿ ಸಿಎಂ ಎಂ.ಕೆ. ಸ್ಟಾಲಿನ್ ನಡುವೆ ಈಗ ಸಾಲದ ಯುದ್ಧ ಶುರುವಾಗಿದೆ. ರಾಜ್ಯದ ಮೇಲೆ 10 ಲಕ್ಷ ಕೋಟಿ ರೂಪಾಯಿಗಳ ಭಾರಿ ಸಾಲದ ಹೊರೆ ಹೊರಿಸಲಾಗಿದೆ ಎಂದು ಸಿಎಂ ವಿಜಯ್ ಅಸಮಾಧಾನ ಹೊರಹಾಕಿದ್ದರೆ ಇದಕ್ಕೆ ಸ್ಟಾಲಿನ್ ತೀಕ್ಷ್ಣ ತಿರುಗೇಟು ನೀಡಿದ್ದಾರೆ.
ಸಿಎಂ ವಿಜಯ್ ಆರೋಪಕ್ಕೆ ಸ್ಟಾಲಿನ್ ಉತ್ತರವೇನು?
ತಮ್ಮ ಸರ್ಕಾರಕ್ಕೆ ಹಸ್ತಾಂತರವಾಗಿರುವ ಬೃಹತ್ ಸಾಲದ ಬಗ್ಗೆ ವಿಜಯ್ ಕಳವಳ ವ್ಯಕ್ತಪಡಿಸುತ್ತಿದ್ದಂತೆಯೇ ಪ್ರತಿಕ್ರಿಯಿಸಿರುವ ಎಂ.ಕೆ. ಸ್ಟಾಲಿನ್, ತಮಿಳುನಾಡು ಮಾಡಿರುವ ಸಾಲವು ಅದರ ಆರ್ಥಿಕ ಶಕ್ತಿಯ ಇತಿಮಿತಿಯಲ್ಲೇ ಇದೆ ಎಂದು ಸಮರ್ಥಿಸಿಕೊಂಡಿದ್ದಾರೆ. ಜಿಡಿಪಿಗೆ ಹೋಲಿಸಿದರೆ ಸಾಲದ ಪ್ರಮಾಣ ಅಪಾಯಕಾರಿ ಮಟ್ಟದಲ್ಲಿಲ್ಲ ಎಂಬುದು ಅವರ ವಾದ.
ಭಾರತದ ಅತಿಹೆಚ್ಚು ಸಾಲಗಾರ ರಾಜ್ಯಗಳು (ಏಪ್ರಿಲ್ 2026ರ ಅಂಕಿಅಂಶ):
ದೇಶದ ಆರ್ಥಿಕತೆಯಲ್ಲಿ ಪ್ರಮುಖ ಪಾತ್ರ ವಹಿಸುವ ರಾಜ್ಯಗಳೇ ಸಾಲದ ಪಟ್ಟಿಯಲ್ಲೂ ಮುಂಚೂಣಿಯಲ್ಲಿವೆ. ಆ ಪಟ್ಟಿ ಇಲ್ಲಿದೆ:
ತಮಿಳುನಾಡು: 9.6 ಲಕ್ಷ ಕೋಟಿ ರೂ.
ಉತ್ತರ ಪ್ರದೇಶ: 8.6 ಲಕ್ಷ ಕೋಟಿ ರೂ.
ಮಹಾರಾಷ್ಟ್ರ: 8.1 ಲಕ್ಷ ಕೋಟಿ ರೂ.
ಕರ್ನಾಟಕ: 7.3 ಲಕ್ಷ ಕೋಟಿ ರೂ.
ಪಶ್ಚಿಮ ಬಂಗಾಳ: 7.1 ಲಕ್ಷ ಕೋಟಿ ರೂ.
ರಾಜಸ್ಥಾನ: 6.4 ಲಕ್ಷ ಕೋಟಿ ರೂ.
ಆಂಧ್ರಪ್ರದೇಶ: 5.6 ಲಕ್ಷ ಕೋಟಿ ರೂ.
ಮಧ್ಯಪ್ರದೇಶ: 5.3 ಲಕ್ಷ ಕೋಟಿ ರೂ.
ಗುಜರಾತ್: 4.9 ಲಕ್ಷ ಕೋಟಿ ರೂ.
ಕೇರಳ: 4.7 ಲಕ್ಷ ಕೋಟಿ ರೂ.
ತಮಿಳುನಾಡಿನ ಸಾಲ ಏರಿಕೆ ಏಕೆ?
ತಮಿಳುನಾಡು ಇಷ್ಟೊಂದು ಭಾರಿ ಪ್ರಮಾಣದ ಸಾಲ ಹೊಂದಲು ರಾಜ್ಯದ ದೊಡ್ಡ ಮಟ್ಟದ ಜನಕಲ್ಯಾಣ ಯೋಜನೆಗಳು (Welfare Schemes) ಮತ್ತು ಮೂಲಸೌಕರ್ಯ ಅಭಿವೃದ್ಧಿ ಕಾಮಗಾರಿಗಳೇ ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗಿದೆ. ಅಂದಾಜಿನ ಪ್ರಕಾರ, ಮಾರ್ಚ್ 2027ರ ವೇಳೆಗೆ ತಮಿಳುನಾಡಿನ ಸಾಲದ ಮೊತ್ತ 10 ಲಕ್ಷ ಕೋಟಿ ರೂಪಾಯಿಗಳ ಗಡಿಯನ್ನು ದಾಟುವ ಸಾಧ್ಯತೆಯಿದೆ.
ತಜ್ಞರ ವಿಶ್ಲೇಷಣೆ ಏನು?
ಯಾರ ಸಾಲ ಅಪಾಯಕಾರಿ ಮಟ್ಟದಲ್ಲಿದೆ?
ಕೇವಲ ಸಾಲದ ಮೊತ್ತವನ್ನು ನೋಡಿ ರಾಜ್ಯದ ಆರ್ಥಿಕ ಸ್ಥಿತಿಯನ್ನು ಅಳೆಯಲಾಗುವುದಿಲ್ಲ. ಬದಲಾಗಿ, ರಾಜ್ಯದ ಒಟ್ಟು ಉತ್ಪಾದನೆಗೆ (GSDP) ಹೋಲಿಸಿದರೆ ಸಾಲ ಎಷ್ಟು ಶೇಕಡಾ ಇದೆ ಎಂಬುದು ಮುಖ್ಯವಾಗುತ್ತದೆ:
ಅಪಾಯದ ವಲಯ: ಪಶ್ಚಿಮ ಬಂಗಾಳ ಮತ್ತು ಕೇರಳ ರಾಜ್ಯಗಳು ಶೇ. 30ಕ್ಕಿಂತ ಹೆಚ್ಚು ಸಾಲದ ಅನುಪಾತ ಹೊಂದಿದ್ದು, ಇವು ಶಕ್ತಿಮೀರಿ ಸಾಲ ಮಾಡಿರುವ ರಾಜ್ಯಗಳಾಗಿವೆ. ಅರುಣಾಚಲ ಪ್ರದೇಶ, ಪಂಜಾಬ್ ಮತ್ತು ಬಿಹಾರ ಕೂಡ ಇದೇ ಪಟ್ಟಿಯಲ್ಲಿವೆ.
ಸುರಕ್ಷಿತ ವಲಯ: ಕರ್ನಾಟಕ, ಮಹಾರಾಷ್ಟ್ರ, ಉತ್ತರಪ್ರದೇಶ ಮತ್ತು ಒಡಿಶಾ ರಾಜ್ಯಗಳು ಉತ್ತಮ ಸಾಲ ಮತ್ತು ಜಿಡಿಪಿ ಅನುಪಾತವನ್ನು ಹೊಂದಿದ್ದು, ಆರ್ಥಿಕವಾಗಿ ತಹಬದಿಯಲ್ಲಿವೆ ಎಂದು ವರದಿಗಳು ತಿಳಿಸಿವೆ.
